NKHANI YAKUSAMBIRA 3
Mzinda Ukuru wa Mberere Zinyake Ukulumba Chiuta na Khristu
“Chiponosko chithu chafuma kwa Chiuta withu, uyo wakukhala pa chitengo, na kwa Mwana wa mberere.”—CHIVU. 7:10.
SUMU 14 Tilumbe Themba Liphya la Charu Chapasi
IVYO VILI MU NKHANI IYI *
1. Kasi nkhani iyo yikayowoyeka pa ungano wa chigaŵa mu 1935 yikamukhwaska wuli munyamata munyake?
MUNYAMATA munyake wakaŵa na vyaka 18 apo wakabatizikanga mu 1926. Ŵapapi ŵake ŵakaŵa Ŵasambiri ŵa Baibolo, zina ilo Ŵakaboni ŵa Yehova ŵakamanyikwanga nalo panyengo iyo. Ŵapapi ŵake ŵakaŵa na ŵana ŵanalume ŵatatu na ŵanakazi ŵaŵiri. Ŵana wose ŵakaŵasambizga kuteŵetera Chiuta na kuyezga Yesu Khristu. Nga umo Ŵasambiri ŵa Baibolo wose ŵakachitiranga pa nyengo iyo, munyamata wakugomezgeka uyu nayo wakaryanga chingwa na kumwa vinyo pa Mugonero wa Fumu. Kweni ivyo wakalindiliranga munthazi vikasintha wati wapulika nkhani yambura kuluwika ya mutu wakuti “Wumba Ukuru.” Nkhani iyi yikayowoyeka pa ungano wa chigaŵa na Mubali J. F. Rutherford mu chaka cha 1935 ku Washington, D.C., U.S.A. Kasi Ŵasambiri ŵa Baibolo ŵakasambira vichi pa ungano uwu?
2. Kasi ni fundo wuli yakukondweska iyo Mubali Rutherford wakalongosora mu nkhani yake?
2 Mu nkhani yake, Mubali Rutherford wakalongosora awo ŵakupanga “mzinda ukuru” uwo ukuyowoyeka pa Chivumbuzi 7:9. Kumanyuma kose, Ŵasambiri ŵa Baibolo ŵakagomezganga kuti mzinda ukuru ni gulu lachiŵiri la ŵanthu awo ŵazamuluta kuchanya kweni mbakugomezgeka chomene yayi pakuyaniska na ŵakuphakazgika. Mubali Rutherford wakajura Malemba na kulongosora kuti mzinda ukuru ukusankhika kuti ulute kuchanya yayi, kweni ni mberere zinyake * za Khristu, izo zizamupona pa “suzgo yikuru” na kukhala pa charu chapasi kwamuyirayira. (Chivu. 7:14) Yesu wakalayizga kuti: “Nili nazo mberere zinyake, izo ni za mu chiŵaya ichi chara. Nazo nkhwenera kuzitora, zipulikenge mazgu ghane, ndipo ziŵenge mskambo umoza, muliska yumoza.” (Yoh. 10:16) “Mberere zinyake” izi Mbakaboni ŵa Yehova ŵakugomezgeka awo ŵakulindilira kuzakakhala kwamuyirayira mu Paradiso pa charu chapasi. (Mat. 25:31-33, 46) Tiyeni tiwone umo unenesko uwu ukasinthira umoyo wa ŵanthu ŵanandi ŵa Yehova pa nyengo iyo, kusazgapo munyamata wa vyaka 18 uyo tamuyowoya pakwamba.—Sal. 97:11; Zinth. 4:18.
UNENESKO UPHYA UKASINTHA UMOYO WA ŴANANDI
3-4. Kasi pa ungano wa chigaŵa wa mu 1935, ŵanandi ŵakamanya vichi pa nkhani ya chigomezgo chawo, ndipo chifukwa wuli?
