1-2. Chifukwa wuli tikusangikapo pa Chikumbusko chaka chilichose?

 VYAKA pafupifupi 2,000 ivyo vyajumpha, Yesu wakapeleka umoyo wake chifukwa cha ise, ndipo wakajura nthowa kuti tizakasange umoyo wamuyirayira. Kweni pa usiku wakuti namachero wafwenge, Yesu wakalangura ŵalondezgi ŵake kuti ŵakumbukirenge sembe yake iyo wakapeleka, kwizira mu chiphikiro chipusu icho pakuŵa chingwa na vinyo.—1 Kor. 11:23-26.

² Tikupulikira dango la Yesu chifukwa chakuti tikumutemwa chomene. (Yoh. 14:15) Chaka chilichose mu nyengo ya Chikumbusko, tikulongora kuti tikuwonga pa ivyo wali kutichitira, para tikughanaghanirapo na kulomba vyakukhwaskana na umo nyifwa yake yiliri yakuzirwa ku ŵanthu. Kweniso tikukondwa kusazgirako uteŵeti withu pa kuchemerako ŵanthu ŵanandi ku ungano wapadera uwu. Ndipo tikuŵikapo mtima kuleka kuzomerezga chilichose kutitondeska kufikapo pa Chikumbusko.

3. Kasi tiwonenge vichi mu nkhani iyi?

³ Mu nkhani iyi, tiwonenge vinthu vitatu ivyo ŵanthu ŵa Yehova ŵakuchita makora chomene pakukumbukira nyifwa ya Yesu: (1) kuchita Chikumbusko munthowa iyo Yesu wakasambizga, (2) kuchemerako ŵanji ku Chikumbusko, na (3) kuchita Chikumbusko nangauli ŵali mu ukhaliro wakusuzga.

4. Kasi tikusambira vichi pa Chikumbusko chaka chilichose, ndipo chifukwa wuli tikwenera kuwuwona mwakupepuka yayi unenesko uwo tikusambira? (Luka 22:19, 20)

⁴ Chaka chilichose pa Chikumbusko, tikutegherezga nkhani ya mu Baibolo iyo yikuzgora mafumbo ghakupambanapambana. Tikusambira chifukwa icho ŵanthu ŵakukhumbikwira sembe yakuwombora kweniso umo nyifwa ya munthu yumoza yingalipilira zakwananga za ŵanthu ŵanandi. Tikukumbuskikaso ivyo chingwa na vinyo vikwimira kweniso awo ŵakwenera kurya na kumwa. (Ŵazgani Luka 22:19, 20.) Ndipo tikughanaghanirapo vitumbiko ivyo ŵanthu awo ŵali na chigomezgo cha pa charu chapasi ŵazamusanga. (Yes. 35:5, 6; 65:17, 21-23) Tikwenera kuwuwona mwakupepuka yayi unenesko uwu. Ŵanthu mabiliyoni ghanandi ŵakuwumanya yayi unenesko uwu, ndiposo ŵakumanya yayi umo sembe ya Yesu yiliri yakuzirwa. Kweniso ŵakukumbukira nyifwa ya Yesu mu nthowa iyo mweneko wakasambizga ŵalondezgi ŵake yayi. Chifukwa wuli?

5. Ŵapositole ŵanandi ŵakati ŵafwa, kasi ŵanthu ŵakamba kuchita wuli pakukumbukira nyifwa ya Yesu?

⁵ Ŵapositole ŵanandi ŵa Yesu ŵakati ŵafwa waka, Ŵakhristu ŵatesi ŵakanjira mu mpingo. (Mat. 13:24-27, 37-39) Ŵakamba “kuyowoya vinthu vyakubendera kuti ŵaguzire ŵasambiri kwa iwo.” (Mil. 20:29, 30) Chimoza cha “vinthu vyakubendera” icho Ŵakhristu ŵatesi ŵakamba kusambizga, ntchakuti Yesu wakapeleka thupi lake “kamoza pera [yayi] kuyegha zakwananga za ŵanandi,” nga umo Baibolo likuyowoyera. Kweni ŵakuti sembe iyi yikwenera kupelekeka mwakuwerezgawerezga. (Heb. 9:27, 28) Mazuŵa ghano, ŵanandi ŵakugomezga chisambizgo chautesi ichi. Sabata yiliyose ŵakuluta ku tchalitchi, nyengo zinyake zuŵa waka lililose, kuti ŵakumbukire sembe ya Yesu. Ndipo mu chisopa cha Katolika ŵakuchema chakuchitika ichi kuti “Sembe ya Misa.” b Nangauli ŵanthu mu visopa vinyake, ŵakukumbukira nyifwa ya Yesu sabata yiliyose yayi, kweni ŵakumanya makora yayi ivyo sembe iyi yikung’anamura. Ŵanyake ŵakujifumba kuti, ‘Kasi nyifwa ya Yesu yingawovwira nadi kuti zakwananga zane zigowokereke?’ Chifukwa wuli ŵakufumba fumbo ili? Chifukwa ntchakuti ŵali kupusikika na ŵanthu awo ŵakuyowoya kuti zakwananga zingagowokereka yayi na sembe ya Yesu. Kasi ŵalondezgi ŵa Yesu ŵaunenesko ŵawovwira wuli ŵanthu kupulikiska ivyo sembe ya Yesu yikung’anamura kweniso nthowa yakwenelera ya kukumbukira nyifwa ya Yesu?

