1-2. Kasi ni layizgo wuli ilo lili pa Yesaya 65:16, 17, ilo likutovwira kuti tizizipizgenge?

UNGANO withu wa chigaŵa wa 2017 ukaŵa na mutu uwemi chomene wakuti “Mungavukanga Chara!” Ungano uwu ukatovwira kumanya umo tingazizipizgira masuzgo. Kufika sono, pajumpha vyaka 4 kufuma apo tikachitira ungano uwu, ndipo tichali kuzizipizga masuzgo agho tikukumana nagho mu charu chiheni ichi.

² Kasi imwe mwasanganapo na masuzgo wuli mwasonosono apa? Kasi mubali winu panji mubwezi winu wali kutayika? Kasi mukulwara nthenda yinyake yakofya? Kasi umoyo wamba kusuzga chifukwa chakuti sono mukuchekura? Kasi mukakhwaskika na soka la chilengiwa, viwawa, panji nthambuzgo? Panji kasi namwe mwakhwaskika na muliri wa COVID-19 panji nthenda yinyake? Tikulindilira mwakunweka zuŵa ilo masuzgo ghose agha ghazamumalira, tizamuluwako ndipo ghazamuchitikaso yayi.—Ŵazgani Yesaya 65:16, 17.

3. Kasi tikwenera kuchita vichi sono, ndipo chifukwa wuli?

³ Umoyo mu charu ichi ngwakusuzga chomene, ndipo masuzgo ghalutilirenge kuhenipirahenipira munthazi umu. (Mat. 24:21) Ntheura tikwenera kulutilira kuzizipizga. Chifukwa wuli? Chifukwa Yesu wakati: “Para muzamuzizipizga, muzamusungilira umoyo winu.” (Luka 21:19) Tingalutilira kuzizipizga para tingaghanaghanira umo ŵanji ŵakuzizipizgira masuzgo ghakuyanako waka na ghithu.

4. Chifukwa wuli tingati Yehova ntchiyelezgero chiwemi chomene pa nkhani ya kuzizipizga?

⁴ Kasi ni njani uyo ntchiyelezgero chiwemi chomene pa nkhani ya kuzizipizga? Yehova Chiuta. Kasi zgoro ili lamuzizikani? Panji lamuzizikani nadi. Kweni para mwaghanaghanirapo mupulikiskenge. Charu ichi chikuwusika na Dyabulosi lekani chili na masuzgo ghanandi. Yehova wali na nkhongono zakuti wangamazga masuzgo agha sono nthe, kweni wakulindilira kuti wazakachite ivi munthazi.  (Rom. 9:22) Kweni pasono, Chiuta withu wakulutilira waka kuzizipizga m’paka panyengo iyo wazamuparanyira charu ichi. Tiyeni tiwone vinthu 9 ivyo Yehova wakuzizipizga.

5. Kasi zina la Chiuta layuyulika wuli, ndipo imwe mukujipulika wuli chifukwa cha ivi?

⁵ Kubinkhiskika kwa zina lake. Yehova wakulitemwa zina lake, ndipo wakukhumba kuti waliyose walichindikenge. (Yes. 42:8) Kweni kwa vyaka vyakujumpha 6,000, zina lake laŵa likuyuyulika. (Sal. 74:10, 18, 23) Ivi vikambira mu munda wa Edeni apo Dyabulosi (kung’anamura “Mutesi”) wakanyoza Chiuta kuti wakunora Adamu na Eva chinthu chinyake icho ŵakakhumbikwiranga kuti ŵaŵe ŵakukondwa. (Gen. 3:1-5) Kufuma waka panyengo yira, Yehova wakuneneka kuti wakunora ŵanthu vinthu ivyo ŵakukhumbikwira nadi. Yesu wakasuzgikanga chomene mu mtima chifukwa chakuti zina la Adada ŵake likabinkhiskikanga. Lekani wakaphalira ŵasambiri ŵake kuti ŵalombenge kuti: “Adada ŵithu imwe muli kuchanya, zina linu lituŵiskike.”—Mat. 6:9.

