NKHANI YAKUSAMBIRA 4
Lutilirani Kutemwana na Mtima Wose
“Mutemwanenge na mtima wose nga umo ŵanthu ŵakutemwerana paubali.”—ROM. 12:10.
SUMU 109 Temwani Ŵanji Kufumira mu Mtima
IVYO VILI MU NKHANI IYI *
1. Kasi ntchivichi chikulongora kuti ŵanthu ŵakutemwana zanadi yayi mu mbumba mazuŵa ghano?
BAIBOLO likayowoyerathu kuti mu mazuŵa ghaumaliro, ŵanthu ŵazamuŵa “ŵambura chitemwa.” (2 Tim. 3:1, 3) Uchimi uwu ukufiskika mazuŵa ghano. Mwachiyelezgero, ŵapapi ŵanandi ŵali kulekana, ndipo ŵana ŵakuwona kuti ŵakutemwekaso yayi. Nanga ŵangaŵa awo ŵandalekane, mu mbumba zawo mulije chitemwa chanadi. Mulangizi wa vya nthengwa munyake wakuti: “Kanandi mama, dada na ŵana ŵakuyowoyeskana viŵi yayi ndipo ŵakumalira nyengo yinandi pa kompyuta, tabuleti, foni panji kuseŵera magemu gha pa kompyuta. Nangauli ŵanthu aŵa ŵakukhala mu nyumba yimoza, kweni ŵakumanyana makora yayi.”
2-3. (a) Kuyana na Ŵaroma 12:10, kasi mbanjani awo tikwenera kuŵatemwa na mtima wose? (b) Kasi tisambirenge vichi mu nkhani iyi?
2 Ise tikwenera yayi kutolera nkharo ya ŵanthu ŵa mu charu ichi awo mbambura chitemwa. (Rom. 12:2) M’malo mwake, tikwenera kutemwa chomene ŵamumbumba yithu kweniso ŵabali na ŵadumbu ŵithu mu mpingo. (Ŵazgani Ŵaroma 12:10.) Kasi kutemwana na mtima wose chikung’anamurachi? Chikung’anamura kulongorana chitemwa nga umo ŵanthu ŵa mbumba yimoza ŵakutemwerana. Chitemwa ichi ndicho tikwenera kulongora ŵabali na ŵadumbu ŵithu mu mpingo. Para tikutemwana na mtima wose, tose tikuteŵetera Yehova mwakukondwa.—Mika 2:12.
3 Kuti timanye umo tingalongolera chitemwa ichi, tiyeni tiwone ivyo tikusambirako ku viyelezgero vya mu Baibolo.
“YEHOVA NGWACHITEMWA CHOMENE”
4. Kasi lemba la Yakobe 5:11 likutiphalirachi vyakukhwaskana na chitemwa cha Yehova?
4 Baibolo likutiphalira mikhaliro yakukondweska ya Yehova. Mwachiyelezgero, likuti “Chiuta ntchitemwa.” (1 Yoh. 4:8) Mazgu agha ghakutipangiska kuti tiŵe nayo paubwezi. Baibolo likutiphaliraso kuti “Yehova ngwachitemwa chomene.” (Ŵazgani Yakobe 5:11.) Mazgu agha ngakukhozga chomene chifukwa ghakulongora kuti Yehova wakutitemwa chomene.
5. Kasi Yehova wakulongora wuli lusungu, ndipo tingamuyezga wuli?
5 Wonani kuti lemba la Yakobe 5:11 likuyowoya kuti Yehova ngwachitemwa chomene pamoza na mukhaliro unyake uwo ukutovwira kusendelera kwa iyo. Mukhaliro uwu ni lusungu. (Eks. 34:6) Nthowa yimoza iyo Yehova wakutilongolera lusungu, nkhutigowokera para tabudiska. (Sal. 51:1) Mu Baibolo, lizgu lakuti lusungu likung’anamura vinandi padera pa kugowokera waka munthu. Likung’anamura chitima icho munthu wakuŵa nacho para wawona munthu munyake wakusuzgika chomene ndipo wakuchitapo kanthu kuti wamovwire. Yehova wakuti khumbo ilo wali nalo lakuti watovwire ndankhongono chomene kujumpha ilo mama wangaŵa nalo pa mwana wake. (Yes. 49:15) Para tili mu suzgo, Yehova wakutovwira chifukwa chakuti wali na lusungu. (Sal. 37:39; 1 Kor. 10:13) Nase tingalongora lusungu ku ŵabali na ŵadumbu ŵithu para tikuŵagowokera na kuleka kuŵasungira vyakusingo para ŵatikhuŵazga. (Efe. 4:32) Nthowa yinyake yiwemi chomene iyo tingalongolera lusungu ni para tikovwira ŵabali na ŵadumbu ŵithu para ŵasangana na masuzgo. Para chitemwa ndicho chikutituma kuti tilengerenge lusungu ŵanji, tikuyezga Yehova uyo ngwachitemwa chomene kuluska waliyose.—Efe. 5:1.