6. Kufika 1872, kasi kagulu ka ŵasambiri ŵa Baibolo kakamanya vichi?

⁶ M’ma 1800, kagulu ka ŵasambiri ŵa Baibolo ako kakalongozgekanga na Charles Taze Russell, kakamba kusanda mwakupwelelera Malemba. Ŵanalume ŵa mu kagulu aka, ŵakakhumbanga kumanya ivyo sembe ya Yesu yikung’anamura kweniso umo tikwenera kukumbukilira nyifwa yake. Kufika mu 1872, ŵakamanya kuti Yesu wakapeleka nadi sembe yakuwombora chifukwa cha ŵanthu wose. Ivyo ŵakasambira ŵakakhala navyo waka chete yayi. Kweni ŵakavimanyiska ku ŵanthu ŵanyake kwizira mu mabuku, manyuzipepara, na magazini. Ndipo kufuma apo, nawo ŵakamba kuchita Chikumbusko kamoza pa chaka nga umo ŵakachitiranga Ŵakhristu ŵakwambilira.

7. Kasi tikupindura wuli na ivyo ŵasambiri ŵa Baibolo ŵakwambilira ŵakasanda?

⁷ Mazuŵa ghano tikupindura na vinthu ivyo Ŵakhristu ŵa mu nyengo yakale ŵakasanda. Kasi tikupindura wuli? Yehova watovwira kupulikiska ivyo sembe ya Yesu yikung’anamura, kweniso ivyo yichitirenge ise na ŵanthu  wose. (1 Yoh. 2:1, 2) Tamanyaso kuti Baibolo likulongosora vigomezgo viŵiri vya ŵanthu awo ŵakukondweska Chiuta. Ŵanthu ŵachoko waka ŵamusanga umoyo wambura kufwa kuchanya, apo ŵanandi ŵali na chigomezgo cha kuzakakhala pa charu chapasi kwamuyirayira. Tikuŵa paubwezi wakukhora na Yehova para tikughanaghanirapo pa umo Chiuta wakutitemwera kweniso umo tikupindulira na sembe yakuwombora. (1 Pet. 3:18; 1 Yoh. 4:9) Ntheura nga mbabali ŵithu ŵakugomezgeka ŵa mu nyengo yakale, nase tikuchema ŵanthu kuti tizakachitire lumoza Chikumbusko, mu nthowa iyo Yesu wakasambizga ŵalondezgi ŵake kuti ndimo tichitirenge.

8. Kasi ŵanthu ŵa Yehova ŵakuchita wuli kuti ŵachemereko ŵanji ku Chikumbusko? (Wonani chithuzi.)

⁸ Ŵanthu ŵa Yehova ŵachemerako ŵanji ku Chikumbusko kwa vyaka vinandi. Mu 1881, ŵabali na ŵadumbu ku United States ŵakachemeka kuti ŵakawungane pamoza ku nyumba ya mubali munyake ku Allegheny, Pennsylvania, kuti ŵakachite ungano wapadera uwu. Pamanyuma, mpingo uliwose ukachitanga Chikumbusko pawekha. Mu Malichi 1940, ŵapharazgi ŵakaphalirika kuti ŵangachemerako waliyose mu chigaŵa chawo uyo ngwakunweka. Mu 1960, kwanyengo yakwamba, Beteli yikapeleka mathirakiti yakuchemera ŵanthu ku Chikumbusko ku mipingo. Kufuma waka nyengo iyi, tagaŵira mathirakiti mabiliyoni ghanandi ghakuchemera ŵanthu ku Chikumbusko. Chifukwa wuli tikuŵikapo chomene mtima kuchemerako ŵanji?

