Kweni nati namba kuchita upayiniya, umoyo wane ukasintha chomene kujumpha umo nkhakhazgiranga. (Efe. 3:20) Panji mungafumba kuti, ‘mukasintha wuli?’ Lekani nilongosore kufuma pakwamba.

Nkhababikira ku Berlin, Germany pati pajumpha myezi yichoko waka kufuma apo Nkhondo Yachiŵiri ya pa Charu Chose yikambira mu 1939. Apo nkhondo iyi yikaŵa pafupi kumara mu 1945, ŵasilikari ŵakalimbikira kuponya mabomba mu msumba wa Berlin. Bomba linyake likaphulika ku chigaŵa icho tikakhalanga, ndipo ine na mbumba yakwithu tikachimbira ndipo tikapona. Pamanyuma tikaluta ku Erfurt uko amama ŵakababikira.

Amama ŵakakhumbanga chomene kusambira unenesko. Ŵakaŵazganga mabuku agho ŵanthu ŵavinjeru ŵakalembanga, kweniso ŵakasanda visopa vyakupambanapambana kweni ŵakakhorwanga yayi. M’ma 1948, Ŵakaboni ŵa Yehova ŵaŵiri ŵakiza ku nyumba kwithu. Amama ŵakaŵanjizga munyumba na kuŵafumba mafumbo ghanandi. Pambere ora limoza lindakwane, amama ŵakaphalira ine na mudumbu wane muchoko kuti, “Nasanga unenesko.” Kufuma waka nyengo iyo, ine, amama na mudumbu wane tikamba kuluta ku maungano mu Erfurt.

Mu 1950 tikaweleraso ku Berlin, uko tikamba kuwungana mu mpingo wa Berlin-Kreuzberg. Tikati tasamira ku kachigaŵa kanyake mu Berlin mwenemumo, tikamba kuwungana mu mpingo wa Berlin-Tempelhof. Nyengo yakati yajumphapo Amama ŵakabatizika, kweni ine nkhajiwonanga kuti nindanozgeke dankha. Chifukwa wuli?

Nkhatondekanga kuchita vinandi pakuteŵetera Yehova chifukwa nkhaŵa wasoni chomene. Nangauli nkhanjiranga mu upharazgi kweni vyaka viŵiri vikamara kwambura kupharazgirapo munthu. Vinthu vikasintha chomene nkhati namanyana na ŵabali na ŵadumbu ŵanandi awo ŵakaŵa ŵachikanga kweniso ŵakujipereka pakuteŵetera Yehova. Ŵanyake mwa ŵanthu aŵa ŵakajalirika mu misasa yakusuzgirako ŵanthu ya Nazi panji majele gha ku East German. Ŵanyake ŵakaŵikanga umoyo wawo pangozi kuyegha mabuku ghithu mwakubisa na  kukapeleka ku East Germany. Ivyo ŵakachita vikanikhozga chomene. Nkhaghanaghana kuti usange ŵabali na ŵadumbu aŵa ŵakaŵika umoyo wawo pangozi chifukwa cha Yehova na ŵabali ŵawo mbwenu nane nkhwenera kuyezgayezga kuleka kuŵa na soni.

Soni zikamba kuchepa apo tikaŵa na upharazgi wapadera mu 1955. Mu kalata iyo yikaŵa mu Uteŵeti Withu wa Ufumu, * Mubali Nathan Knorr wakapharazga kuti upharazgi uwu ngwapadera chomene kuluska ghanyake ghose agho gulu lili kunozgapo. Wakayowoyaso kuti usange mupharazgi waliyose wangachitako upharazgi uwu mbwenu mwezi uwo “uŵenge wakukondweska chomene pa nkhani yakupharazga kuluska kumanyuma kose.” Uwu ukaŵa unenesko nadi. Pati pajumpha nyengo yichoko waka, nkhajipeleka kwa Yehova ndipo mu 1956, nkhabatizika pamoza na adada na mudumbu wane. Kweni nkhenerangaso kusankha chinthu chinyake chakuzirwa.

