1. Chifukwa wuli tili ŵakukondwa?

NTCHAKUKONDWESKA chomene kuwona kuti ŵanthu ŵa Yehova ŵakusazgikirasazgikira. Chaka chamara tikachitiska masambiro gha Baibolo ghakujumpha 10,000,000. Ichi chikulongora kuti ŵateŵeti ŵa Chiuta ŵakuŵaliska ungweru pa charu chose. Ghanaghanirani ŵanthu ŵakunweka mamiliyoni ghanandi awo ŵakiza ku Chikumbusko. Ŵakati ŵiza ŵakasambira za chitemwa icho Chiuta wakalongora apo wakapeleka sembe yakuwombora.—1 Yoh. 4:9.

2, 3. (a) Ntchivichi icho chikutitondeska yayi ‘kuŵala nga ni miliko’? (b) Pakughanaghanira mazgu gha Yesu agho ghali pa Mateyu 5:14-16, kasi tiwonenge vichi?

² Ŵanthu ŵa Yehova pa charu chose ŵakuyowoya viyowoyero vyakupambanapambana. Ndipouli ichi chikutitondeska yayi kulumba Adada ŵithu, a Yehova, mwakukolerana. (Chivu. 7:9) Kwali tikuyowoya chiyowoyero wuli panji tikukhala nkhu, tingaŵala “nga ni miliko mu charu.”—Fil. 2:15.

³ Yehova wakupika uchindami chifukwa cha uteŵeti withu, kukolerana kwithu, ndiposo chifukwa chakuti tikuŵa maso. Kasi  tingaŵaliska wuli uchindami mu vigaŵa vitatu ivi?—Ŵerengani Mateyu 5:14-16.

4, 5. (a) Kasi pali nthowa zinyake izo tingaŵaliskira ungweru padera pa kupharazga? Longosorani. (b) Kasi pangaŵa uwemi wuli para tili ŵalusungu pakupharazga? (Wonani chithuzi chakwamba.)

⁴ “Palije uyo wangaŵa wakugomezgeka ndiposo munenesko kwa Fumu mu mazuŵa ghaumaliro agha . . . pekha usange wangajipeleka kuti waŵaliske ungweru.” Fundo iyi yili mu nkhani yakuti “Ungweru mu Mdima,” (Light in the Darkness) iyo yikalembeka mu Gongwe la Mulinda la Chingelezi la Juni 1, 1925. Nkhani iyi yikalongosora kuti: “Munthu wangaŵaliska ungweru para wakupharazgira ŵanthu makani ghawemi, ndiposo para milimo yake yikukolerana na ungweru.” Ntchakuwonekerathu kuti nthowa yimoza yakuŵaliskira ungweru nkhupharazga makani ghawemi na kuzgora ŵanthu kuŵa ŵasambiri. (Mat. 28:19, 20) Kweniso nkharo yithu yingapangiska kuti Yehova wapike uchindami. Ŵazengezgani na ŵanthu ŵanyake ŵakuwona nkharo yithu. Para tikumwemwetera na kuŵatawuzga mwaubwezi tikulongora umo tiliri ndiposo Chiuta uyo tikusopa.

⁵ Yesu wakaphalira ŵasambiri ŵake kuti: “Para mukunjira mu nyumba, tawuzgani mweneko wa nyumba.” (Mat. 10:12) Ku malo agho Yesu na ŵasambiri ŵake ŵakatemwanga kupharazga, ŵanthu ŵakatemwanga kunjizga ŵalendo mu nyumba zawo. Mazuŵa ghano ndimo viliri yayi ku malo ghanandi. Kanandi ŵanthu ŵakuŵa na wofi panji ŵakukwenyelera para ŵawona munthu wachilendo wali pa nyumba yawo. Kweni para tingaŵa ŵaubwezi ndiposo ŵalusungu, ŵangamba kufwatuka. Kumwemwetera ni nthowa yiwemi yakwambira kuyowoya na munthu. Kumwemwetera kukovwiraso para ŵabali na ŵadumbu ŵakupharazga na kashelufu ka matayala ku malo agho kukusangika ŵanthu ŵanandi. Pakuchita upharazgi uwu, mungawona kuti kanandi ŵanthu ŵakukopeka para tamwemwetera na kuŵatawuzga. Ŵangakopeka kuti ŵize na kutorapo mabuku ghithu. Kweniso mungamba kudumbirana para mungachita vinthu mwalusungu.

