NKHANI YAKUSAMBIRA 25
Gomezgani Yehova Para Mukusuzgika Maghanoghano
‘Nili mu suzgo yikuru chomene.’—1 SAM. 1:15.
SUMU 30 Dada Wane, Chiuta Wane na Mubwezi Wane
CHILATO CHA NKHANI IYI *
1. Chifukwa wuli tikwenera kupulikira chenjezgo la Yesu?
MU UCHIMI wake wakuyowoya vya mazuŵa ghaumaliro, Yesu wakati: “Muŵe maso, mitima yinu yileke kutangwanika na . . . vyenjezgo vya umoyo.” (Luka 21:34) Tikwenera kupulikira chenjezgo ili. Chifukwa wuli? Chifukwa ntchakuti nase tikusangana na masuzgo ghakuyana waka, ndipo waliyose wakusangana nagho masuzgo agha.
2. Kasi ni masuzgo wuli agho ŵabali na ŵadumbu ŵithu ŵakukumana nagho?
2 Nyengo zinyake, tikukumana na masuzgo ghanandi panyengo yimoza. Wonani ivyo vikachitikira ŵanthu aŵa. Kaboni munyake zina lake John, * uyo wakulwara nthenda yakukoma viŵaro, chitima chikamukora apo muwoli wake wakamuchimbira ŵati ŵakhala mu nthengwa vyaka 19. Pamanyuma, ŵana ŵake ŵaŵiri ŵasungwana ŵakaleka kuteŵetera Yehova. Bob na Linda awo mbakutorana, ŵakakumana na masuzgo ghakupambanako na John. Wose ntchito yikaŵamalira, ndipo ŵakaŵachimbizga pa nyumba chifukwa ŵakakwaniskanga yayi kupeleka lenti. Pamanyuma Linda wakasangika na nthenda ya mtima, kweniso wakakoleka na nthenda yinyake iyo yikamba kuchepeska chivikiliro cha mu thupi lake.
3. Kasi lemba la Ŵafilipi 4:6, 7, likutiphalira vichi za Yehova?
3 Tikugomezga kuti Yehova uyo ni Mlengi withu na Dada withu wachitemwa, wakumanya umo tikujipulikira para tikusuzgika maghanoghano. Ndipo wakukhumba kutovwira kuti tizizipizge masuzgo agho tikukumana nagho. (Ŵazgani Ŵafilipi 4:6, 7.) Mu Baibolo muli nkhani zinandi izo zikulongosora masuzgo agho ŵateŵeti ŵa Chiuta ŵakakumana nagho. Kweniso likutiphalira umo Yehova wakaŵawovwilira kuti ŵazizipizge. Tiyeni tiwonepo viyelezgero vichoko waka.
ELIYA “WAKAŴA MUNTHU NGA NDISE”
4. Kasi Eliya wakakumana na masuzgo wuli, ndipo wakachita wuli?
4 Eliya wakateŵeteranga Yehova mu nyengo yakusuzga, ndipo wakakumana na masuzgo ghakuru. Themba Ahabu, uyo wakaŵa yumoza wa mathemba ghambura kugomezgeka mu Israyeli, wakatora Yezebeli uyo wakaŵa muheni chomene kweniso wakasopanga Baala. Ŵanthu ŵaŵiri aŵa ŵakakhuŵilizga ŵanthu kusopa Baala, ndipo ŵakakoma ntchimi zinandi za Yehova. Eliya wakapona. Kweniso pa nyengo iyo kukaŵa njara yikuru, Eliya wakapona chifukwa chakuti wakathemba Yehova. (1 Mathe. 17:2-4, 14-16) Eliya wakagomezgaso Yehova apo wakasuskanga ntchimi zitesi na ŵanthu ŵanyake awo ŵakasopanga Baala. Wakachiska Ŵaisrayeli kuteŵetera Yehova. (1 Mathe. 18:21-24, 36-38) Eliya wakaŵa na ukaboni wakukwana kuti Yehova wakamovwiranga pa nyengo zakusuzga izi.
Yehova wakatuma mungelo kuti wawovwire Eliya kuti waŵeso na nkhongono (Wonani ndime 5-6) *
5-6. Kuyana na 1 Mathemba 19:1-4, kasi Eliya wakajipulika wuli, ndipo Yehova wakalongora wuli kuti wakamutemwanga?