Kwa vyaka vinandi nkhamanyanga kuti nkhwenera kwamba upayiniya, kweni nkhaghanaghananga kuti nizamuchita munthazi. Pakwamba, nkhasankha kuti nisambire bizinesi ya kuwoda na kuguliska katundu mu vyaru vinyake. Kufuma apo, nkhakhumbanga kuti nigwire ntchito kwakanyengo mwakuti niyimanye makora ntchito yane. Ntheura, mu 1961 nkhamba kugwira ntchito ku Hamburg, msumba uwo uli na dowoko likuru chomene ku Germany. Nkhayitemwanga chomene ntchito iyi mwakuti nkhasinthanga waka nyengo yakuti nambire upayiniya. Nkhajifumbanga kuti, ‘sono nichitenge wuli apa?’

Nkhuwonga chomene kuti Yehova wakanovwira kwizira mu ŵabali kumanya kuti kuteŵetera Yehova ndiko nkhwakuzirwa chomene. Ŵanyane ŵanandi ŵakaŵa kuti ŵamba kale upayiniya ndipo ŵakaŵa chiyelezgero chiwemi chomene kwa ine. Kweniso, Mubali Erich Mundt uyo wakakhalapo ku msasa wakuyuzgirako ŵanthu wakanichiska kuti nigomezgenge Yehova. Wakayowoya kuti ku msasa wakuyuzgirako ŵanthu, ŵabali awo ŵakajigomezganga ŵekha ŵakalopwa. Kweni awo ŵakagomezganga chomene Yehova ŵakalutilira kugomezgeka ndipo ŵakawovwiranga chomene gulu la Yehova.

Mubali Martin Poetzinger uyo pamanyuma wakazakaŵa mu Wupu Wakulongozga nayo wakachiskanga ŵabali, wakaŵaphaliranga kuti, “Chikanga ntchakuzirwa chomene.” Nati naghanaghanirapo chomene ivyo wakayowoya, nkhaleka ntchito, ndipo mu Juni 1963 nkhamba upayiniya. Apa ndipo nkhasankha makora chomene. Pati pajumpha myezi yiŵiri pambere nindasange ntchito yinyake yakuti yinovwirenge kuchita makora upayiniya, nkhaphalirika kuti nkhambe upayiniya wapadera. Vyaka vichoko waka vikati vyajumphapo, Yehova wakanitumbika chomene kujumpha umo nkhakhazgiranga. Nkhachemeka kuti nkhanjire kilasi la nambara 44 la Sukulu ya Giliyadi.

Sambiro lakuzirwa chomene ilo nkhasambirako kwa Mubali Nathan Knorr na Lyman Swingle likaŵa lakuti “kuthera yayi pa uteŵeti winu.” Ŵakatichiska kuti tilutilire kuchita uteŵeti withu nanga chingaŵa chakusuzga. Mubali Knorr wakafumba kuti: “Kasi mwamuŵika chomene mahara pa vichi? Kasi mwamuŵika mtima pa masuzgo panji ukavu? Panji mwamuŵika mtima pakupharazga? Temwani ŵanthu.” Zuŵa linyake, apo Mubali Swingle wakalongosoranga chifukwa icho ŵanyake wakulekera luŵiro uteŵeti, chitima chikamukora chomene mwakuti masozi ghakaŵa lengalenga mu maso. Wakaleka dankha kuyowoya mwakuti chitima chichepeko. Nkhakhwaskika chomene na ivyo wakayowoya mwakuti nkhaŵikapo mtima kuti nimukhuŵazgenge yayi Khristu na ŵabali ŵake.—Mat. 25:40.

Ŵati ŵatiphalira uteŵeti uwo tamuchita, ŵabali awo ŵakuteŵetera pa Beteli ŵakatifumbanga uko tamuteŵetera. Ŵabali aŵa ŵakatiphaliranga uwemi wa uteŵeti uliwose uwo tamuchita. Kweni tati taŵaphalira kuti tamuteŵetera ku “Congo (Kinshasa)” ŵakaleka dankha kuyowoya, ndipo ŵakati “O, mukuluta ku Congo! Yehova waŵe namwe.” Ŵakayowoya nthena chifukwa chakuti pa nyengo iyo pakaŵa malipoti ghakuti ku Congo (Kinshasa) kukaŵa nkhondo ndipo ŵanthu ŵakakomananga chomene. Kweni ine nkhaghanaghaniranga waka ivyo nkhasambira.  Tikati tamalizga waka masambiro gha Giliyadi, mu Seputembala 1967, Heinrich Dehnbostel, Claude Lindsay, na ine tikanyamuka kuluta ku Congo mu msumba wa Kinshasa.