6. Kasi banja linyake likasazgirako wuli uteŵeti?

⁶ Mubali na muwoli wake ku England awo mbachekuru, ŵakulwaralwara ndipo ŵakutondeka kupharazga nyumba na nyumba. Ŵakawona kuti ntchiwemi ŵapharazgenge pawaro pa nyumba yawo kuti ŵaŵaliske ungweru. Ŵakuŵika mabuku ghakulongosora Baibolo pa thebulu, pa nyengo iyo ŵapapi ŵakuzakatora ŵana ŵawo pa sukulu iyo yili pafupi na nyumba yawo. Ivi vyawovwira kuti ŵanandi ŵatorepo mabuku gha Mayankho a Zimene Achinyamata Amafunsa—Buku Loyamba na Buku Lachiwiri, kweniso maburosha. Mudumbu munyake uyo ni mupayiniya wakamba kupharazgira nawo lumoza. Ŵapapi aŵa ŵakawonanga kuti mupayiniya uyu ngwamasangulusko kweniso kuti banja ili likakhumbanga kuŵawovwira nadi. Ivi vikawovwira kuti mupapi munyake wambe kusambira Baibolo.

7. Kasi mungawovwira wuli ŵanthu awo ŵafuma mu vyaru vinyake?

⁷ Mu vyaka vyasonosono, vyaru vinandi vili na ŵanthu ŵanandi awo ŵali kuchimbira kwawo. Kasi mungachita wuli kuti movwire ŵanthu aŵa kuti ŵamanye Yehova na khumbo lake? Chakwamba, sambirani umo mungaŵatawuzgira mu chiyowoyero chawo. JW Language app yingamovwirani kuti musambire. Mwalekerachi kusambira mazgu ghachoko waka agho ghangawovwira kuti ŵanweke? Mungaŵalongora mavidiyo na mabuku gha chiyowoyero chawo pa jw.org.—Doto. 10:19.

8, 9. (a) Kasi ni ulongozgi wuli wakovwira uwo tikupokera pa ungano wa Uteŵeti na Umoyo Wachikhristu? (b) Kasi ŵapapi ŵangawovwira wuli ŵana ŵawo kuti ŵazgorengepo pa maungano?

 ⁸ Yehova watipa ungano wa Uteŵeti na Umoyo Wachikhristu kuti utovwire kupharazga mwaluso. Ulongozgi uwo tikupokera pa ungano uwu ukutovwira kuti tiŵe ŵachikanga pakuwelerako ku ŵanthu awo tikaŵapharazgirapo na kwamba kuŵasambizga Baibolo.

⁹ Ŵaphya awo ŵakwiza ku maungano ghithu ŵakuwona kuti ŵana ŵithu ŵakuzgorapo pa maungano. Ŵapapi, wovwirani ŵana ŵinu kuti ŵaŵaliske ungweru. Mungachita nthena, para mukuŵasambizga kuti ŵazgorenge mu mazgu ghawo na ghawo. Mazgoro ghawo ghapusu kweniso ghakufumira pasi pa mtima ghawovwira ŵanyake kuti ŵasambire unenesko.—1 Kor. 14:25.

10. Kasi kusopa kwa mbumba kukovwira wuli kuti tiŵe ŵakukolerana?

¹⁰ Nthowa yinyake iyo tingaŵaliskira ungweru nkhuŵa ŵakukolerana mu banja na mu mpingo. Nthowa yimoza iyo ŵapapi ŵangachitira nthena nkhuŵa na ndondomeko ya Kusopa kwa Mbumba nyengo zose. Ŵanandi ŵakutemwa kuwonelera JW Broadcasting. Para mwawonelera, dumbiskanani fundo zinyake izo zanguŵa mu pulogiramu. Pa nyengo yakusopera ya mbumba, ŵapapi ŵakwenera kukumbuka kuti ulongozgi uwo mwana muchoko wangakhumbikwira ungapambana na uwo muwukirano wangakhumbikwira. Chitani vyose ivyo mungafiska kuti movwire waliyose mu banja linu kuti wasange chandulo.—Sal. 148:12, 13.

11-13. Kasi mungachita wuli kuti mu mpingo muŵe ŵakukolerana na kovwira ŵanji kuti ŵaŵaliske ungweru?

