Kasi muli kuŵerengapo magazini gha Gongwe la Mulinda ghasonosono apa? Yezgani kuzgora mafumbo agha:

Para ulongozgi wafuma ku gulu la Yehova, kasi ŵalaŵiliri ŵa dera na ŵalara mu mpingo ŵakwenera kuchita wuli?

Ŵakwenera kupulikira luŵiro. Ŵakwenera kujifumba kuti: ‘Kasi nkhovwira ŵabali na ŵadumbu kuti ŵalutilire kutemwa vinthu vyauzimu? Kasi nkhupulikira luŵiro na kukhozgera ulongozgi uwo tapokera?’—w16.11, p. 11.

Kasi Ŵakhristu ŵaunenesko ŵakanjira pawuli mu wuzga wa Babuloni Mukuru?

Ŵakanjira mu wuzga wa Babuloni Mukuru ŵapositole wose ŵakati ŵafwa waka. Panyengo yira, ŵanthu ŵanyake ŵakamba kuŵa ŵaliska. Matchalitchi na maboma ghakamba kukhozgera visambizgo vyautesi. Kweniso ghakakanizganga ŵanthu awo ŵakaŵa nga ni tirigu kuti ŵapharazgenge unenesko. Kweni pambere chaka cha 1914 chindafike, ŵabali ŵakuphakazgika ŵakamba kufwatuka ku wuzga wa Babuloni Mukuru.—w16.11, p. 23-25.

Chifukwa wuli ntchito iyo wakachita Lefèvre d’Étaples yikaŵa yakuzirwa chomene?

M’ma 1520, Lefèvre wakang’anamura Baibolo la Chifulenchi kuti ŵanthu ŵanandi ŵaŵe nalo. Ivyo wakalongosora mu Baibolo lake vikawovwira chomene Martin Luther, William Tyndale, na John Calvin.—wp16.6, p. 10-12.

Kasi pali mphambano wuli pakati pa “kughanaghanira vya thupi” na “kughanaghanira vya mzimu”? (Rom. 8:6)

Munthu uyo wakuŵika maghanoghano pa vinthu vya thupi, wakudangizga makhumbiro ghake ghathupi, wakutemwa kuyowoya na kulumba chomene vinthu vya thupi. Kweni munthu uyo wakughanaghanira vya mzimu, wakuŵika maghanoghano ghake pa vinthu vya Chiuta. Munthu wanthena wakulongozgeka na mzimu utuŵa. Kughanaghanira vya thupi ni nyifwa kweni kughanaghanira vya mzimu mbumoyo wamuyirayira na mtende.—w16.12, p. 15-17.

Kasi mungachita wuli kuti muchepeskeko kwenjerwa?

Ŵikani vinthu vyakuzirwa pakwamba, manyani ivyo mungafiska, zuŵa lililose sangani nyengo yakupumulira na kughanaghanira, sangwani na ivyo Chiuta wali kulenga, musekenge na ŵanyinu, muchitenge maseŵero ghakukhozga thupi, kweniso mugonenge mwakukwana.—w16.12, p. 22-23.

“Enoki wakasamuskika kuti waleke kuwona nyifwa.” (Heb. 11:5) Mu nthowa wuli?

Chiuta wakasamuska umoyo wa Enoki mu fundo yakuti wakafwa kwambura kumanya.—wp17.1, p. 12-13.

Chifukwa wuli Ntchakuzirwa kujiyuyura?

Para munthu ngwakujiyuyura wakujiwona mwakwenelera ndipo wakumanya ivyo wakutondeka. Tikwenera kumanya umo nkharo yithu yingakhwaskira ŵanyithu na kuleka kuwona kuti tikuŵaluska.—w17.01, p.18.

Kasi pali ukaboni wuli kuti wupu wakulongozga wa mu nyengo ya Ŵakhristu ŵakwambilira ukalongozgekanga na Chiuta nga umo viliri na wupu wakulongozga mazuŵa ghano?

Na wovwiri wa mzimu utuŵa, wupu wakulongozga ukapulikiskanga Malemba. Ukalongozganga ntchito yakupharazga na wovwiri wa ŵangelo, kweniso ukagomezganga Mazgu gha Chiuta para ukupeleka ulongozgi. Ivi ndivyo wupu wakulongozga ukuchitaso mazuŵa ghano.—w17.02, p. 26-28.

Ni vinthu wuli vikulongora kuti sembe yakuwombora ntchawanangwa chapadera chomene?

Vinthu vinayi ivyo vikulongora kuti sembe yakuwombora njakuzirwa ni: Uyo wakapeleka, chifukwa icho wakapelekera, ivyo vikachitika kuti sembe iyi yipelekeke, kweniso ivyo vyachitika chifukwa cha sembe iyi. Tikwenera kughanaghanira umo vinthu ivi vikaŵira.—wp17.2, p. 4-5.

Para Mkhristu waghanaghaniraposo ivyo wakhumbanga kuchita, kasi wangasintha maghanoghano?

Tikwenera kufiska ivyo tayowoya. Kweni nyengo zinyake vingachitika kuti ivyo tikasankha tikwenera kuviwonaso makora panji kusintha. Chiuta wakati wawona kuti ŵanthu ŵa ku Nineve ŵalapa na kusintha, wakasintha maghanoghano ghake. Nyengo zinyake vinthu vingasintha, panji tingamanya vinthu vinyake ivyo tavimanyanga yayi. Ntheura tingakhumbikwira kusintha.—w17.03, p. 16-17.

Chifukwa wuli kusesa nkhwakofya chomene?

Vinthu vinganangikirathu para tingamba kusesa. Kwali ndise tabudiska panji yayi, kweni kuyowoya mazgu ghakulasa kukunozga vinthu yayi.—w17.04, p. 21.