1. Chifukwa wuli nyengo zinyake tingaŵa na wofi?

 WALIYOSE nyengo zinyake wakuŵa na wofi. Mbunenesko kuti chifukwa cha kusambira Baibolo, tikopa yayi ŵakufwa, viŵanda, panji ivyo vichitikenge munthazi. Kweni tikukhala mu nyengo iyo kukuchitika vinthu “vyakofya” nga zinkhondo, uchigeŵenga kweniso matenda. (Luka 21:11) Tingawopaso ŵanthu, kusazgapo maboma agho ghakutitambuzga panji ŵamumbumba yithu awo ŵakususka kusopa kwaunenesko. Ŵanji ŵakopa kuti ŵangakwaniska yayi kuzizipizga chiyezgo icho ŵangasangana nacho sono, panji icho ŵangasangana nacho munthazi.

2. Longosorani umo vinthu vikaŵira kwa Davide apo wakaŵa ku Gati.

² Davide nayo nyengo zinyake wakawopanga. Mwachiyelezgero, apo Themba Sauli likakhumbanga kumukoma, Davide wakachimbilira ku Gati, msumba wa Ŵafilisiti. Akishi themba la Gati, mwaluŵiro wakamanya kuti Davide wakaŵa chinkhara pa nkhondo uyo ŵanthu ŵakamwimbira sumu apo wakakoma Ŵafilisiti “vikwi na vikwi.” Davide ‘wakawopa chomene.’ (1 Sam. 21:​10-12) Wakawopanga ivyo Akishi wamuchitirenge. Kasi ntchivichi chikamovwira Davide kuti waleke kopa?

3. Kuyana na Salimo 56:​1-3, 11, kasi Davide wakachita wuli kuti waleke kopa?

³ Mu Salimo 56, Davide wakayowoya umo wakajipulikiranga apo wakaŵa ku Gati. Salimo ili likulongora umo Davide wakawopera, kweniso icho chikamovwira kuti waleke kopa. Davide para wamba kopa, wakagomezganga Yehova. (Ŵazgani Salimo 56:​1-3, 11.) Wakaŵa na vifukwa vyakupulikikwa vyakugomezgera Yehova. Na wovwiri wa Yehova, Davide wakachita vinthu vyachilendo chomene: Wakapusikizgira kuti ngwakufuntha! Ndipo pulani iyi yikakora nadi. Sono Akishi wakamuwonanga Davide kuti  ni munthu wakufuntha, mulwani yayi. Ntheura Davide wakapona.—1 Sam. 21:13–22:1.

4. Kasi tingachita wuli kuti timugomezgenge chomene Yehova? Yowoyani chiyelezgero.

⁴ Nase tingaleka kopa para tikugomezga Yehova. Kweni kasi tingachita wuli kuti tigomezgenge chomene Yehova, chomenechomene para tikopa? Ghanaghanirani chiyelezgero ichi. Para mwalwara, nyengo zinyake pakwamba mungaŵa na wofi. Ndipouli, para mukumugomezga dokotala uyo wakumovwirani, wofi ungachepa. Dokotala uyu wangaŵa kuti wali kovwirapo kale ŵalwari ŵanandi awo nawo ŵakaŵa na nthenda yakuyana na yinu. Wakumutegherezgani chomene ndipo mukukhorwa kuti wakupulikiska umo mukujipulikira. Ndipo wakusachizga kuti wamupani wovwiri uwo wachizgapo ŵanthu ŵanyake. Mwakuyana waka, tingamugomezga chomene Yehova para tikughanaghanirapo ivyo wali kuchita kale, ivyo wakuchita sono, kweniso ivyo watichitirenge panthazi apa. Ivi ndivyo Davide wakachita. Apo tikuwona mazgu ghake agho ghali mu Salimo 56, ghanaghanirani umo namwe mungachitira kuti mugomezgenge chomene Yehova na kuleka kopa.

KASI NI VICHI IVYO YEHOVA WALI KUCHITA KALE?

