NKHANI YAKUSAMBIRA 1
“Awo Ŵakupenja Yehova Ŵasoŵenge Kanthu Kawemi Chara”
LEMBA LA CHAKA CHA 2022: “Awo ŵakupenja Yehova ŵasoŵenge kanthu kawemi chara.”—SAL. 34:10.
SUMU 4 “Yehova Ni Muliska Wane”
IVYO VILI MU NKHANI IYI *
Davide wakawonanga kuti ‘wakusoŵa kanthu kawemi chara’ nanga ni apo wakakumananga na masuzgo (Wonani ndime 1-3) *
1. Kasi Davide wakaŵa mu suzgo wuli?
NYENGO yinyake Davide wakachimbiranga kuti waponoske umoyo wake. Sauli, uyo wakaŵa themba lankhongono la Israyeli, wakaŵikapo mtima kuti wamukome. Apo Davide wakakhumbanga chakurya, wakaluta mu msumba wa Nobu, uko wakapempha waka vingwa vinkhondi pera. (1 Sam. 21:1, 3) Pamanyuma, iyo na ŵanalume ŵake ŵakabisama mu mphanji. (1 Sam. 22:1) Chifukwa wuli Davide wakaŵa mu suzgo iyi?
2. Kasi Sauli wakachita chinthu wuli icho chikaŵa chambura kwenelera? (1 Samuyeli 23:16, 17)
2 Sauli wakachitiranga chomene sanji Davide chifukwa chakuti wakaŵa wakumanyikwa kweniso wakaluska pa nkhondo zinandi. Sauli wakamanyaso kuti Yehova wamukana kuŵa themba la Israyeli chifukwa chakuleka kupulikira kwake, ndipo Yehova wakasankha Davide kuti ndiyo waŵenge themba. (Ŵazgani 1 Samuyeli 23:16, 17.) Ndipouli, panyengo iyi Sauli wakaŵa kuti wachali themba la Israyeli, ndipo wakaŵa na ŵasilikari ŵanandi kweniso ŵanthu ŵanandi awo ŵakaŵa ku chigaŵa chake, ntheura Davide wakeneranga kuchimbira kuti waleke kufwa. Kasi Sauli wakaghanaghananga kuti wangatondeska khumbo la Yehova lakuti Davide ndiyo waŵe themba? (Yes. 55:11) Baibolo likulongosola yayi, kweni icho tikumanya ntchakuti apa Sauli wakajiŵikanga pangozi. Awo wakulimbana na Chiuta nyengo zose ŵakutondeka!
3. Kasi Davide wakajipulikanga wuli nangauli wakaŵa mu masuzgo?
3 Davide wakaŵa munthu wakujiyuyura. Wakajisankha yekha yayi kuti waŵe themba la Israyeli, Yehova ndiyo wakamusankha. (1 Sam. 16:1, 12, 13) Sauli wakawonanga Davide kuti ni mulwani wake ndipo wakamba kumutinkha chomene. Kweni Davide wakamupapo mulandu yayi Yehova kuti ndiyo wamunjizga mu masuzgo, kweniso wakadandaura yayi apo wakaŵavya chakurya chakukwana, ndiposo kuti wakakhalanga mu mphanji. M’malo mwake, panyengo iyo wakabisamanga mu mphanji iyi, ndipo panji wakata sumu yiwemi yakulumba Chiuta, iyo ghanyake mwa mazgu ghake ndilo ni lemba lithu la chaka cha 2022, mazgu ghake ngakuti: “Awo ŵakupenja Yehova ŵasoŵenge kanthu kawemi chara.”—Sal. 34:10.
