1. Kuyana na Ŵakolose 2:4, 8, kasi Satana wakuchita wuli kuti watikore wuzga?

SATANA wakukhumba kuti tigalukire Yehova. Kuti wafiske ivyo wakukhumba, wakunanga maghanoghano ghithu kuti watikore tiŵe ŵazga ŵake na kwamba kupulikira iyo. Wakutipusika na vinthu vyakukopa mwakuti timulondezge.—Ŵazgani Ŵakolose 2:4, 8.

2-3. (a) Chifukwa wuli tikwenera kuŵikako mahara ku chenjezgo ilo lili pa Ŵakolose 2:8? (b) Kasi tiwonenge vichi mu nkhani iyi?

² Kasi nase tingapuluskika na Satana? Enya. Kumbukani kuti chenjezgo ilo lili pa Ŵakolose 2:8, Paulosi wakalembera ŵanthu ŵambura kugomezga yayi. Kweni wakalembera Ŵakhristu ŵakuphakazgika na mzimu utuŵa. (Kol. 1:2, 5) Panyengo iyi Ŵakhristu aŵa ŵakaŵa pangozi, ndipo ise mazuŵa ghano ndise tili pangozi chomene. (1 Kor. 10:12) Chifukwa wuli? Chifukwa ntchakuti Satana wali kuchimbizgikira pano pasi, ndipo waŵikapo mtima kuti wapuluske ŵateŵeti ŵakugomezgeka ŵa Chiuta. (Chivu. 12:9, 12, 17) Kweniso tili mu mazuŵa ghaumaliro apo ŵanthu ŵaheni na ŵakupusika ŵakulutilira “kuŵa ŵaheni.”—2 Tim. 3:1, 13.

³ Mu nkhani iyi, tiwonenge umo Satana wakugwiliskira ntchito “upusikizgi wawaka” kuti wanange maghanoghano ghithu. Tiwonenge “mauryarya” panji “njomba” zake zitatu izo wakupusikira ŵanthu. (Efe. 6:11; mazgu ghamusi) Mu nkhani yakulondezgapo, tizamuwona umo tingachitira kuti tiwuskemo maghanoghano ghalighose agho ghali kunangika na mauryarya  ghake. Kweni chakwamba tiyeni tiwone umo Satana wakapuluskira Ŵaisrayeli ŵati ŵanjira mu Charu cha Layizgano na kuwona ivyo tingasambirako.

4-6. Kuyana na Dotoronome 11:10-15, kasi Ŵaisrayeli ŵakeneranga kusambira vichi ŵati ŵanjira mu Charu cha Layizgano?

⁴ Satana wakayezga Ŵaisrayeli kuti ŵasope vikozgo. Kasi wakachita wuli? Wakasangirapo mwaŵi pa nkhani ya chakurya. Ŵaisrayeli ŵati ŵanjira mu Charu cha Layizgano, ŵakeneranga kusintha nthowa zawo zakalimiro. Apo ŵakaŵa ku Eguputo, Ŵaisrayeli ŵakathiliranga minda yawo na maji ghakufuma mu Mlonga wa Nayelo. Kweni mu Charu cha Layizgano mukaŵavya mlonga ukuru, ntheura kuti ŵalime vyakurya ŵakakhumbikwiranga maji gha vula na majumi. (Ŵazgani Dotoronome 11:10-15; Yes. 18:4, 5) Ntheura Ŵaisrayeli ŵakeneranga kusambira nthowa ziphya zakalimiro. Kweni ichi chikaŵa chipusu yayi chifukwa ŵanandi awo ŵakamanyanga vyaulimi ŵakaŵa kuti ŵafwira mu mapopa.

⁵ Yehova wakaŵalongosolera ŵanthu ŵake kuti sono vinthu vyasintha. Pamanyuma wakaŵaphaliraso chenjezgo ilo pakwamba likawonekanga nga likukolerana viŵi yayi na nkhani ya ulimi. Wakati: “Muchenjere kuti muleke kunyengeka na kupuluka mu mitima yinu na kwamba kusopa ŵachiuta ŵanyake na kuŵasindamira.” (Doto. 11:16, 17) Chifukwa wuli wakaŵachenjezga za kusopa ŵachiuta ŵatesi panyengo iyo wakaŵaphaliranga za kusambira nthowa ziphya zakalimiro?

