Kasi muli kuŵerengapo magazini gha Gongwe la Mulinda ghasonosono apa? Yezgani kuzgora mafumbo agha:

Ni vinthu wuli vinayi ivyo vingatovwira kuti tiyimbenge makora?

Tiyimilire makora na kukolera muchanya buku lithu la sumu. Tithute mwakwenelera. Para tikujura chomene mulomo withu, tiyimbenge mwankhongono.—w17.11, peji 5.

Ntchivichi icho chikumukondweskani pakughanaghanira umo ŵakasankhira malo gha mizi yakuponerako ndiposo umo misewu yakuluta ku mizi iyi yikaŵira?

Pakaŵa mizi 6 yakuponerako iyo yikaŵa mu vigaŵa vyose, ndipo yikaŵa na misewu yiwemi. Ntheura uyo wakoma munthu mwangozi wakachimbilirangako mwaluŵiro ndiposo kwambura suzgo.—w17.11, peji 14.

Chifukwa wuli sembe yakuwombora ya Yesu ntchawanangwa chikuru chomene chakufuma kwa Chiuta?

Yikutovwira kuzakakhala kwamuyirayira, ndiposo yikutovwira kuti tifwatuke ku kwananga na nyifwa. Pakuti Chiuta wakutitemwa taŵana ŵa Adamu, wakapeleka mwana wake apo tikaŵa kuti tichali ŵakwananga.—wp17.6, peji. 6-7.

Kasi lemba la Salimo 118:22 likulongora wuli kuti likuyowoya za chiwuka cha Yesu?

Ŵanthu ŵakamukana Yesu kuti ni Mesiya ndipo ŵakamukoma. Kuti iyo waŵe “libwe lakuzirwa lapakona,” wakeneranga kuwuskika.—w17.12, peji 9-10.

Kasi ŵanthu wose awo mukafuma Mesiya ŵakaŵa ŵakwamba kubabika mu nyumba yakwawo?

Ni ŵanthu wose yayi awo Yesu wakafumamo ŵakaŵa ŵakwamba kubabika. Davide wakaŵa mwana wakwamba yayi wa Yese; kweni Mesiya wakafuma mu mphapu ya Davide.—w17.12, peji 14-15.

Ni fundo wuli za mu Baibolo izo zingatovwira pa nkhani ya umoyo?

Pakaŵa nthenda zinyake izo usange munthu walwara, Dango likatenge wakhale payekha. Munthu wakeneranga kugeza mu mawoko para wakora chitanda. Dango likatenge para munthu wajovwira wajimire pasi na kuwundira. Dango likatenge mwana wakwenera kukotoleka pa zuŵa la nambara 8 kufuma apo wababikira chifukwa pa nyengo iyi ndopa zikafumanga chomene yayi.—wp18.1, peji 7.

Chifukwa wuli palije suzgo para Mkhristu wakujitemwa mwakwenelera?

Tikutemwa ŵazengezgani ŵithu nga umo tikujitemwera tekha. (Mrk. 12:31) Ŵafumu ŵakwenera ‘kutemwa ŵawoli ŵawo nga ni mathupi ghawo.’ (Efe. 5:28) Kweni ntchiwemi yayi kujighanaghanira waka tekha.—w18.01, peji 23.

Ni vinthu wuli ivyo vingatovwira kuti tikure mwauzimu?

Tikwenera kusambira Mazgu gha Chiuta, kughanaghanirapo na kulondezga ivyo tikusambira. Kweniso tikwenera kuzomerezga mzimu utuŵa kuti ulongozgenge maghanoghano na mtima withu na kuzomera kuti ŵanyithu ŵatovwire.—w18.02, peji 26.

Chifukwa wuli ŵakumanya vya nyenyezi na ŵakuwukwa ŵangatovwira yayi kumanya vyamunthazi?

Pali vifukwa vyakupambanapambana, kweni chifukwa chikuru ntchakuti Baibolo likukana vinthu ivi.—wp18.2, peji 4-5.

Kasi tikwenera kuchita wuli usange tazomera para mubali panji mudumbu watichemera ku nyumba yake kukarya chakurya?

Usange tazomera para mubali panji mudumbu watichemera ku nyumba yake tikwenera kufiska ivyo talayizga. (Sal. 15:4) Tingakhalanga yayi pa vifukwa vyambura kwenelera. Nakuti uyo watichema wakuŵa kuti wachita vinandi kuti wanozge chakurya.—w18.03, peji 18.

Kasi ŵalara na ŵateŵeti ŵakovwira ŵangasambirako vichi kwa Timote?

Timote wakatemwanga ŵanthu ndipo wakaŵikanga vinthu vyauzimu pa malo ghakwamba. Wakalimbikiranga chomene uteŵeti wakupatulika ndipo wakachitanga ivyo wasambira. Wakalutilira kujisambizga ndipo wakagomezganga mzimu wa Yehova. Ŵalara na ŵateŵeti ŵakovwira ŵangamuyezga Timote.—w18.04, peji 13-14.