1. Kasi Yehova wamuchitirani vichi?

KASI vikenda wuli kuti imwe muŵe Kaboni wa Yehova? Chakwamba mukapulika dankha ‘uthenga uwemi,’ panji kufuma ku ŵapapi ŵinu, munyinu wa ku ntchito, wa ku sukulu, panji kwizira mu upharazgi wa nyumba na nyumba. (Mrk. 13:10) Ndipo pamanyuma munthu munyake wakamalirapo nyengo yinandi na nkhongono kusambira namwe Baibolo. Panyengo iyo mukasambiranga Baibolo, mukamba kumutemwa Yehova ndipo mukamanya kuti nayo wakumutemwani. Yehova wakamuguzirani mu unenesko, ndipo sono ndimwe msambiri wa Khristu uyo wali na chigomezgo cha kuzakakhala na umoyo kwamuyirayira. (Yoh. 6:44) Mukwenera kuti mukumuwonga chomene Yehova chifukwa wakachiska munthu munyake kuti wamusambizgani unenesko na kumuzomerezgani imwe kuŵa muteŵeti wake.

2. Kasi tidumbiskanenge vichi mu nkhani iyi?

² Pakuti sono tikumanya unenesko, tili na mwaŵi wakovwiraso ŵanji kuti nawo tenderenge nawo lumoza pa nthowa yakuya ku umoyo. Nyengo zinyake kwa ise chingaŵa chipusu kupharazgira waka ŵanthu, kweni chingaŵa chakusuzga kwambiska sambiro la Baibolo kweniso kuchitiska sambiro. Kasi ndimo viliri kwa imwe? Usange ni nthena, masachizgo agho ghali mu nkhani iyi ghangamovwirani. Tidumbiskanenge ivyo vikutipangiska kuti tipharazgenge na kuzgora ŵanthu kuŵa ŵasambiri. Tiwonengeso umo tingachitira kuti titonde masuzgo agho ghangatitondeska kuti tambiske sambiro la Baibolo. Kweni chakwamba tiyeni tiwone dankha chifukwa icho tikwenera yayi kupharazga waka, kweni tikweneraso kuŵa ŵasambizgi ŵa makani ghawemi.

3. Chifukwa wuli tikupharazga?

³ Apo Yesu wakaŵa pa charu chapasi wakaphalira ŵalondezgi ŵake kuchita mulimo uwo uli na vigaŵa viŵiri. Chakwamba, wakaŵaphalira kuti ŵapharazgenge makani ghawemi gha Ufumu ndipo wakaŵalongora umo ŵakwenera kuchitira. (Mat. 10:7; Luka 8:1) Mwachiyelezgero, Yesu wakaphalira ŵasambiri ŵake ivyo ŵakwenera kuchita para ŵanthu ŵazomera uthenga wa ufumu kweniso para ŵakana uthenga wawo. (Luka 9:2-5) Kweniso wakayowoyerathu kuti ŵasambiri ŵake ŵazamupharazga ku ŵanthu ŵanandi kweniso mu malo na malo apo wakayowoya kuti ŵazamuchitira “ukaboni ku mitundu yose.” (Mat. 24:14; Mil. 1:8) Kwali ŵanthu ŵakuzomera uthenga wa Ufumu panji yayi, kweni Yesu wakaphalira ŵasambiri ŵake kuti ŵapharazgenge vya Ufumu wa Chiuta kweniso ivyo uzamufiska.

4. Kuyana na Mateyu 28:18-20, kasi tikwenera kuchitaso vichi padera pakupharazga vya Ufumu?

⁴ Kasi ntchinthu wuli chachiŵiri icho Yesu wakaphalira ŵasambiri ŵake kuti ŵachitenge? Wakaphalira ŵalondezgi ŵake kuti ŵasambizgenge ŵanthu kusungilira vinthu vyose ivyo iyo wakayowoya. Kweni ŵanthu ŵanyake ŵangati Yesu wakaphalira Ŵakhristu ŵakwambilira pera kuti ndiwo ŵapharazgenge na kusambizga, kweni kasi uwu mbunenesko? Yayi, Yesu wakalongora kuti mulimo wakuzirwa uwu uchitikenge m’paka mazuŵa ghithu ghano kweniso “m’paka umaliro wa charu ichi.” (Ŵazgani Mateyu 28:18-20.) Yesu wakwenera kuti wakayowoya mazgu agha apo wakawonekera ku ŵasambiri ŵake ŵakujumpha 500. (1 Kor. 15:6) Kweniso kwizira mu ivyo wakavumbulira Yohane, Yesu wakalongora mwa pakweru kuti wakukhumba ŵasambiri ŵake wose ŵasambizgenge ŵanji vya Yehova.—Chivu. 22:17.

