1. Chifukwa wuli ntchakuzirwa kunozgekera masoka gha chilengiwa?

 PARA tanozgekera makora soka linyake, vikovwira kuti tiponoske umoyo withu. Mwachiyelezgero, para kwachitika masoka gha chilengiwa, kanandi ŵanthu awo mbakunozgeka ndiwo ŵakupona kweniso kovwira ŵanyawo. Wupu unyake ku Europe uwo ukuyezgayezga kovwira ŵanthu ukuti: “Para muli ŵakunozgeka makora vikovwira kuti muponoske umoyo winu.”

2. Chifukwa wuli tikwenera kunozgekera suzgo yikuru? (Mateyu 24:44)

² “Suzgo yikuru” yizamwamba mwamabuchi. (Mat. 24:21) Kweni yizamuŵa yakupambanako na masoka ghanandi gha chilengiwa chifukwa chakuti tikumanya kuti yizenge nadi. Pafupifupi vyaka 2,000 ivyo vyajumpha, Yesu wakachenjezga ŵasambiri ŵake kuti ŵaŵe ŵakunozgeka vya zuŵa ili. (Ŵazgani Mateyu 24:44.) Para tanozgekera, chizamuŵa chipusu kuzizipizga panyengo yakusuzga iyi na kovwira ŵanyithu nawo kuzakazizipizga.—Luka 21:36.

3. Kasi kuzizipizga, chiwuravi, na chitemwa vingatovwira wuli kunozgekera suzgo yikuru?

³ Tikwenera kuŵa na mikhaliro yitatu iyo yingatovwira kunozgekera suzgo yikuru. Kasi tizamuchita wuli para taphalirika kupharazga uthenga wa cheruzgo uwo uli nga ni vula yamalibwe, kweniso para ŵanthu ŵakutisuska? (Chivu. 16:21) Tizamukhumbikwira kuzizipizga kuti tilutilire kupulikira Yehova, na kugomezga kuti wativikilirenge. Kasi tizamuchita wuli para ŵabali ŵithu ŵataya katundu wawo yose? (Hab. 3:17, 18) Tizamukhumbikwira kuŵa ŵachiwuravi, mwakuti tiŵawovwire pa vinthu ivyo ŵazamukhumbikwira. Kasi tizamuchita wuli usange tizamukhumbikwira kukhala pamoza na ŵabali na ŵadumbu kwakanyengo chifukwa cha kuwukilika na gulu la ŵamitundu? (Ezek. 38:10-12) Tizamukhumbikwira kuŵa na chitemwa chanadi ku Ŵakhristu ŵanyithu kuti tizakajumphe panyengo yakusuzga iyi.

4. Kasi Baibolo likulongora wuli kuti tikwenera kulutilira kuŵa na mikhaliro nga nkhuzizipizga, chiwuravi, na chitemwa?

 ⁴ Mazgu gha Chiuta ghakutichiska kuti tilutilire kuŵa na mikhaliro nga nkhuzizipizga, chiwuravi, na chitemwa. Lemba la Luka 21:19 likuti: “Para muzamuzizipizga, muzamusungilira umoyo winu.” Lemba la Ŵakolose 3:12 likuti: “Vwarani mtima wa chiwuravi.” Ndipo lemba la 1 Ŵatesalonika 4:9, 10 likuti: “Imwe mukusambizgika na Chiuta kuti mutemwanenge. . . . Kweni tikumuchiskani ŵabali, kuti mulutilire kuchita ichi mwakukwana.” Malemba ghose agha ghakalutanga ku ŵasambiri awo ŵakaŵa kuti ŵalongora kale kuzizipizga, chiwuravi, na chitemwa. Vili nthena chifukwa ŵakeneranga kulutilira kulongora mikhaliro iyi. Nase ndimo tikwenera kuchitira. Kweni kuti tichite nthena, mu nkhani iyi, tiwonenge umo Ŵakhristu ŵakwambilira ŵakalongolera mikhaliro yitatu iyi. Kufuma apo tiwonenge umo tingaŵayezgera ŵasambiri aŵa, na kulongora kuti tanozgekera nadi suzgo yikuru.

