Nkhababikira ku St. Paul, Minnesota, U.S.A mu 1954. Ŵapapi ŵane ŵakaŵa ŵakavu yayi kweniso ŵasambazi yayi, ndipo tikaŵa Ŵakatolika. Munyumba yakwithu tilimo ŵana 5, ndipo ine nili wachiŵiri. Apo nkhaŵa mwana, nkhalutanga ku sukulu ya Katolika, ndipo nkhawovwiranga ŵasembe pa gome. Kweni nkhamanyanga vichoko chomene vya mu Baibolo. Nangauli nkhagomezganga kuti Chiuta wakwenera kuti waliko, kweni nkhagomezganga yayi kuti tchalitchi la Katolika linganovwira kuti nimusopenge.

Mu chaka chakwamba icho nkhasambiranga pa William Mitchell College of Law, ŵakutorana ŵaŵiri awo ŵakaŵa Ŵakaboni ŵa Yehova ŵakiza ku nyumba. Ŵakanisanga kuti natangwanika. Nkhachapanga malaya, ntheura ŵakati ŵamwizaso. Ŵakati ŵizaso, nkhaŵafumba mafumbo ghaŵiri: “Chifukwa wuli ŵanthu ŵaheni ndiwo vinthu vikuŵayendera mu charu?” na lakuti “Kasi munthu wangachita wuli kuti waŵe wakukondwa?” Ŵakanipa buku lakuti Unenesko Weneuwo Ukulongozgera ku Umoyo Wamuyirayira na Baibolo lakutowa la Chingelezi la Malemba Ghakupatulika mu Mang’anamuliro gha Charu Chiphya, la chikopi cha girini. Nkhazomera  kwamba kusambira nawo Baibolo. Ndipo nkhamba kujulika kumaso. Nkhakondwa chomene kumanya kuti Ufumu wa Chiuta ni boma lakuzirwa chomene ilo lizamunozga vinthu pa charu. Nkhajiwoneranga nekha kuti muwuso wa ŵanthu watondeka ndipo wapangiska waka vyakuŵinya, masuzgo, na vinthu vinandi vyambura urunji.

Nkhajipeleka kwa Yehova kukwambilira kwa chaka cha 1982 na kubatizika kuumaliro wa chaka ichi pa Ungano wa Chigaŵa wa mutu wakuti “Unenesko wa Ufumu” uwo ukachitikira ku St. Paul Civic Center. Sabata yakulondezgapo nkhalutaso pa malo agha chifukwa ndiko tikalemberanga mayeso gha vya uloya. Kukwambilira kwa Okutobala, nkhapulika kuti nakwera mayeso. Ntheura nkhaŵa wakwenelera kuŵa loya.

Ku Ungano Wachigaŵa wa “Unenesko wa Ufumu,” nkhakumana na Mike Richardson, uyo wakateŵeteranga pa Beteli ya Brooklyn, ndipo wakaniphalira kuti pa ofesi yithu yikuru iyi papangika dipatimenti yakuwona vya malango. Nkhakumbuka mazgu gha nduna ya ku Etiyopiya agho ghali pa Milimo 8:36, ndipo nkhajifumba kuti, ‘Ntchivichi chikunitondeska kupempha uteŵeti ku Ofesi Yakuwona vya Malango?’ Ntheura nkhapempha uteŵeti uwu.

Ŵapapi ŵane ŵakakondwa yayi kuti nazgoka yumoza wa Ŵakaboni ŵa Yehova. Adada ŵakanifumba usange kugwira ntchito ku Watchtower kunovwirenge pa ntchito yane ya uloya. Nkhaŵalongosolera kuti namuchita waka mulimo wakujipeleka. Nkhaŵaphaliraso kuti namupokeranga madola 75 pa mwezi. Ndalama iyi ndiyo ŵateŵeti ŵa pa Beteli ŵakapikanga.

