Kasi Mukuchita Vinthu na Ŵanakazi nga Umo Yehova Wakuchitira?
TILI na mwaŵi wakuteŵetera Yehova lumoza na ŵadumbu ŵanandi ŵakugomezgeka. Tikuŵatemwa chomene kweniso kuŵawonga ŵadumbu ŵakugomezgeka na ŵakulimbikira aŵa. a Ntheura mwaŵabali fwiliranipo kuchita nawo vinthu mwalusungu, mwakuŵaghanaghanira kweniso mwantchindi. Kweni pakuti ndise ŵakwananga, nyengo zinyake vingatisuzga kuchita nthena. Nakuti ŵabali ŵanyake padera pakuti mbambura kufikapo, paliso vifukwa vinyake ivyo vikuŵatondeska kuchita vinthu mwakwenelera na ŵanakazi.
Ŵanyake ŵali kukulira mu mitheto iyo ŵanakazi ŵakuŵawona kuti mbapasi. Mwachiyelezgero, Hans, mulaŵiliri wadera wa ku Bolivia, wakati: “Ŵanalume ŵanyake ŵali kukulira mu mutheto uwo ŵanalume ŵakujiwona kuti mbapachanya chomene kuluska ŵanakazi. Ndipo ivi vikupangiska kuti ŵaŵayuyurenge chomene.” Shengxian, uyo ni mulara ku Taiwan, wakati: “Uko nkhukhala, ŵanalume ŵanandi ŵakuwona kuti ŵanakazi ŵakwenera yayi kupelekapo maghanoghano ghawo. Usange mwanalume wangazunura za fundo yinyake iyo yikayowoyeka na mwanakazi, ŵanalume ŵanyake ŵakumuchindika yayi.” Ŵanalume ŵanyake ŵakulongora kuti ŵakuyuyura ŵanakazi mu nthowa zinyakeso. Mwachiyelezgero, ŵangayowoya milangwe yakulongora kuti ŵanakazi mbapasi.
Chakukondweska ntchakuti mwanalume waliyose wangasintha umo wakuwonera ŵanakazi nanga wangaŵa kuti wakulira mu mutheto wuli. Wangamazga maghanoghano ghakuti ŵanalume mbapachanya kuluska ŵanakazi. (Efe. 4:22-24) Kweni kuti ivi vichitike, wakwenera kuyezga Yehova. Mu nkhani iyi, tidumbiskanenge umo Yehova wakuchitira vinthu na ŵanakazi, umo ŵabali ŵangachitira vinthu na ŵanakazi nga umo Yehova wakuchitira, kweniso umo ŵalara ŵangachitira kuti ndiwo ŵawenge panthazi kuchindika ŵadumbu.
KASI YEHOVA WAKUCHITA WULI VINTHU NA ŴANAKAZI?
Yehova ntchiyelezgero chiwemi pa umo tingachitira vinthu na ŵanakazi. Pakuŵa Dada walusungu, iyo wakuŵatemwa ŵana ŵake wose. (Yoh. 3:16) Ndipo ŵadumbu ŵakugomezgeka mbana ŵake ŵanakazi ŵakutemweka. Wonani nthowa zakulondezgapo izi, izo Yehova wakulongolera kuti wakuchindika ŵanakazi.
Wakuchita nawo vinthu mwambura kutemwera. Yehova wakalenga mwanalume na mwanakazi mu chikozgo chake. (Gen. 1:27) Ŵanalume wakaŵalenga ŵamahara panji ŵaluso chomene kuluska ŵanakazi yayi. Panji wakuŵatemwa chomene ŵanalume kuluska ŵanakazi yayi. (2 Mid. 19:7) Wakalenga ŵanalume na ŵanakazi mwakuyana waka kuti wose ŵangakwaniska kusambira unenesko wa mu Baibolo na kulondezga mikhaliro yake yiwemi. Kweniso ŵanalume na ŵanakazi ŵakugomezgeka wose Yehova wakuŵawona mwakuyana waka, kwali ŵazamukhala mu paradiso pa charu chapasi kwamuyirayira panji ŵamuŵa mafumu na ŵasembe kuchanya. (2 Pet. 1:1) Apa ntchakuwonekerathu kuti Yehova walije sankho ku ŵanakazi.