9-10. Kasi mbanjani ŵakupindura pa mulimo uwo tikuchita wakuchemerako ŵanji ku Chikumbusko? (Yohane 3:16)

⁹ Chifukwa chimoza icho tikuchemerako ŵanji ku Chikumbusko, ntchakuti tikukhumba kuti  awo nkhakwamba kwizako, ŵamanye unenesko wakukhwaskana na ivyo Yehova na Yesu ŵali kutichitira. (Ŵazgani Yohane 3:16.) Tikugomezga kuti ivyo ŵakuwona na kupulika pa Chikumbusko vikuŵachiska kuti ŵamanye vinandi, kweniso kuti ŵaŵe ŵateŵeti ŵa Yehova. Kweni ŵanji ŵakupinduraso.

¹⁰ Tikuchemaso ŵakulopwa na awo ŵali kuleka kuteŵetera Yehova. Tikuchita nthena kuti tiŵakumbuske kuti Chiuta wachali kuŵatemwa. Ŵanandi ŵakuzomera para taŵachema, ndipo tikukondwa chomene para ŵafikapo pa Chikumbusko. Kufikapo pa Chikumbusko, kukuŵakumbuska umo ŵakakondweranga apo ŵakateŵeteranga Yehova. Chiyelezgero ni Monica. c Mu nyengo ya COVID-19, wakazomerezgekaso kuŵa mupharazgi. Pamanyuma pa Chikumbusko cha mu 2021, wakayowoya kuti: “Chikumbusko ichi chaŵa chapadera chomene kwa ine. Kwanyengo yakwamba kwa vyaka 20, naneso napharazgirapo ŵanthu na kuŵachema kuti ŵasangikepo pa Chikumbusko. Nachita vyose ivyo ningafiska chifukwa nkhumuwonga chomene Yehova na Yesu pa ivyo ŵanichitira.” (Sal. 103:1-4) Kwali ŵanthu ŵazomere ntchemo yithu panji yayi, kweni tikufwilirapo nipera kuchemerako ŵanji ku Chikumbusko, pakumanya kuti Yehova wakuwonga chomene kuyezgayezga kwithu.

11. Kasi Yehova watumbika wuli kuyezgayezga kwithu pa mulimo wakuchemerako ŵanthu ku Chikumbusko? (Hagayi 2:7)

¹¹ Yehova watumbika chomene kuyezgayezga kwithu pakuchemerako ŵanthu ku Chikumbusko. Mu 2021, nangauli pakaŵa vyakujandizga chifukwa cha muliri wa COVID-19, kweni ŵanthu awo ŵakafika pa Chikumbusko ŵakaŵa 21,367,603. Chiŵelengero cha Ŵakaboni ŵa Yehova pa charu chose chapasi, chikunjiramo pafupifupi kaŵiri na hafu mu chiŵelengero ichi. Mbunenesko kuti Yehova wakunweka chomene na chiŵelengero yayi, kweni wakunweka na munthu waliyose payekha uyo wafikapo. (Luka 15:7; 1 Tim. 2:3, 4) Ndipouli, tikugomezga kuti para tikuchemerako ŵanji ku Chikumbusko, Yehova wakutovwira kuti tisange ŵanthu awo mbamitima yiwemi.—Ŵazgani Hagayi 2:7.

12. Kasi ntchivichi chingapangiska kuŵa chakusuzga kuchita Chikumbusko? (Wonani chithuzi.)

¹² Yesu wakayowoyerathu kuti mu mazuŵa ghaumaliro, tikumanenge na masuzgo ghakupambanapambana nga nkhususkika na ŵamumbumba yithu, nthambuzgo, nkhondo, miliri, na vinyake vyantheura. (Mat. 10:36; Mrk. 13:9; Luka 21:10, 11) Nyengo zinyake vinthu ivi vikupangiska kuti chiŵe chakusuzga kukumbukira nyifwa ya Yesu. Kasi ŵabali na ŵadumbu ŵithu ŵachita wuli na masuzgo agha, ndipo Yehova waŵawovwira wuli?

13. Kasi Yehova wakamovwira wuli Artem chifukwa cha kulongora chikanga kweniso kuŵikapo mtima kuti wachite Chikumbusko apo wakaŵa mu jele?