5 Ŵazgani 1 Mathemba 19:1-4. Ndipouli, Eliya wakawopa chomene apo Fumukazi Yezebeli yikamofya kuti yimukomenge. Ntheura wakachimbilira ku Beyere-sheba. Nkhongono zikamumalira mwakuti “wakapempha kuti wafwe waka.” Chifukwa wuli wakajipulika nthena? Eliya wakaŵa wambura kufikapo, “wakaŵa munthu nga ndise.” (Yak. 5:17) Panji wakajipulika nthena chifukwa chakuti wakasuzgika maghanoghano kweniso wakavuka chomene. Panji wakaghanaghananga kuti vyose ivyo wakachita pakovwira ŵanthu kuti ŵambeso kusopa Yehova vikawa pawaka. Kweniso wakaghanaghananga kuti palije waliyose mu Israyeli uyo wasintha, ndipo wakawonanga kuti wakhala yekha uyo wakuteŵetera Yehova. (1 Mathe. 18:3, 4, 13; 19:10, 14) Nyengo zinyake tingazizwa kuti ntchimi yakugomezgeka iyi yikajipulika nthena. Kweni Yehova wakamupulikiska Eliya.
6 Yehova wakamukalipira yayi Eliya chifukwa cha kuyowoya umo wakajipulikiranga. M’malo mwake, wakamovwira kuti waŵeso na nkhongono. (1 Mathe. 19:5-7) Pamanyuma, Yehova wakamovwira mwalusungu Eliya kuti wasinthe kaghanaghaniro kake pakumulongora nkhongono zake zakuzizwiska. Yehova wakamuphaliraso kuti wachali na ŵanthu 7,000 mu Israyeli awo ŵandasopepo Baala. (1 Mathe. 19:11-18) Pakuchita nthena, Yehova wakalongora kuti wakamutemwanga chomene Eliya.
KASI YEHOVA WAKUTOVWIRA WULI?
7. Kasi umo Yehova wakawovwilira Eliya vikutisimikizgira vichi?
7 Kasi namwe mukusuzgika maghanoghano? Tikupembuzgika chomene kumanya kuti Yehova wakapulikiska umo Eliya wakajipulikiranga. Fundo iyi yikutisimikizgira kuti nase wakutipulikiska para tikusuzgika maghanoghano. Wakumanya ivyo tingafiska na ivyo tingatondeka, ndiposo wakumanya ivyo tikughanaghana. (Sal. 103:14; 139:3, 4) Para tiyezgenge Eliya pa nkhani ya kugomezga Yehova, Yehova watovwirenge kuti tizizipizge masuzgo agho ghakutipangiska kuti tisuzgikenge maghanoghano.—Sal. 55:22.
8. Kasi Yehova wamovwiraninge wuli para mukusuzgika maghanoghano?
8 Para munthu wakusuzgika maghanoghano wangamba kughanaghana kuti suzgo lake lizamumara yayi, ndipo nkhongono zingamumalira. Usange ivi vyamuchitikirani, kumbukani kuti Yehova wamovwiraninge. Kasi wamovwiraninge wuli? Wakumupemphani kuti mumuphalire masuzgo ghinu, ndipo wamuzgoraninge. (Sal. 5:3; 1 Pet. 5:7) Ntheura lombani kwa Yehova kwambura kuleka. Wayowoyenge namwe nga umo wakachitira na Eliya yayi. Kweni wayowoyenge namwe kwizira mu gulu lake na Mazgu ghake Baibolo. Nkhani iyo muŵazgenge mu Baibolo, yingamupembuzgani na kumupani chigomezgo. Kweniso ŵabali na ŵadumbu ŵamukhozganinge.—Rom. 15:4; Heb. 10:24, 25.
9. Kasi mubwezi withu wangatovwira wuli?
9 Yehova wakaphalira Eliya kuti milimo yinyake wapeleke kwa Elisha. Yehova wakamupa Eliya mubwezi muwemi, ndipo tikukayika yayi kuti mubwezi uyu wakamovwira kuzizipizga apo wakasuzgikanga maghanoghano. Mwakuyana waka, para taphalira mubwezi withu umo tikujipulikira, wangatovwira kuti tizizipizge. (2 Mathe. 2:2; Zinth. 17:17) Para mukuwona kuti palije uyo mungamuphalira masuzgo ghinu, lombani Yehova kuti wamovwirani kuti musange Mkhristu wakukhwima mwauzimu uyo wangamukhozgani.
10. Kasi ivyo vikachitikira Eliya vikutipa chigomezgo wuli? Ndipo kasi layizgo ilo lili pa Yesaya 40:28, 29 lingatovwira wuli?
