Yehova wakukhumba kuti ŵanthu awo ŵatorana ŵakondwenge mu nthengwa mwawo kweniso kuti ŵakhale lumoza umoyo wawo wose. (Mat. 19:4-6) Usange mukukhumba kutora panji kutengwa, kasi mungachita wuli kuti musange munyinu muwemi wakutorana nayo? Pakuti Yehova ndiyo wakatilenga, wakumanya ivyo tikwenera kuchita kuti tiŵe na mbumba yakukondwa. Ntheura, usange mulondezgenge fundo zake izo wakutipa kwizira mu Baibolo, muŵenge na mbumba yakukondwa nadi. Wonani zinyake mwa fundo izo watipa.

Chakwamba, tikwenera kujisanda na kughanaghanirapo fundo yakuti: “Mtima nguryarya kuluska chilichose, nguheni wambura kukoleka.” (Yer. 17:9) Para ŵanthu ŵaŵiri ŵasangana waka ndipo ŵakukhumba kuŵa pa chibwezi, mwaluŵiro ŵangamba kutemwana chomene ndipo para vyaŵa nthena, chingaŵa chakusuzga kuti ŵasankhe makora vinthu. Para ŵanthu ŵasankha kuti ŵatorane chifukwa chakuti waka ndimo ŵakujipulikira, paumaliro ŵakuzakakhuŵara. (Zinth. 28:26) Lekani ni mahara yayi kuti ŵanthu ŵaŵiri ŵakuti ŵasangana waka ŵambe kutemwana chomene panji kulayizgana nthengwa pambere ŵandamanyane makora.

Lemba la Zintharika 22:3 likuti: “Munthu wakuchenjera wakuwona ulwani na kubisama, kweni muzeleza wakujendera bweka ndipo wakupwetekeka.” Kasi pangaŵa uheni wuli usange munthu wangasanga munyake wakuti watorane nayo pa webusayiti? Chachitima ntchakuti ŵanyake awo ŵakayegheka waka maghanoghano na munthu uyo ŵakasangana nayo pa webusayiti na kwamba kusongana nayo, pamanyuma ŵakawamo kuti munthu uyo wakaŵapusikanga waka. Kweniso ŵanthu ŵakhuluku ŵapanga maakaunti yautesi kuti ŵibire waka ŵanthu ndalama. Ndipo ŵanyake awo ŵakuchita ukhuluku uwu ŵakuyowoya kuti Mbakaboni.

Wonaniso ngozi yinyake iyo yingaŵapo. Mawebusayiti ghanyake ŵali kughapanga munthowa yakuti ghasankhenge ŵanthu awo mbakwenelerana kusongana mwakugwiliskira ntchito nthowa za masamu. Kweni palije ukaboni wakuti nthowa izi zikukora nadi. Chingaŵa chamahara yayi kugomezga pulogiramu ya pa kompyuta yakupangika na munthu kuti ndiyo yitovwire kusankha chinthu icho ntchakuzirwa chomene pa umoyo withu nga ni munthu uyo tingatorana nayo. Mapulogiramu gha pa kompyuta ngakugomezgeka yayi nga umo ziliri fundo za mu Baibolo.​—Zinth. 1:7; 3:5-7.

Fundo ya pa Zintharika 14:15 yikuti: “Munthu muzeleza wakugomezga mazgu ghalighose, kweni wakuchenjera wakulanguruka pa mendero ghake ghose.”  Pambere mundasankhe munthu uyo mukuwona kuti mungatorana nayo, mukwenera kumumanya dankha makora. Kweni chingaŵa chakusuzga kumumanya makora munthu usange mwasangana waka pa Intaneti. Nanga mungaŵa kuti mukumanyapo vinyake vya munthu uyo ivyo wali kulemba vyakukhwaskana na iyo, kweniso mukuchezga chomene pa Intaneti, kasi mbwenu ndikuti mukumumanya makora munthu uyo? Ŵanyake awo ŵakaghanaghananga kuti ŵasanga chitemwa cheneko, ŵakazakakhuŵara na ivyo ŵakazakawona ŵati ŵakumana na munthu uyo maso na maso.