¹³ Kuŵikika mu jele. Ŵabali ŵithu awo ŵali mu jele chifukwa cha chipulikano chawo, ŵakuchita vyose ivyo ŵangafiska kuti ŵakumbukire nyifwa ya Yesu. Chiyelezgero ni Artem. Mu nyengo ya Chikumbusko cha mu 2020, wakaŵikika mu selo la mamita 17 (17 square-meter) ilo mukaŵa ŵakayidi ŵanyake ŵankhondi. Nangauli wakaŵa mu jele, wakafiska kusanga vimanyikwiro vya pa Chikumbusko, ndipo wakanozga vyakuti wadumbenge nkhani ya Chikumbusko kuti wapindure. Kweni ŵakayidi ŵanyake ŵara ŵakatemwanga chomene kukhweŵa na kutuka. Kasi wakachita wuli? Wakaŵapempha usange ŵangaleka dankha kukhweŵa na kutuka kwa ora limoza pera. Artem wakazizwa chomene kuti ŵakayidi ŵanyake ŵara ŵakazomera kuti ŵakhweŵenge yayi panji kutuka panyengo ya Chikumbusko. Iyo wakuti: “Nkhaŵaphalira kuti ŵaŵepo pa Chikumbusko.” Nangauli ŵakati ŵakukhumba yayi kupulika  vyakukhwaskana na chakuchitika ichi, kweni ŵati ŵawona na kupulika kuti Artem wakuchita Chikumbusko, ŵakamufumba vyose vyakukhwaskana na chakuchitika ichi.

14. Kasi ŵanthu ŵa Yehova ŵakachitanga wuli Chikumbusko nangauli kukaŵa muliri wa COVID-19?

¹⁴ Muliri wa COVID-19. Muliri uwu ukati wamba, ŵanthu ŵa Yehova ŵakatondekanga kusangikapo pa Chikumbusko maso na maso. Kweni ivi vikaŵatondeska yayi kuchita Chikumbusko. d Mipingo iyo yikaŵa na Intaneti yikachitanga Chikumbusko kwizira pa vidiyokonferensi. Kweni wuli pakuyowoya za ŵanthu mamiliyoni ghanandi awo ŵakaŵavya Intaneti? Mu vyaru vinyake, maofesi gha minthavi ghakanozga ndondomeko yakuti ŵanthu ŵawonelere pa TV nkhani ya Chikumbusko panji ŵategherezge pa wayilesi. Kweniso maofesi gha minthavi ghakajambura nkhani ya Chikumbusko mu viyowoyero vyakujumpha 500, mwakuti ŵanthu awo ŵakukhala ku malo gha ku mizi chomene nawo ŵachite Chikumbusko. Ndipo ŵabali ŵakagaŵa nkhani zakujambura izi ku ŵabali na ŵadumbu ŵa mu vigaŵa ivi.

15. Kasi mukusambirako vichi kwa msambiri munyake wa Baibolo zina lake Sue?

 ¹⁵ Kususkika na ŵamumbumba. Ŵanyake suzgo likuru ilo ŵakukumana nalo kuti ŵasangikepo pa Chikumbusko, nkhususkika na ŵamumbumba yawo. Wonani ivyo vikachitikira msambiri munyake wa Baibolo zina lake Sue. Mu 2021, pa zuŵa lakuti namachero Ntchikumbusko, Sue wakaphalira munthu uyo wakamusambizganga Baibolo, kuti wachitenge yayi Chikumbusko chifukwa chakuti ŵamumbumba yake ŵakumususka. Uyo wakamusambizganga Baibolo wakamuŵazgira lemba la Luka 22:44. Kufuma apo wakamulongosolera kuti para takumana na masuzgo, tikwenera kuyezga Yesu mwa kumuphalira Yehova mu lurombo kweniso kumugomezga chomene. Zuŵa lakulondezgapo, Sue wakanozgerathu chingwa na vinyo kweniso wakawonelera pulogiramu ya Kusopa kwa Mulenji pa jw.org. Pa usiku uwu, apo wakaŵa yekha mu chipinda chake, wakategherezga Chikumbusko kwizira pa foni. Pamanyuma, wakalembera msambizgi wake kuti: “Mayiro mukanikhozga chomene. Nkhachita vyose ivyo ningafiska kuti nichite Chikumbusko, ndipo Yehova wakanovwira nadi. Nkhutondeka na kuyowoya wuwo umo nakondwera, kweniso nkhuwonga chomene.” Kasi namwe mukuwona kuti Yehova wangamovwirani para mukusangana na suzgo lakuyana waka?

16. Chifukwa wuli tili na chigomezgo chose kuti Yehova watumbikenge kuyezgayezga kwithu kuti tizakasangikepo pa Chikumbusko? (Ŵaroma 8:31, 32)

¹⁶ Yehova wakuwonga chomene kuyezgayezga kwithu uko tikuchita kuti tikumbukire nyifwa ya Yesu. Tili na chigomezgo chose kuti watitumbikenge para tikuwonga pa ivyo watichitira. (Ŵazgani Ŵaroma 8:31, 32.) Ipo tiyeni tiŵikepo mtima kuti tikasangikepo pa Chikumbusko cha chaka chino, kweniso kuti timuchitire vinandi Yehova mu nyengo ya Chikumbusko.