NKHANI YAKUSAMBIRA 29
Khozgerani Yesu Mulongozgi Withu
“Mazaza ghose ghapika kwa ine kuchanya na pa charu chapasi.”—MAT. 28:18.
SUMU 13 Khristu Ntchakuwonerapo Chithu
IVYO VILI MU NKHANI IYI *
1. Kasi khumbo la Yehova ndakuti wuli mazuŵa ghano?
KHUMBO la Chiuta mazuŵa ghano ndakuti makani ghawemi gha Ufumu ghapharazgike pa charu chose chapasi. (Mrk. 13:10; 1 Tim. 2:3, 4) Uwu ni mulimo wa Yehova, ndipo ngwakuzirwa chomene lekani wasankha Mwana wake wakutemweka kuti ndiyo walongozgenge. Tili na chigomezgo chose kuti mulimo wakupharazga uwu ufiskikenge nga umo Yehova wakukhumbira pambere umaliro undize, chifukwa Yesu ndiyo wakulongozga.—Mat. 24:14.
2. Kasi tidumbiskanenge vichi mu nkhani iyi?
2 Mu nkhani iyi, tiwonenge umo Yesu wakugwiliskira ntchito “muzga wakugomezgeka na wavinjeru” kupeleka chakurya chauzimu, kweniso kulongozga ŵalondezgi ŵake pa mulimo ukuru wakupharazga uwo ukuchitika chomene pasono kuluska kumanyuma kose. (Mat. 24:45) Tiwonengeso ivyo waliyose wa ise wangachita kuti wakhozgere Yesu na muzga wakugomezgeka.
YESU NDIYO WAKULONGOZGA PA MULIMO WAKUPHARAZGA
3. Kasi Yesu wali kupika mazaza wuli?
3 Yesu ndiyo wakulongozga pa mulimo wakupharazga. Kasi tikumanya wuli? Kwati kwakhala kanyengo kachoko waka pambere wandakwelere kuchanya, Yesu wakakumana na ŵalondezgi ŵake ŵakugomezgeka ŵachoko waka pa phiri ku Galileya. Wakaŵaphalira kuti: “Mazaza ghose ghapika kwa ine kuchanya na pa charu chapasi.” Wonani fundo yakulondezgapo iyo wakaŵaphaliraso, wakati: “Lutaninge mukazgore ŵanthu ŵa mitundu yose kuŵa ŵasambiri.” (Mat. 28:18, 19) Ntheura pa vinthu ivyo Yesu wali kupika, chimoza chake ntchakuti wali kupika mazaza kulongozga mulimo wakupharazga.
4. Chifukwa wuli tikugomezga kuti Yesu wachali kulongozga mulimo wakupharazga mazuŵa ghano?
4 Yesu wakayowoya kuti mulimo wakupharazga na kuzgora ŵanthu kuŵa ŵasambiri uzamufika ku “mitundu yose” ndipo iyo waŵenge na ŵalondezgi ŵake mu “mazuŵa ghose m’paka umaliro wa charu.” (Mat. 28:20) Mazgu agha ghakalongora pakweru kuti mulimo wakupharazga ulutilirenge kulongozgeka na Yesu nanga ni mu nyengo yithu yino.
5. Kasi ise tikovwirapo wuli pakufiska lemba la Salimo 110:3?
5 Yesu wakafipanga mtima yayi kuti kuzamuŵa ŵantchito ŵachoko kuumaliro wa mgonezi. Wakamanya kuti mazgu gha uchimi gha wamasalimo ghazamufiskika, agho ghakuti: “Ŵanthu ŵako ŵajipelekenge na mtima wose pa zuŵa la nkhondo yako.” (Sal. 110:3) Usange mukuchitako mulimo wakupharazga, ndikuti mukukhozgera Yesu na muzga wakugomezgeka ndipo ivi vikufiska uchimi uwu. Mulimo uwu ukuluta panthazi, kweni pali masuzgo nipera.