5. Kasi Ŵakhristu ŵakwambilira ŵakachita wuli kuti ŵazizipizge viyezgo?

⁵ Ŵakhristu ŵakwambilira ŵakakhumbikwiranga kuzizipizga. (Heb. 10:36) Padera pa kusangana na masuzgo agho waliyose wakusangana nagho, ŵakasanganaso na masuzgo ghanyake pakuŵa Ŵakhristu. Ŵanandi ŵa iwo padera pakutambuzgika na ŵalongozgi ŵachisopa Chachiyuda na ŵalara ŵa boma la Romu, ŵakatambuzgikangaso na ŵabali ŵawo. (Mat. 10:21) Ndipo mukati mu mpingo, nyengo zinyake ŵakeneranga kuti ŵalimbane na ŵachigaluka na visambizgo vyawo vyautesi. (Mil. 20:29, 30) Ndipouli, Ŵakhristu aŵa ŵakazizipizga. (Chivu. 2:3) Kasi ŵakachita wuli kuti ŵazizipizge? Ŵakaghanaghanirapo chomene viyelezgero vya ŵanthu ŵa mu Malemba awo nawo ŵakazizipizga, nga ni Yobu. (Yak. 5:10, 11) Ŵakalomba Yehova kuti waŵape nkhongono. (Mil. 4:29-31) Ndipo iwo ŵakaŵika mtima pa vitumbiko ivyo ŵangazakasanga para ŵalutilira kuzizipizga.—Mil. 5:41.

6. Kasi mukusambirako vichi ku ivyo Merita wakachita kuti wazizipizge apo wakasuskikanga?

⁶ Nase tingazizipizga para nyengo zose tikusambira na kughanaghanirapo viyelezgero vya ŵanthu awo ŵakusangika mu Baibolo kweniso mu mabuku ghithu, awo nawo ŵakazizipizga. Chifukwa cha kuchita nthena, Mudumbu Merita wa ku Albania, wakazizipizga apo ŵamubanja mwake ŵakamususkanga. Wakayowoya kuti: “Nkhakhozgeka chomene nati nasambira nkhani ya mu Baibolo ya Yobu. Wakasuzgika chomene nangauli wakamanyanga yayi uyo wakapangiskanga viyezgo ivyo wakasangananga navyo. Ndipouli, wakayowoya kuti: ‘Nitayengepo chara kunyoloka kwane m’paka nifwe!’ (Yobu 27:5) Nkhaghanaghanira umo viyezgo vya Yobu vikaŵira vyakusuzga kuzizipizga kuluska viyezgo vyane. Mwakupambanako na Yobu, ine nkhamanyanga uyo wakapangiskanga viyezgo vyane.”

7. Nangauli sono tingaŵa kuti tikusangana na masuzgo ghakuru viŵi yayi, kasi tikwenera kusambira kuchita vichi pasono?

⁷ Tingalutilira kuzizipizga para nyengo zose tikufwilirapo kulomba kwa Yehova na kumuphalira vyose ivyo vili mu mtima withu. (Fil. 4:6; 1 Tes. 5:17) Nyengo zinyake pasono mukusangana na viyezgo vyakofya viŵi yayi. Kweni kasi mukupenja wovwiri kufuma kwa Yehova kuti wamovwirani para mwakhuŵara, mwatimbanizgika panji mwasoŵa chakuchita pa nkhani yinyake? Usange nyengo zose mukulomba kwa Yehova kuti wamovwirani pa tumasuzgo tuchokotuchoko uto mukusangana nato pasono, chizamuŵaso chipusu kulomba para munthazi mwazakakumana na masuzgo ghakuru. Para muchitenge nthena, muŵenge na chigomezgo chose kuti Chiuta wakumanya nyengo yakwenelera iyo wangamovwilirani.—Sal. 27:1, 3.

