1-2. (a) Kasi mazgu agho ghali pa Yesaya 41:10 ghakawovwira wuli mudumbu Yoshiko? (b) Kasi Yehova wakazomerezga kuti mazgu agha ghasungikire anjani kuti ŵasange nagho chandulo?

MUDUMBU munyake wakugomezgeka zina lake Yoshiko wakaphalirika nkhani yachitima. Dokotala wake wakamuphalira kuti wakhala na myezi yichoko waka kuti wafwe. Kasi wakachita wuli? Yoshiko wakakumbuka lemba la mu Baibolo ilo wakalitemwanga chomene, la Yesaya 41:10. (Ŵazgani.) Pamanyuma wakaphalira dokotala wake uku mtima uli m’malo kuti wakawopanga yayi, chifukwa Yehova wakamukora pa woko. * Mazgu ghakupembuzga agho ghali mu vesi ili ghakawovwira mudumbu withu wakutemweka kuti wagomezgenge chomene Yehova. Nase lemba ili lingatovwira kuti tileke kufipa mtima chomene para takumana na viyezgo vikuru. Kuti timanye umo lingatovwilira, tiyeni tidumbiskane dankha chifukwa icho Chiuta wakaphalilira Yesaya mazgu agha.

² Pakwamba, Yehova wakakhuŵilizga Yesaya kuti walembe mazgu agha mwakuti ghapembuzge Ŵayuda awo ŵakaŵa pafupi kutolekera ku wuzga ku Babuloni. Kweni Yehova wakazomerezga kuti mazgu agha ghasungike kuti Ŵayuda pera ndiwo ŵasange nagho chandulo yayi, kweni ŵanthu ŵake wose kufuma nyengo yira m’paka sono. (Yes. 40:8; Rom. 15:4) Sono tili mu “nyengo zinonono na zakusuzga,” ndipo tikukhumbikwira mazgu ghakukhozga agho ghali mu buku la Yesaya kuluska kumanyuma kose.—2 Tim. 3:1.

3. (a) Ni malayizgo wuli agho ghali pa Yesaya 41:10, ilo ni lemba la chaka cha 2019? (b) Chifukwa wuli nase tikukhumbikwira nadi malayizgo agha?

³ Mu nkhani iyi, tidumbiskanenge chomene malayizgo ghatatu  ghakukhozga gha Yehova, agho ghali pa Yesaya 41:10: (1) Yehova waŵenge nase, (2) ni Chiuta withu, ndipo (3) watovwirenge. Tikukhumbikwira nadi malayizgo * agha chifukwa nase tikukumana na viyezgo nga ni Yoshiko. Kweniso tikukumana na masuzgo chifukwa cha vinthu viheni ivyo vikuchitika mu charu. Taŵanyake tikutambuzgika na maboma ghankhongono. Tiyeni tidumbiskane malayizgo ghatatu agha, lililose palekha.

4. (a) Kasi ni layizgo wuli lakwamba lakupembuzga ilo tidumbiskanenge? (Wonaniso mazgu ghamusi.) (b) Kasi Yehova wakulongora wuli kuti wakutitemwa? (c) Kasi mukujipulika wuli na mazgu gha Chiuta?

⁴ Chakwamba, Yehova wakutipembuzga na layizgo lakuti: “Ungawopanga yayi, pakuti nili nawe.” * Yehova wakulongora kuti wali nase pakutilongora chitemwa na kutipwelelera. Wonani umo wakulongolera kuti wakutitemwa chomene. Yehova wakuti: “Pakuti waŵa wakuzirwa mu maso ghane, ukachindikika, ndipo ine nakutemwa.” (Yes. 43:4) Palije chinthu chilichose icho chingapangiska Yehova kuleka kutemwa ŵateŵeti ŵake. Kugomezgeka kwake pa ise nkhwambura kusunkhunyika. (Yes. 54:10) Tikuŵa na chikanga pakuwona umo wakutitemwera kweniso chifukwa chakuti ni mubwezi withu. Wativikilirenge mazuŵa ghano nga umo wakachitira na mubwezi wake Abramu (Abrahamu). Yehova wakaphalira Abrahamu kuti: “Kopa chara Abramu. Ine ndine chiskango chako.”—Gen. 15:1.

5-6. (a) Tikumanya wuli kuti Yehova ngwakunweka kutovwira pa viyezgo ivyo tikukumana navyo? (b) Kasi tikusambirako vichi kwa Yoshiko?

⁵ Tikumanya kuti Yehova ngwakunweka kutovwira pa viyezgo ivyo tikukumana navyo chifukwa walayizga ŵanthu ŵake kuti: “Para ukwenda mu maji, niŵenge nawe, para ukwambuka milonga, yikubizgenge yayi. Para ukwenda pa moto, uphyenge chara, ndipo dimi la moto likuŵawurenge yayi.” (Yes. 43:2) Kasi mazgu agha ghakung’anamurachi?