⁶ Yehova wakamanya kuti Ŵaisrayeli ŵakhumbenge kusambira nthowa zinyake zakalimiro ku ŵanthu awo ŵakaŵazingilizga awo ŵakasopanga vikozgo. Mbunenesko kuti ŵanthu aŵa ŵakamanyanga vinandi pa nkhani ya ulimi, ndipo ŵanthu ŵa Chiuta ŵakaŵa  kuti ŵangasambirako maluso ghakuzirwa, kweni ŵanthu aŵa ŵakaŵa ŵawemi yayi. Maghanoghano gha Ŵakenani aŵa ghakaŵa ghaheni chifukwa ŵakasopanga Baala. Ŵakagomezganga kuti Baala ndiyo wakalenga kuchanya kweniso ndiyo wakaŵapanga vula. Yehova wakakhumbanga yayi kuti ŵanthu ŵake ŵapusikike na vigomezgo ivi. Kweni mwakuwerezgawerezga Ŵaisrayeli ŵakasopa Baala. (Maŵa. 25:3, 5; Ŵeru. 2:13; 1 Mathe. 18:18) Sono wonani umo Satana wakakolera Ŵaisrayeli kuŵa ŵazga ŵake.

7. Kasi Ŵaisrayeli ŵakayezgeka wuli ŵati ŵanjira mu Charu cha Layizgano?

⁷ Nthowa yakwamba iyo Satana wakakolera Ŵaisrayeli ni makhumbiro ghawo ghakawiro. Iwo ŵakakhumbanga kuti vula yilokwe. Kweni mu Charu cha Layizgano, kwamba cha kuumaliro kwa Epulero m’paka Seputembala kukaŵanga vula yichoko. Kuti Ŵaisrayeli ŵaŵe na umoyo uwemi kweniso vyakurya vinandi, ŵakathembanga vula iyo kanandi yikambanga kulokwa cha mu Okutobala. Satana wakapusika Ŵaisrayeli kugomezga kuti vinthu vingaŵayendera makora usange ŵangatolera maluso gha ŵanthu awo ŵakasopanga vikozgo. Ŵanthu aŵa ŵakagomezganga kuti ŵakeneranga kuchita tumaluso tunyake twakukhwaskana na kusopa kuti ŵachiuta ŵawo ŵaŵalokweskere vula. Ŵaisrayeli awo ŵakaŵa na chipulikano chichoko mwa Yehova ŵakagomezga kuti iyi yikaŵa nthowa yekha iyo yingawovwira kuti kuleke kuŵa chilangalanga. Ntheura ŵakamba kuchitako tumaluso twa ŵanthu aŵa, kuchindika Baala, chiuta wautesi.

8. Kasi ni nthowa wuli yachiŵiri iyo Satana wakakolera Ŵaisrayeli? Longosorani.

⁸ Nthowa yachiŵiri iyo Satana wakakolera Ŵaisrayeli ni makhumbiro ghaheni ghakugonana. Ŵamitundu pakusopa ŵachiuta ŵawo ŵakachitangaso vinthu vyaunyankhasi. Ŵakaŵangaso na mahule ghanalume na ghanakazi pa tempile. Ŵanthu ŵamitundu aŵa ŵakawonanga kuti ntchiwemi waka kuti ŵanalume na ŵanakazi ŵagonanenge ŵekhaŵekha na kuchita mitundu yinyake ya kugonana. (Doto. 23:17, 18; 1 Mathe. 14:24) Ŵanthu aŵa ŵakagomezganga kuti para ŵakusopa nthena, ŵachiuta ŵawo ŵapangiskenge charu kuŵa chavundira. Ŵaisrayeli ŵanandi ŵakakopeka, ndipo ivi vikapangiska kuti ŵambe kusopa ŵachiuta ŵatesi. Kweni unenesko ukaŵa wakuti Satana wakaŵakora kuŵa ŵazga ŵake.

9. Kuyana na lemba la Hoseya 2:16, 17, kasi Satana wakachita wuli kuti Ŵaisrayeli ŵamuluwe Yehova?

⁹ Nthowa yachitatu iyo Satana wakakolera Ŵaisrayeli njakuti wakaŵaluwiska zina la Yehova. Mu nyengo ya ntchimi Yeremiya, Yehova wakayowoya kuti ntchimi zitesi zikaluwiska ŵanthu zina lake “chifukwa cha Baala.” (Yer. 23:27) Vikuwoneka kuti ŵanthu ŵa Chiuta ŵakaleka kuzunura zina la Yehova ndipo ŵakamba kuchema zina la Baala, ilo likang’anamuranga “Mwenecho” panji “Fumu.” Ntheura chikaŵa chakusuzga ku Ŵaisrayeli kumanya mphambano pakati pa Yehova na Baala, kweni chikaŵa chipusu kwa iwo kusopa Baala na Yehova.—Ŵazgani Hoseya 2:16, 17 na mazgu ghamusi.