Tikati tafika ku Kinshasa, tikasambira dankha Chifurenchi myezi yitatu. Kufuma apo, tikaluta ku Lubumbashi, uko pakwamba kukachemekanga kuti Elisabethville, kufupi na mphaka ya charu cha Zambia, kumwera kwa charu cha Congo. Tikakhalanga mu nyumba ya ŵamishonale.

Pakuti ŵapharazgi ŵakaŵa ŵandafikeko ku Lubumbashi, tikakondwa chomene kuti tikaŵa ŵakwamba kupharazga ku chigaŵa ichi. Nyengo yichoko waka yati yajumphapo, tikamba kusambira Baibolo na ŵanthu ŵanandi mwakuti nyengo yikaticheperanga kuti tisambire nawo wose. Tikapharazgirangaso ŵapolisi. Ŵanandi ŵakachindikanga chomene Mazgu gha Chiuta na mulimo withu wakupharazga. Ŵanthu ŵanandi ŵakayowoyanga Chiswahili, ntheura ine na Claude Lindsay tikasambira chiyowoyero ichi. Kufuma apo, tikaphalirika kuti tikawunganenge na mpingo wa Chiswahili.

Nangauli tikakondwanga na vinthu vyakupambanapambana kweni tikasanganangaso na masuzgo. Kanandi ŵasilikari na ŵapolisi awo ŵakaŵanga kuti ŵaloŵera ŵakatipusikizgiranga vinthu vyakuti tindachitepo. Zuŵa linyake ŵapolisi ŵanandi awo ŵakaŵa na futi ŵakiza ku nyumba ya ŵamishonale pa nyengo iyo tikachitanga maungano, ŵakatitora taŵabali tose na kuluta nase ku polisi ndipo tikakhala kura mpaka 10 koloko usiku ndipo ŵakatifumiskanga.

Mu 1969, nkhamba kuchita mulimo wakwendakwenda. Apo nkhaŵa mulaŵiliri wa dera,  nyengo zinyake tikendanga mitunda yitali mu msewu wamathipa kweniso utheka utali. Ndimo ghaliri malo ghanandi ku Africa. Apo nkhaŵa mu muzi unyake, nyatazi na twana twake wakagonanga kusi ku bedi lane. Nizamuluwapo yayi umo nyatazi uyu wakaniwuskiranga mulenjilenji chifukwa cha viwawa ivyo wakachitanga. Nkhukondwa chomene para nkhukumbuka mausiku agho tikawothanga moto na ŵabali, uku tikuchezga nkhani za mu Baibolo.

Suzgo likuru chomene ilo tikakumana nalo ni ŵabali ŵanyake awo ŵakawonekanga nga Mbakaboni ŵa Yehova uku ŵakakhozgeranga kagulu ka Kitawala. * Ŵanyake mwa ŵanthu aŵa ŵakabatizika na kuŵa ŵalara mu mpingo. Ŵanthu ŵaheni aŵa, awo ŵakaŵa “nga ni malibwe ghakubisika” mu mpingo, ŵakatondeka kupuluska ŵabali na ŵadumbu ŵakugomezgeka. (Yuda 12) Pamanyuma, Yehova wakaŵawuskamo ŵanthu aŵa mu mpingo. Ŵati ŵawukamo ŵanthu ŵanandi ŵakamba kwiza mu mpingo.