3 Nyengo yakukondweska chomene pa ungano wa chigaŵa uwu ni apo muyowoyi wakati: “Wose awo ŵali na chilindizga cha kuzakakhala kwamuyirayira pa charu chapasi ŵayimilire.” Mubali munyake uyo wakaŵapo pa ungano uwu wakayowoya kuti ŵanthu ŵakujumpha hafu ya awo ŵakiza pa ungano uwu ŵakayimilira. Pamanyuma Mubali Rutherford wakati: “Wonani! Mzinda ukuru!” Ndipo wumba ukakuŵa mawoko na kuchemerezga mwachimwemwe. Awo ŵakayimilira ŵakamanya kuti Yehova wandaŵasankhire kuchanya. Ŵakamanya kuti ŵandaphakazgike na mzimu wa Chiuta. Pa zuŵa lakulondezgapo la ungano uwu, ŵanthu ŵakukwana 840 ŵakabatizika na kuŵa Ŵakaboni. Ndipo ŵanandi mwa ŵanthu aŵa ŵakaŵa ŵamberere zinyake.
4 Kufuma apo nkhani iyi yikayowoyekera, munyamata yura tanguyowoya, ndiposo ŵabali na ŵadumbu ŵanandi ŵakaleka kurya chingwa na kumwa vinyo pa Mugonero wa Fumu. Ŵabali na ŵadumbu ŵanyake ŵakajipulika nga umo wakajipulikira mubali munyake wakujiyuyura uyo wakati: “Chikumbusko cha mu 1935 chikaŵa chaumaliro kwa ine kuryapo vimanyikwiro. Nkhamanya kuti Yehova wandaniphakazge na mzimu wake utuŵa kuti nkhakhale kuchanya. Kweni nkhaŵa na chilindizga chakuzakakhala pa charu chapasi na kugwirako ntchito ya kuchizgora kuŵa paradiso.” (Rom. 8:16, 17; 2 Kor. 1:21, 22) Kufuma pa nyengo iyi, mzinda ukuru ukusazgikirasazgikira ndipo ukuteŵetera mwakukolerana na ŵakuphakazgika awo ŵachali pa charu chapasi.
5. Kasi Yehova wakuŵawona wuli awo ŵali kuleka kuryapo pa Chikumbusko?
5 Kasi Yehova wakuŵawona wuli awo ŵakaleka kuryapo pa Chikumbusko pamanyuma pa ungano wa mu 1935? Ndipo kasi Yehova wakumuwona wuli Kaboni wakubatizika mazuŵa ghano uyo nyengo zose wakurya chingwa na kumwa vinyo pa Mugonero wa Fumu kweni pamanyuma wamanya kuti ngwakuphakazgika nadi yayi? (1 Kor. 11:28) Ŵanyake wakulyeramo bweka chifukwa cha kupulikiska uheni chigomezgo chawo. Kweni usange ŵazomera kufuma pasi pa mtima kuti ŵakabudiska, na kuleka kurya, ndipo ŵakulutilira kuteŵetera Yehova mwakugomezgeka, iyo waŵapokelerenge nga ni mberere zinyake. Nangauli ŵamberere zinyake ŵakuryako yayi chingwa na kumwa vinyo, iwo ŵakwiza pa Chikumbusko chifukwa ŵakuwonga chomene ivyo Yehova na Yesu ŵali kuŵachitira.
CHILINDIZGA CHAKUKONDWESKA
6. Kasi Yesu wali kuphalira ŵangelo kuti ŵachite vichi?
6 Pakuti suzgo yikuru yili pafupi, chingaŵa chakukhozga chomene kudumbiskana Chivumbuzi chaputara 7 na kuwona vinyake ivyo chikuyowoya vyakukhwaskana na Ŵakhristu ŵakuphakazgika na mzinda ukuru. Yesu wakuphalira ŵangelo kuti ŵalutilire kukolelera mphepo zinayi za pharanyiko. Ŵakuphalirika kuti ŵangalekezganga yayi mphepo izi kuti ziputire pa charu m’paka Ŵakhristu wose ŵakuphakazgika ŵamare kudindika, kung’anamura kuti Yehova wasimikizga kuti mbakugomezgeka. (Chivu. 7:1-4) Chifukwa cha kugomezgeka kwawo, ŵabali ŵa Khristu ŵakuphakazgika ŵakupika njombe ya kuŵa mafumu na ŵasembe pamoza na Khristu kuchanya. (Chivu. 20:6) Yehova, Yesu, na ŵangelo ŵazamukondwa chomene kuwona ŵakuphakazgika wose ŵakupokera njombe yawo kuchanya.
