NKHANI YAKUSAMBIRA 1
Lutilirani Kukhala Mwakufwasa na Kugomezga Yehova
LEMBA LA CHAKA CHA 2021: “Musangenge nkhongono chifukwa cha kukhala mwakufwasa na kugomezga.”—YES. 30:15.
SUMU 3 Nkhongono na Chigomezgo Chithu
IVYO VILI MU NKHANI IYI *
1. Nga ni Themba Davide, kasi taŵanyake tingafumba kuti vichi?
TOSE tikukhumba kukhala mwakufwasa kweniso mwamtende. Palije uyo wangatemwa kuti wenjerwenge. Nangauli vili nthena, kweni nyengo zinyake tikwenjerwa. Nakuti ŵateŵeti ŵanyake ŵa Yehova ŵangafumba fumbo ilo Themba Davide likafumba Yehova kuti: “Kasi niŵenge wakwenjerwa, na wachitima mu mtima wane zuŵa lililose m’paka pawuli?”—Sal. 13:2.
2. Kasi tidumbiskanenge vichi mu nkhani iyi?
2 Nangauli nyengo zinyake tingenjerwa, kweni pali vinthu ivyo tingachita kuti tileke kwenjerwa chomene. Mu nkhani iyi, chakwamba tidumbiskanenge vinyake mwa vinthu ivyo vingapangiska kuti tenjerwenge. Pamanyuma tidumbiskanenge vinthu 6 ivyo vingatovwira kuti tilutilire kukhala mwakufwasa para tasangana na masuzgo.
KASI NI VICHI VINGAPANGISKA KUTI TENJERWENGE?
3. Kasi ni vinthu wuli ivyo vingatipangiska kuti tenjerwenge, ndipo kasi tingavitondeska vinthu ivi?
3 Pali vinthu vinandi ivyo vingatipangiska kuti tenjerwenge, ndipo vinyake mwa vinthu ivi tingavitondeska yayi kuti vileke kuchitika. Mwachiyelezgero, tingatondeska yayi kuti mtengo wa chakurya, malaya panji nyumba uleke kukwera chaka chilichose. Kweniso tingatondeska yayi viyezgo ivyo awo tikugwira nawo ntchito panji awo tikusambira nawo sukulu ŵangatiyezga navyo kuti tileke kugomezgeka. Ndipo tingaŵalekeska yayi ŵanthu mu chigaŵa chithu kuti ŵaleke kuchita viheni. Tikusangana na masuzgo ghose agha chifukwa chakuti tikukhala mu charu icho ŵanthu ŵanandi ŵakulondezga yayi fundo za mu Baibolo. Kweniso Satana, chiuta wa charu ichi, wakumanya kuti ŵanthu ŵanyake ŵangaleka kuteŵetera Yehova chifukwa cha “vyenjezgo vya nyengo yino.” (Mat. 13:22; 1 Yoh. 5:19) Lekani tikuzizwa yayi kuti charu ntchakuzura na masuzgo agho ghakupangiska ŵanthu kuti ŵenjerwenge chomene.
4. Kasi chingachitika ntchivichi para tikwenjerwa chomene na masuzgo ghithu?
4 Nyengo zinyake tingenjerwa chomene na masuzgo agho takumana nagho mwakuti tingatondeka kughanaghaniraso vinthu vinyake. Mwachiyelezgero, tingenjerwa kuti tisangenge ndalama zakukwana yayi zakuti tigure vyakukhumbikwa pa umoyo withu, kweniso tingenjerwa kuti tilwarenge ndipo tikwaniskenge yayi kuluta ku ntchito ndipo panji ntchito yithu yingatimalira. Tingenjerwaso kuti panji tizamugomezgeka yayi para tayezgeka kuti tiswe dango la Chiuta. Sonosono apa, Satana wazamupangiska ŵanthu ŵake kuti ŵawukire ŵanthu ŵa Chiuta, ntheura nyengo zinyake tingenjerwa kuti tizamuchita wuli para ŵanthu aŵa ŵazakatiwukira. Kweni nyengo zinyake tingajifumbaso kuti, ‘Kasi ntchakwenelera kuti nenjerwenge na vinthu ivi?