8. Kasi chiyelezgero cha Mira chikulongora wuli kuti kuzizipizga masuzgo sono kungatovwira kuzakazizipizga masuzgo gha munthazi? (Yakobe 1:2-4) (Wonaniso chithuzi.)

⁸ Tingazakazizipizga suzgo yikuru, para pasono tikuzizipizga masuzgo agho tikukumana nagho. (Rom. 5:3) Chifukwa wuli tikuyowoya nthena? Ŵabali ŵanandi ŵawona kuti nyengo yiliyose  para ŵazizipizga chiyezgo chinonono, vikuŵawovwira kuti ŵazizipizge chiyezgo chakulondezgapo icho ŵasangana nacho. Para ŵazizipizga suzgo na wovwiri wa Yehova, ŵakuŵa na chigomezgo chose kuti Yehova ngwakunozgeka na wakukhumbisiska kuŵawovwira. Chifukwa cha kuŵa na chipulikano mwa Yehova, vikuŵawovwira kuzizipizga chiyezgo chakulondezgapo. (Ŵazgani Yakobe 1:2-4.) Mira, uyo ni mupayiniya ku Albania, wawona kuti chifukwa chakuti wakazizipizga viyezgo ivyo wakakumanapo navyo kumasinda, vyamovwira kuti walutilire kuzizipizga masuzgo agho wakusangana nagho pasono. Iyo wakuzomerezga kuti nyengo zinyake wakuwona nga kuti ndiyo pera wakusangana na masuzgo ghanandi. Kweni pamanyuma wakughanaghanirapo pa umo Yehova wamovwilira kwa vyaka 20, ndipo wakujiphalira kuti: ‘Lutilira kugomezgeka. Ungazomerezganga yayi kuti vyaka vyose ivyo wateŵetera Yehova kweniso vyose ivyo wachita pa kuzizipizga masuzgo na wovwiri wa Yehova, vilute waka mu maji.’ Namwe mungaghanaghanira umo Yehova wali kumovwiliranipo kale kuti muzizipizge. Gomezgani kuti iyo nyengo yiliyose wakuwona para mwazizipizga chiyezgo ndipo wamutumbikaninge. (Mat. 5:10-12) Ntheura para suzgo yikuru yazakamba, muzamuŵa kuti mwasambira umo mungazizipizgira, kweniso muzamuŵikapo mtima kulutilira kuzizipizga.

9. Kasi Ŵakhristu ŵa ku Antiyoke wa mu Siriya ŵakalongora wuli chiwuravi?

⁹ Wonani ivyo vikachitika Ŵakhristu mu Yudeya ŵakati ŵasangana na njara yikuru. Mpingo wa mu Antiyoke wa mu Siriya ukati wapulika vya njara iyi, ukaŵachitira chiwuravi ŵabali mu Yudeya. Ntheura ŵakachitapo kanthu kuti ŵaŵawovwire Ŵakhristu ŵanyawo. “Ŵakadumura kuti ŵatumizgenge wovwiri ku ŵabali awo ŵakakhalanga mu Yudeya. Waliyose wakapeleka kuyana na umo wakafiskira.” (Mil. 11:27-30) Nangauli ŵabali awo ŵakakhwaskika na njara iyi ŵakakhalanga kutali, kweni Ŵakhristu ŵa ku Antiyoke ŵakaŵikapo mtima kovwirapo.—1 Yoh. 3:17, 18.

10. Kasi ni nthowa wuli izo tingalongolera chiwuravi para Ŵakhristu ŵanyithu ŵasangana na soka la chilengiwa? (Wonaniso chithuzi.)