4. Kasi tidumbiskanenge mafumbo wuli, ndipo chifukwa wuli?
4 Mazuŵa ghano ŵateŵeti ŵa Yehova ŵanandi ŵakuŵavya chakurya chakukwana kweniso vinthu vinyake vyakukhumbikwa pa umoyo. * Ivi vyachitikira ŵateŵeti ŵa Yehova ŵanandi, chomenechomene panyengo ya muliri iyi. Ndipo apo “suzgo yikuru” yikusendelera, tikukhazga kuti tikumanenge na masuzgo ghakuru chomene kuluska agha. (Mat. 24:21) Apo tili na fundo izi mu maghanoghano ghithu, tiyeni tisange mazgoro gha mafumbo ghanayi agha: Kasi Davide ‘wakasoŵa kanthu kawemi chara’ mu nthowa wuli? Chifukwa wuli tikwenera kukhorwa na ivyo tili navyo? Chifukwa wuli tikwenera kugomezga kuti Yehova watipwelelerenge? Ndiposo kasi sono tinganozgekera wuli masuzgo agho tisanganenge nagho munthazi?
“NISOŴENGE KANTHU CHARA”
5-6. Kasi Salimo 23:1-6 likutovwira wuli kupulikiska ivyo Davide wakang’anamuranga apo wakati ŵateŵeti ŵa Chiuta “ŵasoŵenge kanthu kawemi chara”?
5 Kasi Davide wakang’anamurangachi apo wakati ŵateŵeti ŵa Yehova “ŵasoŵenge kanthu kawemi chara”? Fundo iyi tingayipulikiska makora para tingawonaso mazgu ghakuyanako waka agho ghali mu Salimo chaputara 23. (Ŵazgani Salimo 23:1-6.) Davide wakamba salimo ili na mazgu ghakuti: “Yehova ni muliska wane, nisoŵenge kanthu chara.” Mu mavesi ghose ghakulondezgapo mu salimo ili, Davide wakayowoya vitumbiko vya mtengo wapatali ivyo wakasanga chifukwa cha kuzomera kuti Yehova waŵe Muliska wake. Yehova ‘wakamulongozgera mu nthowa za urunji,” ndipo wakamovwira mu nyengo za mtende na za masuzgo wuwo. Davide wakamanyanga kuti nangauli wakaŵa pa “mautheka ghakubiliŵira” gha Yehova, kweni chikang’anamuranga kuti walekerengethu kusangana na masuzgo yayi. Wakamanyanga kuti nyengo zinyake wagongowenge, ndipo viŵenge ngati wakwenda mu “chinkhwawu cha mdima bii.” Kweniso wakamanyanga kuti waŵenge na ŵalwani. Kweni pakuti Yehova wakaŵa Muliska wake, iyo ‘wakawopanga chara.’
6 Ntheura apa zgoro talisanga la fumbo lakuti: Kasi Davide ‘wakasoŵa kanthu kawemi chara’ mu nthowa wuli? Zgoro ndakuti, wakaŵa na chilichose chakukhumbikwa kuti walutilire kuŵa paubwezi wakukhora na Yehova. Wakakhumbikwiranga kuŵa na vinthu vinandi vyakuthupi yayi kuti waŵe wakukondwa. Wakakhorwanga na ivyo Yehova wakamupa. Chakuzirwa chomene kwa iyo chikaŵa chakuti Yehova wamutumbike kweniso kumuvikilira.