5. Kasi Davide wakaghanaghanirangapo vichi kuti waleke kopa? (Salimo 56:​12, 13)

⁵ Nangauli Davide umoyo wake ukaŵa pangozi, kweni wakalutilira kughanaghanira ivyo Yehova wakaŵa kuti wachita kale. (Ŵazgani Salimo 56:​12, 13.) Ndimo Davide wakachitiranga umoyo wake wose. Mwachiyelezgero, nyengo zinyake Davide wakaghanaghanirangapo pa vinthu ivyo Yehova wali kulenga, ndipo vikamukumbuskanga kuti Yehova ngwankhongono chomene kweniso kuti wakuŵikako mahara ku ŵanthu. (Sal. 65:​6-9) Wakaghanaghanirangaso ivyo Yehova wakachitira ŵanthu ŵanyake. (Sal. 31:19; 37:​25, 26) Kweni chomene wakaghanaghanirangapo ivyo Yehova wakamuchitira iyo. Kwambira waka apo Davide wakaŵa mwana, Yehova wakamuvikiliranga. (Sal. 22:​9, 10) Ghanaghanirani umo kughanaghanirapo vinthu ivi kukamovwilira Davide kuti wagomezgenge chomene Yehova.

6. Kasi ntchivichi chitovwirenge kuti tigomezgenge chomene Yehova para tikopa?

 ⁶ Para mwamba kopa, jifumbani kuti, ‘Kasi ni vichi ivyo Yehova wali kuchita kale?’ Ghanaghaniranipo pa vinthu ivyo wali kulenga. Mwachiyelezgero, para ‘tikulaŵisiska’ umo Yehova wakupwelelelera viyuni na maluŵa, vinthu ivyo vikalengeka mu chikozgo chake yayi kweniso ivyo vikumusopa yayi, mbwenu tigomezgenge chomene kuti nase watipwelelerenge. (Mat. 6:​25-32) Ghanaghaniraniso ivyo Yehova wachitira ŵasopi ŵake. Mungasambira za munthu munyake mu Baibolo, uyo wakalongora chipulikano chikuru chomene, panji mungaŵazga za ivyo vikachitikira muteŵeti munyake wa Yehova wa mazuŵa ghano. a Kweniso ghanaghaniranipo pa umo Yehova wakumupwelelerani. Kasi Yehova wakamovwirani wuli kuti mumanye unenesko? (Yoh. 6:44) Kasi Yehova wazgora wuli malurombo ghinu? (1 Yoh. 5:14) Kasi zuŵa lililose mukusanga chandulo wuli na sembe yakuwombora ya Mwana wake?—Efe. 1:7; Heb. 4:​14-16.

7. Kasi ivyo vikachitikira ntchimi Daniyeli vikamovwira wuli Vanessa kuti waleke kopa?

⁷ Vanessa, b mudumbu wa ku Haiti, wakasangana na suzgo ilo likachitiska kuti waŵe na wofi. Mwanalume munyake wa mu chigaŵa icho wakakhalanga wakamwimbiranga foni na kumulembera mameseji zuŵa lililose, kumuchichizga kuti waŵe nayo pa chibwezi. Vanessa wakakana. Kweni mwanalume uyu wakakwiya chomene ndipo wakamofyanga kuti wamutimbenge. Vanessa wakuti: “Nkhawopa chomene.” Kasi Vanessa wakachita wuli? Wakachita vyose ivyo wangafiska kuti wajivikilire. Mulara wakamovwira kuti wakaphare ku polisi. Kweniso wakaghanaghanirapo pa umo Yehova wakavikililira ŵateŵeti ŵake kumanyuma. Vanessa wakuti: “Munthu wakwamba uyo nkhaghanaghanirapo ni ntchimi Daniyeli. Wakaponyeka mu chizongwe cha nkhalamu nangauli palije icho wakabuda. Kweni Yehova wakamuvikilira. Ntheura nkhamulomba Yehova na kumulekera nkhani iyi mu mawoko ghake. Kufuma apo nkhawopangaso yayi.”—Dan. 6:​12-22.