10 Yehova wakawovwira Eliya kuti waleke kusuzgika maghanoghano. Wakamovwiraso kuti wateŵetere mwakugomezgeka kwa vyaka vinandi. Ivyo vikachitikira Eliya vikutipa chigomezgo. Nyengo zinyake tingasuzgika maghanoghano nyengo yitali, ndipo nkhongono zingatimalira. Kweni para tigomezgenge Yehova, watipenge nkhongono kuti tilutilire kumuteŵetera.—Ŵazgani Yesaya 40:28, 29.
HANA, DAVIDE, NA “ASAFU” ŴAKAGOMEZGA YEHOVA
11-13. Longosorani umo ŵateŵeti ŵatatu ŵa Chiuta ŵakasuzgikira maghanoghano.
11 Baibolo likuzunuraso ŵanthu ŵanyake awo nawo ŵakasuzgika chomene maghanoghano. Mwachiyelezgero, Hana wakasuzgika chomene maghanoghano chifukwa chakuti wakaŵa chumba, ndipo muwolimwa munyake wakamunyozanga. (1 Sam. 1:2, 6) Chifukwa cha kusuzgika maghanoghano, Hana wakaŵa na chitima chomene mwakuti wakaliranga waka na kuleka kurya.—1 Sam. 1:7, 10.
12 Nyengo zinyake, Themba Davide likasuzgikanga chomene maghanoghano. Ghanaghanirani masuzgo agho wakakumana nagho. Wakajipanga mulandu chifukwa cha maubudi ghanandi agho wakachita. (Sal. 40:12) Mwana wake Abisalomu wakamugalukira, ndipo pamanyuma mwana wake uyu wakakomeka. (2 Sam. 15:13, 14; 18:33) Mubwezi wake nayo wakamwendera mphiska. (2 Sam. 16:23–17:2; Sal. 55:12-14) Masalimo ghanandi agho Davide wakalemba ghakuyowoya za umo wakajipulikiranga kweniso umo wakagomezgera Yehova.—Sal. 38:5-10; 94:17-19.
Kasi ntchivichi chikawovwira wamasalimo kuti wambeso kuteŵetera Yehova mwakukondwa? (Wonani ndime 13-15) *
13 Wamasalimo munyake wakamba kuchitira sanji ŵanthu ŵaheni. Wamasalimo uyu wakwenera kuti wakaŵa wa mphapu ya Mulevi Asafu, ndipo wakateŵeteranga “mu malo ghakupatulika gha Chiuta.” Chifukwa chakuti wakasuzgikanga maghanoghano, wakaŵa wambura kukondwa na wambura kukhorwa. Wakaleka kukhorwa na vinthu ivyo wakasanganga chifukwa cha kuteŵetera Yehova.—Sal. 73:2-5, 7, 12-14, 16, 17, 21.
14-15. Kasi tikusambirako vichi ku ŵanthu ŵatatu aŵa awo ŵakuzunulika mu Baibolo?
14 Ŵateŵeti ŵatatu aŵa, wose ŵakagomezga kuti Yehova ndiyo waŵawovwirenge. Ŵakamuphalira Yehova mu lurombo ivyo ŵakenjerwanga navyo. Ŵakafwatuka kuyowoya vifukwa ivyo ŵakasuzgikiranga maghanoghano. Ŵakalutilira kusopa Yehova pa tempile.—1 Sam. 1:9, 10; Sal. 55:22; 73:17; 122:1.
15 Yehova wakaŵazgora ŵanthu aŵa ndipo wakaŵachitira chiwuravi. Hana wakasanga mtende wamumtima. (1 Sam. 1:18) Davide wakalemba kuti: “Masoka gha murunji nganandi, kweni Yehova wakumuthaska ku ghose.” (Sal. 34:19) Pamanyuma, wamasalimo wakawona kuti Yehova ‘wamukora ku woko lake lamalyero’ na kumulongozga mwachitemwa. Wakimba kuti: “Kwa ine, ntchiwemi kusendelera kwa Chiuta. Naŵika Fumu Yikuru Yehova kuŵa malo ghane ghakubisamamo.” (Sal. 73:23, 24, 28) Kasi tikusambirako vichi ku ŵanthu aŵa? Nyengo zinyake tingasangana na masuzgo ghakuru agho ghangatipangiska kuti tisuzgikenge maghanoghano. Kweni tingazizipizga para tingaghanaghanira umo Yehova wawovwilira ŵanji, para tikumulomba na kupulikira ivyo wakutiphalira.—Sal. 143:1, 4-8.