7. Kuyana na Luka 21:20-24, kasi Ŵakhristu ŵakwambilira awo ŵakakhalanga mu Yudeya ŵakasangana na masuzgo wuli?
7 Kufuma pa mazgu agho Davide wakayowoya, tingawona kuti ntchakuzirwa chomene kuti tiwonenge vinthu vyakuthupi mwakwenelera. Nangauli tingaŵa ŵakukondwa na vinthu vyakuthupi ivyo tingaŵa navyo, kweni tileke kuviwona kuti ndivyo ni vyakuzirwa chomene pa umoyo withu. Fundo iyi ndiyo Ŵakhristu ŵakwambilira awo ŵakakhalanga mu Yudeya ŵakayipulikiska. (Ŵazgani Luka 21:20-24.) Yesu wakaŵachenjezga kuti nyengo yizamukwana apo Yerusalemu ‘wazamuzingilizgika na ŵankhondo.’ Ivi vikati vyachitika nadi, ŵakeneranga ‘kwamba kuchimbilira kumapiri.’ Kuchimbiramo mu msumba kukaŵa kwakovwira kuti ŵathaske umoyo wawo. Ndipouli, ŵakeneranga kusida vinthu vinandi. Gongwe la Mulinda linyake kumanyuma uku likalongosora kuti: “Ŵakasida minda na nyumba, ŵakatondeka nanga nkhunyamura katundu wa mu nyumba zawo. Ŵakagomezga waka Yehova kuti waŵavikilirenge na kuŵapwelelera. Ndipo ŵakaŵika pakwamba kusopa Yehova kuluska chilichose icho chikawonekanga chakuzirwa.”
8. Kasi ni sambiro wuli lakuzirwa ilo tingasambirako ku Ŵakhristu ŵakwambilira ŵa mu Yudeya?
8 Kasi ni sambiro wuli lakuzirwa ilo tingasambirako ku Ŵakhristu ŵakwambilira ŵa mu Yudeya? Gongwe la Mulinda ilo talizunura kale likati: “Kunthazi uku, tingazakasangana na chiyezgo icho chingazakavumbura umo tikuwonera vinthu vyakuthupi. Chingazakavumbura usange tikuviwona kuti ndivyo ni vyakuzirwa chomene kwa ise, panji usange chakuzirwa kwa ise nkhuponoskeka na Chiuta chifukwa chakuti tili ŵakugomezgeka. Nadi, para umaliro wafika tizamukhumbikwira kuzizipizga masuzgo kweniso kujinora vinthu vinyake. Tizamukhumbikwira kuŵa ŵakunozgeka kuchita chilichose nga umo vikaŵira na Ŵakhristu ŵakwambilira awo ŵakachimbira mu Yudeya.” *
9. Kasi ulongozgi uwo Paulosi wakaphalira Ŵahebere ukumukhozgani wuli?
9 Ghanaghanirani waka umo chikaŵira chakusuzga ku Ŵakhristu ŵakwambilira kusida chilichose na kwamba kukakhala umoyo uphya ku malo ghachilendo. Ŵakakhumbikwiranga chipulikano kuti ŵagomezge Yehova kuti waŵapenge vyakukhumbikwa pa umoyo. Kweni pakaŵa chinthu chinyake icho chikeneranga kuŵawovwira. Vyaka 5 kumanyuma pambere Ŵaroma ŵandazingirizge Yerusalemu, mpositole Paulosi wakapeleka ulongozgi wakovwira ku Ŵahebere wakuti: “Umoyo winu uŵenge wambura kutemwa ndalama, uku mukukhorwa na vinthu ivyo vilipo. Pakuti iyo wati: ‘Nikulekenge yayi napachoko nesi kukutaya munthowa yiliyose.’ Mwakuti tiŵenge ŵakukhwima mtima na kuyowoya kuti: ‘Yehova ni movwiri wane, nopenge chara. Kasi munthu wangachitachi kwa ine?’” (Heb. 13:5, 6) Tikukayika yayi kuti awo ŵakapulikira ulongozgi wa Paulosi pambere Ŵaroma ŵandawukire Yerusalemu, vikaŵasuzga yayi kuzgoŵera umoyo wambura kukhumba vinandi ku malo ghaphya uko ŵakachimbilira. Ŵakaŵa na chigomezgo chose kuti Yehova waŵapenge vyakukhumbikwa pa umoyo. Mazgu gha Paulosi naseso ghakutovwira kuti tigomezgenge Yehova kuti watipenge ivyo tikukhumbikwira pa umoyo.
