1. Chifukwa wuli mazuŵa ghano ŵanthu ŵanandi ŵakuligomezga yayi Baibolo?

 ŴANTHU ŵanandi mazuŵa ghano ŵakukayikira chilichose. Kweniso ŵakumanya yayi uyo ŵangamugomezga. Ŵakukayikira usange ŵanthu awo iwo ŵakuŵagomezga, nga mbandyali, ŵasayansi, panji ŵanthu ŵabizinesi, ŵakuŵaghanaghanira nadi. Kweniso ŵakuŵachindika viŵi yayi ŵaliska ŵavisopa awo ŵakujichema kuti Mbakhristu. Ntheura ntchakuzizika yayi kuti ŵakuligomezga yayi Baibolo, buku ilo ŵaliska aŵa ŵakuti ŵakulilondezga.

2. Kuyana na Salimo 119:160, kasi tikugomezga kuti vichi?

² Pakuti ndise ŵateŵeti ŵa Yehova, ndise ŵakukhorwa kuti iyo ni “Chiuta waunenesko” ndiposo kuti wakutikhumbira viwemi. (Sal. 31:5; Yes. 48:17) Tikugomezga ivyo tikuŵazga mu Baibolo chifukwa ‘mazgu ghose gha Chiuta mbunenesko.’ (Ŵazgani Salimo 119:160.) Tikukolerana navyo ivyo yikalemba nkhwantha yinyake yakusanda Baibolo, iyo yikati: “Palije icho Chiuta wali kuyowoya icho ntchautesi panji chitondekenge kufiskika. Ŵanthu ŵa Chiuta ŵakugomezga vyose ivyo wali kuyowoya, chifukwa ŵakumugomezga Chiuta uyo wali kuyowoya mazgu agha.”

3. Kasi mu nkhani iyi tiwonenge vichi?

³ Kasi tingawovwira wuli ŵanthu ŵanyake kuti nawo ŵaligomezgenge chomene Baibolo nga umo ise tikuligomezgera? Tiyeni tidumbiskane vifukwa vitatu ivyo tingaligomezgera Baibolo. Tiwonenge kuti uthenga wa mu Baibolo undasinthe kufuma apo ukalembekera, tiwonengeso umo mauchimi ghanyake gha mu Baibolo ghafiskikira, kweniso umo uthenga wa mu Baibolo ukusinthira umoyo wa ŵanthu.

4. Chifukwa wuli ŵanthu ŵanyake ŵakukayikira uthenga wa mu Baibolo?

⁴ Yehova Chiuta wakagwiliskira ntchito ŵanalume 40 ŵakugomezgeka kuti ŵalembe Baibolo. Ndipouli, palije mipukutu yakwambilira  iyo ŵakalemba iyo yichalipo m’paka sono. b Mabaibolo ghose agho tili nagho sono, ghali kufuma ku mipukutu iyo nayo yikakopereka kufuma ku mipukutu yinyake. Ivi vikupangiska kuti ŵanthu ŵanyake ŵakayikirenge usange uthenga uwo tili nawo mu Baibolo sono, ni wenewura uwo ukaŵa mu mipukutu yakwambilira. Kasi namwe muli kujifumbapo umo tingasimikizgira kuti uthenga wa mu Baibolo undasinthe?

5. Kasi Malemba Ghachihebere ghakakopereka wuli? (Wonani chithuzi cha pa chikopi.)

⁵ Kuti uthenga wake usungike, Yehova wakalangura ŵanthu ŵake kuti ŵakoperenge uthenga uwu. Wakaphalira mathemba gha Israyeli kuti ghakoperenge Dango, ndipo wakimika Ŵalevi kuti ŵasambizgenge Dango ili ŵanthu. (Doto. 17:18; 31:24-26; Neh. 8:7) Ŵayuda ŵakati ŵakoleka wuzga kuluta ku Babuloni, gulu la nkhwantha lakumanya kukopera Malemba, likamba kukopera Malemba Ghachihebere kuya mu mipukutu yinandi. (Ezir. 7:6, mazgu ghamusi) Ŵanalume aŵa ŵakagwiranga ntchito iyi mwakupwelelera chomene. Para ŵamara kukopera ŵakapendanga lizgu lililose ilo lalembeka kuti ŵawoneseske kuti paleke kusazgika mazgu panji kuwuskikapo. Nangauli ŵakachitanga nthena, kweni pakuti ŵanthu mbambura kufikapo, mu mipukutu yinyake mukasangikanga nipera tumaubudi tunyake tuchokotuchoko. Kweni pakuti mipukutu yakuyana waka na iyi yikaŵa kuti yakopelekaposo kale, tumaubudi utu tukamanyikwa. Kasi tukamanyikwa wuli?

