1. Kasi ntchivichi chikwiza mu maghanoghano ghinu para mukughanaghanira vya Yehova?

 KASI muli kujifumbapo kuti Yehova wakuwoneka wuli? Kasi ntchivichi chikwiza mu maghanoghano ghinu para mukuyowoya nayo mu lurombo? Nangauli Yehova tingamuwona yayi, kweni Baibolo likumulongosora mu nthowa zakupambanapambana. Mu Baibolo, Yehova wakuyowoyeka kuti ni “dazi na chiskango” kweniso “moto wakumyangura.” (Sal. 84:11; Heb. 12:29) Mulembi munyake wa Baibolo wakalongosora Yehova kuti wakawonekanga nga libwe la safiro, chisulo chakunyezimira, kweniso nga ntchiŵingavula. (Ezek. 1:​26-28) Nyengo zinyake tingamba kuzizwa panji kopa na umo Baibolo likumulongosolera Yehova.

2. Kasi ntchivichi chingatondeska ŵanyake kusendelera kwa Yehova?

² Pakuti Yehova tikumuwona yayi, vingatisuzga kugomezga kuti wakutitemwa. Ŵanthu ŵanyake ŵakughanaghana kuti Yehova wangaŵatemwa yayi chifukwa cha ivyo vikaŵachitikirapo kumanyuma. Panji ŵakaŵa na dada uyo wakaŵatemwanga yayi. Yehova wakutipulikiska umo tikujipulikira kweniso umo ivi vikutikhwaskira. Kuti timanye kuti wakutitemwa, wakutiphalira kwizira mu Baibolo mukhaliro wake wakukondweska uwu.

3. Chifukwa wuli tikwenera kusanda chitemwa cha Yehova?

³ Yehova ntchitemwa. Nakuti ndimo Baibolo likumulongosolera. (1 Yoh. 4:8) Iyo wakuchita chilichose chifukwa cha chitemwa. Chitemwa cha Chiuta ntchakukondweska kweniso ntchankhongono chomene mwakuti wakuchilongora na ku ŵanthu awo ŵakumutemwa yayi. (Mat. 5:​44, 45) Mu nkhani iyi, tidumbiskanenge chomene za Yehova na chitemwa chake. Timutemwenge chomene Chiuta withu para tikusambira chomene za iyo.

YEHOVA WAKUTITEMWA CHOMENE

4. Kasi chitemwa cha Yehova chikumupangiskani kuti mujipulikenge wuli? (Wonaniso chithuzi.)

⁴ “Yehova ngwachitemwa chomene.” (Yak. 5:11) Mu Baibolo, Chiuta wakujiyaniska na mama wachitemwa. (Yes. 66:​12, 13) Ghanaghanirani umo mama wachitemwa wakuchitira pakupwelelera  bonda wake. Wakumuŵika makoramakora pa chipakato chake na kuyowoya nayo tumazgu tuwemi twakuzikiska mtima. Para wakulira panji wakupulika vyakuŵinya, wakuwoneseska kuti wamovwira. Mwakuyana waka, para nase tikusuzgika, tikwenera kuŵa na chigomezgo chose kuti Yehova wakutitemwa. Wamasalimo wakalemba kuti: “Para vyenjezgo vyaninyekezga, imwe mukunisanguluska na kunizikiska mtima.”—Sal. 94:19.

5. Kasi chitemwa chakugomezgeka cha Yehova chikung’anamurachi kwa imwe?

⁵ Yehova ngwakugomezgeka. (Sal. 103:8) Iyo wakulutilira kutitemwa nanga ni para tabudiska vinyake. Mtundu wa Israyeli ukamukwiyiskanga Yehova mwakuwerezgawerezga, kweni para walapa wakawusimikizgiranga kuti: “Waŵa wakuzirwa mu maso ghane, ukachindikika, ndipo ine nakutemwa.” (Yes. 43:​4, 5) Chitemwa cha Chiuta kwa ise chindasinthe. Nyengo zose tikwenera kugomezga kuti wakutitemwa. Nanga ni para tachita zakwananga zikuru, Yehova wakutitaya yayi. Para talapa na kuwelera kwa Yehova, tiwonenge kuti wachali kutitemwa. Iyo wakutilayizga kuti ‘wakugowokera chomene.’ (Yes. 55:7) Baibolo likuyowoya kuti para Chiuta watigowokera tiŵenge na “nyengo yakuwezgeramo nkhongono . . . kufuma kwa Yehova.”—Mil. 3:19.