“TIKHORWENGE NA VINTHU IVI”
10. Kasi ‘ntchisisi’ wuli icho Paulosi wakayowoya?
10 Paulosi wakapelekaso ulongozgi wakuyanako waka kwa Timote, ndipo ulongozgi uwu ukugwiraso ntchito kwa ise. Wakalemba kuti: “Ntheura pakuŵa na vyakurya, vyakuvwara na nyumba, tikhorwenge na vinthu ivi.” (1 Tim. 6:8) Kasi ichi chikung’anamura kuti tileke kurya chakurya chiwemi, kuŵa na malo ghawemi ghakukhala, panji kugura malaya ghaphya? Fundo ya Paulosi ni iyi yayi. Paulosi wakang’anamuranga kuti tikwenera kukhorwa na vinthu vyakuthupi ivyo tili navyo. (Fil. 4:12) Ichi ndicho chikaŵa “chisisi” cha Paulosi. Chinthu chakuzirwa chomene kwa ise mbubwezi withu na Chiuta, katundu withu yayi.—Hab. 3:17, 18.
Ŵaisrayeli ‘ŵakasoŵa kanthu chara’ mu vyaka 40 ivyo ŵakaŵa mu mapopa. Tikwenera kukhorwa na ivyo tili navyo pasono. (Wonani ndime 11) *
11. Kasi tingasambirako vichi ku mazgu agho Mosesi wakaphalira Ŵaisrayeli pa nkhani ya kukhorwa?
11 Ivyo ise tingawona kuti tikukhumbikwira, vingapambana na ivyo Yehova wangawona kuti tikukhumbikwira nadi. Wonani ivyo Mozesi wakaphalira Ŵaisrayeli pamanyuma pakuti ŵakhala vyaka 40 mu mapopa. Iyo wakati: “Yehova Chiuta winu wamutumbikani pa chilichose icho mukuchita. Wakumanya makora kuti mukwenda mu mapopa ghakuru agha. Yehova Chiuta winu waŵa namwe vyaka 40 ivi, ndipo mundasoŵerwepo kanthu.” (Doto. 2:7) Pa vyaka 40 vira, Yehova wakapelekanga mana ku Ŵaisrayeli kuŵa chakurya. Kweniso malaya ghawo agho ŵakafuma nagho ku Eguputo, Yehova wakawoneseska kuti ghaleke kumara. (Doto. 8:3, 4) Nangauli panyake ŵanji ŵakawonanga kuti ivi vikaŵa vyakukwana yayi, kweni Mozesi wakakumbuska Ŵaisrayeli kuti ŵakaŵa na chilichose icho ŵakakhumbikwiranga. Yehova wangakondwa chomene para nase tingakhorwanga na ivyo tili navyo, kweniso kuŵa ŵakuwonga nanga pangaŵa pa vinthu vichoko ivyo watichitira. Tiviwonenge kuti ni vitumbiko vyakufuma kwa iyo.
GOMEZGANI KUTI YEHOVA WAMUPWELELERANINGE
12. Kasi ntchivichi chikulongora kuti Davide wakathembanga Yehova m’malo mwa maluso ghake?
12 Davide wakamanya kuti Yehova ngwakugomezgeka ndipo wakupwelelera chomene ŵanthu awo ŵakumutemwa. Nangauli apo Davide wakalembanga Salimo 34 umoyo wake ukaŵa kuti uli pangozi, kweni chigomezgo chake mwa Yehova chikaŵa chankhongono chomene mwakuti wakawonanga nga ‘mungelo wa Yehova wamuzingilizga.’ (Sal. 34:7) Panyake wakayaniskanga mungelo wa Yehova na umo musilikari wakuchitira para wali ku nkhondo, kuti nyengo zose wakuŵa maso kulaŵiska ŵalwani. Nangauli Davide wakaŵa chinkhara pa nkhondo, kweniso Yehova wakamulayizga kuti waŵenge themba, kweni wakagomezga luso lake yayi pakuponya libwe panji pakugwiliskira ntchito lupanga kuti wathereske ŵalwani ŵake. (1 Sam. 16:13; 24:12) Wakaŵika chigomezgo chake mwa Chiuta, pakumanya kuti mungelo wa Yehova wakuvikilira ‘wose awo ŵakopa Chiuta.’ Mbunenesko kuti ise tikukhazga kuti Chiuta watithaskenge mwamunthondwe yayi. Kweni tikumanya kuti wose awo ŵakugomezga Yehova, ŵazamupokera umoyo wamuyirayira nanga pasono ŵangafwa.