⁶ Yehova wakulayizga kuti wawuskengepo masuzgo ghithu yayi, kweni wazomerezgenge yayi kuti masuzgo agho ghali nga ni “milonga” ghatibizge panji viyezgo ivyo vili nga ni “dimi la moto” vitipweteke na kulekerathu  kumuteŵetera. Iyo wakutisimikizgira kuti waŵenge nase, kutovwira ‘kwenda’ panji kuti kujumpha mu masuzgo agha. Kasi Yehova wachitenge vichi? Watovwirenge kuti tileke kopa mwakuti tilutilire kugomezgeka kwa iyo, nanga ni para nyifwa yanunkha. (Yes. 41:13) Yoshiko, uyo wazunulika kukwambilira, wakawona kuti fundo iyi njaunenesko. Mwana wake mwanakazi wakuti: “Tikazizwa chomene kuwona kuti Amama ŵakaŵavya wofi. Tikawona kuti Yehova wakaŵapa mtende wa mu mtima. M’paka zuŵa ilo ŵakafwira, Amama ŵakalutilira kuphalira ŵanesi na ŵalwari ŵanyawo za Yehova na ivyo walayizga.” Kasi tikusambirako vichi kwa Yoshiko? Apo tikukumana na viyezgo, nase tiŵenge na nkhongono ndiposo chikanga usange tikugomezga layizgo la Chiuta lakuti “Nili nawe.”

7-8. (a) Ni layizgo wuli lachiŵiri ilo tiwonenge, ndipo likung’anamura vichi? (b) Chifukwa wuli Yehova wakaphalira Ŵayuda awo ŵakaŵa ku wuzga kuti: “Ungenjerwanga chara”? (c) Ni mazgu wuli gha pa Yesaya 46:3, 4 agho ghakwenera kuti ghakakhozga ŵanthu ŵa Chiuta?

⁷ Wonani layizgo lachiŵiri ilo Yesaya wakalemba. Wakati: “Ungenjerwanga chara, pakuti ndine Chiuta wako.” Kasi mazgu ghakuyowoya za kwenjerwa agha ghakung’anamurachi? Mu viyowoyero ivyo Baibolo likalembekeramo, pa vesi ili mazgu ghakuti ‘kwenjerwa’ ghakung’anamura “kulaŵiska kumanyuma panji ku msana wako chifukwa cha kopa kuti kungiza chilwani panji mulwani uyo wangakupweteka.”

⁸ Chifukwa wuli Yehova wakaphalira Ŵayuda awo ŵakaŵa pafupi kutolekera ku wuzga ku Babuloni kuti “ungenjerwanga chara”? Chifukwa wakamanya kuti ŵanthu ŵa mu charu chira ŵamuŵa na wofi. Chifukwa wuli ŵamuŵa na wofi? Chakuumaliro kwa vyaka 70 ivyo Ŵayuda ŵakaŵira ku wuzga, Ŵababuloni ŵazamuwukirika na ŵasilikari ŵankhongono ŵa Mediya na Peresiya. Yehova wazamugwiliskira ntchito ŵasilikari aŵa kuti wafwature ŵanthu ŵake ku wuzga ku Babuloni. (Yes. 41:2-4) Ŵababuloni na ŵanthu ŵa mitundu yinyake ŵakati ŵamanya kuti ŵalwani ŵawo ŵasendelera, ŵakayezgayezga kulongora chikanga. Ŵakaphalirananga kuti: “Uŵe wankhongono.” Kweniso ŵakapanga vikozgo vinyake vinandi. Ŵakaghanaghananga kuti viŵavikilirenge. (Yes. 41:5-7) Panyengo iyi, Yehova wakakhozga Ŵayuda awo ŵakaŵa ku wuzga ku Babuloni. Wakaŵaphalira kuti: “Iwe Israyeli, [mwakupambana na ŵazengezgani ŵako] ndiwe muteŵeti wane, . . . Ungenjerwanga chara, pakuti ndine Chiuta wako.” (Yes. 41:8-10) Wonani kuti Yehova wakati: “Ndine Chiuta wako.” Yehova wakayowoya mazgu agha kuti wasimikizgire ŵateŵeti ŵake ŵakugomezgeka kuti ŵaleke kufipa mtima chifukwa wandaŵaluwe. Iyo wakaŵa kuti wachali Chiuta wawo, ndipo iwo ŵakaŵa kuti ŵachali ŵanthu ŵake. Wakaŵaphalira kuti: “Nimunyamuraninge, . . na kumuthaskani.” Tikukayika yayi kuti mazgu agha ghakaŵakhozga nadi Ŵayuda awo ŵakaŵa ku wuzga.—Ŵazgani Yesaya 46:3, 4.