Wakuŵategherezga. Yehova wakuŵikako mahara chomene ku masuzgo agho ŵanakazi ŵakukumana nagho kweniso umo ŵakujipulikira. Mwachiyelezgero, wakategherezga na kuchitapo kanthu apo Hana na Rakelo ŵakamulombanga. (Gen. 30:22; 1 Sam. 1:10, 11, 19, 20) Yehova wakawovwiraso na mzimu utuŵa ŵanthu awo ŵakalembanga Baibolo kuti ŵalembemo nkhani za ŵanalume awo ŵakategherezganga ku ŵanakazi. Mwachiyelezgero, Abrahamu wakapulikira apo Yehova wakamuphalira kuti wapulikire muwoli wake Sara. (Gen. 21:12-14) Themba Davide likapulikira ivyo Abigelu wakayowoya. Nakuti wakawona kuti Yehova ndiyo wakatuma Abigelu kuti wayowoye nayo. (1 Sam. 25:32-35) Yesu uyo wakulongora ndendende mikhaliro ya Awiske, wakapulikira amama ŵake a Mariya. (Yoh. 2:3-10) Viyelezgero ivi vikulongora kuti nthowa yimoza iyo Yehova wakulongolera kuti wakuchindika ŵanakazi, nkhuŵategherezga.
Wakuŵagomezga. Mwachiyelezgero, Yehova wakamugomezga Eva kuti wawovwirenge Adamu kupwelelera charu chose. (Gen. 1:28) Pakuchita nthena vikalongoranga kuti Yehova wakawonanga Eva kuti ngwapasi kwa Adamu yayi, kweni kuti wakaŵa movwiri wakumwenelera. Yehova wakagomezgaso ntchimi zanakazi Debora na Hulida kuti zipelekenge ulongozgi ku ŵanthu ŵake, kusazgapo ku mweruzgi na themba. (Ŵeru. 4:4-9; 2 Mathe. 22:14-20) Mazuŵa ghano Yehova walongora kuti wakuŵagomezga ŵanakazi Ŵachikhristu pakuŵapa milimo yakuti ŵachite. Ŵadumbu ŵakugomezgeka aŵa ŵanyake mbapharazgi, ŵanyake mbapayiniya, ndipo ŵanyake mbamishonale. Ŵakovwiraso pa mulimo wakuzenga, kunozga Nyumba za Ufumu kweniso nyumba za pa Beteli. Kweniso ŵanyake ŵakuteŵetera pa Beteli, ndipo ŵanyake ku maofesi yakung’anamulirako mabuku. Ŵadumbu aŵa ŵali nga ni wumba ukuru uwo Yehova wakuwugwiliskira ntchito kuti wafiske khumbo lake. (Sal. 68:11) Apa vikulongolerathu kuti Yehova wakuwona ŵanakazi kuti mbapasi yayi.
KASI ŴABALI ŴANGACHITA WULI KUTI ŴACHITENGE VINTHU NA ŴANAKAZI NGA UMO YEHOVA WAKUCHITIRA?
Ŵabali kuti mumanye usange mukuchita vinthu na ŵanakazi nga umo Yehova wakuchitira, mukwenera kujisanda mwakupwelelera umo mukuŵawonera kweniso umo mukuchitira nawo vinthu. Kuti tifiske kuchita nthena, tikukhumbikwira wovwiri. Nga umo mashini gha X-ray ghakovwilira kumanya usange mtima wa munthu uli na suzgo, mubwezi muwemi, kweniso Mazgu gha Chiuta ghangatovwira kumanya usange tili na maghanoghano ghalighose ghakubudika ghakukhwaskana na ŵanakazi. Kasi tingachita wuli kuti tipokere wovwiri?