5. Kasi Yesu wakang’anamuranga vichi apo wakayowoya kuti: “Lekani kwenjerwa”?
5 Yesu wakaphalira ŵalondezgi ŵake kuti: “Lekani kwenjerwa.” (Mat. 6:25) Kasi apa Yesu wakang’anamuranga kuti tingenjerwanga na pachoko wuwo yayi? Yayi. Kumbukani kuti mu nyengo yakale ŵateŵeti ŵanyake ŵakugomezgeka ŵa Yehova nawo ŵakenjerwanga, kweni nipera Yehova wakalutilira kukondwa nawo. * (1 Mathe. 19:4; Sal. 6:3) Apa Yesu wakatipembuzganga waka. Iyo wakukhumba yayi kuti tenjerwenge chomene na umo tingasangira vinthu m’malo mwakuwona kuti kuteŵetera Yehova ndiko nkhwakuzirwa chomene pa umoyo withu. Ipo kasi tingachita wuli para tamba kwenjerwa?—Wonani bokosi lakuti “Umo Mungachitira.”
VINTHU 6 IVYO VINGATOVWIRA KUTI TIKHALENGE MWAKUFWASA
Wonani ndime 6 *
6. Kuyana na Ŵafilipi 4:6, 7, ntchivichi chingatovwira kuti tileke kwenjerwa chomene?
6 (1) Mulombenge nyengo zose. Para mukwenjerwa chifukwa cha masuzgo ghinu, lombani Yehova kuti wamovwirani. (1 Pet. 5:7) Wangazgora malurombo ghinu mwa kumupani “mtende wa Chiuta uwo ukuluska maghanoghano ghose.” (Ŵazgani Ŵafilipi 4:6, 7.) Ndipo Yehova watipenge mtende uwu kwizira mwa mzimu wake utuŵa.—Gal. 5:22.
7. Kasi tikwenera kukumbuka vichi para tikulomba kwa Chiuta?
7 Para mukulomba kwa Yehova, fwatukani na kumuphalira vyose ivyo mukwenjerwa navyo. Muphalirani suzgo linu ndipo mulongosolerani umo mukujipulikira. Usange mukuwona kuti pali nthowa yakuti mungamazgira suzgo linu, lombani vinjeru kwa iyo kuti musange nthowa iyo kweniso nkhongono kuti mukwaniske ivyo mukukhumba kuchita. Kweni usange suzgo linu ndakuti palije icho mungachitapo, lombani Yehova kuti wamovwirani kuti muleke kwenjerwa chomene. Usange mukulomba mwakudunjika, para pajumpha nyengo muwonenge nadi umo Yehova wazgolera malurombo ghinu. Para pajumpha nyengo yitali kweni lurombo lwinu lundazgoreke, kuleka yayi kulomba. Yehova wakukhumba kuti mumulombenge mwakudunjika kweniso mulutilire kulomba kwa iyo.—Luka 11:8-10.
8. Kasi ntchivichi icho tikwenera yayi kuluwa mu malurombo ghithu?
8 Apo Yehova mukumuthulira vyose ivyo mukwenjerwa navyo, kuluwa yayi kumuwonga. Ntchakuzirwa chomene kuti tighanaghanirenge vinthu viwemi ivyo tili navyo nanga tingaŵa kuti tili na masuzgo ghanandi. Kweni kasi mukwenera kuchita wuli para mukumanya yayi umo mungamuphalilira Yehova umo mukujipulikira? Kumbukani kuti Yehova wakuzgora lurombo nanga mungayowoya waka kuti ‘Chonde novwirani.’—2 Mid. 18:31; Rom. 8:26.
Wonani ndime 9 *
9. Kasi tikwenera kuchita wuli para tikopa?
9 (2) Mugomezgenge vinjeru vya Yehova, vinu yayi. Mu nyengo ya ntchimi Yesaya, ŵanthu ŵa ku Yuda ŵakawopanga chomene kuti ŵawukilikenge na Ŵaasiriya. Chifukwa cha kopa kuti Ŵaasiriya ŵangaŵathereska, iwo ŵakapempha Ŵaeguputo kuti ŵaŵawovwire. (Yes. 30:1, 2) Kweni Yehova wakaŵachenjezga kuti kugomezga Ŵaeguputo kuŵanjizgenge mu masuzgo. (Yes. 30:7, 12, 13) Kwizira mwa Yesaya, Yehova wakaphalira ŵanthu umo ŵangaŵira ŵakuvikilirika zanadi. Wakati: “Musangenge nkhongono chifukwa cha kukhala mwakufwasa na kugomezga” Yehova.—Yes. 30:15b.