6. Kasi ni suzgo wuli ilo ŵapharazgi ŵa Ufumu ŵakusangana nalo mazuŵa ghano?
6 Suzgo limoza ilo ŵapharazgi ŵa Ufumu ŵakusangana nalo nkhususkika. Ŵakugaluka, ŵaliska ŵavisopa na ŵandyali ŵakuphalira ŵanthu mautesi ghanandi ghakukhwaskana na mulimo withu. Usange ŵabali ŵithu, ŵanthu ŵanyake awo tikumanyana nawo, na awo tikugwira nawo ntchito ŵapusikika na mautesi agha, ŵangamba kutichichizga kuti tileke waka kuteŵetera Yehova na kupharazga. Mu vyaru vinyake, ŵalwani ŵithu aŵa ŵakofya ŵabali na ŵadumbu ŵithu, kuŵawukira na kuŵajalira mu jele. Kweni tikuzizwa yayi. Yesu wakayowoyerathu kuti: “Muzamutinkhika na mitundu yose chifukwa cha zina lane.” (Mat. 24:9) Ntheura chifukwa chakuti pasono tikutinkhika mbukaboni wakuti tikutemweka na Yehova. (Mat. 5:11, 12) Satana ndiyo wakupangiska kuti ŵanthu ŵatisuskenge. Kweni Yesu ngwankhongono chomene kuluska Satana. Na wovwiri wa Yesu, makani ghawemi ghakufikira mitundu yose ya ŵanthu. Wonani ukaboni uwu.
7. Kasi pali ukaboni wuli uwo mukuwona wakulongora kuti lemba la Chivumbuzi 14:6, 7 likufiskika?
7 Suzgo linyake ilo tikusangana nalo apo tikupharazga ndakuti ŵanthu ŵakuyowoya viyowoyero vyakupambanapambana. Mu mboniwoni iyo wakalongora mpositole Yohane, Yesu wakayowoyerathu kuti mu mazuŵa ghithu ghano uthenga uwemi uzamutonda suzgo ili. (Ŵazgani Chivumbuzi 14:6, 7.) Kasi ivi vikuchitika wuli? Tikupharazgira ŵanthu ŵanandi chomene uthenga wa Ufumu. Mazuŵa ghano, ŵanthu pa charu chose chapasi ŵangasanga mabuku na mavidiyo ghakulongosora Baibolo pa webusayiti ya jw.org chifukwa pali vinthu ivyo vili mu viyowoyero vyakujumpha 1,000. Wupu Wakulongozga ukazomerezga kuti buku la Mungakondwa na Umoyo Kwamuyirayira! ilo ni buku ilo tikugwiliskira ntchito chomene pakusambizgira ŵanthu sono, ling’anamulike mu viyowoyero vyakujumpha 700. Paliso chakurya chauzimu kwizira mu mavidiyo, cha ŵanthu ŵakumangwa kweniso mabuku gha ŵanthu ŵambura kulaŵiska. Apa tikuwona kuti mauchimi gha mu Baibolo ghakufiskika. Ŵanthu “ŵakufuma mu mitundu ya viyowoyero vyose” ŵakusambira “kayowoyero katuŵa” uwo mbunenesko wa mu Baibolo. (Zek. 8:23; Zef. 3:9) Vyose ivi vikufiskika pasi pa udangiliri wa Yesu Khristu.