Fumbani mubwezi muwemi. (Zinth. 18:17) Tingafumba mubwezi withu uyo tikumugomezga uyo ngwalusungu kweniso uyo wangatibisira chilichose yayi. Tingamufumba kuti: “Kasi ukuwona kuti ŵadumbu nkhuchita nawo wuli vinthu? Kasi ŵakujipulika kuti nkhuŵachindika? Kasi chilipo icho ningasintha pa umo nkhuchitira nawo vinthu?” Para mubwezi winu wamuphalirani apo mukwenera kusintha, kukhuŵara yayi, nesi kupenja vifukwa vyakujibakira. M’malo mwake, yezgayezgani kuti musinthe.
Musambirenge Mazgu gha Chiuta. Nthowa yiwemi chomene iyo tingamanyira usange tikuchita makora vinthu na ŵadumbu, nkhusanda vyakuchita vithu mwakugwiliskira ntchito Mazgu gha Chiuta. (Heb. 4:12) Apo tikusambira Baibolo, tikusanga nkhani za ŵanalume awo ŵakachita makora vinthu na ŵanakazi na awo ŵakachita makora yayi vinthu na ŵanakazi. Pamanyuma tingayaniska umo iwo ŵakachitiranga vinthu na ŵanakazi na umo ise tikuchitira nawo vinthu. Mwakusazgirapo, kuŵazga nkhani zinandi za mu Baibolo za umo tingachitira vinthu na ŵanakazi, kungatovwira kuti tileke kukhozgera maghanoghano ghakubudika ghakukhwaskana na ŵanakazi chifukwa cha kuwona waka vesi limoza. Mwachiyelezgero, lemba la 1 Petrosi 3:7 likuti muwoli wakwenera kupika ‘ntchindi nga ntchiŵiya chambura kukhora.’ b Kasi fundo iyi yikung’anamura kuti ŵanakazi mbapasi, ŵambura mahara panji ŵalije maluso kuyana na ŵanalume? Chara nadi! Yaniskani ivyo wakalemba Petrosi na ivyo vili pa Ŵagalatiya 3:26-29. Lemba ili likuti Yehova wali kusora ŵanakazi na ŵanalume wuwo kuti ŵakawuse pamoza na Yesu kuchanya. Para tikusambira Mazgu gha Chiuta na kufumba mubwezi muwemi kuti wayowoyepo umo tikuchitira vinthu na ŵanakazi, timanyenge umo tingalongolera ntchindi zakwenelera ku ŵadumbu ŵithu.
KASI ŴALARA ŴAKULONGORA WULI KUTI ŴAKUCHINDIKA ŴADUMBU?
Ŵabali mu mpingo ŵangasambira umo ŵangachitira vinthu mwantchindi na ŵadumbu para ŵangayezga ŵalara ŵachitemwa. Kasi ŵalara ŵakuchita wuli kuti ŵaŵe chiyelezgero chiwemi pa kulongora ntchindi ku ŵadumbu? Wonani nthowa zakulondezgapo izi.
Ŵakuŵawonga. Mpositole Paulosi wakalongora chiyelezgero chiwemi icho ŵalara ŵangalondezga. Wakawonga ŵadumbu ŵanyake pawumba mu kalata iyo wakalembera mpingo wa ku Romu. (Rom. 16:12) Ghanaghanirani waka umo ŵadumbu aŵa ŵakajipulikira apo kalata ya Paulosi yikaŵazgikanga ku mpingo. Mwakuyana waka, ŵalara ŵakuŵawonga ŵadumbu chifukwa cha mikhaliro yawo yiwemi kweniso chifukwa cha milimo iyo ŵakuchitira Yehova. Ivi vikovwira ŵadumbu kumanya kuti ŵanthu mu mpingo ŵakuŵachindika kweniso kuŵawonga chomene. Mazgu ghakukhozga agho mulara wangayowoya ghangaŵa ghakovwira chomene ku ŵadumbu apo ŵakulutilira kuteŵetera Yehova mwakugomezgeka.—Zinth. 15:23.