10. Kasi mpha vyakuchitika wuli vinyake apo tingalongora kuti tikugomezga Yehova?
10 Kasi mphawuli apo tingalongora kuti tikugomezga Yehova? Wonani viyelezgero vyakulondezgapo ivi. Tiyelezgere kuti mwapika ntchito iyo mupokerenge ndalama zinandi, kweni yikukhumbikwa kuti mugwirenge maora ghanandi, ndipo yimutondeskaninge kuti muteŵeterenge Yehova mwakukwana. Panji tiyelezgere kuti munthu munyake ku ntchito kwinu wakulongora kuti wakumukhumbani, kweni ngwambura kubatizika. Panji kasi mungachita wuli para mubali winu wayowoya kuti ubali umalenge para mukulutilira kuŵa Kaboni wa Yehova? Mu viyelezgero vyose ivi, mungawona kuti ntchakusuzga kusankha chakuchita kweni Yehova wamupaninge ulongozgi uwo mukukhumbikwira. (Mat. 6:33; 10:37; 1 Kor. 7:39) Kweni fumbo ndakuti, Kasi mumugomezgenge Yehova na kulondezga ulongozgi wake?
Wonani ndime 11 *
11. Kasi ni nkhani wuli za mu Baibolo izo tingasambira kuti tilutilire kukhala mwakufwasa para ŵanji ŵakutisuska?
11 (3) Sambiraniko ku awo ŵakachita makora vinthu na awo ŵakatondeka kuchita makora. Mu Baibolo muli nkhani zinandi izo zikulongora kuti ntchakuzirwa chomene kulutilira kukhala mwakufwasa na kugomezga Yehova. Apo mukusambira nkhani izi, ghanaghanirani ivyo vikawovwira ŵateŵeti ŵa Chiuta kulutilira kukhala mwakufwasa apo ŵakasuskikanga chomene. Mwachiyelezgero, apo khoti likuru la Ŵayuda likaphalira ŵapositole kuti ŵaleke kupharazga, iwo ŵakawopa yayi. M’malo mwake ŵakayowoya mwachikanga kuti: “Tikwenera kupulikira Chiuta nga muwusi m’malo mwa ŵanthu.” (Mil. 5:29) Nanga ni apo ŵakathyapulika, ŵapositole ŵakenjerwapo yayi. Chifukwa wuli? Chifukwa ŵakamanyanga kuti Yehova wakaŵa nawo kweniso wakakondwanga nawo. Lekani ŵakalutilira kupharazga makani ghawemi. (Mil. 5:40-42) Mwakuyana waka, apo msambiri Stefano wakaŵa pafupi kukomeka, wakalutilira kuŵa na mtende mwakuti chisko chake chikaŵa “nga ntchisko cha mungelo.” (Mil. 6:12-15) Chifukwa wuli? Chifukwa wakamanyanga kuti Yehova wakakondwanga nayo.
12. Kuyana na 1 Petrosi 3:14 na 4:14, chifukwa wuli tikwenera kuŵa ŵakukondwa nanga tingatambuzgika?
12 Ŵapositole ŵakaŵa na ukaboni wakuwonekerathu kuti Yehova wakaŵa nawo. Wakaŵapa nkhongono zakuchitira minthondwe. (Mil. 5:12-16; 6:8) Mazuŵa ghano Yehova wakutipa nkhongono zakuchitira minthondwe yayi. Nangauli vili nthena, kweni kwizira mu Mazgu ghake, Yehova wakutisimikizgira kuti para tikutambuzgika chifukwa cha urunji, wakukondwa nase ndipo mzimu wake ukuŵa nase. (Ŵazgani 1 Petrosi 3:14; 4:14.) Ntheura m’malo mwakwenjerwa na umo tizamuchitira para tamba kutambuzgika, tikwenera kuchita vyose ivyo tingafiska kuti tikhozge chomene chigomezgo chithu chakuti Yehova wazamutovwira na kutiponoska. Nga umo ŵakachitira ŵasambiri mu nyengo yakale, tikwenera kugomezga layizgo la Yesu lakuti: “Nizamumupani mazgu na vinjeru, ndipo wose awo ŵakumususkani ŵazamutondeka kulimbana navyo panji kuvisuska.” Yesu wakalayizgaso kuti: “Para muzamuzizipizga, muzamusungilira umoyo winu.” (Luka 21:12-19) Ndipo kuluwa yayi kuti Yehova wakukumbukira nanga tungaŵa tunthu tuchokotuchoko uto ŵateŵeti ŵake ŵakugomezgeka awo ŵali kufwa ŵakachitanga. Pakuti wakuŵamanya, iyo wazamuŵawuska.