6. Chifukwa wuli Yehova wazomerezga kuti pajumphe nyengo yitali pambere wandalongore kuti ndiyo ngwakwenelera kuwusa kuchanya na charu chapasi?

⁶ Ŵanandi ŵakususka Chiuta na muwuso wake. Yehova pera ndiyo ngwakwenelera kuwusa kuchanya na pa charu chapasi, ndipo muwuso wake ndiwo nguwemi chomene. (Chivu. 4:11) Kweni Dyabulosi wayezgayezga kupusika ŵanthu na ŵangelo ŵanyake kuti ŵambe kughanaghana kuti Chiuta ngwakwenelera yayi kuwusa. Patolenge nyengo kuti Yehova walongore kuti ndiyo nadi ngwakwenelera kuwusa, kweniso kuti ndiyo ni muwusi muwemi chomene. Chiuta wazomerezga kuti ŵanthu ŵajiwusenge ŵekha kwa nyengo yitali kuti ŵajiwonere ŵekha kuti ŵangajiwusa makora yayi kwambura kupulikira Mlengi. (Yer. 10:23) Chifukwa chakuti Chiuta wazikira, para nkhani iyi yikuzakamazgika, yizamuŵa kuti yamazgikirathu. Wose ŵazamumanya kuti muwuso wa Yehova ndiwo nguwemi chomene ndipo ni Ufumu wake pera uwo uzamwiziska bata na mtende pa charu chapasi.

7. Kasi mbanjani ŵali kugalukira Yehova ndipo Yehova wazamuŵachitira vichi?

⁷ Kugaluka kwa ŵana ŵake ŵanyake. Yehova wakalenga ŵangelo na ŵanthu ŵakufikapo. Kweni mungelo munyake uyo wakazgoka Satana (kung’anamura “Wakususka”) wakagalukira Yehova na kupusika ŵanthu ŵakufikapo, Adamu na Eva kuti nawo ŵagalukire Yehova. Ŵangelo ŵanyake nawo ŵakakolerana nayo. (Yuda 6) Pamanyuma, mtundu wa Israyeli, uwo ukaŵa mtundu wakusankhika wa Chiuta, ukagaluka na kwamba kusopa ŵachiuta ŵatesi. (Yes. 63:8, 10) Yehova wakawona kuti apa ŵanthu ŵamutaya. Ndipouli, wazizipizga vyose ivi, ndipo walutilirenge kuzizipizga m’paka apo nyengo yizamukwanira yakuti waparanye wose ŵakugaluka. Para ivi vyazakachitika, Yehova na wose awo mbakugomezgeka kwa iyo ŵazamukondwa chomene chifukwa ŵazamukhumbikwiraso kuzizipizga vinthu viheni vya mu charu ichi yayi.

8-9. Kasi ni mautesi wuli agho ŵanthu ŵakumuyowoyera Yehova, ndipo ise tingachitapo vichi?

⁸ Mautesi gha Dyabulosi. Satana wakanena Yobu pamoza na ŵateŵeti wose ŵa Yehova kuti ŵakusopa Chiuta pera chifukwa cha uryezi. (Yobu 1:8-11; 2:3-5) Dyabulosi wachali kunena ŵanthu m’paka sono. (Chivu. 12:10) Nase tingawovwirapo kulongora kuti Satana ni mutesi para tikuzizipizga viyezgo na kulutilira kuŵa ŵakugomezgeka kwa Yehova chifukwa chakuti tikumutemwa. Ndipo nga umo vikaŵira kwa Yobu nase Yehova watitumbikenge para tazizipizga.—Yak. 5:11.