Mu 1971, ŵakanituma kuti nkhateŵeterenge ku ofesi ya munthavi ya Kinshasa, uko nkhachitanga mauteŵeti ghakupambanapambana, nga kunozga makalata, kuwona mabuku agho mipingo yachemeska, kweniso vinthu vinyake vyakukhwaskana na uteŵeti. Pa Beteli nkhasambira umo ningendeskera mulimo withu mu charu icho ntchikuru chomene, uko milimo yithu yinandi yikendanga makora yayi. Nyengo zinyake makalata agho tikatumizganga ku mipingo ghakatoranga myezi kuti ghakafike. Makalata agha tikaghatumizganga pa ndege, ndipo apo ndege yamalira, ŵakaghatumizganga pa boti ilo nyengo zinyake likakhoranga mu vyakumera vya mu maji kwa masabata ghanandi. Kweni mulimo ukendanga nangauli pakaŵa masuzgo agha.

Nkhazizwanga chomene umo ŵabali ŵakafiskiranga kwendeska maungano ghakuru mpaka kumara nangauli tikaŵanga na ndalama zichoko. Ŵakazenganga pulatifomu pa chiduli na kuzengelera na utheka mumphepete kweniso ŵakakakanga mphundwe za utheka zakuti ŵanthu ŵakhalengepo. Mtenje wa pa ungano ŵakazengeranga mishombe panji kuti sungwe ndipo pachanya ŵakaŵikangapo mphasa. Pakuti ŵakaŵavya mizumali ŵakakakiranga waka nyozi panji kuti mikusa kuti mtenje ukhore. Nkhakondwa chomene kuwona umo ŵabali na ŵadumbu aŵa ŵakachitiranga na masuzgo. Nkhamba kuŵatemwa chomene ŵabali na ŵadumbu aŵa. Pamaso pakafipa chomene nati napika uteŵeti kunyake.

Mu 1974, nkhasamukira ku ofesi ya munthavi ku Nairobi, Kenya. Kukaŵa vinandi vyakuti tichite, chifukwa ofesi ya munthavi ya Kenya ndiyo yikalaŵiliranga vyaru 10 pa mulimo wakupharazga, vinyake mwa vyaru ivi, ŵakakanizga mulimo withu. Kanandi ŵakanitumanga kuti nkhendere vyaru ivi, chomenechomene ku Ethiopia uko ŵabali ŵakatambuzgikanga, ndipo ŵakakumananga na viyezgo vikuru. Ŵanandi ŵakaŵachitiranga nkhaza chomene na kuŵajalira mu jele ndipo ŵanyake ŵakakomekanga. Kweni ŵabali aŵa ŵakagomezgeka nipera chifukwa ŵakaŵa paubwezi wakukhora na Yehova kweniso ŵabali ŵanyawo.

Mu 1980, nkhakondwa chomene kutorana na Gail Matheson uyo kukwake nkhu Canada. Tikanjilira lumoza Sukulu ya Giliyadi. Nangauli tikateŵeteranga kwakupambana kweni tikalemberananga makalata. Gail wakaŵa mishonale ku Bolivia. Vyaka 12 vyati vyajumphapo tikakumanaso ku New York. Pati pajumpha nyengo yichoko waka tikatorana ku Kenya. Nkhuwonga chomene kuti nkhatora Gail chifukwa wakutemwa vinthu vyauzimu kweniso wakukhorwa na ivyo wali navyo. Wakulutilira kunovwira kweniso wakunitemwa.

Mu 1986, ine na Gail ŵakatipa uteŵeti wakwendakwenda kweniso nkhateŵeteranga mu Komiti ya Munthavi. Pa uteŵeti uwu, tikenderangaso vyaru vinandi ivyo vikaŵa pasi pa ofesi ya munthavi ya Kenya.

Kanandi nkhukumbuka nyengo izo nkhanozgekeranga ungano ku Asmara (ku Eritrea) mu 1992, apo mulimo withu ukaŵa undakanizgike ku charu ichi. Kweni nyumba yakuchitiramo ungano yikaŵa yakunangika mukati na kuwaro  wuwo. Pa zuŵa la ungano, nkhazizwa chomene kuwona umo ŵabali ŵakanozgera malo gha ungano kuti tisoperepo Yehova. Mbumba zinandi zikayegha salu izo ŵakakutira nyumba yakusoperamo kuti yiwoneke makora. Tikakondwa chomene pa ungano uwu, uwo pakiza ŵanthu 1,279.