GHANAGHANIRANI IVYO YEHOVA WAKUCHITA SONO

8. Kasi Davide wakakhorwa kuti vichi? (Salimo 56:8)

⁸ Nangauli Davide umoyo wake ukaŵa pangozi chomene apo wakaŵa ku Gati, kweni wakaŵika maghanoghano pa vinthu ivyo wakawopanga yayi. M’malo mwake, wakaghanaghaniranga ivyo Yehova wakamuchitiranga panyengo iyo. Davide wakawonanga kuti Yehova wakumulongozga, kumuvikilira kweniso kumupulikiska umo wakajipulikiranga. (Ŵazgani Salimo 56:8.) Davide wakaŵaso na ŵabwezi ŵakugomezgeka awo ŵakamovwiranga, nga ni Yonatani na Wasembe Mukuru Ahimeleki. (1 Sam. 20:​41, 42; 21:​6, 8, 9) Nangauli Themba Sauli likakhumbanga kumukoma, kweni Davide wakapona. Wakakhorwa kuti Yehova wakamanyanga makora suzgo yake kweniso umo wakajipulikiranga.

9. Kasi Yehova wakuwona vichi?

⁹ Para mwasangana na suzgo ilo lamupangiskani kuti muŵe na wofi, kumbukani kuti Yehova wakuwona suzgo linu na kumanya umo mukujipulikira. Mwachiyelezgero, padera pakuwona umo Ŵaisrayeli ŵakatambuzgikiranga mu Eguputo, Yehova wakawonaso “vyakuŵinya vyawo.” (Eks. 3:7) Davide wakimba kuti Yehova wakawona “visuzgo” vyake na “kukweŵeka” kwake. (Sal. 31:7) Nanga ni apo ŵanthu ŵa Chiuta ŵakasuzgikanga chifukwa cha kusankha uheni vinthu, napo Yehova ‘wakakweŵekanga.’  (Yes. 63:9) Para mukopa, Yehova wakumanya umo mukujipulikira ndipo ngwakukhumbisiska kumovwirani kuti muleke kopa.

10. Chifukwa wuli mukukhorwa kuti Yehova wakumanya ivyo vikumuchitikirani kweniso kuti wamovwiraninge kuzizipizga suzgo yinu?

¹⁰ Para mwasangana na masuzgo, nyengo zinyake mungawona yayi umo Yehova wakumovwilirani. Kasi mungachita wuli? Mulombani kuti wamovwirani kuwona umo wakumovwilirani. (2 Mathe. 6:​15-17) Kufuma apo ghanaghanirani mafumbo agha: Kasi mwakhozgekapo na nkhani panji mazgoro agho ŵabali na ŵadumbu ŵakupeleka pa maungano gha mpingo? Kasi mwakhozgekapo na fundo za mu buku lithu lakulongosora Baibolo, vidiyo, panji sumu za mu JW Broadcasting? Kasi munyake wali kumuphaliranipo mazgu ghakukhozga panji kumuŵelengeranipo lemba lakukhozga? Ntchipusu kuwona mwakupepuka chitemwa icho ŵabali na ŵadumbu ŵithu ŵakutilongora kweniso chakurya chauzimu icho tikupokera. Kweni ivi ni vyawanangwa vyakuzirwa chomene vyakufuma kwa Yehova. (Yes. 65:13; Mrk. 10:​29, 30) Vyawanangwa ivi vikulongora kuti Yehova wakumupwelelerani. (Yes. 49:​14-16) Kweniso vikutipa vifukwa vyakukwana vyakumugomezgera.