8. Kasi paŵa vyakufumapo wuli chifukwa cha mulimo withu wakupharazga?
8 Mazuŵa ghano, ŵanthu ŵakujumpha 8,000,000 mu vyaru 240 ŵali mu gulu la Yehova, ndipo chaka chilichose ŵanthu masauzandi ghanandi ŵakubatizika. Ndipouli, chakuzirwa chomene kuluska chiŵelengero, ni mikhaliro Yachikhristu iyo ŵasambiri ŵaphya aŵa ŵakulongora. Iwo ŵavwara “wunthu uphya.” (Kol. 3:8-10) Ŵanandi ŵali kuleka nkharo ziheni, nkhaza, sankho na kutemwa chomene charu chawo. Uchimi uwo uli pa Yesaya 2:4 ukufiskika; ‘ŵakusambiraso nkhondo chara.’ Chifukwa chakuti tikulimbikira chomene kuvwara wunthu uphya, tikovwira kuti ŵanthu ŵize mu gulu la Chiuta, ndipo tikulongora kuti tikulondezga mulongozgi withu Khristu Yesu. (Yoh. 13:35; 1 Pet. 2:12) Vyose ivi vyachitika waka mwangozi yayi. Yesu ndiyo wakutipa wovwiri uwo tikukhumbikwira.
YESU WALI KWIMIKA MUZGA
9. Kuyana na Mateyu 24:45-47, kasi Yesu wakati ntchivichi chizamuchitika mu nyengo yaumaliro?
9 Ŵazgani Mateyu 24:45-47. Yesu wakayowoyerathu kuti mu nyengo yaumaliro, wazamwimika “muzga wakugomezgeka na wavinjeru” kuti wapelekenge chakurya chauzimu. Ntheura tikukhazga kuti muzga uyu waŵenge wakulimbikira chomene mazuŵa ghano. Nakuti umu ndimo viliri nadi. Mulaŵiliri withu Yesu wakugwiliskira ntchito kagulu kachoko waka ka ŵanalume ŵakuphakazgika kupeleka chakurya chauzimu ku ŵanthu ŵa Chiuta na ŵanthu ŵakunweka “pa nyengo yakwenelera.” Ŵanalume aŵa ŵakujiwona kuti ni mafumu pa chipulikano cha ŵanyawo yayi. (2 Kor. 1:24) M’malo mwake, ŵakumanya kuti Yesu Khristu ndiyo ni “mudangiliri na mulongozgi” wa ŵanthu ŵake.—Yes. 55:4.
10. Kasi ni buku ndi pa mabuku agho ghalongoreka pa chithuzi ilo likamovwirani kwamba kwenda pa nthowa yakuya ku umoyo wamuyirayira?
10 Kwambira mu 1919 muzga wakugomezgeka wapanga mabuku ghakupambanapambana agho ghawovwira chomene ŵakunweka kuti ŵasambire unenesko wakufuma mu Mazgu gha Chiuta. Mu 1921 muzga wakafumiska buku lakuti The Harp of God kuti wawovwire ŵakunweka kusambira visambizgo vyakwambilira vya mu Baibolo. Para nyengo zikusintha, mabuku ghakusazgikira ghakafumiskikangaso. Kasi ni buku wuli ilo imwe likamovwirani kumanya, na kwamba kutemwa Adada ŵinu ŵakuchanya? Kasi likaŵa lakuti “Mulungu Akhale Woona,” Unenesko Weneuwo Ukulongozgera ku Umoyo Wamuyirayira, Mungathe Kukhala ndi Moyo Kosatha M’paradaiso pa Dziko Lapansi, Chimanyisko Cheneicho Chikulongozgera ku Umoyo Wamuyirayira, Kasi Baibolo Likusambizgachi Chomenechomene?, Kasi Baibolo Likutisambizga Vichi?, panji buku la Mungakondwa na Umoyo Kwamuyirayira!, ilo lafumiskika waka sonosono? Mabuku ghose agha ghakapangika na chilato chakuti ghatovwire kuzgora ŵanthu kuŵa ŵasambiri panyengo iyo ghakafumiskikanga.