Panyengo ya suzgo yikuru, Gogi wa Magogi wangazakayezga kutiwukira mu zinyumba zithu. Kweni tili na chigomezgo chose kuti Yesu na ŵangelo ŵake ŵazamuŵa ŵakuwona ivyo wakuchita, ndipo ŵazamutivikilira (Wonani ndime 13)
13. Para Gogi wa Magogi wazakatiwukira, chifukwa wuli tizamuwoneka ŵambura kuvikilirika, kweni chifukwa wuli tikwenera kopa chara? (Wonani chithuzi cha pa chikopi.)
13 Sonosono apa, chigomezgo chithu mwa Yehova chakuti wangativikilira, chiyezgekenge. Para Gogi wa Magogi, uko nkhukolerana kwa mitundu, wazakawukira ŵanthu ŵa Chiuta, panji tingazakawona nga watikomenge. Tizamukhumbikwira kugomezga Yehova kuti watithaskenge na kutivikilira kwambura kutondeka. Ku ŵamitundu, tizamuwoneka nga ni mberere zambura muliska izo zilije wakuzivikilira. (Ezek. 38:10-12) Tizamuŵavya chirwero chilichose, kweniso ŵambura kumanya kurwa nkhondo. Mitundu yizamuwona kuti ntchipusu kutiparanya. Yizamumanya yayi kuti ŵangelo ŵa Yehova ŵanozgeka kale kutilwera nkhondo. Kweni ise tizamumanya chifukwa tili na chipulikano. Mitundu yizamuzizikika chomene para ŵankhondo ŵakuchanya ŵazakamba kutilwera.—Chivu. 19:11, 14, 15.
NOZGEKERANITHU SONO VYAMUNTHAZI
14. Kasi tingachita wuli sono kuti tinozgekerethu ivyo vichitikenge munthazi?
14 Kasi tinganozgekera wuli vyamunthazi pasono? Chakwamba, tikwenera yayi kuwona kuti katundu withu ngwakuzirwa chomene, chifukwa zuŵa linyake tizamukhumbikwira kumuleka. Tikweneraso kukhorwa na ivyo tili navyo, na kuŵa ŵachimwemwe chifukwa chakuŵa paubwezi na Yehova. Para tamumanya makora Yehova ndipo tingaŵa na chigomezgo kuti wazamukwaniska nadi kutivikilira para Gogi wa Magogi wazakatiwukira.
15. Kasi Davide ivyo vikamuchitikirapo kumanyuma, vikamovwira wuli kumanya kuti nyengo zose Yehova wamovwirenge?
15 Wonaniso icho chikawovwira Davide, icho nase chingatovwira kunozgekera viyezgo vyamunthazi. Davide wakati: “Chetani mwe, muwone kuti Yehova ni muwemi. Ngwakukondwa munthu uyo wakubisama mwa iyo.” (Sal. 34:8) Mazgu agha ghakulongora chifukwa icho Davide wakagomezgeranga Yehova kuti wamuvikilirenge. Davide kanandi wagomezganga Chiuta, ndipo Chiuta wakamukhuŵazgapo yayi. Mwachiyelezgero, apo Davide wakaŵa muwukirano wakakumana na Goliyati uyo wakaŵa chinkhala chakofya cha Ŵafilisiti, ndipo wakachiphalira kuti: “Muhanya uno Yehova wakupelekenge mu woko lane.” (1 Sam. 17:46) Pamanyuma, Davide wakamba kuteŵetera mu nyumba ya Themba Sauli, ilo likayezgapo kanandi waka kuti limukome. Kweni “Yehova wakaŵa” nayo Davide. (1 Sam. 18:12) Chifukwa chakuti Davide wakamanyanga umo Yehova wakamovwilirapo kumanyuma, wakaŵa na chigomezgo chose kuti wamovwirengeso panyengo iyo wakaŵa mu masuzgo.