Pakuti nkhagwiranga dankha ntchito ku khoti, nkhatondeka kuluta ku Beteli nyengo yeneyiyo. Kweni mu 1984, nkhamba kuteŵetera pa Beteli ya Brooklyn, New York. Nkhapika uteŵeti ku Ofesi Yakuwona vya Malango. Ivyo nkhasambira apo nkhagwiranga ntchito ku khoti vikanovwira chomene pa nyengo iyi.

Holo ya Stanley iyo yili mu Msumba wa Jersey, ku New Jersey yikagulika mu Novembala 1983. Ŵabali ŵakapempha ku boma kuti ŵambe kunozgaso mipopi, vimbuzi na magesi pa malo agha. Ŵakati ŵakumana na ŵalara ŵa boma, ŵabali ŵakaŵalongosolera kuti ŵakukhumba kuti mu holo iyi ŵachitirengemo maungano gha Ŵakaboni ŵa Yehova. Kweni pakaŵa suzgo limoza. Dango la Msumba wa Jersey likatenge malo ghakusoperako ghaŵenge ku malo uko kuli nyumba za ŵanthu pera. Holo ya Stanley yikaŵa ku malo ghakuchitirako malonda, ntheura ŵalara ŵa boma ŵakakana kuzomerezga kuti ghaŵe malo ghakusoperako. Ŵabali ŵakachita apilu, kweni apilu yikakanika.

 Mu sabata yakwamba nati nafika waka pa Beteli, gulu likatolera nkhani iyi ku khoti. Nkhamanyanga makora umo tingachitira na milandu yanthena chifukwa nkhaŵa kuti nagwirapo vyaka viŵiri ku khoti la, St. Paul, Minnesota. Yumoza mwa maloya ghithu wakati pa holo ya Stanley pakachitikiranga vinthu vyakupambanapambana, nga nkhuwonelera mafilimu, kweniso kukizanga ŵakwimba ŵa sumu za Rock. So pangalekerachi kuchitikira ungano wa chisopa? Khoti likayiwonaso makora nkhani iyi ndipo likadumura kuti Msumba wa Jersey ukatiswera wanangwa withu wakusopa. Khoti likalangura kuti msumba uwu utipe chikalata chakuzomerezga kuti tambepo ntchito yithu, ndipo nkhamba kuwona umo Yehova wakatumbikiranga gulu lake kuti ntchito yake yilute panthazi. Nkhakondwa chomene kuti nane nkhawovwirapo pa nkhani iyi.

Ŵabali ŵakambapo ntchito yikuru yakunozga holo iyi, ndipo ungano wa kilasi la nambara 79 la awo ŵakamalizga Sukulu ya Giliyadi ukachitikira mu holo iyi pa Seputembala 8, 1985. Ivi vikachitika pambere chaka chindakwane kufuma apo holo iyi yikanozgekera. Nkhaŵa na mwaŵi wa kuteŵetera mu ofesi yakuwona vya malango iyo yikawovwiranga chomene kuti vinthu vya Ufumu vilute panthazi. Nkhaŵa wakukondwa chomene kovwirapo pa ntchito ya Yehova. Chimwemwe icho nkhaŵa nacho panyengo iyi chikaluska icho nkhaŵa nacho pambere nindize ku Beteli. Kweni nkhamanyanga yayi kuti Yehova wanigwiliskirengeso ntchito pa milandu yinandi.

M’ma 1980 ŵadokotala na vipatala ŵakachindikanga yayi para Ŵakaboni ŵa Yehova ŵakukhumba wovwiri wambura kusazgako ndopa. Ŵadumbu awo ŵali na nthumbo ndiwo ŵakaŵanga mu suzgo chomene chifukwa kanandi ŵeruzgi mu makhoti ŵakatenge ŵamama awo ŵali na nthumbo ŵalije wanangwa wa kukana kupokera ndopa. Ŵeruzgi aŵa ŵakatenge para mama wangakana kupokera ndopa, mbwenu wafwenge ndipo mwana waŵenge wambura nyina.