6. Kasi tumaubudi uto tuli mu mipukutu ya mu Baibolo tukumanyikwa wuli?

⁶ Nkhwantha zakusanda Baibolo mazuŵa ghano zili na nthowa yakumanyira usange awo ŵakakoperanga Baibolo mu nyengo yakale ŵakabudiska tunthu tunyake pakukopera. Wonani chiyelezgero ichi. Tiyelezgere kuti ŵanthu 100 ŵaphalirika kuti ŵakopere nkhani yinyake na bolopeni, mbwenu munthu yumoza wabudiska pachoko waka vinthu vinyake pakukopera. Nthowa iyo tingamanyira ivyo wabudiska nkhuyaniska ivyo iyo wakopera na ivyo ŵanyake 99 ŵakopera. Mwakuyana waka, kuti nkhwantha zakusanda Baibolo zimanye apo munthu munyake uyo wakakoperanga mupukutu wakabudiska panji kuwuskapo mazgu ghanyake, zikuyaniska mupukutu wake na mipukutu yinyake yakupambanapambana ya Baibolo.

7. Kasi awo ŵakakoperanga mipukutu ya Baibolo ŵakachitanga wuli mulimo wawo?

⁷ Awo ŵakakoperanga Baibolo kufuma ku mipukutu yakumasinda ŵakafwilirapo chomene kuti ŵalembe vyaunenesko. Wonani ivyo vikulongora kuti fundo iyi njaunenesko. Mupukutu wakale chomene uwo muli Malemba ghose Ghachihebere, ukalembeka mu 1008 panji 1009 C.E. Ukuchemeka Leningrad Codex. Kweni sonosono apa, mipukutu yinandi ya Baibolo panji vigaŵa waka vya mipukutu vili kusangika, ndipo ni vyakale chomene pafupifupi vyaka 1,000 kuluska mupukutu wa Leningrad Codex. Munthu munyake wangaghanaghana kuti, pakuti mipukutu yakopereka mwakuwerezgawerezga na ŵanthu ŵakupambanapambana kwa vyaka vyakujumpha 1,000, ndikuti mazgu agho ghali mu mupukutu wa Leningrad Codex ghakwenera kuti ghakupambana chomene na agho ghali mu mipukutu yakale chomene yira. Kweni ndimo viliri yayi. Nkhwantha izo zikayaniskanga mipukutu yakale chomene na yasonosonoko, zikasanga kuti nangauli mazgu na kalongosolero ka vinthu vinyake kakupambanako kweni ng’anamuro panji kuti uthenga wake undasinthe.

8. Kasi pali mphambano pakati pa mipukutu yasonosono ya Malemba Ghachigiriki na mipukutu yinyake yakale chomene?

⁸ Ŵakhristu ŵakwambilira nawo ŵakakoperanga mipukutu ya Malemba Ghachigiriki. Iwo ŵakakopera mwakupwelelera chomene mipukutu ya mabuku 27 gha Malemba Ghachigiriki, ndipo ŵakagwiliskiranga ntchito mipukutu iyi pa maungano kweniso pa mulimo wawo wakupharazga. Nkhwantha yinyake yikati yayaniska mipukutu yakumanyuma iyo yikaŵa kuti yilipo panyengo iyo, na mipukutu yinyake ya pa nyengo yakuyana waka ya Malemba Ghachigiriki, yikayowoya kuti: “Panyengo yasono pali mipukutu yinandi chomene ya  Malemba Ghachigiriki kuluska mabuku ghanyake ghalighose, . . . ndipo mipukutu iyi yili na Malemba ghose Ghachigiriki.” Buku la Anatomy of the New Testament likuti: “Tikwenera kugomezga kuti ivyo tikuŵazga mazuŵa ghano mu Mabaibolo ghakugomezgeka gha Malemba Ghachigiriki, ni uthenga uwo ukuyana ndendende na uwo ukalembeka na awo ŵakalemba mipukutu ya Baibolo mu nyengo yakale.”