Mzinda ukuru wavwara minjilira yituŵa ndipo mu mawoko ghawo uli na minthavi ya vintchindo, wimilira panthazi pa chitengo cha Chiuta na Mwana wa mberere (Wonani ndime 7)
7. Kuyana na Chivumbuzi 7:9, 10, kasi Yohane wakawona anjani mu mboniwoni, ndipo ŵakachitanga vichi? (Wonani chithuzi cha pa chikopi.)
7 Yohane wati wayowoya vya ŵa 144,000 aŵa, awo ni mafumu na ŵasembe, wakawonaso chinthu chinyake chakukondweska. Wakawona “mzinda ukuru” wapona pa Aramagedoni. Gulu ili likupambana na ilo wakawona pakwamba. “Mzinda ukuru” uli na ŵanthu ŵanandi chomene mwakuti tikumanya yayi chiŵelengero chawo. (Ŵazgani Chivumbuzi 7:9, 10.) Iwo ‘ŵavwara minjilira yituŵa,’ kulongora kuti ŵajisungilira ‘kwambura kabanga kakufuma ku charu’ cha Satana ndipo mbakugomezgeka kwa Chiuta na Khristu. (Yak. 1:27) Iwo ŵakuchemerezga kuti ŵali kuthaskika chifukwa cha ivyo Yehova na Yesu, uyo ni Mwana wa mberere wa Chiuta, ŵali kuchita. Kweniso mu mawoko ghawo muli minthavi ya vintchindo, kulongora kuti mbakukondwa kuzomera kuti Yesu ni Fumu yakuphakazgika ya Yehova.—Yaniskani na Yohane 12:12, 13.
8. Kasi lemba la Chivumbuzi 7:11, 12 likutiphalira vichi vyakukhwaskana na mbumba ya Yehova yakuchanya?
8 Ŵazgani Chivumbuzi 7:11, 12. Kasi awo ŵakaŵa kuchanya ŵakachita wuli ŵakati ŵawona mzinda ukuru? Yohane wakawona kuti awo ŵakaŵa kuchanya mbakukondwa chomene kweniso ŵakalumbanga Yehova ŵati ŵawona mzinda ukuru. Mbumba ya Yehova yakuchanya yizamukondwa chomene kuwona uchimi uwu ukufiskika apo mzinda ukuru uzamufuma mu suzgo yikuru.
9. Kuyana na lemba la Chivumbuzi 7:13-15, kasi ŵa mzinda ukuru ŵakuchita vichi panyengo yasono?
9 Ŵazgani Chivumbuzi 7:13-15. Yohane wakalemba kuti ŵa mzinda ukuru “ŵachapa minjilira yawo na kuyituŵiska mu ndopa za Mwana wa mberere.” Ichi chikung’anamura kuti ŵali na njuŵi yituŵa ndipo Yehova wakukondwa nawo. (Yes. 1:18) Iwo Mbakhristu ŵakujipeleka na ŵakubatizika awo ŵali na chipulikano chakukhora mu sembe ya Yesu ndiposo awo ŵali paubwezi na Yehova. (Yoh. 3:36; 1 Pet. 3:21) Lekani mbakwenelera kwimilira panthazi pa chitengo cha Chiuta na kumuchitira “uteŵeti wakupatulika muhanya na usiku” pa charu chapasi. Nanga ni sono nthena, mbakulimbikira chomene ndipo ŵakuchita chigaŵa chikuru pa mulimo wa kupharazga Ufumu na kuzgora ŵanthu kuŵa ŵasambiri. Kweniso ŵakuŵika Ufumu wa Chiuta pakwamba kuluska vyakukhumba vyawo.—Mat. 6:33; 24:14; 28:19, 20.