Pa Disembala 29, 1988, Mudumbu Denise Nicoleau, wakataya ndopa zinandi wati wababa mwana. Ndopa zikachepa chomene ndipo dokotala wake wakamupempha kuti wazomere kupokera ndopa. Kweni mudumbu Nicoleau wakakana. Zuŵa lakulondezgapo mulenji, ŵachipatala ŵakapempha chikalata ku khoti chakuŵazomerezga kuti ŵamupe waka ndopa mudumbu uyu. Khoti likadumura kuti wapike ndopa kwambura kupeleka mwaŵi kwa mudumbu Nicoleau panji mfumu wake kuti ŵayowoyepo maghanoghano ghawo.

Pa Chinkhondi, Disembala 30, ŵachipatala ŵakamupa ndopa Mudumbu Nicoleau nangauli mfumu wake na ŵachibali ŵake awo ŵakaŵapo ŵakakana. Mise yake, mbumba zinyake, na mulara yumoza panji ŵaŵiri ŵakakakika chifukwa ŵati ndiwo ŵakajandizganga Mudumbu Nicoleau kuti waleke  kupokera ndopa. Pa Chisulo mulenji, Disembala 31, manyuzipepara, mawayilesi, na ma TV mu Msumba wa New York ghakapharazga vya nkhani iyi.

Pa Mande mulenji, nkhadumbiskana na Mweruzgi wa khoti likuru, Milton Mollen. Nkhamulongosolera nkhani yose, kweniso kuti ŵeruzgi ŵakadumura kuti mudumbu withu wapike ndopa kwambura kumupa mwaŵi wakuti wayowoyepo. Mollen wakaniphalira kuti nilute ku ofesi yake chakumise kuti tikadumbiskane mulandu uwu na kuwona malango ghanyake ghakukhwaskana na nkhani iyi. Philip Brumley, uyo wakaŵa mulaŵiliri wane, tikalutira lumoza ku ofesi ya Mollen mise yira. Mollen wakachemaso Loya wa chipatala chira kuti nayo waŵepo. Pakaŵa kuphurungana na mafumbo. Pa nyengo yinyake, Mubali Brumley wakalemba kapepala na kunipa. Wakalembapo kuti “khizga mtima.” Nakuti uwu ukaŵa ulongozgi uwemi chomene chifukwa nkhamba kuthukira apo nkhasuskananga na loya wa chipatala.

Pakati pajumpha pafupifupi ora limoza, Mweruzgi Mollen wakati mulandu uwu ndiwo uzamuŵa wakwamba kudumbika namachero. Apo tikafumanga mu ofesi yake, Mollen wakati loya wa chipatala “wavware zikhore namachero.” Wakang’anamuranga kuti loya wa chipatala chizamumuŵira chipusu yayi kupeleka vifukwa vyakupulikikwa ivyo ŵakachichizgira Mudumbu Nicoleau kuti wapokere ndopa uku mwenecho wakukana. Nkhawona kuti Yehova wakanikhozganga kuti mulandu uwu tizamuwina. Chikaŵa chakukondweska chomene kuwona kuti Yehova wakatigwiliskiranga ntchito kuti wafiske khumbo lake.

Usiku uwu tikatchezera kunozgekera ivyo tamuyowoya ku khoti namachero. Khoti likaŵa pafupi waka na Beteli ya Brooklyn, ntheura ŵabali ŵakuteŵetera mu Ofesi Yakuwona vya Malango ŵakenda waka kuluta ku khoti. Ŵeruzgi ŵanayi ŵakati ŵapulika chigaŵa chithu, ŵakati chikaŵa chambura kwenelera kudumura kuti mudumbu wapike ndopa mwakuchichizgika. Khoti likuru likakolerana na Mudumbu Nicoleau ndipo likati nkhuswa wanangwa wa ŵanthu kudumura waka nkhani kwambura kupulika dankha ku mulomo wa mulwari.