5. Kuyana na 1 Ŵakorinte 3:6-9, kasi pali kukolerana wuli pakati pa kupharazga na kusambizga?

⁵ Mpositole Paulosi wakayaniska mulimo wakuzgora ŵanthu kuŵa ŵasambiri na ulimi kuti walongore kuti tikwenera kuchita vinandi padera pa kupanda waka. Wakaphalira Ŵakorinte kuti: “Ine nkhapanda, Apolo wakathilira . . . Imwe ndimwe munda wa Chiuta uwo ukulimika.” (Ŵazgani 1 Ŵakorinte 3:6-9.) Ise tili ŵantchito mu “munda wa Chiuta.” Ntheura tikupanda mbuto para tikupharazga, ndipo tikuthilira para tikusambizga. (Yoh. 4:35) Kweni tikumanya kuti Chiuta ndiyo wakukuzga mbuto panji kuti ndiyo wakuguza ŵanthu kwiza kwa iyo.

6. Kasi para tikusambizga ŵanthu tikwenera kuŵawovwira kuchita vichi?

⁶ Tikupenja awo ŵali na “maghanoghano ghakwenelera umoyo wamuyirayira.” (Mil. 13:48) Kuti tovwire ŵanthu kuŵa ŵasambiri, tikwenera kuŵawovwira (1) kupulikiska, (2) kugomezga na (3) kuchita ivyo ŵakusambira mu Baibolo. (Yoh. 17:3; Kol. 2:6, 7; 1 Tes. 2:13) Waliyose mu mpingo wangawovwira ŵasambiri ŵa Baibolo mwa kuŵalongora chitemwa kweniso kuŵapokelera para ŵiza ku maungano. (Yoh. 13:35) Uyo wakusambizga Baibolo wakwenera kumalirapo nyengo kweniso nkhongono zinandi kovwira msambiri wake kusintha ‘vinthu vyakukhomelera chomene’ ivyo wakugomezga. (2 Kor. 10:4, 5) Vingatora myezi yinandi kuti tovwire munthu kuti wasinthe na kuŵa wakwenelera kubatizika. Ntheura ntchakuzirwa chomene kuŵikapo mtima kumovwira.

7. Chifukwa wuli mukupharazga makani ghawemi na kusambizga ŵanthu?

⁷ Chifukwa wuli tikupharazga na kusambizga ŵanthu kuti ŵaŵe ŵasambiri? Chakwamba, ntchifukwa chakuti tikutemwa Yehova. Para mukuyezgayezga kupulikira dango lakuti mupharazgenge na kuzgora ŵanthu kuŵa ŵasambiri, mukulongora kuti mukutemwa Chiuta. (1 Yoh. 5:3) Ghanaghanirani fundo iyi: Mukupharazgira ŵanthu chifukwa chakuti mukutemwa Yehova. Kweni kasi chikaŵa chipusu nthena kupulikira dango ili lakuti mupharazgenge? Chikwenera kuti chikaŵa chipusu yayi. Kasi pa zuŵa lakwamba mukaŵa na  wofi kupharazga? Tikukayika yayi kuti mukaŵa na wofi. Kweni mukamanya kuti ntchito iyi ndiyo Yesu wakukhumba kuti muchite ndipo mukapulikira dango ili. Ndipo pati pajumpha kanyengo, mukamba kuyizgoŵera ntchito iyi. Kweni wuli pa nkhani ya kuchitiska sambiro la Baibolo? Kasi mukuchitaso wofi para mukughanaghanira nkhani iyi? Panyake ndimo viliri. Kweni para mwalomba kwa Yehova, kumupempha kuti wamovwirani kuŵa na chikanga kuti mwambiske sambiro la Baibolo, wamovwiraninge kuti muzgore ŵanthu kuŵa ŵasambiri.