10. Kasi ni njomba wuli izo Satana wakupuluskira ŵanthu mazuŵa ghano?

¹⁰ Nthowa zenezizi izi ndizo Satana wakupuluskiraso ŵanthu mazuŵa ghano. Wakuŵakora ŵanthu kuŵa ŵazga ŵake kwizira mu makhumbiro ghawo ghakawiro, makhumbiro ghaheni ghakugonana, na kuŵatondeska kumanya zina la Yehova. Tiyeni tiwone nthowa yakwamba.

11. Kasi Satana wachita wuli kuti ŵanthu ŵaleke kumumanya makora Yehova?

 ¹¹ Satana wakutondeska ŵanthu kumanya Yehova. Ŵapositole ŵa Yesu ŵakati ŵafwa, ŵanthu ŵanyake awo ŵakatenge Mbakhristu ŵakamba kuthandazga visambizgo vyautesi. (Mil. 20:29, 30; 2 Tes. 2:3) Ŵanthu ŵakugaluka aŵa ŵakamba kutimbanizga unenesko wakukhwaskana na Chiuta. Mwachiyelezgero, ŵakawuskamo zina la Chiuta mu Mabaibolo ghawo na kuŵikamo zina lakuti “Fumu.” Ŵakati ŵawuskamo zina la Chiuta na kuŵikamo lakuti “Fumu” chikaŵa chakusuzga ku awo ŵakaŵerenganga Baibolo kumanya kuti Yehova wakupambana na mafumu ghanyake agho ghakuzunulika mu Malemba. (1 Kor. 8:5) Yehova na Yesu, wose ŵakaŵachemanga kuti “Fumu.” Ntheura chikaŵa chakusuzga kumanya kuti Yehova na Yesu mbakupambana. (Yoh. 17:3) Nthimbanizgo iyi yikapangiska kuti paŵe chisambizgo cha Utatu, chisambizgo icho mu Mazgu gha Chiuta mulije. Chifukwa cha vyose ivi, ŵanthu ŵakugomezga kuti ntchambura machitiko kumumanya Chiuta. Kweni uwu mbutesi.—Mil. 17:27.

12. Kasi chisopa chautesi chikukhuŵilizga vichi? Kuyana na lemba la Ŵaroma 1:28-31, kasi chachitika ntchivichi?

¹² Satana wakupuluskaso ŵanthu kwizira mu makhumbiro ghaheni ghakugonana. Mu nyengo ya Ŵaisrayeli, Satana wakagwiliskira ntchito chisopa chautesi kuti wakhuŵilizge ŵanthu kuchita uzaghali. Mazuŵa ghano napo ndimo wakuchitira. Chisopa chautesi chikuzomerezga na kukhuŵilizga ŵanthu kuti ŵachitenge uzaghali. Ntheura ŵanandi awo ŵakuti ŵakuteŵetera Chiuta ŵali kulekerathu kulondezga fundo za Chiuta pa nkhani iyi. Mu kalata yake iyo wakalembera Ŵaroma, mpositole Paulosi wali kulongosora ivyo vyachitika. (Ŵazgani Ŵaroma 1:28-31.) Vinyake mwa “vinthu vyambura kwenelera” ni kugonana kwa mtundu uliwose, kusazgapo kugonana kwa ŵanalume panji ŵanakazi ŵekhaŵekha. (Rom. 1:24-27, 32; Chivu. 2:20) Ntheura ntchakuzirwa chomene kuti tipulikirenge ivyo Baibolo likusambizga pa nkhani iyi.

13. Kasi ni njomba wuli yinyake iyo Satana wakupuluskira ŵanthu?

¹³ Satana wakupuluskaso ŵanthu kwizira mu makhumbiro ghawo ghakawiro. Mwakawiro, tose tikukhumba kusambira maluso agho ghangatovwira kuti tisange vyakukhumbikwa pamoza na mbumba zithu. (1 Tim. 5:8) Kanandi  tingaŵa na maluso agha para tingaluta ku sukulu na kuŵikapo mtima kusambira. Kweni tikwenera kuchenjera. Mu vyaru vinandi ŵana ŵakusambira maluso ghakuzirwa ku sukulu, kweni ŵakusambiraso vinjeru vya charu ichi. Ŵana ŵakukhuŵilizgika kuti ŵakayikirenge kuti Chiuta waliko kweniso ŵangaligomezganga yayi Baibolo. Ŵakuphalirika kuti ŵanthu wose awo mbamahara ŵakugomezga kuti vinthu vikachita kusintha kufuma ku vinyake. (Rom. 1:21-23) Visambizgo ivi vikususkana na ‘vinjeru vya Chiuta.—1 Kor. 1:19-21; 3:18-20.