YONATANI NA DAVIDE “ŴAKAMBA KUTEMWANA CHOMENE”
6. Kasi Yonatani na Davide ŵakalongora wuli kuti ŵakatemwananga chomene?
6 Mu Baibolo muli nkhani za ŵanthu ŵambura kufikapo awo ŵakalongora kuti ŵakatemwananga chomene. Mwachiyelezgero, Yonatani na Davide. Baibolo likuti: “Yonatani na Davide ŵakamba kutemwana chomene, ndipo Yonatani wakamba kumutemwa nga umo wakujitemwera yekha.” (1 Sam. 18:1) Yehova wakasankha Davide kuti wanjire m’malo mwa Sauli kuŵa themba. Sauli wakachita sanji chomene, ndipo wakakhumbanga kumukoma Davide. Kweni Yonatani wakakhozgera yayi ivyo adada ŵake ŵakakhumbanga kuchitira Davide. Yonatani na Davide ŵakalayizgana kuti ŵalutilirenge kuŵa paubwezi kweniso kulutilira kovwirana.—1 Sam. 20:42.
Davide na Yonatani ŵakatemwananga chomene nangauli ŵakapambananga vyaka vinandi (Wonani ndime 6-9)
7. Kasi ni vichi ivyo mphanyi vikatondeska Yonatani na Davide kuŵa paubwezi?
7 Ntchakuzizika chomene kuti Yonatani na Davide ŵakatemwananga chomene, chifukwa pakaŵa vinthu vinandi ivyo mphanyi vikaŵatondeska kutemwana. Mwachiyelezgero, Yonatani wakaŵa mulara kwa Davide vyaka pafupifupi 30. Yonatani wakaghanaghanapo yayi kuti wangaŵa yayi paubwezi na munthu uyo ni mwana chomene kwa iyo kweniso wakumanya vichoko pakuyaniska na iyo. Ndipouli, Yonatani ndimo wakachitirayayi, wakamuchindikanga chomene Davide.
8. Chifukwa wuli mukughanaghana kuti Yonatani wakaŵa mubwezi muwemi chomene kwa Davide?
8 Yonatani mphanyi wakamuchitira sanji Davide. Pakuŵa mwana wa Themba Sauli, Yonatani mphanyi wakakamira kuti ndiyo waŵe themba lakulondezgapo. (1 Sam. 20:31) Kweni Yonatani wakaŵa wakujiyuyura, ndipo wakaŵa wakugomezgeka kwa Yehova. Ntheura wakakhozgera na mtima wose ivyo Yehova wakasankha kuti Davide ndiyo waŵenge themba lakulondezgapo. Wakaŵaso wakugomezgeka kwa Davide nangauli ivi vikamukwiyiska chomene Sauli.—1 Sam. 20:32-34.
9. Kasi tikumanya wuli kuti Yonatani wakamuchitiranga sanji yayi Davide?
9 Yonatani wakamutemwanga chomene Davide, ntheura wakamuchitiranga sanji yayi. Yonatani wakaŵa wachikanga, wakarwa nkhondo zinandi ndipo wakaŵa waluso pakuponya muvi. Ŵanthu ŵakuti iyo na dada wake Sauli “ŵakaŵa ŵaluŵiro kuluska nombo” ndiposo “ŵankhongono chomene kuluska nkhalamu.” (2 Sam. 1:22, 23) Ntheura Yonatani waŵenge munyake mphanyi wakajitukumura chifukwa cha vinthu ivyo wakachitanga. Kweni iyo wakalimbanapo yayi na Davide panji kumuchitira sanji chifukwa cha vinthu viwemi ivyo Davide wakachita. M’malo mwake, Yonatani wakalumbanga Davide chifukwa wakaŵa wachikanga kweniso wakagomezganga Yehova. Nakuti Yonatani wakamba kumutemwa chomene Davide wati wakoma Goliyati. Kasi nase tingalongora wuli kuti tikuŵatemwa chomene ŵabali na ŵadumbu ŵithu?
KASI MAZUŴA GHANO TINGALONGORA WULI KUTI TIKUTEMWANA NA MTIMA WOSE?
