1. Kasi tikwenera kuwuwona wuli mwaŵi wa kulomba kwa Yehova?

 MLENGI wa vinthu vyose, kuchanya na charu chapasi, wali kutipa mwaŵi wapadera chomene. Wali kutipa mwaŵi wa kulomba kwa iyo. Ghanaghanirani waka: Tingamukhutulira Yehova ivyo vili mu mtima withu nyengo yiliyose, kweniso mu chiyowoyero chilichose, kwambura kupempha dankha chizomerezgo. Tingalomba nanga tingaŵa pa bedi mu chipatala, panji mu jele, na chigomezgo chose kuti Adada ŵithu ŵachitemwa ŵakutipulika. Tikuwonga chomene mwaŵi wapadera uwu.

2. Kasi Themba Davide likalongora wuli kuti likazirwiskanga mwaŵi wa lurombo?

² Themba Davide likazirwiskanga chomene mwaŵi wa lurombo. Ilo likimba kwa Yehova kuti: “Lurombo lwane luŵe nga ni vyakununkhira ivyo vyanozgeka panthazi pinu.” (Sal. 141:1, 2) Mu nyengo ya Davide, vyakununkhira vyakupatulika ivyo ŵasembe ŵakagwiliskiranga ntchito pakusopa kutuŵa, ŵakaŵikangapo phwelelero chomene pakuvinozga. (Eks. 30:34, 35) Davide pakuyaniska lurombo na vyakununkhira, vikulongora kuti wakakhumbanga kuti waghanaghanirengepo mwakupwelelera chomene pa ivyo wayowoyenge kwa Adada ŵake ŵakuchanya. Ivi ndivyo nase tikukhumba. Tikukhumba kuti malurombo ghithu ghamukondweskenge Yehova.

3. Kasi tikwenera kulomba munthowa wuli kwa Chiuta, ndipo chifukwa wuli?

³ Para tikulomba kwa Yehova, tikwenera kuŵa ŵantchindi chomene. Ghanaghanirani za mboniwoni zakuzizwiska izo wakawona Yesaya, Ezekiyeli, Daniyeli, na Yohane. Nangauli mboniwoni izo ŵakawona zikaŵa zakupambana, kweni pali chimoza icho zikuyana. Zose zikulongora kuti Yehova ni Fumu yapachanya chomene  na yakuzizwiska. Yesaya wakawona “Yehova wakhala pa chitengo chapachanya na chakutumphuskika.” (Yes. 6:1-3) Ezekiyeli wakawona Yehova wakhala pachanya pa gileta lake likuru, ndipo wazingilizgika na ‘ungweru ukuru uwo ukaŵa nga ntchiŵingavula.’ (Ezek. 1:26-28) Daniyeli wakawona “Mulara Wamwaka” wavwara vituŵa, ndipo pa chitengo chake pakafumanga dimi la moto. (Dan. 7:9, 10) Ndipo Yohane wakawona Yehova wakhala pa chitengo ndipo wazingilizgika na chinthu chinyake nga ntchiŵingavula chakutowa chomene. (Chivu. 4:2-4) Para tikughanaghanira za uchindami ukuru wa Yehova, tikukumbuskika kuti ipo ni mwaŵi ukuru chomene kuyowoya nayo mu lurombo kweniso kuti ntchakuzirwa chomene kulongora ntchindi para tikumulomba. Kweni kasi tikwenera kulomba wuli?

4. Kasi tikusambirako vichi ku mazgu agho Yesu wakazunura kukwambilira kwa lurombo lwachiyelezgero ulo luli pa Mateyu 6:9, 10?

⁴ Ŵazgani Mateyu 6:9, 10. Pa Upharazgi wake wa pa Phiri, Yesu wakasambizga ŵasambiri ŵake umo ŵangalombera munthowa yakukondweska Chiuta. Yesu wati wayowoya mazgu ghakuti “ntheura, pakulomba mutenge,” chakwamba wakazunura dankha vinthu vyakuzirwa chomene ivyo vikukolerana na khumbo la Yehova. Wakalomba dankha kuti zina la Yehova likwenera kutuŵiskika, Ufumu wa Chiuta wize, uwo uzamuparanya wose awo ŵakususkana na Chiuta, kweniso wakalomba za vinthu viwemi ivyo Chiuta wazamuchitira ŵanthu munthazi. Para tikuzunuramo vinthu vyanthena ivi mu malurombo ghithu, tikulongora kuti khumbo la Chiuta ndakuzirwa kwa ise.

