1. Kasi tingasimikizga vichi, ndipo chifukwa wuli?

 PARA mukuwona umo vinthu viliri mu charu, kasi vikumusuzgani kugomezga kuti vinthu viŵenge makora? Ŵanthu mu mbumba ŵakutemwana yayi nga umo vikaŵira kale. Ŵanthu ŵakulutilira kuŵa ŵankhaza, ŵakujighanaghanira ŵekha kweniso kuŵa ŵakali. Ndipo ŵanandi vikuŵasuzga kugomezga ŵamazaza. Kweni vinthu ivi vingamupani chigomezgo chakuti vinthu viŵenge makora. Chifukwa wuli? Chifukwa ŵanthu ŵakuchita ndendende nga umo vikayowoyekerathu mu uchimi wakukhwaskana na “mazuŵa ghaumaliro.” (2 Tim. 3:1-5) Ŵanthu ŵamitima yiwemi ŵangasuska yayi kuti uchimi uwu ukufiskika. Ndipo kufiskika kwa uchimi uwu kukulongora kuti Khristu Yesu ni Themba la Ufumu wa Chiuta. Kweni uwu ngumoza waka mwa mauchimi ghakuyowoya vya Ufumu. Tikhozgenge chipulikano chithu para taweleramo mauchimi ghanyake agho ghafiskika mu vyaka vyasonosono apa.

2. Kasi tiwonenge vichi mu nkhani iyi, ndipo chifukwa wuli? (Yowoyanipo pa chithuzi cha pa chikopi.)

² Mu nkhani iyi, tiwonenge (1) uchimi uwo ukutovwira kumanya apo Ufumu wa Chiuta ukambira kuwusa, (2) mauchimi agho ghakutovwira kumanya kuti Yesu ni Themba la Ufumu wa Chiuta kuchanya, (3) mauchimi agho ghakuvumbura umo ŵalwani ŵa Ufumu wa Chiuta ŵazamuparanyikira. Tiwonenge kuti mauchimi agha ghakukolerana makora nga umo munthu  wangabanyira pamoza tumapisi twakupambanapambana twa chithuzi na kupanga chithuzi chakuwoneka makora. Mwakuyana waka, umo mauchimi ghakupambanapambana ghakukolerana, ghakutipa chithuzi chiwemi chakuti Yehova wali pafupi kuparanya charu ichi.

3. Kasi uchimi wa pa Daniyeli 7: 13, 14 ukutisimikizgira vichi?

³ Uchimi wa pa Daniyeli 7: 13, 14 ukutisimikizgira kuti Khristu Yesu wazamuŵa Muwusi muwemi chomene wa Ufumu wa Chiuta. Ŵanthu ŵakufuma mu mitundu yose ŵazamukondwa kumuteŵetera ndipo pazamuŵa Muwusi munyake yayi pamanyuma pa iyo. Uchimi unyake mu buku la Daniyeli ukayowoyerathu kuti Yesu wazamupokera Ufumu paumaliro wa uchimi wa nyengo 7. Ipo kasi ntchamachitiko kumanya apo Yesu wakaŵira Themba?

4. Longosorani umo lemba la Daniyeli 4:10-17 likutovwilira kumanya chaka icho Khristu wakaŵira Themba. (Wonaniso mazgu ghamusi.)

⁴ Ŵazgani Daniyeli 4:10-17. “Nyengo 7” zikwimira vyaka 2,520. Nyengo 7 izi zikamba mu 607 B.C.E., apo Ŵababuloni ŵakawuskapo themba laumaliro pa chitengo cha Ufumu wa Yehova mu Yerusalemu. Nyengo izi zikamara mu 1914 C.E. apo Yehova wakimika Yesu, “uyo wali na wenelero,” kuŵa Themba la Ufumu wa Chiuta. *—Ezek. 21:25-27.

5. Kasi ni nthowa wuli yimoza iyo yingatovwira kusanga chandulo na uchimi wakukhwaskana na “nyengo 7”?

⁵ Kasi uchimi uwu ungatovwira wuli? Para tapulikiska makora uchimi wakukhwaskana na “nyengo 7,” tiŵenge na chigomezgo chose kuti Yehova wazamufiska malayizgo ghake panyengo yakwenelera. Yehova wakasankha kale kuti wazamuŵika Yesu kuŵa Themba panyengo yinyake. Ndipo nyengo iyi yikati yakwana, Yehova wakachita nadi. Ntheura tikumanyaso kuti wazamufiska mauchimi ghanyake ghose panyengo yakwenelera. Nadi, zuŵa la Yehova ‘lichedwenge chara.’—Hab. 2:3.