Wamasalimo munyake wakati: “Nkhukhala chara pamoza na ŵanthu ŵapusikizgi. Ndipo nkhugega awo ŵakujibisa umo ŵaliri.” (Sal. 26:4) Ŵanthu ŵanandi ŵakuwona kuti ntchiwemi waka kuteta pa mawebusayiti yakusongeranapo kuti ŵawonekenge ŵawemi. Ŵakubisa nkharo zawo ziheni para ŵakutumizga mameseji ku ŵanji. Ntheura ntchakuzirwa chomene kuti mughanaghanire mazgoro gha mafumbo agha: Nanga ŵanthu ŵanyake ŵangati Mbakaboni ŵa Yehova, kweni kasi mbakubatizika? Kasi mbakukhwima mwauzimu? Kasi ŵali paubwezi uwemi na Yehova? Kasi ŵanthu ŵakuŵachindika mu mpingo? Kasi ŵakuchita vinthu viheni ndipo ni “mendezgano ghaheni”? (1 Kor. 15:33; 2 Tim. 2:20, 21) Kasi mbanangwa kutora panji kutengwa kuyana na fundo za mu Baibolo? Ntchakukhumbikwa chomene kumanya mazgoro gha mafumbo agha, kweni chingaŵa chakusuzga kumanya kwambura kufumba ku Ŵakaboni ŵanyake awo ŵakumumanya makora munthu uyo. (Zinth. 15:22) Kweniso unenesko ngwakuti, muteŵeti wakugomezgeka wa Yehova wangaghanaghana yayi zakutorana na munthu wambura kugomezga, ndipo pamanyuma na ‘kukakika joko’ na munthu uyo.​—2 Kor. 6:14; 1 Kor. 7:39.

Chifukwa chakuti ntchakofya chomene kugwiliskira ntchito mawebusayiti agho ŵanthu ŵakusongeranapo, pali nthowa ziwemi izo mungapenjera na kumanyana na munthu wakwenelera uyo mungatorana nayo. Kasi ni nkhu uko mungasanga munthu muwemi wakuti mungatorana nayo? Para ntchakuzomerezgeka ŵanthu ŵanandi kukumana pamoza, ndipo tingaŵa na mwaŵi wakumanyana makora na ŵanji, kwali mpha maungano gha mpingo, maungano gha dera, gha chigaŵa na nkhumano zinyake.

Para vingachitika yayi kukumana pamoza nga umo viliri mu nyengo ya muliri wa COVID-19 iyi, tingagwiliskira ntchito vinthu vya tekinoloje kuti tichite maungano gha mpingo ndipo uwu ungaŵaso mwaŵi uwo tingamanyirako Ŵakaboni ŵanyake awo ŵandatengwe panji kutora. Mungawona para ŵakuyowoya nkhani pa maungano na kuwona umo ŵakulongolera chipulikano chawo para ŵakuzgorapo. (1 Tim. 6:11, 12) Kweniso mungayowoyeskana nawo para maungano ghamara waka. Kweniso para mphanyengo yakuchezga na Ŵakaboni ŵanyithu, mungawona umo munthu uyo mukumukhumba wakuchezgera na ŵanji, ndipo ivi vingamovwirani kumanya mikhaliro iyo wali nayo. (1 Pet. 3:4) Para nyengo yajumphapo ndipo mwamba kumanyana makora, mungawona usange muli na vilato vyakuyana kweniso usange mungatorana.

Para ŵanthu awo ŵandatore panji kutengwa ŵakugwiliskira ntchito fundo za mu Baibolo kuti ŵasange munthu wakwenelera wakuti ŵangatorana nayo, ŵangaŵa na nthengwa yakukondwa, nga umo ntharika yinyake ya mu Baibolo yikuyowoyera kuti: “Uyo wasanga muwoli [panji mfumu] muwemi wasanga chinthu chiwemi, ndipo wakutemweka na Yehova.”​—Zinth. 18:22.