11. Chifukwa wuli ntchakuzirwa chomene kuti tose tipokerenge chakurya chauzimu?
11 Awo ŵamba waka sono kunweka ndiwo ŵekha yayi awo ŵakukhumbikwira chakurya chauzimu chakukhoma. Tose ndivyo tikukhumbikwira. Mpositole Paulosi wakalemba kuti: “Chakurya chakukhoma ntcha ŵanthu ŵakukhwima.” Wakasazgiraposo kuti para tikuchita ivyo tikusambira mu Baibolo vitovwirenge “kupambaniska pakati pa chiwemi na chiheni.” (Heb. 5:14) Mu nyengo yakusuzga iyi, umo mikhaliro yiwemi yanjira chomene pasi, chingaŵa chakusuzga chomene kulondezga fundo za Yehova. Kweni Yesu wakuwoneseska kuti tasambira vinthu ivyo tikukhumbikwira kuti chipulikano chithu chilutilire kuŵa chakukhora. Chakurya chauzimu ichi chikufuma mu Mazgu gha Chiuta, Baibolo. Muzga wakugomezgeka ndiyo wakunozga na kugaŵa chakurya ichi, mwakulongozgeka na Yesu.
12. Nga ni Yesu, kasi talongora wuli kuti tikuchindika zina la Chiuta?
12 Nga ni Yesu, nase tapeleka ntchindi izo zikwenelera ku zina la Chiuta. (Yoh. 17:6, 26) Mwachiyelezgero, mu 1931, tikamba kumanyikwa na zina la mu Malemba lakuti Ŵakaboni ŵa Yehova, kuchita nthena kukalongora umo zina la Chiuta liliri lakuzirwa kwa ise ndipo tikakhumbanga kuti timanyikwenge na zina la Adada ŵithu ŵakuchanya. (Yes. 43:10-12) Ndipo kufuma waka mu Okutobala chaka ichi, zina lapadera ili likusangika pa chikopi cha Gongwe la Mulinda lililose lakusambira. Mwakusazgirapo, Baibolo la Malemba Ghakupatulika mu Mang’anamuliro gha Charu Chiphya, lili kuwezgeramo zina la Chiuta mu malo umo likwenera kuŵamo mu Baibolo. Ivi vikupambana chomene na matchalitchi agho ghakujichema kuti Ngachikhristu, agho ghali kufumiskamo zina lakuti Yehova mu ma Baibolo ghawo ghanandi agho ŵali kung’anamura.
YESU WAKULONGOZGA ŴALONDEZGI ŴAKE
13. Kasi ntchivichi chikumukhorweskani kuti Yesu wakugwiliskira ntchito “muzga wakugomezgeka na wavinjeru” mazuŵa ghano? (Yohane 6:68)
13 Kwizira mwa “muzga wakugomezgeka na wavinjeru,” Yesu wali kupanga gulu lakugomezgeka pa charu chapasi kuti wakhuŵilizge kusopa kutuŵa. Kasi mukujipulika wuli para mwaghanaghanira za gulu ili? Panyake namwe mukujipulika nga umo mpositole Petrosi wakajipulikiranga, uyo wakayowoya kwa Yesu kuti: “Tilute tiye kwa njani? Imwe muli na mazgu gha umoyo wamuyirayira.” (Yoh. 6:68) Kasi mphanyi tose tili kochi pasono tilekenge kuŵa mu gulu la Yehova? Kwizira mu gulu ili, Khristu wakuwoneseska kuti tili na chilichose icho tikukhumbikwira kuti tilutilire kuŵa ŵakugomezgeka kwa Chiuta. Wakutisambizgaso umo tingachitira makora mulimo withu wakupharazga. Kweniso wakutovwira kuvwara “wunthu uphya,” mwakuti tikondweskenge Yehova.—Efe. 4:24.
14. Kasi mwasanga chandulo wuli chifukwa chakuŵa mu gulu la Yehova mu nyengo ya COVID-19?
14 Yesu wakupeleka ulongozgi wakovwira chomene mu nyengo zakusuzga. Uwemi wa ulongozgi wake ukawonekera chomene pa nyengo iyo nthenda ya COVID-19 yikambanga waka. Apo ŵanthu ŵanandi ŵakayungwayungwanga kuti ŵachitenge wuli, Yesu wakawoneseska kuti tapokera ulongozgi wakupulikikwa makora uwo ungatovwira kuti tiŵe ŵakuvikilirika. Tikachiskika kuti tivwarenge masiki kweniso kuti titalikiranenge na ŵanyithu. Ŵalara ŵakachiskika kuti nyengo na nyengo ŵayowoyeskanenge na waliyose mu mpingo na kumanya ivyo wakukhumbikwira mwakuthupi kweniso mwauzimu. (Yes. 32:1, 2) Tikupokeraso ulongozgi wakusazgikira na kukhozgeka na malipoti ghakufuma ku Wupu Wakulongozga.