6. Kasi lemba la Zekariya 2:8 likutisambizgachi vya Yehova?

⁶ Ŵazgani Zekariya 2:8. Chifukwa chakuti Yehova wakutitemwa, wakumanya luŵiro umo tikujipulikira kweniso ngwakukhumbisiska kutivikilira. Wakukwenyelera chomene para tasangana na masuzgo. Ntheura tingaŵa na chigomezgo chose kuti watizgorenge para tamulomba kuti: “Nisungilirani nga ni mboni ya jiso linu.” (Sal. 17:8) Jiso ntchiŵaro chakuzirwa chomene kweniso chikupwetekeka luŵiro. Ntheura para Yehova wakuyaniska ŵateŵeti ŵake na mboni ya jiso lake, vili nga wakuyowoya kuti, ‘Waliyose uyo wakupweteka imwe, ŵanthu ŵane, wakupweteka vinthu vyane vyakuzirwa.’

7. Chifukwa wuli tikwenera kulutilira kugomezga kuti Yehova wakutitemwa?

⁷ Yehova wakukhumba kuti tikhorwe kuti wakutitemwa ise patekha. Kweni wakumanya kuti chifukwa cha ivyo vikatichitikirapo kumanyuma, tingamba kukayika usange wakutitemwa nadi. Panji pasono tikukumana na vinthu ivyo vingatipangiska kuti tambe kukayika usange Yehova wakutitemwa nadi. Kasi ni vichi ivyo vingatovwira kuti tigomezgenge kuti wakutitemwa? Wonani umo Yehova wakalongolera chitemwa chake kwa Yesu, umo wakulongolera chitemwa chake ku ŵakuphakazgika kweniso waliyose wa ise.

 UMO YEHOVA WAKULONGOLERA CHITEMWA CHAKE

8. Chifukwa wuli Yesu wakakhorwa kuti Awiske ŵakumutemwa?

⁸ Pambere Yesu wandize pa charu chapasi, wakaŵa kuti wakhala pamoza na Yehova kwa vyaka vinandi, ndipo vikapangiska kuti ŵatemwanenge chomene. Ubwezi wawo ngwakale chomene mu chilengiwa chose. Pa Mateyu 17:​5, Yehova wakayowoya mwakupulikikwa makora umo wakumutemwera Yesu. Yehova wakhumbenge mphanyi wakayowoya waka kuti ‘Uyu ndiyo nkhukondwa nayo.’ Ndipouli, wakakhumbanga kuti timanye umo wakumutemwera Yesu, ntheura wakamuchema kuti “Mwana wane wakutemweka.” Yehova wakanothanga nayo Mwana wake Yesu, chomenechomene chifukwa chakuti wakaŵa wakunozgeka kupeleka umoyo wake. (Efe. 1:7) Ndipo Yesu wakakayikanga yayi kuti Awiske ŵakumutemwa. Wakamanyanga kuti Adada ŵake ŵakumutemwa chomene. Kanandi waka wakayowoyanga na chigomezgo chose kuti Awiske ŵakumutemwa.—Yoh. 3:35; 10:17; 17:24.

9. Kasi ni mazgu wuli agho ghakulongosora chitemwa icho Yehova wali nacho pa ŵakuphakazgika? Longosorani. (Ŵaroma 5:5)

⁹ Yehova wakulongoraso kuti wakuŵatemwa chomene ŵakuphakazgika. (Ŵazgani Ŵaroma 5:5.) Wonani mazgu agha ghakuti “watipungulira.” Dikishonare yinyake yakulongosora mazgu gha mu Baibolo, yikulongosora kuti mazgu agha ghakung’anamura kuti chitemwa chake “chikupungulikira pa ise nga ni mlonga.” Mazgu agha ghakulongora kuti Yehova wakuŵatemwa chomene ŵakuphakazgika! Ŵakuphakazgika ŵakumanya kuti “ŵakutemweka na Chiuta.” (Yuda 1) Mpositole Yohane wakalongosora umo ŵakuphakazgika ŵakujipulikira apo wakalemba kuti: “Wonani chitemwa icho Adada ŵalongora kwa ise, kuti tichemekenge ŵana ŵa Chiuta.” (1 Yoh. 3:1) Kasi Yehova wakutemwa ŵakuphakazgika pera? Yayi, Yehova walongora chitemwa chake kwa waliyose wa ise.