¹⁰ Nase mazuŵa ghano tingalongora chiwuravi ku Ŵakhristu ŵanyithu para tamanya kuti ŵasangana na soka la chilengiwa. Tikwenera kuŵa ŵakunozgeka kovwirapo, nyengo zinyake tingafumba ŵalara usange tingakawovwirapo uko kwachitika soka la chilengiwa, tingapeleka vyawanangwa vyakovwira pa ntchito ya pa charu chose, panji tingaŵalombera awo ŵakhwaskika na soka la chilengiwa. b (Zinth. 17:17) Mwachiyelezgero, mu 2020, Makomiti Ghakuwona za Masoka Ghachilengiwa ghakujumpha 950 ghakasoreka pa charu chose kuti ghakawovwire awo ŵakakhwaskika na muliri wa COVID-19. Wose awo ŵakuteŵetera mu makomiti agha ŵakuwongeka chomene. Chifukwa cha chiwuravi pa ŵabali na ŵadumbu ŵithu, iwo ŵakagaŵa vyakukhumbikwa pa umoyo ku ŵabali na ŵadumbu, kuŵawovwira mwauzimu, kweniso mu malo ghanyake ŵakanozga panji kuŵazengera nyumba na malo ghakusoperapo.—Yaniskani na 2 Ŵakorinte 8:1-4.

11. Kasi tikuchindika wuli Yehova para tikulongora chiwuravi?

¹¹ Para talongora chiwuravi usange kwachitika soka la chilengiwa, ŵanji ŵakuwona kujipeleka kwithu. Mwachiyelezgero, mu 2019, chimphepo chakuchemeka Hurricane Dorian chikananga Nyumba ya Ufumu ya ku Bahamas. Apo ŵabali ŵakazengangaso Nyumba ya Ufumu iyi, ŵakafumba wakuzenga uyo wakaŵa Kaboni yayi kuti wayowoye ndalama izo zingakhumbikwira kuti wagwire ntchito iyi. Wakaŵaphalira kuti: “Nigwirenge waka ntchito iyi kwambura malipiro ghalighose kweniso nipelekenge vyose ivyo vikukhumbikwira pa ntchito iyi. . . Ivi nichitirenge waka gulu linu pera. Nachita nthena chifukwa nakhwaskika chomene na umo mukuchitira vinthu para ŵanyinu ŵasangana na suzgo.”  Ŵanthu ŵanandi mu charu ichi ŵakumumanya yayi Yehova. Kweni ŵanandi ŵakuwona ivyo Ŵakaboni ŵa Yehova ŵakuchita pakovwira ŵanyawo. Ntheura tikukondwa chomene para tamanya kuti chifukwa cha kulongora ŵanji chiwuravi, vikovwira kuti ŵanthu ŵanyake ŵasendelere kwa Yehova, uyo ni Chiuta ‘wakuzura na lusungu.’—Efe. 2:4.

12. Kasi kulongora chiwuravi sono kungatovwira wuli kunozgekera suzgo yikuru? (Chivumbuzi 13:16, 17)

¹² Chifukwa wuli tizamukhumbikwira kulongora chiwuravi pa suzgo yikuru? Baibolo likulongora kuti wose awo ŵakoleranenge yayi na ŵandyali, ŵakumanenge na masuzgo sono kweniso panyengo ya suzgo yikuru. (Ŵazgani Chivumbuzi 13:16, 17.) Ŵabali na ŵadumbu ŵithu ŵangakhumbikwira wovwiri kuti ŵasange vyakukhumbikwira vya zuŵa na zuŵa. Ipo para Fumu yithu, Khristu Yesu, yikwiza kuzakeruzga charu ichi, mphanyi yazakatisanga kuti tikulongora chiwuravi na kutichema kuti ‘tizakahare Ufumu.’—Mat. 25:34-40.