5. Kasi ntchiwemi waka kulomba vinthu vyataŵene kwa Yehova?

⁵ Mazgu ghakulondezgapo agho Yesu wakayowoya mu lurombo lwachiyelezgero, ghakulongora kuti ntchiwemi waka kulomba vinthu vyataŵene ivyo tikukhumba. Tingamulomba Yehova kuti watipe chakurya cha zuŵa ilo, kutigowokera zakwananga zithu, kutivikilira ku viyezgo, kweniso kutithaska kwa muheni. (Mat. 6:11-13) Para tikulomba vinthu ivi kwa Yehova tikulongora kuti tikuthemba wovwiri wake, kweniso kuti tikukhumba kumukondweska.

6. Kasi tikwenera kulomba vinthu vyekha ivyo Yesu wakazunura mu lurombo lwachiyelezgero? Longosorani.

⁶ Yesu wakang’anamuranga kuti ŵalondezgi ŵake ŵasungilirenge waka pa mtima mazgu  ghose gha mu lurombo lwachiyelezgero yayi, nesi kulomba ndendende mazgu gha mu lurombo ulu. Mu malurombo ghanyake agho Yesu wakalomba, wakayowoya vinthu vinyake ivyo vikaŵa vyakuzirwa kwa iyo panyengo iyo. (Mat. 26:39, 42; Yoh. 17:1-26) Mwakuyana waka, nase tingalomba vinthu ivyo tikwenjerwa navyo. Usange tikukhumbikwira kusankha chakuchita pa nkhani yinyake, tingalomba kuti watipe vinjeru na umanyi. (Sal. 119:33, 34) Usange tambenge kuchita mulimo wakusuzga, tingalomba kuti watipe mahara gha umo tingachitira. (Zinth. 2:6) Ŵapapi ŵangalombera ŵana ŵawo, ŵana ŵangalombera ŵapapi ŵawo, kweniso tose tikwenera kulombera awo tikusambira nawo Baibolo kweniso awo tikuŵapharazgira. Ndipouli, malurombo ghithu ghakwenera kuŵa ghakupempha wovwiri pera yayi.

7. Chifukwa wuli tikwenera kumulumba Yehova mu malurombo ghithu?

⁷ Tikumbukenge kumulumba Yehova mu malurombo ghithu. Palije munyake uyo wakukhumbikwira kulumbika kuluska Chiuta withu. Iyo ni ‘muwemi, na wakunozgeka kugowokera.’ Kweniso ‘ngwalusungu na wachiwuravi, wakukalipa luŵiro chara, wakuzara na chitemwa na kugomezgeka.’ (Sal. 86:5, 15) Tili na vifukwa viwemi nadi vyakulumbira Yehova chifukwa cha umo waliri kweniso ivyo wakuchita.

8. Kasi ni vinthu wuli ivyo tingamuwonga Yehova? (Sal 104:12-15, 24)

⁸ Padera pakulumba Yehova mu malurombo ghithu, tikwenera kumuwonga chifukwa cha vinthu viwemi ivyo wali kutipa. Mwachiyelezgero, tingamuwonga chifukwa cha mitundu yakupambanapambana iyo tikuwona mu maluŵa, vyakurya vyakunowa vya mitundumitundu, kweniso ŵabwezi awo tikukondwa nawo. Adada ŵithu ŵachitemwa ndiwo ŵali kutipa vyose ivi na vinyake vinandi, na chilato chakuti tikondwenge. (Ŵazgani Salimo 104:12-15, 24.) Kweni chikuru chomene icho tikumuwongera Yehova, ntchakuti wakutipa chakurya chinandi chauzimu icho chikutovwira kuŵa na chipulikano chakukhora, kweniso wali kutipa chigomezgo chiwemi cha munthazi.

9. Kasi ntchivichi chingatovwira kuti tikumbukenge kumuwonga Yehova? (1 Ŵatesalonika 5:17, 18)

⁹ Chingaŵa chipusu kuluwa kumuwonga Yehova pa viwemi vyose ivyo wakutichitira. Kasi ntchivichi chingamovwirani kuti mukumbukenge? Mungalemba vinthu ivyo mukulomba  mwakudunjika kwa Yehova, ndipo nyengo na nyengo, muwonengepo pa ivyo mukalemba kuti muwone umo Yehova wakuzgolera malurombo ghinu. Ndipo pamanyuma muwongani chifukwa cha kumovwirani. (Ŵazgani 1 Ŵatesalonika 5:17, 18.) Ghanaghanirani fundo iyi: Tikujipulika makora, kweniso tikukondwa para ŵanji ŵakutiwonga. Mwakuyana waka, Yehova nayo wakukondwa para tikukumbuka kumuwonga chifukwa cha kuzgora malurombo ghithu. (Kol. 3:15) Kweni kasi pali chifukwa wuli chinyake icho tingamuwongera Chiuta withu?