10. Kasi ni nthowa wuli yikuru chomene iyo Yehova walongolera kuti wakumutemwani chomene?

¹⁰ Kasi ni nthowa wuli yikuru chomene iyo Yehova walongolera chitemwa chake? Ni sembe yakuwombora, iyo ntchawanangwa chikuru chomene icho Yehova wali kulongolera chitemwa chake kuluska waliyose mu chilengiwa chose. (Yoh. 3:16; Rom. 5:8) Wakapeleka Mwana wake wapadera, kuti wafwire ŵanthu wose kuti zakwananga zithu zigowokereke kweniso kuŵa nayo paubwezi. (1 Yoh. 4:10) Para tikughanaghanira chomene mtengo uwo Yehova na Yesu ŵakapeleka, timanyengeso umo Yehova wakutitemwera waliyose payekha. (Gal. 2:20) Sembe yakuwombora yikapelekeka pa chifukwa chakuti Yehova wakakhumbanga waka urunji uwoneke yayi. Kweni ntchawanangwa cha chitemwa. Yehova walongora kuti wakutitemwa chomene pakupeleka Yesu, uyo ngwakuzirwa chomene kwa iyo. Wakazomerezga Mwana wake Yesu kusuzgika na kufwa chifukwa cha ise.

11. Kasi tikusambirapo vichi pa Yeremiya 31:3?

¹¹ Nga umo tawonera, Yehova wakujipulika waka kuti wakutitemwa yayi, kweni wakulongora chitemwa chake pa ise. (Ŵazgani Yeremiya 31:3.) Yehova watiguzira kwa iyo chifukwa wakutitemwa. (Yaniskani na Dotoronome 7:​7, 8.) Palije munthu panji chilichose icho chingatipatura ku chitemwa ichi. (Rom. 8:​38, 39) Kasi chitemwa ichi chikumupangiskani kuti mujipulikenge wuli? Ŵazgani Salimo 23, na kuwona umo Davide wakajipulikira chifukwa cha kumanya kuti Yehova wakumutemwa kweniso umo ise nase tingajipulikira para tingamanya kuti Yehova wakutitemwa.

KASI CHITEMWA CHA YEHOVA CHIKUMUPANGISKANI KUTI MUJIPULIKENGE WULI?

12. Kasi mungalongosora wuli mwakudumura lemba la Salimo 23?

¹² Ŵazgani Salimo 23:​1-6. Salimo 23 ni sumu iyo yikulongora kuti munthu wakugomezga kuti Yehova wakumutemwa kweniso kumupwelelera. Davide, uyo wakalemba salimo ili, wakalongosora  za ubwezi wakukhora uwo ukaŵa pakati pa iyo na Yehova, uyo wakati ni Muliska wake. Davide wakajiwonanga kuti ngwakuvikilirika chifukwa wakazomerezga kuti Yehova ndiyo wamulongozgenge, ndipo wakamugomezganga chomene. Wakamanya kuti Yehova walekengepo yayi kumulongora chitemwa umoyo wake wose. Chifukwa wuli wakagomezganga nthena?

13. Chifukwa wuli Davide wakaŵa na chigomezgo chose kuti Yehova wakumupwelelera?

¹³ “Nisoŵenge kanthu chara.” Davide wakawonanga kuti Yehova wakumupwelelera chifukwa chakuti nyengo zose wakamupanga ivyo wakakhumbikwiranga. Wakamanyangaso kuti Yehova ni mubwezi wake ndipo wakumutemwa. Lekani wakaŵa wakusimikizga kuti visuzge viti wuli, Yehova walutilirenge kumupa vyose ivyo wakukhumbikwira. Chifukwa chakuti Davide wakagomezganga kuti Yehova wakumutemwa na kumupwelelera, vikamovwira kuti waleke kwenjerwa, kweni wakondwenge na kuŵa wakukhorwa.—Sal. 16:11.