13. Nga umo pakulongolera pa Ŵaroma 15:7, kasi Ŵakhristu ŵakwambilira ŵakalutilira wuli kulongorana chitemwa?

¹³ Chitemwa ndicho chikaŵa chimanyikwiro cha Ŵakhristu ŵakwambilira. Kweni kasi chikaŵa chipusu waka kulongora chitemwa? Wonani umo mpingo wa ku Romu ukaŵira. Ŵanyake ŵakaŵa Ŵayuda, awo ŵakasambizgika Dango la Mozesi, apo ŵanyake ŵakaŵa Ŵamitundu awo ŵakakulira mu mitheto yakupambanapambana. Ŵakhristu ŵanyake ŵakwenera kuti ŵakaŵa ŵazga apo ŵanyake ŵakaŵa ŵanangwa, ndipo nyengo zinyake ŵanyake mwa iwo ŵakaŵa ŵeneko ŵa ŵazga aŵa. Kasi Ŵakhristu aŵa ŵakakwaniska wuli kulutilira kulongora chitemwa nangauli ŵakaŵa ŵakupambana? Mpositole Paulosi wakaŵachiska kuti ‘ŵapokeleranenge.’ (Ŵazgani Ŵaroma 15:7.) Kasi wakang’anamuranga vichi? Mazgu agho ghali kung’anamulika kuti ‘kupokelera’ ghakung’anamura kupokelera makora munthu munyake, kwali mpha nyumba pithu panji kuŵa nayo paubwezi. Mwachiyelezgero, Paulosi wakaphalira Filimoni umo wangapokelelera Onesimo, muzga wake uyo wakamuchimbira, kuti: “Umupokelere makora.” (Filim. 17) Kweniso Prisila na Akwila ŵakamupokelera Apolo, uyo wakamanyanga vinandi yayi vyakukhwaskana na Chikhristu pakuyaniska na iwo, ‘pakumutolera pamphepete.’ (Mil. 18:26) Ŵakhristu aŵa ŵakazomerezga yayi kuti ŵaŵe ŵakugaŵikana chifukwa chakuti ŵakapambananga, m’malo mwake ŵakalutilira kupokelerana.

14. Kasi Anna na mfumu wake ŵakalongora wuli chitemwa?

¹⁴ Nase tingalongora chitemwa ku ŵabali na ŵadumbu ŵithu para tikuŵa nawo paubwezi na kuchezga nawo. Para tichitenge nthena nawo ŵachiskikenge kutilongora chitemwa. (2 Kor. 6:11-13) Wonani ivyo vikachitikira Anna na mfumu wake. Nyengo yichoko waka ŵati ŵasamira ku West Africa uko ŵakateŵeteranga nga mbamishonale, muliri wa COVID-19 ukamba. Chifukwa cha muliri, ŵakawungananga maso na maso yayi na mpingo wawo ndipo chikaŵa chakusuzga kuti ŵamanyane na ŵabali na ŵadumbu. Kasi mbumba iyi yikalongora wuli chitemwa? Ŵakagwiliskiranga ntchito vidiyokonferensi kuti ŵayowoyeskane na ŵabali na ŵadumbu ŵa mpingo wawo, ndipo ŵakaŵaphaliranga kuti ŵakukhumba kuti ŵaŵamanye makora. Mabanja ghanandi ghakakhwaskika chomene na chitemwa icho ŵamishonale aŵa ŵakalongora ndipo nawo ŵakamba kuŵayimbira na kuŵatumira mameseji pafupipafupi. Chifukwa wuli ŵamishonale aŵa ŵakakhumba kuti ŵaŵamanye makora ŵabali ŵa mu mpingo uphya uwu? Anna wakuti: “Nizamuluwa yayi chitemwa icho ŵabali na ŵadumbu aŵa ŵakalongora kwa ine na mbumba yane panyengo ziwemi na zakusuzga wuwo. Chiyelezgero chawo chanichiska kuti nane nilongorenge chitemwa.”

15. Kasi mukusambirako vichi ku chiyelezgero cha Vanessa pa nkhani yakutemwa ŵabali na ŵadumbu wose? (Wonaniso chithuzi.)