9-10. Chifukwa wuli palije chifukwa chakopera? Yowoyani chiyelezgero.

⁹ Kuluska kumanyuma kose, ŵanthu sono ŵakwenjerwa chomene chifukwa vinthu pa charu vikuhenipirahenipira. Nase tikukhwaskika na masuzgo agha. Kweni palije chifukwa chakopera. Yehova wakutiphalira kuti: “Ndine Chiuta wako.” Chifukwa wuli mazgu agha ntchifukwa chankhongono chakulekera kufipa mtima?

¹⁰ Wonani chiyelezgero ichi: Jim na Ben ŵali mu ndege iyo yikwenda mwakusuzgikira chifukwa cha chimphepo chakofya. Apo chimphepo ichi chikututuzgira ndege pasi na muchanya, mazgu gha payiloti (uyo wakwendeska ndege) ghakupulikikwa mu masipika kuti: “Kakani malamba ghinu, tendenge mu chimphepo chakofya kwakanyengo.” Jim wakwamba kufipa mtima. Kweni pamanyuma, payiloti wakutiso: “Mungenjerwanga yayi. Ine nkhuyowoya ndine payiloti winu.” Panyengo iyi, Jim wakupukunya mutu  ndipo wakuti, “So ni mazgu wuli agha”? Kweni wakuwona kuti Ben wali phee, wakwenjerwa yayi. Jim wakumufumba kuti: “Chifukwa wuli ukopa yayi?” Ben wakumwemwetera na kuzgora kuti: “Chifukwa nkhumumanya makora payiloti uyu. Mbadada ŵane!” Pamanyuma Ben wakuti: “Leka nikuphalireko vya adada. Nkhugomezga kuti wofi wako umarenge para waŵamanya makora ndiposo luso ulo ŵali nalo pa nkhani ya kwendeska ndege.”

11. Kasi chiyelezgero cha Jim na Ben chikutisambizga vichi?

¹¹ Kasi chiyelezgero ichi chikutisambizga vichi? Nga ni Ben, nase tikopa yayi chifukwa tikuŵamanya makora Adada ŵithu ŵakuchanya, a Yehova. Tikumanya kuti ŵatilongozgenge kuti tijumphe mu masuzgo ghakuyana waka na chimphepo agho tingakumana nagho kuumaliro wa mgonezi uwu. (Yes. 35:4) Tikugomezga Yehova, ntheura apo ŵanthu wose mu charu ŵakukoleka na wofi, ise tikopa yayi. (Yes. 30:15) Kweniso tikuchita nga ni Ben. Tikuphalirako ŵazengezgani ŵithu vifukwa ivyo tikwenera kugomezgera Chiuta. Nawo ŵangaŵa na chigomezgo chose kuti nanga ŵangakumana na masuzgo wuli, Yehova waŵawovwirenge.

12. (a) Ni layizgo wuli lachitatu ilo tidumbiskanenge? (b) Kasi mazgu ghakuti “woko” la Yehova ghakutikumbuska vichi?

¹² Wonani layizgo lachitatu ilo Yesaya wakalemba, lakuti: “Nikukhozgenge, enya, nikovwirenge.” Yesaya wakaŵa kuti walongosora kale umo Yehova wakhozgerenge ŵanthu ŵake, wakati: ‘Yehova wizenge mu nkhongono, ndipo woko lake liwusenge m’malo mwa iyo.’ (Yes. 40:10) Mu Baibolo, kanandi “woko” likwimira nkhongono. Ntheura mazgu ghakuti “woko lake liwusenge” ghakutikumbuska kuti Yehova ni Fumu yankhongono. Kumanyuma, wakagwiliskira ntchito nkhongono zake zambura chigoti pakovwira na kuvikilira ŵateŵeti ŵake, ndipo mazuŵa ghano wakulutilira kukhozga  na kuvikilira awo ŵakumugomezga.—Doto. 1:30, 31; Yes. 43:10, mazgu ghamusi.

13. (a) Mphanyengo wuli apo Yehova wakusunga chomene layizgo lake lakuti watikhozgenge? (b) Ni mazgu wuli agho ghakutikhozga na kutovwira kuti tileke kopa?

¹³ Chomenechomene panyengo iyo ŵalwani ŵithu ŵakutitambuzga, Yehova wakusunga layizgo lake lakuti: “Nikukhozgenge.” Mu vyaru vinyake mazuŵa ghano, ŵalwani ŵithu ŵakuyezgayezga kuti ŵalekeske ntchito yithu yakupharazga panji kuti gulu lithu liŵe lakukanizgika. Nangauli vili nthena, tikufipa mtima yayi na ŵalwani aŵa. Yehova watiphalira mazgu agho ghakutovwira kuti tiŵe na nkhongono na kuleka kopa. Watilayizga kuti: “Palije chilwero icho chapangikira iwe icho chitondenge.” (Yes. 54:17) Mazgu agha ghakutikumbuska fundo zitatu zakuzirwa chomene.