13. Kasi pali ma uwemi uli para tikusambira za ŵanthu awo ŵakatondeka kulutilira kukhala mwakufwasa na kugomezga Yehova?
13 Tingasambirakoso ku ŵanthu awo ŵakatondeka kulutilira kukhala mwakufwasa na kugomezga Yehova. Kusambira vya ŵanthu aŵa kutovwirenge kuti tileke kuchita ivyo iwo ŵakachita. Mwachiyelezgero, kukwambilira kwa muwuso wake, Asa themba la Yuda, wakagomezga Yehova apo ŵankhondo ŵanandi ŵakamuwukira. Yehova wakamovwira ndipo wakaŵatonda ŵalwani ŵake. (2 Mid. 14:9-12) Kweni pamanyuma, apo kagulu kachoko waka ka ŵasilikari ŵa Basha themba la Israyeli kakamuwukira, Asa wakagomezga Yehova yayi kuti wamuponoske nga umo wakachitira kumanyuma. M’malo mwake, wakahonga Ŵaasiriya kuti ŵamovwire. (2 Mid. 16:1-3) Ndipo apo wakalwara chomene, wakagomezgaso Yehova yayi kuti wamovwire.—2 Mid. 16:12.
14. Kasi tingasambirako vichi ku ivyo Asa wakanangiska?
14 Pakwamba Asa wakagomezganga Yehova para wasangana na masuzgo. Kweni pamanyuma, wakaleka kugomezga Chiuta kuti wamovwire ndipo wakakhumbanga kumazga yekha masuzgo agho wakasangana nagho. Pulani ya Asa yakugomezga Ŵaasiriya kuti ŵamovwire pakwamba yikawonekanga nga njiwemi waka. Kweni Ŵayuda ŵakakhala nyengo yitali yayi pa mtende. Yehova wakamuphalira kwizira mwa ntchimi kuti: “Pakuti wagomezga themba la Siriya ndipo ukagomezga Yehova Chiuta wako chara, ŵankhondo ŵa themba la Siriya ŵafwanthamuka mu woko lako.” (2 Mid. 16:7) Tikwenera kuŵa maso kuti tileke kughanaghana kuti tingamazga masuzgo ghithu patekha kwambura ulongozgi wa Yehova uwo uli mu Mazgu ghake. Nanga pangaŵa panyengo yakuti tikukhumbikwa kusankha vinthu mwaluŵiro, tikwenera kuzikira na kugomezga Yehova, ndipo iyo watovwirenge.
Wonani ndime 15 *
15. Kasi tikwenera kuchita vichi para tikuŵazga Baibolo?
15 (4) Sungani pamtima mavesi gha mu Baibolo. Para mukuŵazga mavesi gha mu Baibolo agho ghakulongora kuzirwa kwa kufwasa na kugomezga Yehova, yezgani kusungilira mavesi agha. Kuti mughasunge pamtima, mungachita makora kughaŵazga mwakukwezga panji kughalemba pamphepete kuti mughaŵazgenge pafupipafupi. Yehova wakaphalira Joshuwa kuti nyengo zose waŵazgenge buku la Dango kuti wachitenge vinthu mwavinjeru. Ivyo wakaŵazganga mu buku la Dango vikamovwira kuti waleke kopa kweniso kuti waŵe na chikanga kulongozga ŵanthu ŵa Chiuta. (Josh. 1:8, 9) Mavesi ghanandi mu Baibolo ghangamovwirani kuti mukhale mwakufwasa para mwakumana na masuzgo agho ghangamupangiskani kuti mwenjerwenge panji kopa.—Sal. 27:1-3; Zinth. 3:25, 26.
Wonani ndime 16 *
16. Kasi Yehova wakugwiliskira wuli ntchito mpingo kutovwira kulutilira kukhala mwakufwasa na kumugomezga?
16 Muchezgenge na ŵanthu ŵa Chiuta. Yehova wakugwiliskira ntchito ŵabali na ŵadumbu kutovwira kuti tilutilire kukhala mwakufwasa na kumugomezga. Pa maungano tikusanga chandulo na nkhani zachisanisani, mazgoro gha ŵabali na ŵadumbu kweniso vinthu vyakukhozga ivyo ŵabali na ŵadumbu aŵa ŵakutiphalira. (Heb. 10:24, 25) Kweniso tingakhozgeka chomene para tikuphalirako ŵabwezi ŵithu ŵakugomezgeka mu mpingo vinthu ivyo tikufipa navyo mtima. “Mazgu ghawemi” ghakufuma kwa mubwezi ghangatovwira kuti tileke kwenjerwa chomene.—Zinth. 12:25.