¹⁵ Taŵanandi ŵa ise tili mu mipingo iyo muli ŵabali na ŵadumbu ŵakufuma mu vigaŵa vyakupambanapambana kweniso ŵali na mikhaliro yakupambanapambana. Tingalutilira kuŵalongora chitemwa para tikuŵika mtima pa mikhaliro yawo  yiwemi. Mudumbu munyake zina lake Vanessa, uyo wakuteŵetera ku New Zealand, vikamusuzganga kuchezga na ŵabali na ŵadumbu ŵanji mu mpingo wake. Kweni pamanyuma wakawona kuti m’malo mwa kuŵagega awo mikhaliro yawo yikamukondweskanga yayi, iyo wakawona kuti wambe kuchezga nawo chomene. Ivi vikamovwira kuti wamanye chifukwa icho Yehova wakuŵatemwera ŵabali na ŵadumbu aŵa. Iyo wakuti: “Kwambira apo mfumu wane wakaŵira mulaŵiliri wa dera, tikuchezga na ŵabali na ŵadumbu ŵanandi awo ŵali na mikhaliro yakupambanapambana, ndipo vyanovwira kuti chiŵe chipusu kuŵamanya makora. Sono nkhutemwa ŵabali na ŵadumbu ŵakupambanapambana. Nakuti ndimo Yehova wakukhumbira kuti tichitirenge chifukwa ŵanthu awo wali kuŵaguza kuti ŵamusopenge ŵakufuma mu mitundu yakupambanapambana.” Para tikuwona ŵanyithu nga umo Yehova wakuŵawonera, tikulongora kuti tikuŵatemwa.—2 Kor. 8:24.

16. Chifukwa wuli chitemwa chizamuŵa chakukhumbikwira chomene pa suzgo yikuru? (Wonaniso chithuzi.)

¹⁶ Chitemwa chizamukhumbikwira chomene pa suzgo yikuru. Para suzgo yikuru yazakayamba, ni nkhu uko tingazakasanga chivikiliro? Wonani ivyo Yehova wakaphalira ŵanthu ŵake kuchita apo Babuloni wakawukirika. Wakaŵaphalira kuti: “Lutani ŵanthu ŵane, njirani mu vipinda vinu vyamukati, ndipo jalani vijaro pamanyuma pinu. Bisamani kwa kanyengo kachoko, m’paka ukali ujumphe.” (Yes. 26:20) Nyengo zinyake mazgu agha ghangazakagwiraso ntchito kwa ise apo tizamukumana na suzgo yikuru. ‘Vipinda vyamukati’ vingimira mipingo. Panyengo ya suzgo yikuru, tizamusanga chivikiliro icho Yehova wakutilayizga para tikulutilira kumuteŵetera lumoza na ŵabali na ŵadumbu ŵithu. Ntheura, tikwenera kuŵikapo mtima chomene sono kuti tiŵatemwenge ŵabali na ŵadumbu ŵithu kufumira pasi pamtima. Nyengo zinyake kuti tizakapone tizamukhumbikwira wovwiri wa ŵabali na ŵadumbu ŵithu.

17. Para tanozgekerathu sono, kasi tizamuchita wuli panyengo ya suzgo yikuru?

¹⁷ “Zuŵa likuru la Yehova” yizamuŵa nyengo yakusuzga chomene kwa waliyose. (Zef. 1:14, 15) Nanga mbateŵeti ŵa Yehova nawo ŵazamusuzgika. Kweni para tanozgekerathu sono, tizamukhala mwakufwasa na kovwira ŵanji. Tizamuzizipizga masuzgo ghalighose agho tizamusangana nagho. Para ŵabali na ŵadumbu ŵithu ŵakusuzgika, tizamuchita chilichose icho tingakwaniska kuti tiŵawovwire mwa kuŵalongora chiwuravi kweniso kuŵapa vyakukhumbikwa pa umoyo. Ndipo para pasono tikuŵatemwa ŵabali na ŵadumbu ŵithu kufumira pasi pamtima, tizamulutiliraso kuŵatemwa panyengo yakusuzga iyi. Paumaliro Yehova wazamutitumbika na umoyo wamuyirayira mu charu icho masoka gha chilengiwa na masuzgo ghanyake ghose vizamukumbukikaso yayi.—Yes. 65:17.