PA Chitatu namulenji, Janyuwale 24, 2018, mbumba ya Beteli ku United States na Canada yikaŵa yakukondwa kupulika chipharazgo chakuti: Mubali Kenneth Cook, Jr., nayo sono wali mu Wupu Wakulongozga wa Ŵakaboni ŵa Yehova.

Mubali Cook wakababikira na kukulira ku Pennsylvania, U.S.A. Wakasambira unenesko kwa uyo wakasambiranga nayo sukulu, apo wakaŵa pafupi kumalizga masambiro gha sekondare, ndipo wakabatizika pa Juni 7, 1980. Wakamba upayiniya wanyengo zose pa Seputembala 1, 1982. Wati wachita upayiniya vyaka viŵiri, wakachemeka ku Beteli ndipo wakamba kuteŵetera pa Beteli ku Wallkill, New York, pa Okutobala 12, 1984.

Kwa vyaka 25, Mubali Cook wakachita mauteŵeti ghakupambanapambana ku Dipatimenti Yakusindikizga Mabuku na ku Ofesi Yakulaŵilira Mbumba ya Beteli. Wakatorana na muwoli wake, Jamie, mu 1996, ndipo nayo wakamba kuteŵetera pa Beteli ku Wallkill. Mu Disembala 2009, Mubali na Mudumbu Cook ŵakaŵatumizga ku Watchtower Educational Center ku Patterson, New York, uko Mubali Cook wakamba kuteŵetera mu Dipatimenti ya Kuzgora Mafumbo na Kulemba Makalata (Writing Correspondence). Mu Epulero 2016, ŵati ŵawelera ku Wallkill kwa kanyengo waka, Mubali na Mudumbu Cook ŵakaŵasamuskira ku Brooklyn, New York. Pati pajumpha myezi yinkhondi, ŵakasamuskikira ku likuru ku Warwick, New York. Mu Janyuwale 2017, Mubali Cook wakimikika kuŵa movwiri mu Dipatimenti Yakulemba ya Wupu Wakulongozga.