Mzinda ukuru ngwakukondwa kufuma mu suzgo yikuru (Wonani ndime 10)
10. Kasi ŵa mzinda ukuru ŵakugomezga vichi na mtima wose, ndipo ni layizgo wuli ilo ŵazamuwona likufiskika?
10 Mzinda ukuru, uwo uzamufuma mu suzgo yikuru uli na chigomezgo chose kuti Chiuta wazamulutilira kuwupwelelera chifukwa “Uyo wakukhala pa chitengo wazamutandawura hema lake pa iwo.” Panyengo iyi, malayizgo ghose agho mberere zinyake zikalindiliranga mwakunweka kuti ghafiskike, ghazamufiskika: “[Chiuta] wazamufyura masozi ghose ku maso ghawo, ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya.”—Chivu. 21:3, 4.
11-12. (a) Kuyana na Chivumbuzi 7:16, 17, ni vitumbiko wuli ivyo ŵa mzinda ukuru ŵakulindilira? (b) Kasi mberere zinyake zikwenera kuchita vichi para Chikumbusko chafika, ndipo chifukwa wuli?
11 Ŵazgani Chivumbuzi 7:16, 17. Panyengo yasono ŵanthu ŵa Yehova ŵanyake ŵakusoŵa chakurya chifukwa cha ukavu, viwawa ivyo vikuchitika mu charu, panji nkhondo. Ŵanyake ŵali mu jele chifukwa cha chipulikano chawo. Ndipouli, ŵa mzinda ukuru mbakukondwa chomene kumanya kuti para ŵazakapona pharanyiko la charu ichi, ŵazamuŵa na chakurya chinandi chakuthupi na chauzimu. Apo charu chiheni cha Satana chikuzakaparanyika, Yehova wazamuwoneseska kuti mzinda ukuru wavikilirika ku ukali wake uwo uli nga ni “chithukivu.” Para suzgo yikuru yazakamara, Yesu wazamulongozgera ŵanthu ŵakupona aŵa ku “maji gha umoyo” wamuyirayira. Mzinda ukuru uli na chilindizga chakukondweska nadi. Pa ŵanthu mabiliyoni ghanandi awo ŵali kuŵako, ŵa mzinda ukuru awo ŵazamujumpha pa suzgo yikuru, ŵangazakacheta nyifwa yayi.—Yoh. 11:26.
12 Ŵamberere zinyake ŵakulindilira vinthu vyakukondweska chomene ndipo ŵakuwonga chomene Yehova na Yesu. Iwo ŵandasankhike kuluta kuchanya, kweni mbakuzirwa chomene kwa Yehova, ndipo wakuŵatemwa chomene. Ŵakuphakazgika na ŵamberere zinyake wose ŵakulumba Chiuta na Khristu. Nthowa yimoza iyo ŵakulumbira Yehova nkhwiza pa Mugonero wa Fumu.
LUMBANI YEHOVA NA MTIMA WOSE PA CHIKUMBUSKO
Chingwa na vinyo ivyo ŵakwendeska pa Chikumbusko vikutikumbuska kuti Yesu wakatifwira mwakuti tizakasange umoyo (Wonani ndime 13-15)
13-14. Chifukwa wuli waliyose wakwenera kwiza pa Chikumbusko cha nyifwa ya Khristu?
13 Mu vyaka vyasonosono, munthu yumoza pa ŵanthu 1,000 awo ŵiza pa Chikumbusko ndiyo wakurya chingwa na kumwa vinyo. Mipingo yinandi pa charu chapasi mulije uyo wakuryapo pa Chikumbusko. Ŵanandi awo ŵakwiza pa Chikumbusko ŵali na chilindizga chakuzakakhala pa charu chapasi. Ipo chifukwa wuli ŵakwiza pa Mugonero wa Fumu? Mwachiyelezgero, munthu wakuluta ku ukwati wa mubwezi wake nangauli ndiyo yayi wakukwatiska. Wakuluta chifukwa chakuti wakukhumba kulongora kuti wakukhozgera awo ŵakutorana kweniso wakuŵatemwa. Mwakuyana waka, ŵamberere zinyake nawo ŵakuluta ku Chikumbusko chifukwa ŵakukhumba kulongora kuti ŵakukhozgera Khristu na ŵakuphakazgika kweniso kuti ŵakuŵatemwa. Chifukwa chinyake icho ŵamberere zinyake ŵakulutira ku Chikumbusko ntchakuti ŵalongore kuti ŵakuwonga sembe ya Yesu chifukwa ndiyo yili kovwira kuti ŵazakakhale kwamuyirayira pa charu chapasi.