Nyengo yichoko waka yikati yajumphapo, khoti likuru chomene ku New York likadumura kuti Mudumbu Nicoleau wali na wanangwa wa kupokera wovwiri wambura kusazgako ndopa. Uwu ukaŵa mulandu wakwamba pa milandu yinayi yakukhwaskana na ndopa iyo nkhawovwirapo, iyo yikaŵa mu  makhoti ghakuru mu vigaŵa vyakupambanapambana vya United States. (Wonani bokosi lakuti “ Milandu Iyo Tawina mu Makhoti Ghakuru.”) Kweniso pamoza na maloya ghanyake nawovwirapo pa milandu yakukhwaskana na uyo wali na udindo wa kusunga na kusambizga mwana, kupatana, na milandu yinyake yakukhwaskana na malo na vyakuzenga.

Apo nkhakumana na Dawn kakwamba, wakaŵa kuti walekana na mfumu wake ndipo wakaŵa na ŵana ŵatatu. Wakasanganga yekha vyakukhumbikwa pa umoyo na kuchita upayiniya. Wakasangana na masuzgo ghanandi pa umoyo, kweni chikanikondweska chomene ntchakuti wakaŵikapo mtima kuteŵetera Yehova. Mu 1992, tikaluta ku Ungano wa Chigaŵa wa mutu wakuti “Ŵakunyamura Ungweru” mu Msumba wa New York ndipo nkhamusonga. Tikatorana chaka chakulondezgapo. Kuŵa na mwanakazi uyo wakutemwa chomene Yehova kweniso wakutemwa kuseka ntchawanangwa chakufuma kwa Yehova. Dawn wanichitira viwemi vinandi mu mazuŵa ghose agho taŵira lumoza.—Zinth. 31:12.

Apo tikatorananga, ŵana ŵakaŵa na vyaka 11, 13, na 16. Nkhakhumbanga kuŵa dada muwemi, ntheura nkhaŵazganga mabuku ghithu na kulondezga ulongozgi wose wakuyowoya vya umo ningaŵira dada muwemi wamusangapo. Vyaka vyose ivi pakaŵanga masuzgo ghanyake, kweni nkhukondwa kuti ŵana ŵakuniwona kuŵa mubwezi wawo wakugomezgeka kweniso dada wawo. Nyengo zose ŵabwezi ŵa ŵana ŵithu ŵakaŵa ŵakupokelereka pa nyumba yithu ndipo tikakondwanga chomene kuŵa na ŵawukirano aŵa.

Mu 2013, ine na Dawn tikasamira ku Wisconsin kuti tikapwelelere ŵapapi ŵithu ŵachekuru. Kweni nkhazizwa kuti uteŵeti wane wa pa Beteli ukamara yayi. Gulu likanipempha kuti nilutilire kovwirapo pa milandu yakupambanapambana.

Mu Seputembala 2018, nkhawonanga kuti ku singo kukazuranga mankhanana. Dokotala wakati wanipima, wakasanga yayi icho chikambiska suzgo ili. Pamanyuma, dokotala munyake wakasachizga kuti nkhawonane na dokotala wakumanya vya matenda gha ku wongo. Mu Janyuwale 2019, dokotala wakumanya vya wongo wakanipima ndipo wakati nili na nthenda iyo para pajumpha nyengo yinangenge thupi lose.

Pakati pajumpha mazuŵa ghatatu, apo nkhachitanga maseŵero ghanyake agho nkhutemwa, nkhaphyoka woko. Nkhaghamanyanga chomene maseŵero agha chifukwa naghachita kufuma pa wanichi, ntheura kuti niphyoke woko nkhamanya kuti nthenda yamba kunisakaza. Nthenda iyi yikapalara luŵiro chomene ndipo ichi chikanizizika. Nkhayamba kutondeka kuyowoya makora, kwenda, kweniso kumira chinthu.

Nili wakukondwa chomene kuti ntchito yane ya uloya yawovwira gulu la Yehova kuti lilute panthazi. Nalemba nkhani zinandi mu magazini ghakumanyikwa na kuyowoyapo pa maungano gha ŵadokotala, kulongosora kuti Ŵakaboni ŵa Yehova ŵali na wanangwa kusankha nthowa zakuchizgira na zakuchitira opareshoni kwambura ndopa. Kweni nkhuyowoya mazgu agho Luka wakayowoya pa Luka 17:10 kuti: ‘Nili muzga waka. Nachita ivyo nangwenera kuchita.’