14. Kasi Yehova wakutipwelelera wuli mwachitemwa?

¹⁴ Yehova wakutipwelelera, chomenechomene para tasangana na masuzgo. Claire a uyo wateŵetera pa Beteli kwa vyaka vyakujumpha 20, nkhongono zikamumalira chomene apo banja lakwake likakumana na masuzgo ghakuru. Adada ŵake ŵakakoleka na nthenda yakukoma viŵaro, munung’una wake munyake wakasezgeka mu mpingo, banja lakwake likakumana na suzgo la vyachuma, ndipo mu nyumba ŵakaŵafumiska. Kasi Yehova wakalongora wuli kuti wakuŵapwelelera? Claire wakuti: “Yehova wakawoneseska kuti zuŵa lililose ŵamumbumba yithu ŵali na chilichose icho ŵakakhumbikwiranga. Nyengo zose, wakatipanga vinandi chomene kuluska ivyo tikakhumbikwiranga! Kanandi nkhughanaghanira umo Yehova  watovwilira panyengo zakusuzga ndipo nizamuluwapo yayi chitemwa chake. Kukumbukira vinthu ivi kwanovwira kulutilira kuteŵetera Yehova mwakukondwa nanga mphanyengo ya masuzgo.”

15. Chifukwa wuli Davide wakajipulika kuti wakasamphuskika? (Wonaniso chithuzi.)

¹⁵ “Wakunisamphuska.” Nyengo zinyake Davide wakasuzgikanga maghanoghano chifukwa cha masuzgo agho wakasangananga nagho. (Sal. 18:​4-6) Kweni wakasamphuskika chifukwa chakuti Yehova wakamutemwanga na kumupwelelera. Yehova wakamulongozgera mubwezi wake uyu mu “mautheka ghakubiliŵira” kweniso ku “malo ghakupumulirako uko kuli maji ghanandi.” Ntheura, Davide wakasanga nkhongono ndipo vikamovwira kuti walutilire kuteŵetera Yehova mwakukondwa.—Sal. 18:​28-32.

16. Kasi imwe chitemwa cha Yehova chamusamphuskani wuli?

¹⁶ Mazuŵa ghano napo, ‘chifukwa cha chitemwa chakugomezgeka cha Yehova, tikumalirathu yayi,’ para tasangana na masuzgo pa umoyo withu. (Chit. 3:22; Kol. 1:11) Wonani ivyo vikachitikira Rachel. Vikamuŵinya chomene mfumu wake wati wamuleka kweniso wati waleka kuteŵetera Yehova mu nyengo ya COVID-19. Kasi Yehova wakamovwira wuli? Iyo wakuti: “Yehova wakawoneseska kuti niwonenge kuti wakunitemwa. Wakanipa ŵabwezi awo ŵakachezganga nane, kuninyamulira chakurya, kunitumizgira mameseji na malemba ghakukhozga, kumwemwetera nane, ndipo ŵakalutilira kunikumbuska kuti Yehova wakunipwelelera. Nkhumuwonga chomene Yehova chifukwa chakunipa mbumba yikuru yauzimu iyo yikunitemwa.”

17. Chifukwa wuli Davide ‘wakawopanga’ chilichose yayi?

¹⁷ “Nkhopa chara, pakuti imwe muli nane.” Kanandi Davide umoyo wake ukaŵanga pangozi, ndipo wakaŵa na ŵalwani ŵanandi ŵankhongono. Ndipouli, chitemwa cha Yehova chikamovwira kuti wajipulikenge wakuvikilirika. Davide wakajipulikanga kuti Yehova wali nayo pa suzgo lake lililose, ndipo wakumusimizgikira kuti wamovwirenge. Lekani wakimba kuti: “[Yehova] wakanithaska ku wofi wane wose.” (Sal. 34:4) Nangauli Davide nyengo zinyake wakawopanga chomene, kweni wakamazga wofi uwu chifukwa chakuti wakamanyanga kuti Yehova wakumutemwa.