14 Chifukwa chinyake icho ŵamberere zinyake ŵakulutira ku Chikumbusko ntchakuti ŵakukhumba kulongora kuti ŵakupulikira dango la Yesu. Apo Yesu wakambiskanga Mugonero wa Fumu na ŵapositole ŵake ŵakugomezgeka, wakaŵaphalira kuti: “Lutilirani kuchita ichi kuti munikumbukenge.” (1 Kor. 11:23-26) Ntheura iwo ŵakulutilira kwiza pa Mugonero wa Fumu panyengo yose iyo ŵakuphakazgika ŵachali pa charu chapasi. Nakuti ŵa mberere zinyake ŵakuchemerako waliyose kuti waŵe nawo pa Chikumbusko.
15. Kasi tingachita wuli kuti tilumbe Chiuta na Khristu pa Chikumbusko?
15 Pa Chikumbusko tikuŵa na mwaŵi wa kulumba Chiuta na Khristu pakwimba sumu na kulombera lumoza. Nkhani iyo yizamuyowoyeka pa Chikumbusko cha chaka chino yili na mutu wakuti “Longorani Kuti Mukuwonga Ivyo Chiuta na Khristu Ŵali Kumuchitirani!” Nkhani iyi yizamutovwira kuti tiwongenge chomene ivyo Yehova na Khristu ŵali kutichitira. Apo chingwa na vinyo vizamwendanga, vizamutikumbuska thupi la Yesu na ndopa zake izo wakathiska chifukwa cha ise. Tizamukumbuka kuti Yehova wakutitemwa chomene lekani wakazomerezga Mwana wake kufwa mwakuti ise tizakasange umoyo wamuyirayira. (Mat. 20:28) Waliyose uyo wakutemwa Adada ŵithu ŵakuchanya na Mwana wawo wazamuluta ku Chikumbusko.
WONGANI YEHOVA CHIFUKWA CHA CHIGOMEZGO ICHO WAMUPANI
16. Kasi ŵakuphakazgika na ŵamberere zinyake ŵakuyana wuli?
16 Ŵakhristu ŵakuphakazgika na ŵamberere zinyake ŵakupambana viŵi yayi. Yehova wakutemwa gulu limoza kuluska linyake yayi. Magulu ghose ngakuzirwa ndipo wakughatemwa mwakuyana waka. Nakuti ŵakuphakazgika na ŵamberere zinyake, wose wakaŵagura na ndopa za Mwana wake wakutemweka. Magulu agha ghakupambana waka ivyo ghakulindizga munthazi. Kweni ghose ghakwenera kulutilira kugomezgeka kwa Chiuta na Khristu. (Sal. 31:23) Ndipo kumbukani kuti mzimu wa Chiuta ungagwira ntchito mwakuyana waka pa tose, kwali ndise ŵakuphakazgika panji yayi. Ichi chikung’anamura kuti Yehova wakupeleka mzimu wake utuŵa ku munthu waliyose kuyana na ivyo vikukhumbikwa pa nyengo iyo.
17. Kasi ŵakuphakazgika awo ŵachali pa charu chapasi ŵakulindilira vichi mwakunweka?
17 Ŵakhristu ŵakuphakazgika ŵakubabika nacho yayi chilindizga cha kuchanya. Chiuta ndiyo wakupanda chilindizga ichi mu mitima yawo. Iwo ŵakughanaghanira za chilindizga chawo, ŵakuyilombera nkhani iyi, ndipo mbakunweka kukapokera njombe yawo kuchanya. Ŵakumanya yayi umo mathupi ghawo ghauzimu ghamuŵira kuchanya. (Fil. 3:20, 21; 1 Yoh. 3:2) Nangauli vili nthena, kweni mbakunweka chomene kukawonana na Yehova, Yesu, ŵangelo, na ŵakuphakazgika ŵanyawo mu Ufumu wakuchanya.