10. Kasi ‘kutemwana chomene kufumira mu mtima’ chikung’anamurachi?
10 Baibolo likutiphalira kuti ‘titemwanenge chomene kufumira mu mtima.’ (1 Pet. 1:22) Yehova ntchiyelezgero chiwemi kwa ise. Chitemwa chake ntchikuru mwakuti para tilutilirenge kugomezgeka kwa iyo, wazamulekapo yayi kutitemwa. (Rom. 8:38, 39) Lizgu Lachigiriki ilo lili kung’anamulika kuti “chomene” pa lemba la 1 Petrosi 1:22, likuyowoya za munthu uyo wakuŵikapo mtima wose kulongora chitemwa. Nyengo zinyake ntchipusu yayi kulongora chitemwa ku ŵabali na ŵadumbu ŵithu. Para ŵanji ŵatikhuŵazga, tikwenera kulutilira ‘kuzizipizgirana mu chitemwa, na kuyezgayezga kusungilira umoza wa mzimu mu chakukakira cha mtende.’ (Efe. 4:1-3) Para tikuyezgayezga kuŵa pa mtende na ŵabali na ŵadumbu ŵithu, tiŵikenge chomene maghanoghano pa ivyo ŵakunangiska yayi. Kweni tiŵawonenge nga umo Yehova wakuŵawonera.—1 Sam. 16:7; Sal. 130:3.
Paulosi wakachiska Yuwodiya na Sintike kuti ŵatemwanenge. Nyengo zinyake nase vikutisuzga kuti tikoleranenge na ŵabali na ŵadumbu ŵithu (Wonani ndime 11)
11. Chifukwa wuli nyengo zinyake chingaŵa chakusuzga kutemwana na mtima wose?
11 Ntchipusu yayi nyengo zose kutemwa chomene ŵabali na ŵadumbu ŵithu, chomenechomene para tikumanya ivyo ŵakubudiska. Nakuti ili likwenera kuti likaŵa suzgo likuru ku Ŵakhristu ŵanyake ŵakwambilira. Mwachiyelezgero, Yuwodiya na Sintike ŵakateŵeteranga makora waka para ŵali na Paulosi. Kweni pa vifukwa vinyake paŵekha ŵakapulikananga yayi. Ntheura Paulosi wakaŵachiska kuti “ŵayane maghanoghano mu Fumu.”—Fil. 4:2, 3.
Ŵabali ŵalara ŵachinyamata ŵangaŵa paubwezi na ŵabali ŵalara awo mbachekuru (Wonani ndime 12)
12. Kasi tingachita wuli kuti titemwanenge chomene na ŵabali na ŵadumbu ŵithu?
12 Kasi tingachita wuli kuti ŵabali na ŵadumbu ŵithu tiŵatemwenge na mtima wose? Para taŵamanya makora Ŵakhristu ŵanyithu, chiŵenge chipusu kuŵapulikiska na kwamba kuŵatemwa chomene. Ndipo tingaŵa nawo paubwezi nanga tingaŵa kuti tikupambana nawo vyaka vinandi panji umo tili kukulira. Kumbukani kuti Yonatani na Davide ŵakapambananga vyaka pafupifupi 30 kweni ŵakatemwanga chomene. Kasi mu mpingo winu muli munthu uyo ni mulara panji mwana kwa imwe uyo mungaŵa nayo paubwezi? Para muchitenge nthena, mulongorenge kuti ‘mukutemwa ŵabali wose.’—1 Pet. 2:17.
Wonani ndime 12 *
13. Kasi vingachitika kuŵa paubwezi na waliyose mu mpingo? Longosorani.
13 Kasi kutemwa ŵasopi ŵanyithu na mtima wose chikung’anamura kuŵa paubwezi na waliyose mu mpingo? Yayi, ivi vingachitika yayi. Ntchakawiro kuŵa paubwezi na ŵanthu ŵanyake chifukwa chakuti tikutemwa vinthu vyakuyana. Yesu wakachema ŵapositole ŵake wose kuti “ŵabwezi,” kweni wakatemwanga chomene Yohane. (Yoh. 13:23; 15:15; 20:2) Nangauli vikaŵa nthena, kweni Yesu wakamutemweranga yayi Yohane. Mwachiyelezgero, apo Yohane na Yakobe ŵakapempha kuti ŵazakaŵape malo ghakuzirwa mu Ufumu wa Chiuta, Yesu wakaŵaphalira kuti: “Kukhala ku woko lane lamalyero panji lamazere ndine yayi nkhusankha.” (Mrk. 10:35-40) Nga ni Yesu, nase tikwenera yayi kutemwera ŵabwezi ŵithu pakuchita vinthu. (Yak. 2:3, 4) Chifukwa kuchita nthena kungawovwira yayi kuti mpingo uŵe wakukolerana.—Yuda 17-19.