9. Kuyana na Yesaya 40:8, kasi unenesko ngwakuti wuli pakuyowoya za uthenga wa mu Baibolo?

⁹ Nkhwantha zinandi izo zikagwiranga mulimo wakukopera mipukutu ya Baibolo kwa vyaka vinandi zikachita mulimo uwu mwakupwelelera chomene kweniso mwaluso. Lekani mazuŵa ghano tili na Baibolo ilo uthenga wake ngwenewurawura, undasinthe cha. c Apa ntchakuwonekerathu kuti Yehova ndiyo wakapangiska kuti uthenga uwo wakukhumba kuphalira ŵanthu uleke kusintha, uŵe wenewuwo kwa vyaka vyose. (Ŵazgani Yesaya 40:8.) Kweni pangaŵa ŵanyake ŵangasuska kuti nangauli Baibolo uthenga wake undasinthe m’paka mazuŵa ghano, kweni chikung’anamura kuti lili kupelekeka na Chiuta yayi. Sono tiyeni tiwone ukaboni wakuti Baibolo lili kupelekeka nadi na Chiuta.

10. Yowoyani uchimi umoza wa mu Baibolo uwo ukafiskika uwo ukulongora kuti mazgu agho ghali pa 2 Petrosi 1:21 ngaunenesko. (Wonani vithuzi.)

¹⁰ Mu Baibolo muli mauchimi ghanandi agho ghakafiskika mu nyengo yakale, ndipo ghanyake ghakafiska pati pajumpha vyaka vinandi chomene kufuma apo ghakalembekera. Nakuti mdauko ukulongora kuti mauchimi agha ghakafiskika nadi. Ivi vikutizizika yayi chifukwa tikumanya kuti Yehova ndiyo ni Mwenecho wa mauchimi ghose agho ghali mu Baibolo. (Ŵazgani 2 Petrosi 1:21.) Ghanaghanirani waka za mauchimi ghakuyowoya za kubwangandulika kwa msumba wakale wa Babuloni. Chapakatikati pa 778 na 732 B.C.E, ntchimi Yesaya yikalongozgeka na mzimu wa Chiuta kuti yiyowoyerethu kuti msumba wankhongono uwu uzamubwangandulika. Yikayowoya nanga ni zina la uyo wazamubwangandura msumba uwu, yikati ni Sayirasi. Ndipo yikayowoya mwakudunjika ivyo vizamuchitika kuti wabwangandure msumba uwu. (Yes. 44:27–45:2) Yesaya wakachimaso kuti Babuloni paumaliro wazamubwangandukirathu  muyirayira ndipo muzamukhalaso ŵanthu yayi. (Yes. 13:19, 20) Ivi ndivyo vikachitika nadi. Mu 539 B.C.E., Babuloni wakabwangandulika na Ŵamedi na Ŵaperesiya ndipo malo agha agho pakwamba ukaŵa msumba ukuru na wankhongono kweniso wakutowa, sono ni vibumira waka.—Wonani vidiyo yakuti Baibolo Likayowoyerathu Kuti Babuloni Wazamuparanyika mu buku lakuŵelengera pa kompyuta panji pa foni la Mungakondwa na Umoyo Kwamuyirayira!, sambiro 03 fundo 5.

11. Longosorani umo uchimi wa pa Daniyeli 2:41-43 ukufiskikira mazuŵa ghano.

¹¹ Mauchimi gha mu Baibolo ghakafiskikanga mu nyengo yakale pera yayi, nanga ni sono napo tikuwona mauchimi gha mu Baibolo ghakufiskika. Mwachiyelezgero, ghanaghanirani umo uchimi wa mu buku la Daniyeli ukufiskikira wakuyowoya za Muwuso wa pa Charu Chose wa Britain na America. (Ŵazgani Daniyeli 2:41-43.) Ivyo uchimi uwu ukayowoya vyafiskika ndendende, ukati muwuso uwu mu vigaŵa vinyake uzamuŵa ‘wankhongono’ nga ntchisulo, kweni mu vigaŵa vinyake uzamuŵa wambura nkhongono nga ni “dongo.” Ndipo ivi ndivyo vyachitika nadi. Muwuso wa Britain na America walongora nadi kuti uli na nkhongono nga ntchisulo, chifukwa ndiwo ukachita chigaŵa chikuru chomene pakuwina Nkhondo ziŵiri za pa Charu Chose, ndipo ukulutilira kuŵa na nkhongono chomene pa nkhondo. Kweni ŵanthu ŵa mu vyaru vyawo ŵapangiskaso kuti muwuso uwu uleke kuŵa na nkhongono chomene, chifukwa kanandi ŵakulwera wanangwa wawo, kwali mpha nkhani ya ntchito, kujiyimira paŵekha na vinyake. Kweniso ŵakuchita viwoneskero kuchichizga boma kuti lichite ivyo iwo ŵakukhumba. Nkhwantha yinyake iyo yikusanda umo ndyali zikwendera pa charu yikayowoya kuti: “Panyengo yasono palije charu pa charu chapasi icho kuli wanangwa chomene kweniso icho ŵanthu mbakugaŵikana chomene pa nkhani ya ndyali kuluska charu cha United States.” Ndipo charu cha Britain icho chikuwusira lumoza na charu cha United States, mwasonosono apa chaŵa chakugaŵikana chomene pa nkhani ya ubali uwo chikwenera kuŵa nawo na vyaru vya mu European Union. Kugaŵikana uku kwapangiska kuti chiŵe chakusuzga chomene kuti muwuso wa Britain na America uŵe na nkhongono chomene.