Mulimo wakwendakwenda ukaŵa wakusuzgirapo chifukwa malo agho tikafikirangako ghakaŵa ghakupambanapambana. Nyengo zinyake tikafikiranga mu chinyumba chiwemi chakutowa icho chikaŵa mumphepete mwa nyanja, kweni nyengo yinyake tikafikiranga mukanyumba kakupangika na malata ako vimbuzi vyake vikaŵa kutali. Kweni vikaŵavya kanthu uko tikateŵeteranga. Tikukondwa chomene para takumbuka nyengo izo tikatangwanikanga na upharazgi pamoza na ŵapayiniya na ŵapharazgi ŵanyake mu mpingo. Tikati tapokera uteŵeti unyake, tikaleka ŵabwezi ŵakutemweka ŵanandi awo tikuŵasoŵa.

Kuumaliro kwa m’ma 1980 na kukwambilira kwa m’ma 1990, mulimo withu ukazomerezgeka mu vyaru vinandi ivyo vikaŵa pasi pa ofesi ya munthavi ya Kenya. Ntheura vyaru vinyake navyo vikamba kuŵa na maofesi ghawo. Mu 1993, ŵakatituma kuti tikateŵeterenge pa ofesi ku Addis Ababa, Ethiopia, uko pakwamba mulimo withu tikachitanga mwakubisa, kweni sono tikaŵa ŵakufwatuka.

Yehova watumbika mulimo withu ku Ethiopia. Ŵabali na ŵadumbu ŵanandi ŵali kwamba upayiniya. Kweniso ŵanthu 20 pa 100 ŵaliwose, ŵakuchita upayiniya chaka chilichose kufuma 2012. Masukulu ghakusambizga Baibolo nagho ghawovwira chomene, ndipo Nyumba za Ufumu zakujumpha 120 zili kuzengeka. Mu 2004 mbumba ya Beteli yikasamukira ku malo ghaphya, ndipo ŵali kuzengaposo Malo gha Ungano.

Mu vyaka vinandi ivyo vyajumpha, ine na Gail tasanga ŵabwezi ŵanandi ŵapamtima ku Ethiopia. Tikuŵatemwa chomene ŵabali na ŵadumbu aŵa chifukwa mbalusungu kweniso mbachitemwa. Sono tikulwaralwara, ntheura ŵali kutisamuska kuti tikateŵeterenge ku ofesi ya munthavi ya Central Europe. Ŵakutipwelelera chomene ku ofesi iyi, kweni tikuŵasoŵa chomene ŵabwezi ŵithu ku Ethiopia.

Tajiwonera tekha umo Yehova wakuzgira mulimo withu. (1 Kor. 3:6, 9) Mwachiyelezgero, apo tikapharazgira ŵanthu ŵa ku Rwanda kakwamba, kukaŵavya mupharazgi waliyose ku Rwanda. Ŵanthu aŵa ŵakiza ku Congo kuti ŵazakasange copper. Kweni sono ku charu ichi kuli ŵabali na ŵadumbu kujumpha 30,000. Mu 1967 ku Congo (Kinshasa) kukaŵa ŵapharazgi pafupifupi 6,000. Sono kuli ŵapharazgi pafupifupi 230,000 ndipo ŵanthu ŵakujumpha 1,000 000 ŵakiza ku chikumbusko mu 2018. Mu vyaru vyose ivyo vikaŵa pasi pa ofesi ya munthavi ya Kenya, chiŵelengero cha ŵapharazgi chakwera kujumpha pa 100,000.

Mu vyaka 50 ivyo vyajumpha, Yehova wanovwira kwizira mu ŵabali ŵakupambanapambana kuti niŵe muteŵeti wanyengozose. Nangauli nichali na soni, kweni nasambira kugomezga chomene Yehova. Ivyo vikanichitikira apo nkhaŵa ku Africa vyanovwira kuti niŵe wakuzikira kweniso wakukhorwa. Ine na Gail tichali kudokera ŵabali na ŵadumbu awo ŵakalongora mtima wa kupokelera ŵalendo, kuzizipizga mu masuzgo ghakuru na kugomezga Yehova. Tikumuwonga chomene Yehova chifukwa cha lusungu lwake lukuru. Yehova wanitumbika chomene kujumpha umo nkhakhazgiranga.—Sal. 37:4.