Ŵawongani
Para ŵakuwonga ŵadumbu, ŵalara ŵakuyowoya kufumira pasi pa mtima kweniso ŵakuzunura mwakudunjika icho ŵakuŵawongerapo. Chifukwa wuli? Mudumbu munyake zina lake Jessica wakati: “Vikuŵa makora para mulara waphalira mudumbu kuti ‘tawonga ivyo mwachita.’ Kweni vikuŵa makora chomene para wayowoya mwakudunjika ivyo wakutiwonga nga nkhovwira ŵana ŵithu kuti ŵaleke kuchita chiwawa pa maungano, panji chifukwa tangwendera ku nyumba ya uyo tikusambira nayo Baibolo kuti tikamutore na kwizira nayo lumoza ku maungano.” Para ŵalara ŵakuzunura vinthu ivyo ŵakuŵawongera, ŵadumbu ŵakujipulika kuti mbakukhumbikwa kweniso mbakuzirwa mu mpingo.
Ŵakuŵategherezga ŵadumbu. Ŵalara ŵakujiyuyura ŵakumanya kuti ndiwo pera yayi ŵali na fundo ziwemi. Ŵalara aŵa ŵakuŵapempha ŵadumbu kuti ŵayowoyepo masachizgo ghawo, na kutegherezga mwakupwelelera para ŵakuyowoya. Para ŵalara ŵakuchita nthena ŵakukhozga ŵadumbu kweniso iwo ŵakusanga chandulo. Mwawuli? Mulara munyake zina lake Gerardo, uyo wakuteŵetera pa Beteli, wakati: “Nawona kuti para nafumba ŵadumbu kuti ŵayowoyepo masachizgo ghawo pa mulimo unyake, mulimo uwo nkhuwuchita makora chomene. Kanandi ŵakuŵa kuti ŵali kuchitapo ntchito iyo kwanyengo yitali kuluska ŵabali ŵanandi.” Mu mpingo, ŵadumbu ŵanandi mbapayiniya, ntheura ŵakumanya vinandi vyakukhwaskana na ŵanthu ŵa mu chigaŵa chakupharazgako. Mulara munyake zina lake Bryan wakuti: “Ŵadumbu ŵithu ŵali na mikhaliro yiwemi kweniso maluso agho ghangawovwira mu gulu la Yehova. Ntheura sangani chandulo na ivyo ŵakumanya!”
Ŵategherezgani
Ŵalara ŵavinjeru ŵakwenera yayi kusulako waka masachizgo gha ŵadumbu. Chifukwa wuli? Mulara munyake zina lake Edward wakuti: “Maghanoghano gha mudumbu kweniso ivyo wakumanyapo pa nkhani yinyake vingawovwira mubali kupulikiska makora nkhani yinyake, kweniso kuŵa na lusungu ku ŵanji.” (Zinth. 1:5) Nanga mulara wangaghagwiliskira ntchito yayi masachizgo gha mudumbu, kweni wakwenera kumuwonga chifukwa cha kupeleka masachizgo ghake.
Ŵakuŵasambizga ŵadumbu. Ŵalara ŵavinjeru ŵakupenja mipata yakusambizgira ŵadumbu. Mwachiyelezgero, ŵangaŵasambizga ŵadumbu umo ŵangachitiskira ungano wakunozgekera uteŵeti mwakuti ŵaŵenge ŵakunozgeka kuchitiska para mubali wakubatizika palije. Ŵangaŵasambizga umo ŵangagwiliskilira ntchito mashini ghanyake mwakuti ŵawovwirengepo pa mulimo wakuzenga mu gulu la Yehova. Pa Beteli, ŵalaŵiliri ŵa ma dipatimenti ŵali kuŵasambizga ŵadumbu kuchita milimo yakupambanapambana, kusazgapo kunozga vinthu, kugura vinthu, akaunting’i, kweniso mulimo wakukhwaskana na vya makompyuta na milimo yinyake yantheura. Para ŵalara ŵakusambizga ŵadumbu, ŵakulongora kuti ŵadumbu ŵakuŵawona kuti mbakuzirwa kweniso ŵakuŵagomezga.