12. Kasi mauchimi gha mu Baibolo ghakutisimikizgira vichi?

¹² Mauchimi ghanandi gha mu Baibolo agho ghafiskika kale ghakukhozga chomene chigomezgo chithu kuti vyose ivyo Chiuta walayizga munthazi vifiskikenge nadi. Tikujipulika nga umo wakajipulikira wamasalimo uyo wakalomba kwa Yehova kuti: “Nkhunwekera chiponosko chinu, pakuti mazgu ghinu ntchigomezgo chane.” (Sal. 119:81) Mu Baibolo, Yehova watipa “munthazi muwemi na chigomezgo.” (Yer. 29:11) Chigomezgo chithu cha munthazi, chikuthemba pa kuyezgayezga kwa ŵanthu yayi, kweni pa malayizgo gha Yehova. Ipo tiyeni tilutilire kughagomezga chomene Mazgu gha Chiuta ndipo tingachita nthena usange tikuŵazga mauchimi agho ghali mu Baibolo.

13. Kuyana na lemba la Salimo 119:66, 138, kasi mbukaboni wuli unyake uwo ukulongora kuti Baibolo ndakugomezgeka?

¹³ Ukaboni unyake uwo ukulongora kuti tingagomezga nadi ivyo Baibolo likuyowoya, ngwakuti ulongozgi wake ukovwira ŵanthu para ŵakuwulondezga. (Ŵazgani Salimo 119:66, 138.) Mwachiyelezgero, ŵakutorana awo ŵakaŵa pafupi kulekana, sono mbakukondwa chifukwa cha kulondezga ulongozgi wa mu Baibolo. Ŵana ŵawo mbakukondwa chomene kulelekera mu mbumba Yachikhristu umo ŵakujipulika kuti mbakuvikilirika kweniso ŵakutemweka.—Efe. 5:22-29.

14. Yowoyani chiyelezgero chakulongora kuti kulondezga fundo za mu Baibolo kungawovwira ŵanthu kuti ŵaŵe na nkharo yiwemi.

¹⁴ Nanga ni ŵanthu awo ŵakaŵa vigeŵenga vyakofya chomene, ŵasintha umoyo wawo chifukwa cha kulondezga ulongozgi wavinjeru wa mu Baibolo. Wonani umo ulongozgi wa mu Baibolo ukawovwilira Jack uyo wakajalirika mu jele. d Iyo wakaŵa chigeŵenga chakofya chomene, ndipo mu  jele wakamanyikwanga kuŵa yumoza mwa ŵanyapara ŵakofya chomene awo ŵakaŵa kuti ŵanyongekenge. Kweni zuŵa linyake Jack wakaŵapo pa sambiro la Baibolo. Wakakhwaskika chomene na lusungu ulo ŵabali awo ŵakachitiskanga sambiro ŵakamulongora, ndipo nayo wakamba kusambira Baibolo. Wati wamba kulondezga ivyo wakasambiranga, wakamba kusintha nkharo yake kweniso wakamba kuŵa munthu walusungu. Nyengo yikati yajumphapo, Jack wakaŵa mupharazgi wambura kubatizika ndipo pamanyuma wakabatizika. Iyo wakapharazganga mwamwamphu chomene ku ŵakayidi ŵanyake vya Ufumu wa Chiuta, ndipo wakawovwira ŵanthu pafupifupi ŵanayi kuti ŵasambire unenesko. Zuŵa lakuti wanyongekere likati lakwana, Jack wakaŵa kuti wasintha chomene. Yumoza wa maloya ghake wakati: “Uyu ni Jack uyo nkhamumanyanga vyaka 20 ivyo vyajumpha yayi. Visambizgo vya Ŵakaboni ŵa Yehova vyasintha chomene umoyo wake.” Nangauli Jack ŵakamunyonga nadi, kweni nkharo yake yikulongora kuti Mazgu gha Chiuta ghali na nkhongono yakusintha ŵanthu kuti ŵaŵe na nkharo yiwemi.—Yes. 11:6-9.