⁹ Satana wakugwiliskira ntchito ŵalongozgi ŵa visopa vyautesi kuti ŵayowoyenge kuti Yehova ngwankhaza ndipo ndiyo wakupangiska kuti ŵanthu ŵasuzgikenge. Ŵanyake ŵakufika na pakuyowoya kuti para ŵana ŵafwa, ni Chiuta waŵatora chifukwa wakukhumba ŵangelo ŵanandi kuchanya. Uku nkhumuyuyura chomene Chiuta.  Kweni ise tikumanya kuti Yehova ni Dada wachitemwa. Para talwara nthenda yakofya panji para mubali withu wakutemweka wafwa, tikumupa mulandu Chiuta withu yayi. Kweni tili na chipulikano kuti zuŵa linyake wazamuchizga ŵalwari kweniso wazamuwuska ŵakufwa. Nakuti tikwenera kuphalira waliyose uyo wangatemwa kumanya kuti Yehova ni Chiuta wachitemwa chomene. Para tachita nthena, ndikuti Yehova wamuzgorenge uyo wakumunena.—Zinth. 27:11.

10. Kasi lemba la Salimo 22:23, 24, likuvumbura vichi vyakukhwaskana na Yehova?

¹⁰ Kusuzgika kwa ŵateŵeti ŵake. Yehova ni Chiuta walusungu chomene. Chitima chikumukora chomene para wakuwona kuti tikusuzgika chifukwa cha nthambuzgo, ulwari, panji kuwura urunji kwithu. (Ŵazgani Salimo 22:23, 24.) Yehova wakumanya umo tikusuzgikira, wakukhumba chomene kumazga ivi, ndipo wamazgenge nadi. (Yaniskani na Ekisodo 3:7, 8; Yesaya 63:9.) Zuŵa likwiza apo “wazamufyura masozi ghose ku maso [ghithu], ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya.”—Chivu. 21:4.

11. Kasi Yehova wakujipulika wuli chifukwa cha ŵateŵeti ŵake ŵakugomezgeka awo ŵali kufwa?

¹¹ Nyifwa ya ŵabwezi ŵake. Kasi Yehova wakujipulika wuli para ŵanalume na ŵanakazi ŵakugomezgeka ŵatayika? Iyo ngwakukhumbisiska chomene kuti wazakaŵawoneso. (Yobu 14:15) Ghanaghanirani waka umo Yehova wamusoŵera mubwezi wake Abrahamu. (Yak. 2:23) Panji Mozesi, uyo wakayowoyeskana nayo “maso na maso.” (Eks. 33:11) Ndipo ngwakukhumbisiskaso chomene kupulika Davide na ŵanji awo ŵakalembako masalimo ŵakwimba sumu ziwemi za malumbo. (Sal. 104:33) Nangauli ŵabwezi ŵa Yehova aŵa ŵali kufwa, kweni Yehova wandaŵaluwe. (Yes. 49:15) Wakukumbuka chilichose chakukhwaskana na wunthu wawo kweniso umo ŵakaŵira. Ndipo Baibolo likuyowoya kuti “wose mbamoyo mu kawonero kake.” (Luka 20:38, mazgu ghamusi) Zuŵa linyake wazamuŵawuska,  ndipo wazamupulikaso malurombo ghawo ghakufumira pasi pa mtima na kuzomera kusopa kwawo. Usange namwe mubali winu wali kufwa, fundo izi zingamupembuzgani.

12. Kasi ntchivichi chikumukwenyelezga chomene Yehova mu mazuŵa ghaheni ghaumaliro agha?

¹² Ŵanthu ŵaheni awo ŵakupweteka ŵanyawo. Uchigaluka ukati wamba mu Edeni, Yehova wakamanya kuti vinthu vihenipenge chomene ndipo patolenge nyengo kuti vizakanozgekeso. Yehova wakutinkha chomene nkhaza, kuchitirana vinthu vyambura urunji na viwawa ivyo vyazara mu charu mazuŵa ghano. Iyo nyengo zose wakuŵikako mahara chomene ku ŵanthu awo ŵangajivikilira yayi paŵekha. Mwachiyelezgero, ŵanthu awo mbakulopwa, ŵana ŵalanda kweniso vyokoro. (Zek. 7:9, 10) Yehova wakukwenyelera chomene para wakuwona ŵateŵeti ŵake ŵakugomezgeka ŵakutambuzgika na kujalirika mu jele. Manyani kuti Yehova wakumutemwani chomene mose imwe mukuzizipizga nayo lumoza.