8. Kuyana na Mariko 6:34, kasi ntchivichi chinyake chingatituma kuti tisambizgenge ŵanji?

⁸ Chachiŵiri, tikutemwa ŵanthu lekani tikuŵasambizga unenesko. Mwachiyelezgero, panyengo yinyake Yesu na ŵasambiri ŵake ŵakavuka chomene chifukwa ŵakaŵa kuti ŵapharazga chomene. Ŵakakhumbanga kuti ŵapumurepo, kweni mzinda ukaŵalondezga. Yesu chitima chikamukora ndipo wakamba kuŵasambizga “vinthu vinandi.” (Ŵazgani Mariko 6:34.) Wakalimbikira chomene nangauli wakaŵa kuti wavuka. Chifukwa wuli? Yesu wakamanya umo ŵanthu aŵa ŵakajipulikiranga. Wakakhumbanga kuŵawovwira chifukwa wakawona kuti ŵakasuzgikanga ndipo ŵakakhumbikwiranga chigomezgo. Mazuŵa ghano napo ndimoso vinthu viliri. Ŵanthu ŵali na masuzgo ndipo ŵakukhumbikwira chigomezgo nangauli ŵangawoneka nga vinthu vili makora panji nga ŵakukondwa na umoyo. Ŵali nga ni mberere izo zazgeŵa ndipo zilije muliska kuti wazilongozge. Mpositole Paulosi wakayowoya kuti ŵanthu ŵanthena aŵa, ŵakumumanya yayi Chiuta ndipo ŵalije chigomezgo. (Efe. 2:12) Ŵali pa “nthowa yisani iyo yikuya ku pharanyiko.” (Mat. 7:13) Para tighanaghanirenge umo ŵanthu ŵa mu chigaŵa chithu ŵaliri kuti ŵakukhumbikwira kumanya Chiuta, chitemwa chititumenge kuti tiŵawovwire. Ndipo nthowa yiwemi chomene iyo tingaŵawovwilira, nkhwamba kusambira nawo Baibolo.

9. Kuyana na Ŵafilipi 2:13, kasi Yehova wangamovwirani wuli?

⁹ Nyengo zinyake mukuchita wofi kuti mwambiske sambiro la Baibolo chifukwa mukumanya kuti mukhumbikwirenge nyengo yinandi kuti munozgekerenge kweniso kuchitiska sambiro la Baibolo. Usange ni nthena, muphalirani Yehova. Mupemphani kuti wamovwirani kuŵa na khumbo la kusanga munthu wakuti mwambe nayo sambiro la Baibolo. (Ŵazgani Ŵafilipi 2:13.) Mpositole Yohane wakutiphalira kuti Chiuta wazgorenge malurombo ghithu usange ghakukolerana na khumbo lake. (1 Yoh. 5:14, 15) Ntheura mungaŵa na chigomezgo chose kuti Yehova wamovwiraninge kuŵa na khumbo lakusambizga ŵanji.

10-11. Kasi ni vinthu wuli ivyo vingatitondeska kuŵa na sambiro la Baibolo?

¹⁰ Tikumanya kuti ntchito yithu ya kusambizga ŵanthu njakuzirwa chomene, kweni chingaŵa chakusuzga kuchita nthena nga umo tikukhumbira. Tiyeni tiwone masuzgo ghanyake agho ghangaŵapo kweniso umo tingaghatondera.

¹¹ Para panji tikuwona kuti tingafiska yayi chifukwa cha umo vinthu viliri pa umoyo withu. Mwachiyelezgero, ŵanyake mbachekuru ndipo ŵanyake ŵali makora viŵi yayi muthupi. Kasi ndimo vinthu viliri kwa imwe? Usange ndimo viliri, wonani vinyake ivyo tasambirako mu nyengo ya muliri wa COVID-19 iyi. Tasambira kuti tingapangiska masambiro gha Baibolo mwakugwiliskira ntchito foni panji vinthu vinyake vya tekinoloje. Ntheura ndikuti mungambiska sambiro la Baibolo uku muli panyumba yinu, icho ntchinthu chakusuzga yayi. Kweniso pali uwemi unyake. Ŵanyake ŵakukhumba kusambira Baibolo, kweni ŵakuŵa panyumba yayi panyengo iyo ŵabali ŵakunjilira mu upharazgi. Ŵangaŵa na m’pata mulenji chomene panji usiku. Kasi namwe mungasambira Baibolo na munthu panyengo izi? Yesu wakasambizga Nikodemo panyengo iyo yikaŵa yiwemi kwa Nikodemo.—Yoh. 3:1, 2.

