Ukaboni ukulongora kuti Yesu wakamba kuŵa Wasembe Mukuru wati wabatizika mu 29 C.E. Tikumanya wuli fundo iyi? Pa ubatizo wake, Yesu wakalongora kuti ngwakunozgeka kupeleka umoyo wake pa jotchero lakuyelezgera kuti wachite “khumbo” la Chiuta. (Gal. 1:4; Heb. 10:5-10) Pakuti jotchero lakuyelezgera ili laŵa lilipo kufuma apo Yesu wakabatizikira kuya munthazi, tempile likuru lauzimu, likwenera kuti nalo likamba pa nyengo iyi. Tempile likuru lauzimu ni ndondomeko ya kusopa kutuŵa uko Yehova wali kunozga kwizira mu sembe yakuwombora. Jotchero ntchigaŵa chakuzirwa chomene cha tempele lauzimu.—Mat. 3:16, 17; Heb. 5:4-6.

Pakuti tempile likuru lauzimu likaŵa kuti lamba, pakakhumbikwanga wasembe mukuru. Ntheura Yehova wakaphakazga Yesu na “mzimu utuŵa na nkhongono” kuti waŵe wasembe mukuru. (Mil. 10:37, 38; Mrk. 1:9-11) Kasi tikumanya wuli kuti Yesu wakimikika kuŵa Wasembe Mukuru pambere wandafwe na kuwuskika? Zgoro tikulisanga para tasanda nyengo iyo Aroni na awo ŵakanjira m’malo mwake ŵakimikikiranga kuŵa ŵasembe ŵakuru pasi pa Dango la Mozesi.

Dango ilo Yehova wakapeleka ku Ŵaisrayeli kwizira mwa Mozesi likatenge wasembe mukuru pera ndiyo wanjirenge mu Malo Ghatuŵa Chomene pa chihema. Kweniso tempile likati lazengeka, ndiyo wakeneranga kunjira mu Malo Ghatuŵa Chomene gha pa tempile. Pakaŵa katani iyo yikatchinganga pakati pa Malo Ghatuŵa na Malo Ghatuŵa Chomene. Wasembe Mukuru wakajumphanga katani iyi pa Zuŵa la Mphepiska pera. (Heb. 9:1-3, 6, 7) Aroni na awo ŵakanjira m’malo mwake ŵakaphakazgikanga kuŵa ŵasembe ŵakuru pambere ŵandanjire ‘kujumpha katani’ ya chihema. Ntheura Yesu nayo wakwenera kuti wakaphakazgika kuŵa Wasembe Mukuru wa tempile likuru lauzimu la Yehova pambere wandafwe. Pamanyuma ndipo “wakajumpha katani, kung’anamura thupi lake” mwakuti walute kuchanya. (Heb. 10:20) Lekani mpositole Paulosi wakati Yesu wakiza “pakuŵa wasembe mukuru” ndipo “wakanjira mu chihema chikuru chomene na chakufikapo, chambura kupangika na mawoko,” na kunjira “kuchanya kwenecho.”—Heb. 9:11, 24.

Palije mphambano pakati pa nyengo iyo phangano liphya likakhozgekera na iyo likambira. Chifukwa wuli tikuyowoya nthena? Yesu wakati waluta kuchanya na kupeleka mtengo wa umoyo wake chifukwa cha ise, wakachita chinthu chakwamba chakukhumbikwa kuti phangano liphya liŵe lakuzomerezgeka. Ivyo vikachitika vikawovwiraso kuti phangano lambe kugwira ntchito. Kasi ni vichi ivyo vikachitika?

Chakwamba, Yesu wakawonekera pamaso pa Yehova, pamanyuma wakapeleka mtengo wa sembe yake kwa Yehova. Paumaliro, Yehova wakazomera mtengo wa ndopa izo Yesu wakathiska. Kwambura ivi, phangano liphya likatenge ligwirenge ntchito yayi.

Baibolo likutiphalira yayi nyengo yenecho iyo Yehova wakazomelera mtengo wa sembe ya Yesu. Ntheura tingayowoya mwakudunjika yayi nyengo yenecho iyo phangano liphya likakhozgekera na kwamba kugwira ntchito. Kweni icho tikumanya ntchakuti apo Yesu wakakweranga kuchanya kukhala mazuŵa 10 kuti zuŵa la Pentekoste lifike. (Mil. 1:3) Panyengo yinyake wati wakwera waka kuchanya, wakapeleka mtengo wa sembe yake kwa Yehova, ndipo Yehova wakazomera sembe yake. (Heb. 9:12) Ukaboni wa fundo iyi ukawoneka makora pa Pentekoste 33 C.E. (Mil. 2:1-4, 32, 33) Apa vikawonekerathu kuti phangano liphya likagwiranga ntchito.

Mwakudumura, phangano liphya likakhozgeka na kwamba kugwira ntchito apo Yehova wakazomera mtengo wa ndopa izo Yesu wakathiska. Ndipo Wasembe Mukuru, Yesu, ndiyo ni Muphemaniski wa phangano ili.—Heb. 7:25; 8:1-3, 6; 9:13-15.