Wonani ndime 17 *
17. Kuyana na Ŵahebere 6:19, kasi chigomezgo chithu cha Ufumu chikutovwira wuli kulutilira kukhala mwakufwasa pa nyengo ya masuzgo?
17 (6) Lutilirani kukhozga chigomezgo chinu. Chigomezgo chithu cha Ufumu chili nga ni “nyanguru wa umoyo,” chikutovwira kuti tichitenge vinthu mwakwenelera nangauli tikusangana na masuzgo kweniso tikwenjerwa. (Ŵazgani Ŵahebere 6:19.) Ghanaghanirani ivyo Yehova watilayizga munthazi. Pa nyengo iyo, tizamwenjerwaso yayi. (Yes. 65:17) Ntheura jiwonani kuti muli mu charu chiphya cha mtende umo vinthu viheni vikuchitikaso yayi. (Mika 4:4) Mukhozgengeso chomene chigomezgo chinu para mukuphalirako ŵanji za charu chiphya. Chitani vyose ivyo mungafiska pa mulimo wakupharazga na kuzgora ŵanthu kuŵa ŵasambiri. Para muchitenge nthena, muŵenge “ŵakukhorwa chomene na chigomezgo chinu m’paka paumaliro.”—Heb. 6:11.
18. Kasi munthazi umu tisanganenge na vichi, ndipo tikwenera kuchita vichi sono?
18 Apo umaliro wa charu ichi uli pafupi, tisanganenge na masuzgo ghanandi agho ghapangiskenge kuti tenjerwenge. Kweni lemba la chaka cha 2021 lingatovwira kuti tilutilire kukhala mwakufwasa apo tikukumana na masuzgo agha. Tichitenge nthena chifukwa cha nkhongono zithu yayi, kweni chifukwa cha kugomezga Yehova. Ntheura chaka ichi, tiyeni tilongore mu vyakuchita vithu kuti tikugomezga layizgo la Yehova lakuti: “Musangenge nkhongono chifukwa cha kukhala mwakufwasa na kugomezga.”—Yes. 30:15.
SUMU 8 Yehova Ntchiphokwero Chithu
^ ndime 5 Lemba lithu la chaka cha 2021 likudidimizga kuti ntchakuzirwa chomene kugomezga Yehova apo tikusangana na masuzgo agho ghakutipangiska kuti tenjerwenge. Mu nkhani iyi tidumbiskanenge ivyo tingachita kuti tilondezgenge ulongozgi uwo uli mu lemba lithu la chaka.
^ ndime 5 Ŵabali na ŵadumbu ŵanyake ŵakugomezgeka ŵakwenjerwa chomene mwakuti vikuŵafikiska paheni chomene. Kwenjerwa kwanthena uku kungakhumbikwa ku chipatala chifukwa ni kwenjerwa uko Yesu wakayowoyanga yayi.
^ ndime 63 MAZGU GHAKULONGOSORA CHITHUZI: (1) Zuŵa lose, mudumbu wakulomba kufumira pasi pamtima chifukwa cha ivyo wakwenjerwa navyo.
^ ndime 65 MAZGU GHAKULONGOSORA CHITHUZI: (2) Pa nyengo yakupumura ku ntchito, wakuŵazga Mazgu gha Chiuta kuti wasange vinjeru.
^ ndime 67 MAZGU GHAKULONGOSORA CHITHUZI: (3) Wakughanaghanirapo viyelezgero viheni na viwemi ivyo vili mu Baibolo.
^ ndime 69 MAZGU GHAKULONGOSORA CHITHUZI: (4) Walemba pa pepara lemba lakukhozga ilo wakukhumba kulisungilira pamtima ndipo wakulibatika pa furiji.
^ ndime 71 MAZGU GHAKULONGOSORA CHITHUZI: (5) Wakukondwa na ŵabwezi ŵake apo wali mu uteŵeti.
^ ndime 73 MAZGU GHAKULONGOSORA CHITHUZI: (6) Wakukhozga chigomezgo chake mwakughanaghanira vyamunthazi.