10. Kuyana na 1 Petrosi 2:21, chifukwa wuli tikwenera kuwonga Yehova pakutumizga Yesu pa charu chapasi?

¹⁰ Ŵazgani 1 Petrosi 2:21. Tikwenera kumuwonga Yehova chifukwa cha kutumizga Mwana wake pano pasi kuti wazakatisambizge. Tikumanya vinandi vya Yehova kweniso umo tingachitira kuti timukondweske, para tikusambira vya umoyo wa Yesu. Usange tili na chipulikano mu sembe ya Khristu, tikuŵa paubwezi uwemi chomene na Yehova Chiuta na kuŵa nayo pamtende.—Rom. 5:1.

11. Chifukwa wuli tikulomba kwizira mu zina la Yesu?

¹¹ Tikuwonga Yehova chifukwa chakuti tikulomba kwizira mwa Mwana wake. Yehova wakutipa ivyo tapempha kwizira mwa Yesu. Kweniso wakutegherezga na kuzgora malurombo agho talomba kwizira mwa Yesu. Yesu wakalongosora kuti: “Chilichose icho mulombenge mu zina lane, nizamuchichita, mwakuti Adada ŵapike uchindami kwizira mwa Mwana.”—Yoh. 14:13, 14.

12. Kasi ntchifukwa wuli chinyake icho tikuwongera Yehova chifukwa cha Mwana wake?

¹² Yehova wakutigowokera zakwananga zithu kwizira mu sembe yakuwombora ya Yesu. Malemba ghakulongosora kuti Yesu ‘ngwasembe withu mukuru uyo wakhala ku woko lamalyero la chitengo cha Wakuchindikika kuchanya.’ (Heb. 8:1) Yesu ni ‘movwiri withu kwa Adada.’ (1 Yoh. 2:1) Tikumuwonga chomene Yehova pakutipa Wasembe Mukuru uyo wakupulikiska makora kupeleŵera kwithu kweniso uyo ‘wakutiŵeyelera m’malo mwa ise’! (Rom. 8:34; Heb. 4:15) Ise tili ŵanthu ŵambura kufikapo, ntheura tingayowoyeskana nayo yayi Yehova mu lurombo kwambura sembe ya Yesu. Namwe mungazomerezga kuti tikusoŵa na mazgu wuwo gha umo tingawongera chawanangwa cha mtengo wapatali icho Yehova wali kutipa, icho ni Mwana wake wakutemweka!

13. Kasi Yesu wakalongora wuli kuti wakuŵatemwa ŵasambiri ŵake pa usiku wakuti machero ghake wakomekenge?

¹³ Pa usiku wakuti machero ghake wakomekenge, Yesu wakalombera ŵasambiri ŵake kwanyengo yitali, kuti Adada ŵake ‘ŵaŵavikilire kwa muheni.’ (Yoh. 17:15) Apa Yesu wakalongora kuti wakuŵatemwa chomene ŵasambiri ŵake. Nangauli iyo ndiyo wakaŵa pafupi kukumana na masuzgo ghakuru chomene, kweni wakafipirangaso chomene mtima ŵapositole ŵake.

14. Kasi tingalongora wuli kuti tikuŵatemwa ŵabali na ŵadumbu ŵithu?

¹⁴ Pakuti tikuyezga Yesu, nase tikughanaghanira vyakukhumba vithu pera yayi, m’malo mwake nyengo na nyengo tikuŵalombera ŵabali na ŵadumbu ŵithu. Para tikuchita nthena, tikulongora kuti tikupulikira dango la Yesu lakuti titemwanenge yumoza na munyake, kweniso tikulongora kwa Yehova umo tikutemwera ŵasopi ŵanyithu. (Yoh. 13:34) Tileke kughanaghana kuti para tikulombera ŵabali na ŵadumbu ŵithu, ndikuti tikutaya waka nyengo yithu pawaka. Mazgu gha Chiuta ghakutiphalira kuti “ŵeyelero la munthu murunji lili na nkhongono yikuru chomene.”—Yak. 5:16.

15. Chifukwa wuli ŵabali na ŵadumbu ŵithu ŵakukhumbikwira malurombo ghithu?

 ¹⁵ Ŵasopi ŵanyithu ŵakukhumbikwira malurombo ghithu chifukwa ŵakukumana na masuzgo ghanandi. Tingaŵalombera kwa Yehova kuti waŵawovwire kuzizipizga ulwari, masoka gha chilengiwa, nkhondo, nthambuzgo, panji masuzgo ghanyake. Tingalomberaso ŵabali na ŵadumbu awo ŵakulimbikira kuti ŵawovwire ŵabali na ŵadumbu awo ŵakukhumbikwira wovwiri. Panji mukumanyapo ŵanji awo ŵakukumana na masuzgo ghakuyanako na agha. Mwalekerachi kuŵazunura mazina ghawo apo mukulomba pamwekha? Tikulongora chitemwa chanadi cha paubali para tikulomba Yehova kuti waŵawovwire kuzizipizga.