¹¹ Kasi ŵawukirano ŵangachita wuli kuti tiŵe ŵakukolerana mu mpingo na kuchiska ŵanji kuti ŵaŵaliske ungweru? Para ndimwe muwukirano, chezgani na Ŵakhristu awo mbachekuru. Mungaŵafumba ivyo vyaŵachitikira mu vyaka vyose ivyo ŵateŵetera Yehova. Para muchitenge nthena mose mukhozgekenge, ndipo mulutilirenge kuŵaliska ungweru. Tose tikwenera kuŵa ŵakunozgeka kupokelera awo ŵakwiza ku maungano ghithu pa Nyumba ya Ufumu. Para tichitenge nthena tiŵenge ŵakukolerana ndipo ŵalendo nawo ŵangakhumba kuŵaliska ungweru. Mungaŵatawuzga ŵalendo mwachimwemwe, panji kovwira ŵaphya kusanga malo ghakukhala. Ŵawovwirani kuti ŵamanyane na ŵabali mu mpingo. Ivi vingawovwira kuti ŵafwatuke.

¹² Para mukuchitiska ungano wakunozgekera  uteŵeti mungachita vinandi kuti movwire Ŵakhristu ŵachekuru kuti nawo ŵapharazgenge. Kasi ŵali na chigaŵa chakupharazgako? Nyengo zinyake mungaŵagaŵira muwukirano kuti wende nawo mu uteŵeti na kuŵawovwira. Kweniso mungalongora kuti mukughanaghanira awo ŵakusuzgikira mu thupi ndipo ŵakutondeka kupharazga. Para mukughanaghanira ŵanji na kuchita mwamahara mungawovwira ŵawukirano na ŵachekuru, ŵapharazgi awo ŵateŵetera nyengo yitali na awo ŵamba sono, kuti ŵalimbikirenge kupharazga makani ghawemi.—Lev. 19:32.

¹³ Wamasalimo wakalemba kuti: “Ntchiwemi na chakukondweska nadi kuti ŵabali ŵakukhala pamoza mwakukolerana!” (Ŵerengani Salimo 133:1, 2.) Ŵaisrayeli ŵakapinduranga chomene para ŵakusopera lumoza na ŵanyawo awo ŵakateŵeteranga Yehova. Vikaŵa nga ni mafuta ghawemi na ghakununkhira makora. Mwakuyana waka, tingakhozga ŵabali na ŵadumbu para tikuŵaghanaghanira kweniso tili ŵalusungu. Ichi chikovwira kuti tiŵe ŵakukolerana mu mpingo. Kasi ‘mungasanuzga’ chitemwa chinu kuti mumanye makora ŵabali mu mpingo?—2 Kor. 6:11-13, mazgu ghamusi.

14. Kasi mungachita wuli kuti muŵaliske ungweru ku ŵazengezgani ŵinu?

¹⁴ Kasi mungachita wuli kuti muŵaliske ungweru wa mu Baibolo ku ŵazengezgani ŵinu? Mazgu ghinu ghalusungu na vyakuchita vinu vingakopa mzengezgani winu kuti wamanye unenesko. Jifumbani kuti: ‘Kasi ŵazengezgani ŵane ŵakuniwona wuli? Kasi pa nyumba yane nkhupwelelerapo na kuŵika makora vinthu? Kasi ŵanthu ŵakuti pa nyumba pane pakuwoneka wuli? Kasi nkhuŵa wakunozgeka kovwira ŵanji?’ Para mukuchezga na Ŵakaboni ŵanyinu, ŵafumbani umo lusungu lwawo ndiposo nkharo yawo yiwemi vyakhwaskira ŵabali ŵawo, ŵazengezgani ŵawo, awo ŵakugwira nawo ntchito, panji ŵanyawo ku sukulu. Ntchakuwonekerathu kuti ŵamuphaliraninge vinthu vyakukondweska.—Efe. 5:9.

15. Chifukwa wuli ntchakuzirwa kuŵa maso?

¹⁵ Para tikukhumba kuti tilutilire kuŵaliska ungweru, tikwenera kumanya nyengo iyo tilimo. Yesu wakachenjezga ŵasambiri ŵake mwakuwerezgawerezga kuti: “Muŵenge maso.” (Mat. 24:42; 25:13; 26:41) Para tikugomezga kuti “suzgo yikuru” yili kutali chomene, panji kuti yizenge kweni mu nyengo yithu yayi, tiŵenge maso yayi kovwira ŵanji kumanya unenesko wakukhwaskana na Yehova pa mpata uliwose uwo wasangika. (Mat. 24:21) M’malo mwa kuŵala chomene, ungweru withu umarenge pachoko na pachoko na kuzimwirathu.

16, 17. Kasi tingachita wuli kuti tilutilire kuŵa maso?