15. Kasi tikapokera ulongozgi wuli pa umo tikwenera kuchitira maungano na mulimo wakupharazga mu nyengo ya muliri iyi, ndipo paŵa vyakufumapo wuli?
15 Mu nyengo ya muliri iyi, tikupokeraso ulongozgi wakupulikikwa makora wa umo tikwenera kuchitira maungano gha mpingo kweniso mulimo wakupharazga. Muliri uwu ukati wamba, mwaluŵiro tikamba kuchita maungano gha mpingo, gha dera kweniso gha chigaŵa kwizira pa vidiyokonferensi, whatsapp, na nthowa zinyake. Tikambaso kupharazga kwizira mu makalata na foni. Yehova watumbika kuyezgayezga kwithu. Malipoti gha mu maofesi gha munthavi ghanandi ghakulongora kuti chiŵelengero cha ŵapharazgi chikusazgikira chomene. Nakuti ŵanandi ŵasangana na vinthu vyakukhozga chomene mu nyengo iyi.—Wonani bokosi la mutu wakuti: “ Yehova Wakutumbika Mulimo Withu Wakupharazga.”
16. Kasi tingaŵa ŵakusimikizga vichi?
16 Ŵanyake ŵakwenera kuti ŵakaghanaghananga kuti gulu likuchita vinthu mwakutalulira pa nkhani ya muliri uwu. Kweni nyengo yati yajumphapo, ndipo vikawoneka makora kuti ulongozgi uwo tikapokera ukaŵa nadi wavinjeru. (Mat. 11:19) Ndipo para tikughanaghanirapo pa umo Yesu wakulongozgera ŵanthu ŵake mwachitemwa, tikuŵa ŵakusimikizga kuti vilije kanthu kuti kwali namachero kuwengechi, kweni Yehova na Mwana wake wakutemweka ŵaŵenge nase.—Ŵazgani Ŵahebere 13:5, 6.
17. Kasi mukujipulika wuli chifukwa chakuti mukulongozgeka na Yesu?
17 Ndise ŵakukondwa chomene kuti tikuteŵetera mwakulongozgeka na Yesu. Tili mu gulu ilo ndakugaŵikana yayi, chifukwa cha mitheto, charu na chiyowoyero. Tikupokera ulongozgi wakukwana kufuma mu Mazgu gha Chiuta ndipo tikusambizgika umo tingachitira makora mulimo withu wakupharazga. Waliyose wa ise wakusambizgika umo wangavwalira wunthu uphya, ndipo tikusambira kutemwana yumoza na munyake. Ntheura tili na chifukwa chakunothera kuti Yesu ni mulongozgi withu.
SUMU 16 Lumbani Ya Chifukwa cha Mwana Wake Wakuphakazgika
^ Ŵabali na ŵadumbu mamiliyoni ghanandi ŵakupharazga makani ghawemi mwamwamphu mazuŵa ghano. Kasi namwe muli pakati pa ŵanthu aŵa? Usange ni nthena, ndikuti namwe Fumu Yesu Khristu ndiyo ni mulongozgi winu. Mu nkhani iyi, tiwonenge ukaboni wakulongora kuti Yesu ndiyo wakulongozga mulimo wakupharazga mazuŵa ghano. Ndipo kughanaghanirapo pa ukaboni uwu kutovwirenge kuŵikapo mtima kulutilira kuteŵetera Yehova mwakulongozgeka na Khristu.