18. Kasi kumanya kuti Yehova wakutitemwa kukutikhozga wuli para takumana na suzgo linyake likuru?

¹⁸ Kasi kumanya kuti Yehova wakutitemwa kukutikhozga wuli para takumana na suzgo linyake likuru? Mupayiniya munyake zina lake Susi wakulongosora umo iyo na mfumu wake ŵakajipulikira mwana wawo wati wajikoma. Iyo wakuti: “Wamunthu ukukhwaskika chomene para  chinthu chinyake chakuchitiska chitima chakuchitikira, ndipo ukuwona nga kuti vinthu vinyake viheni vikuchitikirengeso. Kweni chitemwa cha Yehova chatovwira kujipulika ŵakuvikilirika.” Rachel, uyo tamuzunura kale, wakuti: “Usiku unyake apo chitima chikakwera chomene kweniso apo nkhenjerwanga chomene na kopa, nkhalomba mwakukwezga kwa Yehova. Nyengo yeneyiyo nkhawona kuti Yehova wanizikiska mtima na kunichetamiska, nga umo mama wakuchitira na mwana wake, ndipo tulo tukaniba. Nizamuluwapo yayi ivyo vikachitika apa.” Mulara munyake zina lake Tasos wakakhala vyaka 4 mu jele chifukwa cha kukana kunjira usilikari. Kasi wakawona wuli kuti Yehova wakumutemwa na kumupwelelera? Iyo wakuti: “Yehova wakanipa vinandi kuluska ivyo nkhakhumbikwiranga. Ivi vikanovwira kuti nimugomezgenge chomene. Kweniso, kwizira mwa mzimu wake, Yehova wakanovwira kuti niŵenge wakukondwa nangauli nkhaŵa mu jele. Ivi vikanisimikizgira kuti para nkhumugomezga chomene Yehova, nijipulikengeso kuti wakunitemwa chomene. Ntheura nkhamba kumuteŵetera nga mupayiniya wanyengozose nangauli nkhaŵa mu jele.”

SENDELERANI KWA CHIUTA WACHITEMWA

19. (a) Kasi tilombenge wuli para tingamanya kuti Chiuta wakutitemwa? (b) Kasi ni fundo nji iyo yikumukhwaskani chomene pa fundo izo zikulongosora chitemwa cha Yehova? (Wonani bokosi lakuti “ Mazgu Agho Ghakutovwira Kujipulika Kuti Yehova Wakutitemwa.”)

¹⁹ Ivyo tadumbiskana mu nkhani iyi vikulongora kuti Yehova, “Chiuta wa chitemwa,” wali nase. (2 Kor. 13:11) Iyo wakutemwa waliyose payekha. Ndise ŵakukhorwa kuti ‘tazingilizgika na chitemwa chakugomezgeka’ cha Yehova. (Sal. 32:10) Para tikughanaghanirapo chomene pa umo Yehova walongolera chitemwa chake kwa ise, timanyengeso umo wakutipwelelera kweniso ubwezi uwo tili nawo na iyo. Tingamulomba mwakufwatuka na kumuphalira umo chitemwa chake chiliri chakukhumbikwa kwa ise. Tingamuphalira ivyo tikwenjerwa navyo, chifukwa tikumanya kuti wakutipulikiska kweniso ngwakukhumbisiska kutovwira.—Sal. 145:​18, 19.

20. Kasi chitemwa cha Yehova chikutovwira wuli kusendelera kwa iyo?

²⁰ Nga umo vikuŵira kuti para kwazizima tikusendelera kufupi na moto, mwakuyana waka tikusendelera kwa Yehova chifukwa ngwachitemwa. Nangauli chitemwa cha Yehova ntchankhongono, kweni ntchalusungu. Ntheura mukondwenge chifukwa Yehova wakumutemwani. Mphanyi tose talongora kuti tikutemwa Yehova mwakuyowoya kuti: “Nkhutemwa Yehova.”—Sal. 116:1.