12. Kasi ni vinthu wuli ivyo vingamovwirani kugomezga kuti namwe mungaŵa msambizgi muwemi?

 ¹² Para tikuwona kuti tingakwaniska yayi kupangiska sambiro la Baibolo. Panyake tikughanaghana kuti tikwenera dankha kumanya vinandi panji kuŵa dankha na luso pambere tindambe kusambira na munthu. Usange ndimo mukughanaghanira, wonani vinthu vitatu ivyo vingamovwirani kugomezga kuti namwe mungasambira Baibolo na munthu munyake. Chakwamba, Yehova wakuwona kuti ndimwe ŵakwenelera kusambizga ŵanji. (2 Kor. 3:5) Chachiŵiri, Yesu uyo wali na ‘mazaza ghose kuchanya na pa charu chapasi,’ ndiyo wamupani wenelero kuti musambizgenge ŵanji. (Mat. 28:18) Ndipo chachitatu, muli na ŵanyinu awo ŵangamovwirani. Yesu wakathembanga ivyo Adada ŵake ŵakamusambizga kuti wakayowoye, ndipo namweso ndivyo mungachita. (Yoh. 8:28; 12:49) Mwakusazgirapo, mungafumba masachizgo kwa mulaŵiliri wa gulu linu, mupayiniya waluso panji mupharazgi waluso kuti wamovwirani umo mungambiskira na kuchitiska sambiro la Baibolo. Chinyake icho chingamovwirani kuti muŵe msambizgi muwemi, nkhuŵira lumoza na ŵapharazgi ŵaluso aŵa para ŵakuchitiska sambiro la Baibolo.

13. Chifukwa wuli tikwenera kuzgoŵera nthowa ziphya zakasambizgiro?

¹³ Para tikuwona kuti ntchakusuzga kuzgoŵera nthowa ziphya zakupharazgira na vinthu vinyake vyakusambizgira ivyo vyafuma sono. Nthowa ya umo tikuchitiskira masambiro gha Baibolo pasono yasintha. Buku lithu lasono lakusambizgira ŵanthu Baibolo, la mutu wakuti Mungakondwa na Umoyo Kwamuyirayira!, likukhumbikwira kunozgekera makora sambiro lililose na kuchitiska mwakupambana na umo tikachitiskiranga kale. Tikuŵerenga ndime zichoko waka na kudumbiskana chomene na msambiri. Para tikusambizga, tikugwiliskira chomene ntchito mavidiyo na vinthu vinyake vya tekinoloje nga JW Library^®. Usange mukumanya yayi umo mungagwiliskira ntchito vinthu ivi, pemphani munthu munyake kuti wamusambizgani umo mungachitira. Ise taŵanthu tikutemwa kuchita vinthu munthowa iyo tili kuzgoŵera. Ntheura ntchipusu yayi kuzgoŵera kuchita vinthu munthowa yinyake. Kweni na wovwiri wa Yehova kweniso ŵanji, chimuŵiraninge chipusu kuzgoŵera ndipo vimunozgeraninge chomene para mukusambira na ŵanthu. Mupayiniya munyake wakayowoya kuti, nthowa iyi yakusambizgira, “njakunozga chomene kwa msambiri na msambizgi wuwo.”

14. Kasi tikwenera kukumbuka vichi para tikupharazga mu chigaŵa icho ntchakusuzga kwambiska masambiro gha Baibolo, ndipo kasi lemba la 1 Ŵakorinte 3:6, 7, likutikhozga wuli?