14. Chifukwa wuli tikuzizwa yayi para ŵalwani ŵa Chiuta ŵakutiwukira?

¹⁴ Chakwamba, tikukhazga kuti titinkhikenge chifukwa tikulondezga Khristu. (Mat. 10:22) Yesu wakayowoyerathu kuti ŵasambiri ŵake ŵazamutambuzgika chomene mu mazuŵa ghaumaliro. (Mat. 24:9; Yoh. 15:20) Chachiŵiri, uchimi wa Yesaya ukatichenjezgerathu kuti ŵalwani ŵithu ŵazamutitinkha, kweniso ŵazamugwiliskira ntchito vilwero vyakupambanapambana kuti ŵatipweteke. Vinyake mwa vilwero ivi nkhutiyowoyera mautesi agho ghangawoneka nga mbunenesko, kutipusikizgira, na kutitambuzga. (Mat. 5:11) Yehova walekeskenge yayi ŵalwani ŵithu para ŵakugwiliskira ntchito vilwero ivi pakulimbana nase. (Efe. 6:12; Chivu. 12:17) Kweni tikwenera kopa yayi. Chifukwa wuli?

15-16. (a) Ni fundo wuli yachitatu iyo tikwenera kukumbuka, ndipo lemba la Yesaya 25:4, 5 likukhozgera wuli fundo iyi? (b) Kasi lemba la Yesaya 41:11, 12 likuti ntchivichi chichitikirenge awo ŵakulimbana nase?

¹⁵ Wonani fundo yachitatu iyo tikwenera kukumbuka. Yehova wayowoya kuti “palije chilwero” chakupangikira ise “icho chitondenge.” Nga umo linga likutivikililira ku chivula champhepo, Yehova nayo wakutivikilira ku “kupoma kwa ŵankhaza.” (Ŵazgani Yesaya 25:4, 5.)  Ŵalwani ŵithu ŵaluskenge yayi. Vyose ivyo ŵangachita ni vyakanyengo waka.—Yes. 65:17.

¹⁶ Kweniso, kuti Yehova watikhozge kuti timugomezgenge chomene, watilongosolera mwakupulikikwa makora ivyo vizamuchitikira wose awo ‘ŵakutikwiyira.’ (Ŵazgani Yesaya 41:11, 12.) Nanga ŵalwani ŵithu ŵangalimbana nase cham’tundu wuli, ndipo nanga nkhondo yinganunkha cham’tundu wuli, icho chichitikenge ntchimoza: Ŵalwani wose ŵa ŵanthu ŵa Chiuta “ŵamalenge na kuparanyika.”

17-18. (a) Kasi kuŵazga Baibolo kungatovwira wuli kuti tigomezgenge chomene Chiuta? Yowoyani chiyelezgero. (b) Kasi kughanaghanirapo pa lemba la chaka cha 2019 kutovwirenge wuli?

¹⁷ Tingamugomezga chomene Yehova usange tamumanya makora. Ndipo nthowa yekha iyo tingamumanyira makora Chiuta, nkhuŵazga Baibolo mwakupwelelera na kughanaghanirapo ivyo tikuŵazga. Mu Baibolo muli nkhani zakugomezgeka zakuyowoya umo Yehova wakavikililira ŵanthu ŵake kumanyuma. Nkhani izi zikutipa chigomezgo chose kuti sono napo wativikilirenge.

¹⁸ Wonani mazgu ghanyake ghakuyelezgera agho Yesaya wakayowoya kuti walongore umo Yehova wakutivikililira. Wakati Yehova ni muliska ndipo ŵateŵeti ŵake ni mberere. Pakuyowoya za Yehova, Yesaya wakati: “Na woko lake wawunganyenge pamoza twana twa mberere, ndipo watuyeghenge pa chifuŵa chake.” (Yes. 40:11) Para tikuwona kuti Yehova wativumbatira na woko lake lankhongono, tikujiwona kuti tili ŵakuvikilirika ndipo tikopa yayi. Kuti muzga wakugomezgeka na wavinjeru watovwire kuti tileke kufipa mtima nanga tingakumana na masuzgo wuli, wasankha lemba la Yesaya 41:10 kuŵa lemba la chaka cha 2019. Lemba ili likuti: “Ungenjerwanga chara, pakuti ndine Chiuta wako.” Ghanaghaniranipo pa mazgu ghakukhozga agha. Ghamukhozganinge apo mukukumana na masuzgo agho ghali kunthazi.