18. Kasi ŵamberere zinyake ŵakulindilira vichi?
18 Ŵamberere zinyake ŵakulindilira mwakunweka kuzakakhala pa charu chapasi kwamuyirayira. Ivi ndivyo taŵanthu mwakawiro tikukhumba. (Muph. 3:11) Ŵakulindilira mwakunweka zuŵa ilo ŵazamwambira kuzgora charu chose chapasi kuŵa paradiso. Ŵakulindilira mwakunweka zuŵa ilo ŵazamuzenga nyumba zawo, kulima minda yawo, na kulera ŵana ŵawo mu charu chambura matenda. (Yes. 65:21-23) Ŵakulindizga kuzakatembeya ku malo ghakupambanapambana pa charu chapasi, kuwona mapiri, nkhorongo, nyanja, na kusanda vinthu vyakupambanapambana ivyo Yehova wali kulenga. Kweni icho chikuŵakondweska chomene ntchakuti ubwezi wawo na Yehova uzamulutilira kukhora.
19. Kasi waliyose wa ise wakuŵa na mwaŵi wuli pa nyengo ya Chikumbusko, ndipo chaka chino chizamuŵako pa wuli?
19 Yehova wapeleka chilindizga chakukondweska chomene ku ŵateŵeti ŵake wose awo ŵali kujipeleka kwa iyo. (Yer. 29:11) Chikumbusko cha nyifwa ya Khristu chikupeleka mwaŵi ku waliyose wakuti walumbe Chiuta na Khristu chifukwa cha ivyo ŵali kutichitira mwakuti tikasange umoyo wamuyirayira. Ntchakuwonekerathu kuti Chikumbusko ni ungano wakuzirwa chomene uwo Ŵakhristu ŵaunenesko ŵakuŵa nawo chaka chilichose. Chaka chino Chikumbusko chizamuŵako pa Chisulo, Malichi 27, 2021 para zuŵa lanjira. Chaka chino nacho ŵanandi ŵazamwiza pa Chikumbusko chifukwa ŵakukhala mu vyaru ivyo mbanangwa. Ŵanyake ŵazamwiza nangauli ŵakususkika. Ŵanyake ŵazamuchita Chikumbusko uku ŵali mu jele. Mphanyi mipingo yose, magulu, na waliyose payekha wazakaŵa na Chikumbusko chiwemi apo Yehova, Yesu, ŵangelo na ŵakuphakazgika awo ŵali kale kuchanya ŵazamuŵa kuti ŵakuwona.
SUMU 150 Penjani Chiuta Kuti Mupone
^ ndime 5 Malichi 27, 2021, ni zuŵa lakuzirwa chomene ku Ŵakaboni ŵa Yehova. Pa usiku wa zuŵa ili, tizamuchita Chikumbusko cha nyifwa ya Khristu. Ŵanandi awo ŵazamwiza pa Chikumbusko ichi mba “mberere zinyake.” Kasi Ŵakaboni ŵa Yehova ŵakamanya vichi vyakukhwaskana na mberere zinyake mu chaka cha 1935? Kasi ni vinthu wuli vyakukondweska ivyo ŵamberere zinyake ŵakulindilira para suzgo yikuru yazakajumpha? Ndipo kasi ŵamberere zinyake ŵangalumba wuli Chiuta na Khristu pa Chikumbusko?
^ ndime 2 MAZGU GHALONGOSOREKA: Mberere zinyake ni ŵanthu wose awo ŵakulondezga Khristu ndipo ŵakulindilira kuzakakhala pa charu chapasi kwamuyirayira. Ŵanyake mwa iwo ŵali kwamba kusopa Yehova mu mazuŵa ghaumaliro agha. Mzinda ukuru ni mberere zinyake izo zizamuŵa na umoyo apo Khristu wazamwiza kuzakeruzga ŵanthu panyengo ya suzgo yikuru, ndipo zizamupona pa suzgo yikuru iyi.