11. Kasi ntchivichi chikawovwira Aida kuleka kopa?

¹¹ Aida, uyo wakukhala ku Senegal, wakawona umo Yehova wakamovwilira apo wakakumana na suzgo. Pakuti iyo ni mwana wakwamba mu mbumba yakwawo, ŵapapi ŵake ŵakakhazganga kuti ndiyo wapenjenge ndalama zakovwilira mbumba yose kweniso mweneko. Wati wasintha vinthu vinyake pa umoyo wake kuti wachite upayiniya, Aida wakamba kusuzgikira kusanga ndalama. Mbumba yakwake yikakwiya chomene ndipo yikamba kumususka. Iyo wakuti: “Nkhafipanga mtima kuti nitondekenge kupwelelera ŵapapi ŵane ndipo waliyose walekenge kunitemwa. Nyengo zinyake nkhimbanga mulandu Yehova chifukwa cha kuzomerezga kuti vinthu vifike paheni chomene.” Pamanyuma wakategherezga nkhani pa maungano. Aida wakuti: “Uyo wakadumbanga nkhani wakatikumbuska kuti Yehova wakumanya vyose ivyo vikutisuzga mu mtima withu. Chifukwa cha ulongozgi uwo ŵabali ŵalara kweniso ŵanji ŵakanipanga, pachoko na pachoko, nkhakhorwa kuti Yehova wakunitemwa.  Para nkhulomba kwa Yehova, nkhamba kuŵa na chigomezgo chose kuti wanovwirenge, ndipo nkhaŵanga na mtende wamumtima para nawona kuti malurombo ghane ghazgoreka.” Nyengo yati yajumphapo, Aida wakayisanga ntchito iyo yikamovwiranga apo wakachitanga upayiniya, kweniso kovwira ŵapapi ŵake na ŵanji. Iyo wakuti: “Nasambira kuti nimugomezgenge chomene Yehova. Sono para nalomba, wofi ukumara.”

IVYO YEHOVA WACHITENGE MUNTHAZI

12. Kuyana na Salimo 56:​9, kasi Davide wakagomezganga kuti vichi?

¹² Ŵazgani Salimo 56:9. Vesi ili likuvumburaso chinyake icho chikawovwira Davide kuti waleke kopa. Likulongora kuti Davide nanga ni apo umoyo wake ukaŵa pangozi, iyo wakaghanaghaniranga ivyo Yehova wamuchitirenge munthazi. Davide wakamanyanga kuti Yehova wamupumuzgenge panyengo yakwenelera. Kweniso Yehova wakaŵa kuti wayowoya kale kuti Davide ndiyo waŵenge themba lakulondezgapo la Israyeli. (1 Sam. 16:​1, 13) Kwa Davide, vyose ivyo Yehova wakalayizga vikaŵa nga vyachitika kale.

13. Kasi tikwenera kugomezga kuti Yehova wachitenge vichi?

¹³ Kasi imwe Yehova wamulayizgani vichi? Nangauli tikukhazga kuti wativikilirenge ku masuzgo ghose yayi, c kweni tikumanya kuti masuzgo ghose agho tikukumana nagho mu charu chiheni ichi, wazamughamazga mu charu chiphya. (Yes. 25:​7-9) Mlengi withu wali na nkhongono zakuwuskira ŵakufwa, kuchizga ŵalwari na kuwuskapo ŵakususka wose.—1 Yoh. 4:4.

14. Kasi tikwenera kughanaghanirapo vichi?

¹⁴ Para mwamba kopa, ghanaghanirani ivyo Yehova wachitenge munthazi. Ghanaghanirani umo muzamujipulikira para Satana kulije, ŵanthu ŵaheni kulije kuli ŵawemi pera, kweniso apo pachoko na pachoko tizamwamba kuŵa ŵarunji. Pa ungano wa chigaŵa wa 2014 pakaŵa chiyelezgero icho chikalongoranga umo tingachitira apo tikughanaghanirapo vya chigomezgo chithu. Dada wakadumbiskananga na mbumba yake umo lemba la 2 Timote 3:​1-5 mphanyi likalembekera, liŵenge kuti likayowoyanga ivyo vizamuchitika mu paradiso. Wakati: “Kweni umanye cheneichi, kuti mu charu chiphya nyengo zizamuŵa zakukondweska. Pakuti ŵanthu ŵazamutemwa ŵanyawo, vinthu vyauzimu, ŵazamuŵa ŵakujiyuyura, ŵakuchindika Chiuta, ŵakupulikira ŵapapi, ŵakuwonga, ŵakugomezgeka, ŵakutemwa mbumba zawo, ŵakupulika vya ŵanyawo, ŵakuyowoya viwemi vya ŵanji, ŵakujikora, ŵakuzika, ŵakutemwa uwemi, ŵambura kunotha, ŵakutemwa Chiuta m’malo mwa kutemwa vyakusanguluska, ŵakusopa Chiuta mwakujipeleka; ndipo ku aŵa ungapatukangako chara.” Kasi mukudumbiskana na ŵamumbumba yinu panji ŵasopi ŵanyinu umo umoyo uzamuŵira mu charu chiphya?