6. (a) Kasi pali ukaboni wuli uwo ukulongora kuti Khristu wakuwusa kuchanya? (b) Kasi lemba la Chivumbuzi 6:2-8 likusimikizgira wuli ukaboni uwu?

⁶ Kuumaliro wa uteŵeti wake wa pa charu chapasi, Yesu wakayowoyerathu vinthu vinyake ivyo vizamovwira ŵalondezgi ŵake kumanya kuti wamba kuwusa kuchanya. Vinyake mwa vinthu ivyo wakazunura ni nkhondo, njara, na vindindindi. Wakayowoyaso kuti kuzamuŵa miliri na zinthenda “mu malo na malo,” ndipo muliri wa COVID-19 ntchimoza chake. Vinthu ivi ntchimoza mwa vinthu ivyo Baibolo likuti “chimanyikwiro” cha kuŵapo kwa Khristu. (Mat. 24:3, 7; Luka 21:7, 10, 11) Vyaka 60 vyati vyajumphapo kufuma apo wakafwira na kuwelera kuchanya, Yesu wakapeleka ukaboni wakusazgikira kwa mpositole Yohane, kusimikizgira kuti vinthu ivi vizamuchitika nadi. (Ŵazgani Chivumbuzi 6:2-8.) Vinthu vyose ivi vikuchitika kufumira apo Yesu wakaŵira Themba mu 1914.

7. Chifukwa wuli Yesu wati waŵa Themba, pa charu pali kwamba kuchitika masuzgo ghanandi chomene?

⁷ Chifukwa wuli vinthu vikahenipa chomene pa charu chapasi Yesu wati waŵa Themba? Lemba la Chivumbuzi 6:2 likutipa ukaboni wakuzirwa. Chinthu chakwamba icho Yesu wakachita wati waŵa Themba la Ufumu wa Chiuta, nkhurwa nkhondo. Kasi wakarwa na njani? Wakarwa na Dyabulosi na viŵanda vyake. Kuyana na Chivumbuzi chaputara 12, Satana wakathereskeka, ndipo iyo pamoza na viŵanda vyake ŵakaponyeka pa charu chapasi. Chifukwa  cha ivi, Satana ni mukali chomene ndipo wali kwamba kuyuzga ŵanthu pa charu chapasi na kupangiska masoka ghakupambanapambana.—Chivu. 12:7-12.

8. Apo tikuwona mauchimi ghakukhwaskana na Ufumu ghakufiskika, kasi vingatovwira wuli?

⁸ Kasi mauchimi agha ghangatovwira wuli? Vyakuchitika vya mu charu kweniso kusintha kwa nkharo ya ŵanthu kungatovwira kumanya kuti Yesu ni Themba kuchanya. Ntheura m’malo mwa kukhuŵara para tikuwona kuti ŵanthu mbakujighanaghanira ŵekha kweniso mbankhaza, tikukumbuka kuti ivyo ŵakuchita vikufiska uchimi wa mu Baibolo. Ufumu wa Chiuta ukuwusa kuchanya. (Sal. 37:1) Ndipo apo Aramagedoni yikusendelera, vinthu vilutilirenge kuhenipirahenipira. (Mrk. 13:8; 2 Tim. 3:13) Tikuŵawonga chomene Adada ŵithu ŵachitemwa ŵakuchanya, pakutovwira kupulikiska chifukwa icho pa charu paliri masuzgo ghanandi.

9. Kasi uchimi wa pa Daniyeli 2:28, 31-35, ukulongosora wuli ufumu waumaliro wa pa charu chose, ndipo mphawuli apo ukamba kuwusa?

⁹ Ŵazgani Daniyeli 2:28, 31-35. Tikuwona kuti uchimi uwu ukufiskika mazuŵa ghano. Loto la Nebukadinezara likalongora ivyo vizamuchitika “mu mazuŵa ghaumaliro,” para Khristu wamba kuwusa. Likalongora kuti ŵalwani ŵa Yesu ŵa pa charu chapasi ŵazamusazgapo ufumu waumaliro wa pa charu chose uwo ukayowoyekerathu mu Baibolo. Ufumu uwu ukwimilirika na ‘vikandiro vyakusazgikana chisulo na dongo.’ Ufumu wa pa charu chose uwu pasono ukuwusa kale. Ukamba kuwusa pa nyengo ya Nkhondo Yakwamba ya pa Charu Chose apo Britain na United States ŵakamba kukolerana chomene, na kuŵa Ufumu wa pa Charu Chose wa Britain na America. Loto la Nebukadinezara la chikozgo,  likayowoyerathuso vinthu viŵiri vyakukhwaskana na ufumu wa pa charu chose uwu, ivyo vizamuwupambaniska na maufumu ghanyake ghakumanyuma.