14. Kasi vinjeru vya charu vikukhuŵilizga vichi?

¹⁴ Vinjeru vya charu vikususka fundo za urunji za Yehova. Vikovwira yayi kuti munthu waŵe na vipambi vya mzimu, m’malo mwake vikupangiska munthu kuchita “milimo ya thupi.” (Gal. 5:19-23) Vikukhuŵilizga ŵanthu kuŵa ŵakujikuzga kweniso “ŵakujitemwa.” (2 Tim. 3:2-4) Mikhaliro iyi yikupambana chomene na nkharo yakujiyuyura iyo Chiuta wakukhumba kuti ŵateŵeti ŵake ŵaŵe nayo. (2 Sam. 22:28) Ŵakhristu ŵanyake awo ŵali kuluta ku yunivesite ŵali kutolera maghanoghano gha charu m’malo mwa kutolera maghanoghano gha Chiuta. Tiyeni tiwone chiyelezgero chimoza icho chingatovwira kumanya ivyo vingachitika usange nase tingakhumba masambiro ghapachanya.

15-16. Kasi tikusambirako vichi ku ivyo vikachitikira mudumbu munyake?

¹⁵ Mudumbu munyake uyo wachita uteŵeti wanyengozose vyaka vyakujumpha 15 wakuti: “Pakuŵa Kaboni wakubatizika, nkhamanyanga uheni wakuluta ku yunivesite, kweni nkhasulako waka machenjezgo agha. Nkhaghanaghananga kuti ulongozgi uwu ukunikhwaska yayi.” Kasi wakakumana na masuzgo wuli chifukwa  cha kuluta ku yunivesite? Iyo wakutiso: “Masambiro agha ghakanimaliranga nyengo yinandi na nkhongono zane. Nkhatangwanikanga chomene mwakuti nkhaŵanga na nyengo yichoko chomene yakulombera kwa Yehova. Chifukwa chakuti nkhavukanga chomene, nkhatondekanga kusambira Baibolo pamoza na ŵanyane na kunozgekera makora maungano gha mpingo. Nkhati namanya kuti masambiro ghapachanya agha ghakunanga ubwezi wane na Yehova, nkhawona kuti nkhwenera kughaleka. Ndipo nkhaghaleka nadi.”

¹⁶ Kasi masambiro ghapachanya agha ghakananga wuli maghanoghano ghake? Iyo wakuti: “Masambiro agha ghakanipangiska kuti niŵikenge chomene mtima pa maubudi gha ŵanji, chomenechomene ŵabali na ŵadumbu, ndipo nkhakhazganga vinandi kwa iwo. Kweniso nkhajipaturanga. Ndipo vikanitolera nyengo yitali kuti nileke kuŵa na maghanoghano agha. Ivyo vikanichitikira vikanovwira kumanya kuti ntchakofya chomene kusulako machenjezgo agho Yehova wakutipa kwizira mu gulu lake. Yehova wakanimanyanga makora kuluska umo namweneko nkhajimanyiranga. Nipulikirenge mphanyi vyose ivi vikanichitikira yayi.”

17. (a) Kasi tikwenera kuŵikapo mtima kuchita vichi? (b) Kasi nkhani yakulondezgapo yizamulongosora vichi?

¹⁷ Ŵikanipo mtima kuti muleke kukoleka wuzga “kwizira mu vinjeru vya charu na upusikizgi wawaka” wa charu cha Satana ichi. Lutilirani kuŵa maso na njomba za Satana. (1 Kor. 3:18; 2 Kor. 2:11) Mungazomerezganga yayi kuti Satana wamuluwiskani zina la Yehova kweniso umo mukwenera kumusopera. Pulikirani fundo zaurunji za Yehova. Kweniso kumuzomerezga yayi Satana kuti wamupusikani kuti musuleko ulongozgi wa Yehova. Kweni wuli usange mwamanya kuti maghanoghano ghinu ghali kunangika kale na charu ichi? Nkhani yakulondezgapo yizamulongosora umo Mazgu gha Chiuta ghangatovwilira kugadabura maghanoghano na vizgoŵi nanga vingaŵa kuti vyakhomelera “chomene.”—2 Kor. 10:4, 5.