¹⁴ Para tikukhala mu chigaŵa icho ntchakusuzga kwambiska masambiro gha Baibolo. Ŵanthu ŵanyake ŵakukhumba yayi kupulika uthenga withu ndipo panji ŵakususka. Kasi ntchivichi chingatovwira kulutilira kugomezga kuti ŵanthu ŵanthena aŵa ŵangategherezga uthenga wa mu Baibolo uwo tikupharazga? Kumbukani kuti vinthu vikusintha mwaluŵiro chomene pa umoyo wa ŵanthu mu charu chiheni ichi, ndipo ŵanthu awo pakwamba ŵakakhumbanga yayi uthenga withu, ŵangamba kuwamo kuti ŵakukhumbikwira ulongozgi wakufuma kwa Chiuta pa umoyo wawo. (Mat. 5:3) Ŵanji awo pakwamba ŵakakananga mabuku ghithu pamanyuma ŵakazomera sambiro la Baibolo. Tikumanyaso kuti Yehova ndiyo ni Mwenecho wa vuna. (Mat. 9:38) Wakukhumba kuti ise tilutilire kupanda na kuthilira, kweni Iyo ndiyo wakukuzga. (1 Kor. 3:6, 7) Ndipo ntchakukhozga chomene kumanya kuti nanga tingaŵa kuti tilije sambiro la Baibolo pasono, Yehova wakutilumba chifukwa cha kuyezgayezga kwithu, kuti ntchifukwa cha unandi wa ŵanthu awo tikuŵapa mabuku ghithu yayi panji awo tikusambira nawo. *

15. Kasi Yehova wakujipulika wuli para munthu wazomera kusambira Baibolo ndiposo para wakuchita ivyo wakusambira?

¹⁵ Yehova wakukondwa para munthu wazomera kusambira unenesko wa mu Baibolo ndiposo para wakuphalirako ŵanyake ivyo wakusambira. (Zinth. 23:15, 16) Yehova wakukondwaso chomene para wakuwona ŵanthu ŵake ŵakulimbikira kupharazga na kusambizga mazuŵa ghano. Mwachiyelezgero, nangauli mu chaka cha uteŵeti cha 2020 kwanguŵa muliri uwo wachitika pa charu chose, kweni tanguchitiska masambiro gha Baibolo ghakukwana 7,705,765, ndipo ivi vyawovwira kuti ŵanthu ŵakukwana 241,994, ŵajipeleke kwa Yehova na kubatizika. Ndipo ŵasambiri ŵaphya aŵa, nawo ŵachitiskenge masambiro gha Baibolo na kupangaso ŵasambiri ŵanandi. (Luka 6:40) Kwambura kukayika, tikumukondweska chomene Yehova para tikuchitako mulimo wakuzgora ŵanthu kuŵa ŵasambiri.

16. Kasi tikwenera kujiŵikira chilato wuli?

¹⁶ Kuzgora ŵanthu kuŵa ŵasambiri ni mulimo wakusuzga, kweni na wovwiri wa Yehova tingafiska kuchitako mulimo uwu wakusambizga ŵanthu kuti ŵatemwenge Adada ŵithu ŵakuchanya. Kasi mungajiŵikira yayi chilato kuti mwambe kusambizga munthu Baibolo? Mungazizwa na ivyo vingachitika usange mungapemphanga waliyose uyo mukukumana nayo kuti mwambe kusambira nayo. Usange tichitenge nthena, Yehova watumbikenge kuyezgayezga kwithu.

17. Kasi tijipulikenge wuli usange nase tiŵenge na sambiro la Baibolo?

¹⁷ Ni mwaŵi wapadera chomene kupharazga kweniso kusambizga ŵanji unenesko. Mulimo uwu ukutovwira chomene kuti tiŵenge ŵakukondwa. Mpositole Paulosi uyo wakawovwira ŵanthu ŵanandi ku Tesalonika kuŵa ŵasambiri, wakayowoya umo wakajipulikiranga, ndipo wakati: “Kasi chigomezgo chithu panji chimwemwe panji mphumphu yakunothera ni vichi panthazi pa Fumu yithu Yesu? Asi ndimwe? Imwe ndimwe uchindami na chimwemwe chithu.” (1 Tes. 2:19, 20; Mil. 17:1-4) Ŵanandi ndimo ŵakujipulikiraso mazuŵa ghano. Mudumbu munyake zina lake Stéphanie uyo pamoza na mfumu wake ŵawovwirapo ŵanthu ŵanandi kubatizika wakuti: “Palije chinthu chakukondweska kuluska kovwira ŵanthu kujipeleka kwa Yehova.”