16. Chifukwa wuli tikwenera kuŵalombera awo ŵakulongozga pakati pithu?

¹⁶ Awo ŵakulongozga mu mpingo, ŵakuwonga chomene para tikuŵazunura mu malurombo ghithu, ndipo malurombo agha ghakuŵawovwira chomene. Mpositole Paulosi wakamanyanga kuti wakakhumbikwiranga kuti ŵanji ŵamulomberenge. Iyo wakalemba kuti: “Nane munilomberenge kuti Chiuta wanipe mazgu ghake kuti para nkhujura mulomo wane, niyowoyenge na chikanga apo nkhumanyiska ŵanthu chisisi chakupatulika cha makani ghawemi.” (Efe. 6:19) Mazuŵa ghano napo, tili na ŵabali ŵanandi ŵakulimbikira awo ŵakulongozga pakati pithu. Tikulongora kuti tikuŵatemwa para tikulomba Yehova kuti watumbike milimo iyo ŵakuchita.

17-18. Kasi mphanyengo wuli apo tingapempheka kuti tilombe, ndipo tikwenera kukumbuka vichi?

¹⁷ Nyengo zinyake tingapempheka kuti tipeleke lurombo pa ŵanyithu. Mwachiyelezgero, mudumbu uyo wali na sambiro la Baibolo wangapempha mudumbu uyo ŵendera lumoza, kuti wapeleke lurombo. Kweni panji mudumbu munyake uyu wakumumanya makora yayi msambiri uyu, ntheura vingaŵa makora chomene usange wangapeleka lurombo lwa paumaliro pa sambiro. Ivi vingawovwira kuti wamanye makora ivyo wangamulombera msambiri wa Baibolo uyu.

¹⁸ Mubali wangapempheka kuti walombe pa ungano wakunozgekera uteŵeti, panji pa maungano gha mpingo. Ŵabali awo ŵali na mwaŵi wa kulomba pa maungano agha, ŵakwenera kukumbuka chilato cha maungano agha. Lurombo luleke kuŵa nthowa ya kuchenyeramo panji kusambizgira mpingo, nesi kuyowoyeramo  vipharazgo. Maungano ghanandi gha mpingo, sumu na lurombo vikupika waka maminiti 5, ntheura mubali uyo wapelekenge lurombo wakwenera yayi kuyowoya “mazgu ghanandi,” chomenechomene kukwambilira kwa maungano.—Mat. 6:7.

19. Kasi ntchivichi chingatovwira kuti zuŵa la cheruzgo la Yehova lizakatisange tili ŵakunozgeka?

¹⁹ Lurombo lukwenera kuŵa pa malo ghakwamba mu umoyo withu, chomenechomene sono apo zuŵa la cheruzgo la Yehova likusendelera chomene. Pa nkhani iyi, Yesu wakati: “Muŵe maso, nyengo zose muŵeyelerenge kuti mupone ku vinthu vyose ivyo vichitikenge.” (Luka 21:36) Nadi, para tikulomba nyengo zose, tiŵenge maso mwauzimu ndipo zuŵa la Chiuta lizamutisanga kuti tili ŵakunozgeka.

20. Kasi tingachita wuli kuti malurombo ghithu ghaŵenge nga ni vyakununkhira vya sungu liwemi chomene kwa Yehova?

²⁰ Kasi tadumbiskana vichi? Tikuzirwiska chomene mwaŵi wa lurombo. Vinthu vyakuzirwa chomene ivyo tikwenera kulomba ni ivyo vikukolerana chomene na khumbo la Yehova. Tikuwongaso Chiuta chifukwa cha Mwana wake, Ufumu wake, kweniso mwaŵi wakulomberako ŵasopi ŵanyithu. Tingalombaso vinthu vyataŵene ivyo tikukhumbikwira mwakuthupi na mwauzimu wuwo. Para tikughanaghanirapo mwakupwelelera vinthu ivyo tiyowoyenge mu lurombo, tikulongora kuti tikuzirwiska chomene mwaŵi wapadera uwu. Mazgu ghithu ghaŵenge nga ni vyakununkhira vya sungu liwemi chomene kwa Yehova, ndipo malurombo ghithu ‘wakondwenge nagho.’—Zinth. 15:8.