Mu Baibolo tikuŵazga za ŵanthu ŵakugomezgeka awo nawo ŵakajipulikanga “nga ndise.” (Yak. 5:17) Mwachiyelezgero, tingapulikiska mwaluŵiro ivyo Paulosi wakang’anamuranga apo wakayowoya mazgu agho ghali pa Ŵaroma 7:21-24, ghakuti: “Para nkhukhumba kuchita chiwemi, icho ntchiheni chikuŵa nane. . . . Namunthu wakusuzgika ine!” Mazgu agha nase ghangatikhozga chifukwa tikulimbana na mathupi ghithu ghakwananga.

Nyengo yinyake Paulosi wakayowoyaso umo wakajipulikiranga. Pa Ŵagalatiya 2:20, wakayowoya kuti Yesu “wakanitemwa ndipo wakajipeleka chifukwa cha ine.” Kasi namwe ndimo mukujipulikira? Panji viŵi yayi.

Para tikujiwona ŵambura kwenelera chifukwa cha zakwananga izo tikachita kumanyuma, tigomezgenge yayi kuti Yehova wakutitemwa ndipo wali kutigowokera. Kweniso vingatisuzga kugomezga kuti sembe yakuwombora ntchawanangwa icho Chiuta wali kutipa. Kasi Yesu nayo wakukhumba tiwonenge sembe yakuwombora kuti ntchawanangwa? Usange ni nthena, ntchivichi chingatovwira kuchita nthena? Tiyeni tiwone mafumbo ghaŵiri agha.

Yesu wakukhumba tiwonenge sembe yake kuti ntchawanangwa icho wakapeleka kwa munthu waliyose payekha. Chifukwa wuli tikuyowoya nthena? Muŵe nga mukuwona ivyo vili kulembeka pa Luka 23:39-43 vikuchitika. Munthu munyake wapayikika pafupi na Yesu. Wakuzomera kuti wakachita vinthu viheni. Munthu uyu wakwenera kuti wakabuda vikuru chomene chifukwa ŵanthu awo ni vigeŵenga ndiwo ŵakakomekanga mwakuchita kuŵapayika pa khuni. Munthu uyu wakufipa mtima ndipo wakumuŵeyelera Yesu kuti: “Muzakanikumbuke para mukunjira mu Ufumu winu.”

Kasi Yesu wakachita wuli? Ghanaghanirani vyakuŵinya ivyo Yesu wakapulika apo wakazgokanga kuti wamulaŵiske munthu uyu. Nangauli wakapulikanga vyakuŵinya, Yesu wakamwemwetera na kumusimikizgira munthu uyu kuti: “Nadi nkhukuphalira muhanya uno, iwe uzamuŵa na ine mu Paradiso.” Yesu wakatenge wamukumbuskenge munthu uyu kuti ‘Mwana wa munthu wakizira kuzakapeleka umoyo wake kuŵa chiwombolero cha ŵanandi.’ (Mat. 20:28) M’malo mwake Yesu wakayowoyapo yayi za ŵanthu ŵanandi. Wakayowoya nayo mwachitemwa na kumuphalira kuti “iwe” uzamuŵa na “ine” mu Paradiso. Wakamusimikizgira munthu uyu kuti wazamukhala kwamuyirayira mu paradiso pa charu chapasi.

Tikukayika yayi kuti Yesu wakakhumbanga kuti munthu uyu wamanye kuti sembe iyo wakaŵa pafupi kupeleka, nayo yimupindulirenge. Usange Yesu wakajipulika nthena kwa chigeŵenga icho chikaŵavya mwaŵi wakuti chiteŵetere Chiuta, wuli pakuyowoya za Mkhristu wakubatizika uyo wakuteŵetera Chiuta? Ntchivichi chingatovwira kugomezga kuti sembe ya Khristu tipindurenge nayo nangauli tikachita maubudi ghanyake kumasinda?