16. Kasi mphanyengo wuli apo ‘tingacheta’ na kuwona uwemi wa Yehova?
16 Usange sono tikugomezga chomene Yehova kuti watilongozgenge, chizamuŵaso chipusu kunthazi kuzakamugomezga kuti watovwirenge. Pakukhumbikwira chipulikano mwa Yehova kweniso kuŵa ŵakhumbisiska, kuti tipemphe holide kwa abwana ŵithu ku ntchito na chilato chakuti tilute ku ungano wa dera panji wa chigaŵa, panyakeso kupempha kuti tichepeskeko utali wanyengo yakugwilira ntchito kuti tisangikenge pa maungano gha mpingo na kunjira mu uteŵeti nyengo zose. Kweni wuli usange bwana wakana pempho lithu ndipo ntchito yatimalira? Kasi tili na chipulikano mwa Yehova kuti wangatitaya yayi, kweniso kuti watipenge ivyo tikukhumbikwira pa umoyo? (Heb. 13:5) Ŵanandi awo ŵakuchita uteŵeti wanyengozose ŵangalongosora ivyo vili kuŵachitikirapo ivyo vikulongora kuti Yehova wakaŵawovwira apo ŵakasoŵerathu pakukora. Yehova ngwakugomezgeka.
17. Kasi lemba la chaka cha 2022 ndakuti wuli, ndipo chifukwa wuli ndakwenelera nadi?
17 Na Yehova pafupi, palije chifukwa chakopera ivyo vizenge munthazi. Chiuta withu watovwirenge nyengo zose, chikuru tikulutilira kudangizga khumbo lake pakwamba mu umoyo withu. Kuti tikumbuskike kuzirwa kwa kunozgekerathu masuzgo agho ghali panthazi apa, kweniso kuzirwa kwa kugomezga Yehova kuti wazamutitaya yayi, Wupu Wakulongozga wasankha lemba la Salimo 34:10 kuŵa lemba la chaka cha 2022, lakuti: “Awo Ŵakupenja Yehova Ŵasoŵenge Kanthu Kawemi Chara.”
SUMU 38 Wamuzgoraninge Ŵankhongono
^ Lemba la chaka cha 2022 lafuma pa Salimo 34:10, apo pakuti: “Awo ŵakupenja Yehova ŵasoŵenge kanthu kawemi chara.” Kweni ŵateŵeti ŵa Yehova ŵakugomezgeka ŵanandi, ŵalije ndalama zinandi panji vinthu vinandi vyakuthupi. Ipo chifukwa wuli tikuyowoya kuti “ŵasoŵenge kanthu kawemi chara”? Ndiposo chifukwa wuli kupulikiska makora vesi ili kungatovwira kunozgekera masuzgo agho ghakwiza munthazi?
^ Wonani “Mafumbo Ghakufumira ku Ŵaŵazgi” mu Gongwe la Mulinda la Seputembala 15, 2014.
^ MAZGU GHAKULONGOSORA CHITHUZI: Nanga ni apo wakabisamanga mu mphanji kuchimbira Themba Sauli, Davide wakawonganga ivyo Yehova wakamupanga.
^ MAZGU GHAKULONGOSORA CHITHUZI: Ŵaisrayeli ŵati ŵafuma mu Eguputo, Yehova wakaŵapanga mana kuŵa chakurya kweniso wakapangiska malaya ghawo kuti ghaleke kumara.