10. (a) Kasi uchimi wa Daniyeli wakukhwaskana na Britain na America ukufiskika wuli mazuŵa ghano? (b) Kasi tikwenera kuŵa maso na vichi? (Wonani bokosi lakuti “ Chenjerani na Dongo!”)

¹⁰ Chakwamba, mwakupambana na maufumu ghakumanyuma ghakuzunulika mu loto, Ufumu wa Britain na America ukwimilirika na chisulo nga ntcha golide panji siliva yayi, kweni ukwimilirika na chisulo chakusazgikana na dongo. Dongo likwimira ŵana ŵa ŵanthu panji kuti “ŵanthu bweka.” (Dan. 2:43) Mazuŵa ghano tikuwonerathu kuti ufumu wa pa charu chose uwu ukutondeka kuchita ivyo ukukhumba, chifukwa cha mawupu ghakulwera wanangwa wa ŵanthu, wanangwa pa ntchito, kweniso chifukwa chakuti ŵanthu ŵakuchita viwoneskero kweniso ŵali na mazaza chomene pa visora.

11. Kasi kumanya kuti Ufumu wa Britain na America ukuwusa, kukukhozga wuli chigomezgo chithu chakuti tikukhala mu mazuŵa ghaumaliro?

¹¹ Chachiŵiri, Ufumu wa Britain na America, uwo ukwimilirika na vikandiro vya chikozgo, ni ufumu wa pa charu chose waumaliro uwo ukayowoyekerathu mu Baibolo. Paŵengeso ufumu wa ŵanthu yayi pamanyuma pa ufumu uwu. Uzamuparanyika na Ufumu wa Chiuta pa Aramagedoni pamoza na maufumu ghanyake ghose gha ŵanthu. *—Chivu. 16:13, 14, 16; 19:19, 20.

12. Kasi ni ukaboni wuli wakusazgikira uwo uchimi wa Daniyeli ukutipa uwo ukutipembuzga na kutipa chigomezgo?

¹² Kasi uchimi uwu ungatovwira wuli? Uchimi wa Daniyeli ukutipaso ukaboni wakusazgikira wakuti tikukhala mu mazuŵa ghaumaliro. Vyaka vyakujumpha 2,500 ivyo vyajumpha, Daniyeli wakayowoyerathu kuti pamanyuma pa Babuloni, paŵengeso maufumu ghanayi gha pa charu chose agho ghawusenge ŵanthu ŵa Chiuta. Kweniso wakavumbura kuti Ufumu wa Britain na America, ndiwo uzamuŵa waumaliro pa maufumu agha. Ivi vikutipembuzga na kutipa chigomezgo chakuti sonosono apa Ufumu wa Chiuta uparanyenge maboma ghose gha ŵanthu ndipo uzamuwusa charu chose chapasi.—Dan. 2:44.

13. Kasi “themba la 8” na “mathemba 10” agho ghakuzunulika pa Chivumbuzi 17:9-12 ghakwimira vichi, ndipo kasi uchimi uwu wafiskika wuli?

¹³ Ŵazgani Chivumbuzi 17:9-12. Chifukwa chakuti Nkhondo Yakwamba ya pa Charu Chose yikananga vinthu vinandi chomene, chinthu chinyake chikachitika icho chikafiska uchimi wakukhwaskana na mazuŵa ghaumaliro. Ŵalongozgi ŵa charu ŵakakhumbanga kuti pa charu chose paŵe mtende. Ntheura mu Janyuwale 1920, ŵakambiska wupu wa League of Nations, uwo pamanyuma wupu wa United Nations ukazakanjira mu malo mwake mu Okutobala 1945. Wupu uwu ukuchemeka kuti “themba la 8.” Kweni ni ufumu wa pa charu chose yayi. Chifukwa nkhongono zake zikuthemba pa maboma gha ndyali agho ghakuwuwovwira. Baibolo likuyowoya kuti maboma agha ni “mathemba 10.”

14-15. (a) Kasi lemba la Chivumbuzi 17:3-5 likuvumbura vichi vyakukhwaskana na “Babuloni Mukuru”? (b) Kasi ŵanthu awo ŵakukhozgera chisopa chautesi ŵakuchita vichi?