13. Kasi ni mikhaliro wuli yiheni iyo Chiuta wakuwona pakati pa ŵanthu, ndipo kasi wachitengepo vichi?

¹³ Kugonana kwambura kwenelera uko ŵanthu ŵakuchita. Ŵanthu ŵali kulengeka mu chikozgo cha Chiuta, kweni Satana wakuŵapangiska kuti ŵachitenge vinthu viheni. Chiuta wakati wawona kuti “uheni wa ŵanthu ukaŵa ukuru chomene” mu nyengo ya Nowa, “chitima chikamukora Yehova kuti wakapanga munthu pa charu chapasi, ndipo vikamuŵinya mu mtima wake.” (Gen. 6:5, 6, mazgu ghamusi, 11) Kasi tingati vinthu viliko makora pasono kuluska nyengo yira? Yayi, sono ndipo vyahenipirathu. Dyabulosi ngwakukondwa chomene kuti kugonana kwambura kwenelera kwa mtundu uliwose kwazara chomene, kusazgapo vinthu vinyake vyaukazuzi ivyo vikuchitika pakati pa ŵanthu awo mbakupambana viŵaro kweniso pakati pa ŵanalume panji ŵanakazi ŵekhaŵekha. (Efe. 4:18, 19) Satana wakukondwaso chomene para awo ŵakusopa Yehova ŵachita kwananga kukuru. Para Yehova wazikira mwakukwana, wazamulongora kuti wakutinkha chomene vinthu viheni mwa kuparanya ŵanthu wose awo ŵakukana kusintha.

14. Kasi ŵanthu ŵakuchita vichi na charu kweniso vinyama?

¹⁴ Kunangika kwa chilengiwa. Munthu wakupwetekeka ŵanyake pera yayi para wakuwusa, kweniso wakutondeka kupwelelera charu na vinyama ivyo Yehova wakaphalira ŵanthu kuti ŵavipwelelerenge. (Muph. 8:9; Gen. 1:28) Ŵasayansi ŵanyake ŵakuti ivyo ŵanthu ŵakuchita vingapangiska kuti mitundu 1 miliyoni ya vinyama na vyakumera yimalirethu mu vyaka vichoko waka kunthazi uku. Lekani ntchakupulikikwa kuti ŵanthu ŵakufipa mtima na kunangika kwa chilengiwa. Kweni tikuwonga Yehova chifukwa walayizga kuti ‘waparanyenge awo ŵakunanga charu’ na kuzgora charu chapasi kuŵa paradiso.—Chivu. 11:18; Yes. 35:1.

15-16. Kasi ntchivichi chikwenera kutovwira kuti nase tizizipizgenge nga ni Yehova? Pelekani chiyelezgero.

¹⁵ Ghanaghanirani waka unandi wa vinthu viheni ivyo Adada ŵithu ŵakuchanya ŵazizipizga kwa vyaka masauzandi ghanandi. (Wonani bokosi la mutu wakuti “ Ivyo Yehova Wakuzizipizga.”) Yehova wangamazga vinthu viheni ivyo vikuchitika mu charu ichi nyengo yiliyose iyo wakhumbira. Kweni kuzikira kwake kwatovwira chomene ise. Ghanaghanirani chiyelezgero ichi. Tiyelezgere kuti mfumu na muwoli wake ŵaphalirika kuti mwana wawo uyo wandababike wali na masuzgo ghanandi chomene ndipo para wababika wazamukhala umoyo wakusuzgika chomene ndipo wazamufwa wachali muchoko. Kweni ŵapapi ŵakukondwa para mwana wababika nangauli chiŵenge chakusuzga kuti ŵamupwelelere. Chitemwa icho ŵali nacho pa mwana wawo ndicho chikuŵawovwira kuti ŵazizipizge masuzgo agho ŵakukumana nagho apo ŵakuyezgayezga kuti mwana wawo waŵe na umoyo uwemi.