15. Kasi kulondezga unenesko wa mu Baibolo kukovwira wuli kuti ŵanthu ŵa Yehova ŵapambanenge na ŵanthu ŵa mu charu ichi? (Wonani chithuzi.)

¹⁵ Chifukwa cha kulondezga unenesko wa mu Baibolo, ŵanthu ŵa Chiuta mbakukolerana chomene. (Yoh. 13:35; 1 Kor. 1:10) Mtende withu kweniso kukolerana kwithu kukuwoneka makora chomene, chomene para tikuyaniska umo charu ntchakugaŵikirana pa nkhani ya ndyali, mutheto, na kasangiro. Munyamata munyake zina lake Jean, wakakhwaskika chomene wakati wawona kukolerana uko kuli pakati pa Ŵakaboni ŵa Yehova. Munyamata uyu wakakulira ku charu cha ku Africa. Apo nkhondo yapawenenawene yikati yamba ku charu chake wakanjira usilikari, ndipo pamanyuma wakachimbilira ku charu chapafupi na charu chake. Ku charu ichi wakakumana na Ŵakaboni ŵa Yehova. Jean wakuti: “Nkhasambira kuti awo ŵali mu chisopa chaunenesko ŵakuchitako yayi vinthu vya ndyali ndipo mbakugaŵikana yayi. Kweni ŵakutemwana yumoza na munyake.” Iyo wakutiso: “Kumanyuma umoyo wane wose ukaŵa pakuvikilira charu chane. Kweni nkhati nasambira unenesko wa mu Baibolo, nkhasankha kugwiliskira  ntchito umoyo wane kuti niteŵetere Yehova.” Jean wali kusintha chomene. M’malo mwa kurwa nkhondo na fuko linyake, sono wakupharazga uthenga wa mu Baibolo ku waliyose uyo wakumana nayo. Ntheura pakuti uthenga wa mu Baibolo ukovwira waliyose mwambura kupwelerako kanthu zakuti ngwa fuko wuli panji mtundu wuli, uwu mbukaboni wankhongono uwo tingagomezgera Baibolo kuti ni Mazgu nadi gha Chiuta.

16. Chifukwa wuli ntchakuzirwa chomene kukhozga chigomezgo chithu mu Mazgu gha Chiuta?

¹⁶ Apo charu ichi chikulutilira kuhenipirahenipira, nyengo zinyake tingayezgeka kuti tikayikirenge ivyo Mazgu gha Chiuta ghakuyowoya. Ŵanthu ŵangamba kupanda maghanoghano ghakuti tikayikirenge mu mitima yithu usange ivyo Baibolo likuyowoya ni vyaunenesko nadi, kweniso usange Yehova wakugwiliskira nadi ntchito muzga wakugomezgeka na wavinjeru kuti watilongozgenge mazuŵa ghano. Kweni usange takhorwa kuti Mazgu gha Yehova ngaunenesko nadi, tipusikikenge yayi usange ŵanthu aŵa ŵakukhumba kulopweska chipulikano chithu. Tidumurenge mu mitima yithu ‘kuti tipulikirenge ulongozgi wa Yehova nyengo zose, m’paka umaliro.’ (Sal. 119:112) Tikhozgekenge soni yayi kuphalirako ŵanji unenesko uwo uli mu Mazgu gha Chiuta na kuŵachiska kuti ŵalondezgenge ivyo vili mu Baibolo. (Sal. 119:46) Tizizipizgenge masuzgo ghakuru, nanga yingaŵa nthambuzgo, ndipo ‘tizikirenge na kuŵa na chimwemwe.’—Kol. 1:11; Sal. 119:143, 157.

17. Kasi lemba la chaka cha 2023 litikumbuskenge vichi?

¹⁷ Tikuwonga chomene kuti Yehova wativumbulira unenesko. Unenesko uwu ukutovwira kuŵa na chigomezgo ndiposo kuti tileke kutimbanizgika luŵiro maghanoghano. Kweniso watisambizga umo tikwenera kukhalira mu charu ichi icho chikulutilira kutimbanizgika na kuhangayika. Ukutipa chigomezgo kuti vinthu viŵenge makora munthazi para Ufumu wa Chiuta wazakamba kuwusa. Ipo, mphanyi lemba la chaka cha 2023 latovwira kuŵa na chigomezgo chose kuti vyose ivyo vili mu Mazgu gha Chiuta ni vyaunenesko.—Sal. 119:160.