15. Nangauli Tanja wakawopanga, kasi chikamovwira ntchivichi kuti waleke kopa?

¹⁵ Mudumbu munyake ku North Macedonia zina lake Tanja wakaleka kopa wati wamba kughanaghanirapo vitumbiko ivyo wazamusanga munthazi. Ŵapapi ŵake ŵakamususkanga chomene wati wamba kusambira Baibolo. Iyo wakuti: “Vinthu vinyake ivyo nkhawopanga kuti vichitikenge, vikachitika nadi. Zuŵa lililose ilo nalutira ku maungano, para nawera amama ŵakanitimbanga. Ŵapapi ŵane ŵakanofya kuti ŵanikomenge para naŵa Kaboni wa Yehova.” Paumaliro, Tanja ŵakamuchimbizga pa nyumba. Kasi wakachita wuli? Iyo wakuti: “Nkhaghanaghaniranga umo nizamuŵira wakukondwa muyirayira chifukwa cha kusankha kulutilira kugomezgeka. Kweniso nkhaghanaghaniranga  umo Yehova wazamunitumbikira mu charu chiphya chifukwa cha kutaya chilichose mu charu ichi kweniso umo nizamuluwira viheni vyose.” Tanja wakasungilira nadi kunyoloka kwake. Ndipo na wovwiri wa Yehova, wakasanga malo ghakukhala. Sono Tanja wali kutengwa kwa mubali wakugomezgeka ndipo wose na mfumu wake ŵakuchita uteŵeti wanyengozose.

LUTILIRANI KUGOMEZGA CHOMENE YEHOVA

16. Kasi ntchivichi chizamutovwira kuti tileke kopa para tazakamba kuwona vyakuchitika ivyo vikayowoyekerathu pa Luka 21:​26-28?

¹⁶ Panyengo ya suzgo yikuru, ŵanthu “ŵazamufwa chipoyo chifukwa cha wofi.” Kweni ŵanthu ŵa Chiuta ŵazamopa yayi. (Ŵazgani Luka 21:​26-28.) Chifukwa wuli tizamopa yayi? Chifukwa tizamuŵa kuti tasambira kale kugomezga Yehova. Tanja, uyo tamuzunura kale, wakuyowoya kuti ivyo vikamuchitikirapo kumanyuma vikumovwira kulimbana na masuzgo ghanonono. Iyo wakuti: “Nasambira kuti palije suzgo ilo Yehova wangatondeka kutovwira kuti tizizipizge. Nyengo zinyake vingawoneka nga kuti awo ŵakutisuzga ndiwo ŵali na nkhongono chomene, kweni unenesko ngwakuti Yehova ndiyo ngwankhongono chomene kuluska iwo. Ndipo nanga suzgo yingaŵa yikuru wuli, kweni yizamumara.”

17. Kasi lemba lithu la chaka cha 2024 litovwirenge wuli? (Wonani chithuzi cha pa chikopi.)

¹⁷ Mazuŵa ghano ntchakawiro kopa. Kweni nga ni Davide, tingaleka kopa. Lemba lithu la chaka cha 2024 ni lurombo lwa Davide, ulo wakamuphalira Yehova kuti: “Para nawopa, nkhuthemba imwe.” (Sal. 56:3) Wonani ivyo yikayowoya nkhwantha yinyake yakusanda Baibolo vyakukhwaskana na vesi ili, yikati: “Davide wakalutilira yayi kughanaghanira vinthu ivyo vingamupangiska kopa, panji kughanaghanira vya suzgo lake. Kweni wakathemba Uyo wamuthaskenge.” Ghanaghaniranipo chomene vya lemba lithu la chaka, chomene para mwasangana na suzgo ilo likumupangiskani kuti mopenge. Patulani nyengo kughanaghanirapo ivyo Yehova wali kuchita kale, ivyo wakuchita sono kweniso ivyo wachitenge munthazi. Para muchitenge nthena, namwe muyowoyenge nga ni Davide kuti: “Nkhuthemba Chiuta, nkhopa chara.”—Sal. 56:4.