¹⁶ Mwakuyana waka, ŵana wose ŵa Adamu na Eva ŵakubabika ŵambura kufikapo. Kweni nipera  Yehova wakuŵatemwa ndipo wakuŵapwelelera. (1 Yoh. 4:19) Ndipo mwakupambanako na ŵapapi ŵa mu chiyelezgero, awo palije icho ŵangachitapo, Yehova wali na nkhongono zakumazgira masuzgo gha ŵana ŵake. Wali kusankha kale nyengo iyo wazamumazgira masuzgo ghose agho ŵanthu ŵakukumana nagho. (Mat. 24:36) Chitemwa cha Yehova, chikwenera kutipangiska kuti nase tizizipizgenge nyengo yiliyose apo ntchakwenelera.

17. Kasi ivyo Yesu wakazizipizga, nga umo pakuyowoyera pa Ŵahebere 12:2, 3, vikutovwira wuli ise kuti tilutilire kuzizipizga?

¹⁷ Yehova ntchiyelezgero chiwemi chomene pa nkhani ya kuzizipizga. Yesu wakaŵayezga makora chomene Adada ŵake pa nkhani ya kuzizipizga. Apo wakaŵa pa charu chapasi, wakazizipizga kayowoyero ka msinjiro, wakasulako soni ndipo wakazizipizga khuni lakusuzgikirapo chifukwa cha ise. (Ŵazgani Ŵahebere 12:2, 3.) Tikukayika yayi kuti chiyelezgero chiwemi cha Yehova pa nkhani ya kuzizipizga, ndicho chikamovwira Yesu kuti nayo wazizipizge. Ndipo naseso chingatovwira.

18. Kasi lemba la 2 Petrosi 3:9 likutovwira wuli kupulikiska ivyo vyachitika chifukwa chakuti Yehova wazikira chomene?

¹⁸ Ŵazgani 2 Petrosi 3:9. Yehova wakumanya nyengo yakwenelera yakumazgira charu chiheni ichi. Chifukwa chakuti wazikira, vyawovwira kuti ŵanthu ŵanandi ŵamumanye makora ndipo pasono mzinda ukuru wa ŵanthu mamiliyoni ghanandi ukumusopa. Wose mbakukondwa kuti Yehova wazizipizga mwakukwana m’paka iwo ŵababika, ŵasambira kumutemwa iyo, na kujipeleka kwa iyo. Vizamuwoneka mwapakweru kuti Yehova wakachita makora kuzizipizga, para wazakapeleka njombe ku ŵanthu mamiliyoni ghanandi awo ŵazizipizga m’paka kuumaliro.

19. Kasi tikwenera kuŵikapo mtima kuchita vichi ndipo tizamusanga vitumbiko wuli?

¹⁹ Tikusambirako kwa Yehova umo tingazizipizgira uku tili ŵakukondwa. Nangauli pachitika vinthu vinandi vyakuchitiska chitima kweniso masuzgo agho Satana wapangiska, kweni Yehova wakulutilira kuŵa “Chiuta wakukondwa.” (1 Tim. 1:11) Naseso tingalutilira kuŵa ŵakukondwa apo tikulindilira mwakuzikira kuti Yehova watuŵiske zina lake, kulongora ukuru wake, kumazga uheni wose, na kumazga masuzgo ghose agho tikusangana nagho pasono. Tiyeni tiŵikepo mtima kuzizipizga mwakukondwa uku tikumanya kuti Adada ŵithu ŵakuchanya nawo ŵakuzizipizga. Usange tachita nthena, mazgu agha ghaŵenge ghaunenesko kwa waliyose wa ise, ghakuti: “Wakukondwa ni munthu uyo wakulutilira kuzizipizga chiyezgo, chifukwa para wazomerezgeka wazamupokera mphumphu ya umoyo, iyo Yehova wakalayizga awo ŵakulutilira kumutemwa.”—Yak. 1:12.