¹⁴ Ŵazgani Chivumbuzi 17:3-5. Mu mboniwoni, mpositole Yohane wakawona muhule, “Babuloni Mukuru,” uyo wakwimira visopa vyose vyautesi. Kasi mboniwoni iyi yafiskika wuli? Kwanyengo yitali, visopa vyautesi vikukolerana chomene na maboma gha ndyali ndipo vikughawovwira. Ndipouli, sonosono apa Yehova wapangiskenge ŵandyali “kuchita maghanoghano ghake.” Kasi chakufumapo chake chiŵenge chivichi? Maboma gha ndyali agha, agho ni “mathemba 10,” ghawukirenge visopa vyautesi na kuviparanya vyose.—Chivu. 17:1, 2, 16, 17.

 ¹⁵ Kasi tikumanya wuli kuti umaliro wa Babuloni Mukuru uli pafupi? Kuti tizgore fumbo ili, tikwenera kukumbuka kuti msumba wakale wa Babuloni, chigaŵa chinyake ukavikilirikanga na maji gha mlonga ukuru wa Yufurate. Buku la Chivumbuzi likuyaniska ŵanthu mamiliyoni ghanandi awo ŵakukhozgera Babuloni Mukuru na “maji” agho ghakavikiliranga msumba wakale wa Babuloni. (Chivu. 17:15) Kweniso likuvumburaso kuti maji ‘ghazamukamuka,’ icho chikulongora kuti chisopa chautesi chizamuluza ŵanthu ŵanandi awo ŵakuchikhozgera. (Chivu. 16:12) Mazuŵa ghano uchimi uwu ukufiskika, chifukwa ŵanthu ŵanandi ŵakwamba kuchileka chisopa chautesi, na kwamba kupenja kunyake nthowa za umo ŵangamazgira masuzgo ghawo.

16. Kasi kupulikiska mauchimi ghakukhwaskana na apo wupu wa United Nations ukambira kweniso apo Babuloni Mukuru wazamuparanyikira kungatovwira wuli?

¹⁶ Kasi mauchimi agha ghangatovwira wuli? Kwambiskika kwa wupu wa United Nations kweniso fundo yakuti ŵanthu ŵanandi ŵakukhozgera yayi chisopa chautesi vikulongora kuti tikukhala mu mazuŵa ghaumaliro. Nangauli ŵanthu ŵanandi ŵakuleka kukhozgera Babuloni Mukuru, kweni ivi ndivyo vizamupangiska  kuti chisopa chautesi chiparanyike yayi. Nga umo tayowoyera kale, Yehova ndiyo wazamuŵika ichi mu mitima ya “mathemba 10,” kuti ‘ghachite maghanoghano ghake.” Mathemba agha ghakwimira maboma gha ndyali agho ghakukhozgera wupu wa United Nations. Maboma agha ghazamuparanya Babuloni Mukuru mwamabuchi, ivyo vizamuzizika ŵanthu pa charu chose. * (Chivu. 18:8-10) Kuparanyika kwa Babuloni Mukuru kuzamukhwaska chomene charu chose chapasi na kupangiska masuzgo ghanandi. Kweni ŵanthu ŵa Chiuta ŵazamuŵa na vifukwa viŵiri vyakukondwera. Mulwani wa Yehova Chiuta uyo waŵapo kwanyengo yitali, wazamuparanyika muyirayira, ndipo kuwombokwa kwithu ku mgonezi uheni uwu kuzamuŵa kuti kuli pafupi.—Luka 21:28.

17-18. (a) Kasi tingalutilira wuli kukhozga chipulikano chithu? (b) Kasi tizamudumbiskana vichi mu nkhani yakulondezgapo?

¹⁷ Daniyeli wakayowoyerathu kuti “umanyi wenecho uzamwandana.” Nakuti umanyi uwu wandana nadi. Tapulikiska mauchimi ghakukhwaskana na mu nyengo yithu. (Dan. 12:4, 9, 10) Mauchimi agha ngaunenesko nadi mwakuti ghakutovwira kuti timuchindikenge chomene Yehova kweniso kuzirwiska Mazgu ghake. (Yes. 46:10; 55:11) Ntheura lutilirani kukhozga chipulikano chinu pakufwilirapo kusambira Malemba kweniso kovwira ŵanji kuti ŵaŵe paubwezi uwemi na Yehova. Yehova wavikilirenge wose awo ŵakuthemba iyo ndipo wazamuŵapa “mtende wambura kumara.”—Yes. 26:3.

¹⁸ Mu nkhani yakulondezgapo, tizamudumbiskana mauchimi ghakukhwaskana na mpingo Wachikhristu mu nyengo yaumaliro. Nga umo tizamusambilira, mauchimi agha nagho ghakulongora kuti tikukhala mu mazuŵa ghaumaliro. Tizamuwonaso ukaboni wakusazgikira wakuti Yesu Khristu uyo sono ni Themba, wakulongozga ŵateŵeti ŵake ŵakugomezgeka.