Ŵasambizgani
Ŵadumbu ŵanandi ŵakugwiliskira ntchito ivyo ŵasambizgika na ŵalara kovwilira ŵanji. Mwachiyelezgero, ŵadumbu ŵanyake ŵakugwiliskira ntchito maluso ghakuzenga agho ŵali kusambizgika, kovwilira ŵanji kuzengaso nyumba zawo izo zikanangika na soka la chilengiwa. Ŵadumbu ŵanyake ŵakugwiliskira ntchito maluso agho ŵali kusambizgika gha umo ŵangachitira upharazgi wa uko kukusangika ŵanthu ŵanandi, kovwira ŵadumbu ŵanandi kuti nawo ŵachitengeko upharazgi uwu. Kasi ŵadumbu ŵakujipulika wuli na ŵalara awo ŵakuŵasambizga? Mudumbu munyake zina lake Jennifer wakuti: “Apo nkhachitangako mulimo wakuzenga Nyumba ya Ufumu yinyake, mulara uyo wakalaŵiliranga ntchito iyi wakapatura nyengo kunisambizga. Wakawonanga ntchito iyo nkhachitanga, na kuniwonga. Nkhakondwanga kugwira nayo chifukwa nkhawonanga kuti wakunizirwiska kweniso kunigomezga.”
VYANDULO IVYO VIKUŴAPO PARA TIKUCHITA VINTHU NA ŴADUMBU NGA TILI BANJA LIMOZA
Tikuŵatemwa chomene ŵadumbu ŵithu ŵakugomezgeka nga umo Yehova wakuchitira. Ntheura tikuchita nawo vinthu nga mbamumbumba waka yithu. (1 Tim. 5:1, 2) Tikunotha nawo chomene ndipo tikukondwa kugwilira nawo pamoza. Ndipo tikukondwa chomene para ŵakumanya kuti tikuŵatemwa kweniso ndise ŵakunozgeka kuŵawovwira. Mudumbu munyake zina lake Vanessa wakuti: “Nkhumuwonga chomene Yehova pa kuniŵika mu gulu lake, ilo lili na ŵabali awo ŵakunikhozga chomene.” Mudumbu munyake wa ku Taiwan wakuti: “Nkhuwonga chomene kuti Yehova na gulu lake ŵakuwona kuti ŵanakazi mbakuzirwa ndipo ŵakuchindika maghanoghano ghawo. Ivi vikukhozga chipulikano chane kweniso vikunovwira kuti niwongenge chomene pakuŵa mu gulu la Yehova.”
Yehova wakwenera kuti wakukondwa chomene para wakuwona ŵabali ŵakugomezgeka ŵakuyezgayezga kuwona na kuchita vinthu na ŵanakazi nga umo iyo wakuchitira. (Zinth. 27:11) Mulara munyake ku Scotland zina lake Benjamin wakuti: “Charu chikuwona kuti ŵanakazi mbapasi chomene. Ntheura ŵanakazi para ŵali ku Nyumba ya Ufumu, tikukhumba kuti ŵawonenge kuti tikuŵachindika kweniso kuŵatemwa.” Mphanyi tose tachita ivyo tingafiska kuti tiyezge Yehova pakuchita vinthu na ŵadumbu mwachitemwa kweniso mwantchindi.—Rom. 12:10.
a Mu nkhani iyi, lizgu lakuti “ŵadumbu” likuyowoya za ŵadumbu Ŵachikhristu, ŵakubabika nawo nyumba yimoza yayi.
b Kuti mumanye vinandi vya mazgu ghakuti “ntchiŵiya chambura kukhora,” wonani nkhani yakuti “Mtengo wa ‘Chotengera Chochepa Mphamvu’” mu Gongwe la Mulinda la Chichewa la Meyi 15, 2006, kweniso nkhani yakuti “Ulongozgi Wavinjeru kwa Ŵakutorana” mu Gongwe la Mulinda la Malichi 1, 2005.