GOMEZGANI YEHOVA KUTI MUZIZIPIZGE
Pakwamba mudumbu uyu wakajipaturanga, kweni vinthu vikasintha wati wamba kupenjerezga nthowa za umo wangawovwilira ŵanji (Wonani ndime 16-17)
16-17. (a) Chifukwa wuli tikwenera yayi kujipatura? (b) Kasi tingachita wuli kuti tikhozgeke?
16 Ku ŵateŵeti ŵatatu aŵa tikusambirakoso fundo yinyake yakuzirwa. Tingajipaturanga yayi kwa Yehova na ku ŵanthu ŵake. (Zinth. 18:1) Nancy, uyo wakasuzgika chomene maghanoghano mfumu wake wati wamuleka, wakuti: “Kwa mazuŵa ghanandi nkhakhumbanga yayi kuyowoya na munthu waliyose. Kweni apo nkhajipaturanga ndipo nkhaŵanga na chitima chomene.” Vinthu vikasintha apo Nancy wakamba kupenjerezga nthowa izo wangawovwilira ŵanji awo ŵakaŵa na masuzgo. Iyo wakuti: “Nkhaŵategherezganga apo ŵakanilongosoleranga masuzgo ghawo. Nkhawona kuti para nkhuŵalengera chitima, nkhaluwangako masuzgo ghane.”
17 Tikusanga nkhongono para tikuwungana. Para tili pa maungano, tikujura nthowa kuti Yehova waŵe “movwiri na musanguluski” withu. (Sal. 86:17) Pa maungano Yehova wakutikhozga na mzimu wake, Mazgu ghake, kweniso kwizira mu ŵateŵeti ŵake. Tikuŵaso na mwaŵi ‘wakukhwimiskana.’ (Rom. 1:11, 12) Mudumbu munyake zina lake Sophia wakati: “Yehova kweniso ŵabali na ŵadumbu ŵakanovwira kuti nizizipizge. Chinthu chakuzirwa chomene kwa ine ghakaŵa maungano gha mpingo. Nawona kuti para nkhupharazga na kuwungana, nkhuleka kwenjerwa na kusuzgika maghanoghano.”
18. Para nkhongono zatimalira, kasi Yehova wakutovwira wuli?
18 Para nkhongono zatimalira, tiyeni tikumbuke kuti Yehova walayizga kuti kusuzgika maghanoghano kuzamumara. Kweniso pasono watovwirenge para tikusuzgika maghanoghano. Para nkhongono zatimalira na kuŵavya chigomezgo, ‘wakutipa khumbo na nkhongono’ kuti tilutilire kumuteŵetera.—Fil. 2:13.
19. Kasi lemba la Ŵaroma 8:37-39 likutisimikizgira vichi?
19 Ŵazgani Ŵaroma 8:37-39. Mpositole Paulosi wakutisimikizgira kuti palije icho chingatipatura ku chitemwa cha Chiuta. Kasi tingawovwira wuli ŵabali na ŵadumbu awo ŵakusuzgika maghanoghano? Nkhani yakulondezgapo yizamulongosora umo tingamuyezgera Yehova pa nkhani ya kulongora chiwuravi na kovwira ŵabali na ŵadumbu awo ŵakusuzgika maghanoghano.
SUMU 44 Lurombo lwa Munthu Wakusuzgika
^ ndime 5 Para munthu wangasuzgika maghanoghano kwa nyengo yitali wangamba kulwaralwara. Kasi Yehova wangatovwira wuli? Mu nkhani iyi tiwonenge umo Yehova wakawovwilira Eliya apo wakasuzgikanga maghanoghano. Tisambirengeko ku ŵanthu ŵanyake awo ŵakuzunulika mu Baibolo na kuwona ivyo tingachita kuti Yehova watovwire para tikusuzgika maghanoghano.
^ ndime 2 Mazina ghasinthika mu nkhani iyi.
^ ndime 53 MAZGU GHAKULONGOSORA CHITHUZI: Mungelo wa Yehova wakumuwuska Eliya makoramakora na kumupa chakurya na maji.
^ ndime 55 MAZGU GHAKULONGOSORA CHITHUZI: Wamasalimo uyo wakwenera kuti ngwa mphapu ya Asafu wakulemba masalimo na kwimba pamoza na Ŵalevi ŵanyake.