14. Kasi lemba la Ŵafilipi 2:3 lingatovwira wuli kuti tileke kuŵa na mzimu wakuphalizgana?
14 Para tikutemwana na mtima wose, tikuvikilira mpingo kuti uleke kuŵa na mzimu wakuphalizgana. Kumbukani kuti Yonatani wakamuchitiranga sanji yayi Davide panji kukhumba kuti waŵe themba ndiyo m’malo mwa Davide. Nase tikwenera kuyezga Yonatani. Tingachitiranga sanji yayi ŵabali ŵithu para ŵali na maluso ghanyake, ‘kweni tiŵe ŵakujiyuyura na kuwona ŵanyithu kuti ŵakutiluska.’ (Ŵazgani Ŵafilipi 2:3.) Manyani kuti waliyose wangachita chinthu icho chingawovwira mpingo. Para tilutilirenge kujiyuyura, tiwonenge mikhaliro yiwemi iyo ŵabali na ŵadumbu ŵithu ŵali nayo, ndipo tisambirengeko viwemi kwa iwo.—1 Kor. 12:21-25.
15. Kasi mwasambirako vichi ku ivyo vikachitikira Tanya na mbumba yake?
15 Para tasangana na masuzgo, Yehova wakutipembuzga kwizira mu ŵabali na ŵadumbu ŵithu awo ŵakutitemwa chomene. Wonani ivyo vikachitikira mbumba yinyake apo yikaŵa ku Ungano wa Mitundu Yose ku United States, wa mutu wakuti “Chitemwa Chikumara Yayi” wa 2019. Tanya, mama uyo wali na ŵana ŵatatu wakuti: “Pa zuŵa la Chisulo apo tikaweleranga ku hotelo iyo tikafikira, galimoto yinyake yikaluza mabuleki na kuganda galimoto yithu. Pakaŵavya wakupwetekeka, kweni mahara ghakatimalira ndipo tikafuma mu galimoto na kwimilira pa msewu. Mbwenu munthu munyake wakatichema kuti tilute mu galimoto yake kuti tiŵe ŵakuvikilirika. Wakaŵa mubali uyo nayo wakafuma ku ungano. Ndipo wakaŵa yekha yayi uyo wakayima. Ŵabali na ŵadumbu ŵanyake 5 ŵa ku Sweden awo nawo ŵakaŵa pa ungano uwu nawo ŵakayima. Ŵadumbu ŵakanihaga ine na mwana wane mwanakazi, ndipo tikajipulika makora chomene. Kufuma apo nkhaphalira ŵabali na ŵadumbu aŵa kuti ŵangaluta, tiŵenge makora, kweni ŵakatileka yayi. Ŵakakhala nase m’paka apo ŵachipatara ŵakafikira, ndipo ŵakawoneseska kuti tili na vyose vyakukhumbikwira. Pa nyengo yakusuzga iyi, tikawona chitemwa cha Yehova. Ivyo vikatichitikira apa, vikakhozga chomene chitemwa icho tili nacho pa ŵabali na ŵadumbu ŵithu kweniso vikakhozga chitemwa chithu pa Yehova.” Kasi mukukumbukira nyengo iyo mukasuzgika chomene ndipo Ŵakhristu ŵanyinu ŵakamulongorani chitemwa?
16. Kasi pakuŵa uwemi wuli para tikutemwana na mtima wose?
16 Ghanaghanira waka vinthu viwemi ivyo vikuchitika para tikutemwana na mtima wose. Tikupembuzga ŵabali na ŵadumbu ŵithu para ŵasangana na masuzgo. Tikovwira ŵabali na ŵadumbu withu kuteŵetera Yehova mwakukolerana kweniso mwakukondwa. Tikulongoraso kuti ndise nadi ŵasambiri ŵa Yesu ndipo ivi vikukopa ŵanthu ŵamitima yiwemi kuti ŵambe kuteŵetera Yehova. Kuluska vyose, tikupeleka ntchindi kwa Yehova uyo ni “Dada wa mtima walusungu na Chiuta wa chisangulusko chose.” (2 Kor. 1:3) Mphanyi tose taŵikapo mtima kulongorana chitemwa na kulutilira kutemwana na mtima wose.
SUMU 130 Gowokerani Ŵanyinu
^ ndime 5 Yesu wakayowoya kuti ŵasambiri ŵake ŵazamumanyikwa para ŵakutemwana. Lekani tose tikwenera kuyezgayezga kulongorana chitemwa. Tikwenera kuŵatemwa chomene ŵabali na ŵadumbu ŵithu nga umo ŵanthu ŵakutemwerana paubali. Nkhani iyi, yitovwirenge umo tingachitira kuti tiŵatemwenge chomene ŵabali na ŵadumbu ŵithu mu mpingo.
^ ndime 55 MAZGU GHAKULONGOSORA CHITHUZI: Mubali mulara wachinyamata uyo wakupindura na luso lwa mubali mulara uyo ni muchekuru, wafika ku nyumba ya mubali muchekuru uyu, ndipo ŵamupokelera na mawoko ghaŵiri. Ŵabali aŵa na ŵawoli ŵawo ŵakulongorana chitemwa kweniso mtima wakupa.