Pakuti Yesu wakamupa mulimo wakupharazga, Paulosi wakapulikiska kuti Yesu wakafwira iyo. Chifukwa wuli? Iyo wakalongosora kuti: “Nkhuwonga Fumu yithu Khristu Yesu, uyo wakanipa nkhongono chifukwa wakawona kuti ndine wakugomezgeka pakunipa uteŵeti, nangauli pakwamba nkhaŵa wakuyuyura Chiuta na wakutambuzga ŵanthu ŵake kweniso munthu wamsinjiro.” (1 Tim. 1:12-14) Chifukwa chakuti Yesu wakamupa mulimo uwu, ukamovwira kumanya kuti Yesu ngwalusungu, ngwachitemwa, kweniso wakumugomezga. Mwakuyana waka, Yesu wali kutipa mulimo wakupharazga makani ghawemi. (Mat. 28:19, 20) Kasi nase mulimo wakupharazga ungatovwira kumanya kuti Yesu wakafwira ise?

Albert, uyo wawelera sonosono apa kwa Yehova wati wasezgeka vyaka pafupifupi 34, wakalongosora kuti: “Kwananga kwane kuli pamaso pane nyengo zose. Kweni para nkhupharazga nkhujipulika nga ni mpositole Paulosi, nane Yesu wali kunipa mulimo wakupharazga. Ukunovwira kuŵa wakukondwa kweniso kuti nijiwonenge mwakwenelera, ndipo nkhuwona kuti nkhulindizga viwemi munthazi.”—Sal. 51:3.

Allan, uyo wakaŵa wambembe kweniso wakapalamura milandu yinandi pambere wandasambire unenesko, wakati: “Nichali kukumbuka vinthu viheni ivyo nkhachitira ŵanthu. Nyengo zinyake nkhusuzgika maghanoghano. Kweni nkhuwonga Yehova kuti wazomerezga munthu wakwananga nga ndine kuti niphalirengeko ŵanthu makani ghawemi. Para nkhuwona kuti ŵanthu ŵakupokelera makani ghawemi, vikunikumbuska kuti Yehova ni muwemi chomene na wachitemwa. Nkhuwona kuti wakunigwiliskira ntchito kovwira awo nawo ŵachita vinthu viheni nga ndine.”

Upharazgi ukovwira kuti timalirenge nkhongono zithu pa milimo yiwemi na kuŵa na maghanoghano ghawemi. Ukutisimikizgira kuti Yesu ngwalusungu, ngwachitemwa kweniso wakutigomezga.

Mu charu cha Satana ichi, mtima withu ungalutilira kutisuska chifukwa cha zakwananga izo tikachita kumasinda. Kasi ntchivichi chingatovwira kulimbana na maghanoghano agha?

Jean uyo kanandi wakusuzgika maghanoghano chifukwa chakuti wakaŵa na umoyo wapaŵiri apo wakaŵa muwukirano, wakuti: “Nkhukondwa kuti ‘Chiuta ni mukuru kuluska mitima yithu.’” (1 Yoh. 3:19, 20) Nase tingapembuzgika kumanya kuti Yehova na Yesu ŵakutimanya makora kuluska umo taŵeneko tikujimanyira. Kumbukani kuti sembe yakuwombora ŵakapeleka kuti yovwire ŵanthu ŵakufikapo yayi, kweni ŵanthu ŵakwananga awo ŵalapa.—1 Tim. 1:15.

Para tikulomba na kughanaghanira umo Yesu wakachitiranga vinthu na ŵanthu ŵambura kufikapo, kweniso para tikuchita vyose ivyo tingafiska pa mulimo wakupharazga, tikhorwenge kuti sembe yakuwombora yikapelekeka kuti yovwire ise. Para muchitenge nthena, nga ni Paulosi muyowoyenge kuti: Yesu “wakanitemwa ndipo wakajipeleka chifukwa cha ine.”