¹⁶ Apo vinthu vikulutilira kuhenipa mu mazuŵa ghaumaliro agha, tose tikwenera kulutilira kuŵa maso. Tikukayika yayi kuti para Yehova wakuzakachitapo kanthu, yizamuŵa nyengo yakwenelera nadi. (Mat. 24:42-44) Pa nyengo yasono tikwenera kuŵa maso chomene ndiposo ŵakuzika. Ŵazgani Mazgu gha Chiuta zuŵa lililose, ndipo muŵe maso pa nkhani ya kulomba. (1 Pet. 4:7) Sambirani ku ŵabali na ŵadumbu awo ŵakalutilira kuŵa maso na kuŵaliska ungweru. Chiyelezgero chimoza chili mu nkhani yakulongosora umoyo wa munthu ya mutu wakuti “Nakora Salu ya Muyuda kwa Vilimika 70,” iyo yili kulembeka mu Gongwe la Mulinda la Epulero 15, 2012, peji 18-21.

¹⁷ Tangwanikani na kuteŵetera Yehova. Chitirani ŵanji lusungu, ndipo chezgani na ŵabali na ŵadumbu. Muŵenge ŵakukondwa chomene, ndipo muwonenge kuti nyengo yikwenda mwaluŵiro. (Efe. 5:16) Vyaka 100 ivyo vyajumpha, ŵabali ŵakatangwanika chomene na uteŵeti ndipo ŵakachita vinandi. Kweni mazuŵa ghano tikuchita vinandi chomene ndipo Yehova wakutilongozga.  Tikuŵaliska chomene ungweru kuluska umo tikaghanaghaniranga.

18, 19. Kasi ŵalara ŵa mpingo ŵangatovwira wuli kuti tiŵe ŵakukhora kweniso ŵamwamphu? Yowoyani chiyelezgero.

¹⁸ Tikukhozgeka chomene kumanya kuti nangauli tili ŵambura kufikapo kweni tikuteŵetera Yehova munthowa yakuzomerezgeka. Kuti Yehova watovwire, watipa “vyawanangwa mu ŵanthu,” awo mbabali ŵalara mu mpingo. (Ŵerengani Ŵaefeso 4:8, 11, 12.) Para ŵalara ŵazakamwenderani, muzakawone kuti ni mwaŵi wakuti musambireko ku vinjeru vyawo na ulongozgi wawo.

¹⁹ Ŵalara ŵaŵiri ku England ŵakendera banja linyake ilo likaŵa na masuzgo mu nthengwa. Muwoli wakawona kuti mfumu wake wakulongozga yayi pa vinthu vyauzimu. Mfumu wake wakazomera kuti wakaŵa msambizgi muwemi yayi ndipo wakaŵavya ndondomeko yakuti ŵaŵenge na kusopa kwa mbumba nyengo zose. Ŵalara ŵakaŵaphalira kuti ŵaghanaghanire chiyelezgero cha Yesu. Yesu wakapweleleranga ŵasambiri ŵake na kuŵapa vyakukhumbikwa. Ŵalara ŵakachiska mfumu kuti wayezge Yesu. Ŵakachiska muwoli kuti waŵe wakuzikira. Ŵakasachizgaso umo ŵangachitira kuti nyengo zose ŵaŵenge na kusopa kwa mbumba pamoza na ŵana ŵawo ŵaŵiri. (Efe. 5:21-29) Pamanyuma ŵalara ŵakawonga mubali pa ivyo wakuyezgayezga kuchita. Ŵakamuchiska kuti walutilire kuchita makora ndipo wagomezgenge mzimu utuŵa kuti umovwirenge kuchita makora mulimo wake pakuŵa mutu wa banja. Chitemwa na lusungu ulo ŵalara ŵakalongora vikawovwira mbumba iyi kuti yiŵaliske ungweru.

20. Kasi paŵenge viwemi wuli para muŵaliskenge ungweru?

²⁰ Wamasalimo wakimba kuti: “Ngwakukondwa waliyose uyo wakopa Yehova. Uyo wakwenda mu nthowa zake.” (Sal. 128:1) Para mukovwira ŵanji kuteŵetera Chiuta, muli na nkharo iyo yikovwira kuti muŵe ŵakukolerana, na kulutilira kuŵa maso, ndikuti mukuŵaliska ungweru ndipo mukondwenge chomene. Ŵanji ŵawonenge milimo yinu yiwemi, ndipo ŵanandi ŵakhumbenge kupeleka uchindami kwa Adada ŵithu ŵakuchanya.—Mat. 5:16.