1. Kasi tingamuyezga wuli Yehova, Dada withu wachitemwa?

YEHOVA wakutitemwa chomene. (Yoh. 3:16) Nase tikwenera kuŵayezga Adada ŵithu ŵachitemwa aŵa. Ntheura tikuyezgayezga ‘kuŵalengera chitima ŵanthu wose, kuŵatemwa na kuŵalongora chiwuravi,’ chomenechomene “awo mbamoza na ise mu chipulikano.” (1 Pet. 3:8; Gal. 6:10) Para ŵabali na ŵadumbu ŵakumana na masuzgo tikwenera kuŵawovwira.

2. Kasi tiwonenge vichi mu nkhani iyi?

² Wose awo ŵakukhumba kuteŵetera Yehova ŵasanganenge na masuzgo. (Mrk. 10:29, 30) Ntchakuwonekerathu kuti tisanganenge na viyezgo vinandi apo umaliro wa charu ichi ukusendelera. Kasi tingachita wuli kuti tovwiranenge? Tiyeni tiwone ivyo tikusambirako kwa Loti, Yobu, na Naomi. Tiwonengeso masuzgo agho ŵabali na ŵadumbu ŵithu ŵakukumana nagho mazuŵa ghano na kuwona umo tingaŵawovwilira kuti ŵazizipizge.

3. Kuyana na 2 Petrosi 2:7, 8, kasi Loti wakasankha wuli vinthu? Ndipo chikachitika ntchivichi?

³ Loti wakasankha makora yayi. Iyo wakasankha kuti wakakhalenge pakati pa ŵanthu ŵazaghali mu Sodomu. (Ŵazgani 2 Petrosi 2:7, 8.) Chigaŵa ichi chikaŵa chisambazi, kweni Loti wakasangana na masuzgo ghanandi chifukwa cha kusamirako. (Gen. 13:8-13; 14:12) Panji muwoli wake wakagalukira Yehova chifukwa chakuti wakawutemwa chomene msumba uwu, panji ŵanthu ŵanyake awo ŵakakhalanga mu msumba uwu. Ntheura wakafwa apo Chiuta wakalokweska moto na sulefure mu msumba uwu.  Loti wakaŵaso na ŵana ŵaŵiri ŵasungwana. Ŵana aŵa, ŵakaŵa pachibwezi na ŵanalume awo ŵakafwira mu Sodomu. Loti wakaluza nyumba yake, katundu wake, kweniso chakuŵinya chomene kuluska vyose, muwoli wake. (Gen. 19:12-14, 17, 26) Panyengo yakusuzga iyi, kasi Yehova wakaleka kuzikira nayo Loti? Yayi.

4. Kasi Yehova wakalongora wuli kuzikira kwa Loti? (Wonani chithuzi cha pa chikopi.)

⁴ Nangauli Loti wakasankha kukhala mu Sodomu, kweni Yehova wakamulongora chiwuravi pakumutumira ŵangelo kuti ŵamuponoske pamoza na mbumba yake. Kweni m’malo mwakuti wapulikire mwaluŵiro ŵangelo na kuwukamo mu Sodomu, iyo ‘wakachita chizita.’ Ŵangelo ŵakachita kumukora pa woko na kumovwira pamoza na mbumba yake kuti wawukemo mu msumba uwu. (Gen. 19:15, 16) Pamanyuma ŵakamuphalira kuti wachimbilire ku chigaŵa cha mapiri. Kweni m’malo mwa kupulikira Yehova, Loti wakapempha kuti wachimbilire ku msumba wapafupi. (Gen. 19:17-20) Yehova wakazikira na kumutegherezga, ndipo wakamuzomerezga kuti wachimbilire ku msumba uwo wakapempha. Pamanyuma Loti wakachita wofi kukhala mu msumba uwu, ndipo wakasamira ku chigaŵa cha mapiri. Chigaŵa ichi ndicho Yehova wakamuphalira pakwamba kuti wachimbilireko. (Gen. 19:30) Yehova wakazikira nayo chomene Loti. Kasi tingamuyezga wuli?

5-6. Kasi tingalondezga wuli ulongozgi wa pa 1 Ŵatesalonika 5:14 apo tikuyezga Chiuta?

⁵ Nga ni Loti, mubali withu mu mpingo wangasankha makora yayi vinthu na kujichemera masuzgo. Kasi tingachita wuli usange vyanthena ivi vyachitika? Nyengo zinyake tingawona kuti ntchiwemi timuphalire waka unenesko, ndipo tingamuphalira kuti wakuvuna ivyo wakaseŵa. (Gal. 6:7) Kweni chingaŵa makora usange tingamovwira nga umo Yehova wakachitira na Loti. Mwawuli?

⁶ Yehova wakatuma ŵangelo kuti ŵamuchenjezge Loti na kumovwira kuti wapone ku soka ilo wakawiskira mu Sodomu. Mwakuyana waka, nase tikwenera kumuchenjezga mubali withu para tawona kuti ivyo wakuchita vimuchemerenge masuzgo. Kweni tikweneraso kumovwira. Tikwenera kuzikira nayo nanga wangaŵa kuti wakuchedwa kuchitapo kanthu pa ulongozgi uwo tamupa. Tiŵe nga mbangelo ŵaŵiri ŵara. M’malo mwa kugongowa na kumuleka waka mubali withu, tikwenera kupenjerezga nthowa za umo tingamovwilira. (1 Yoh. 3:18) Tikwenera kumovwira mwachitemwa kuti walondezge ulongozgi uwemi uwo tamupa.—Ŵazgani 1 Ŵatesalonika 5:14.

7. Kasi Yehova wakamuwonanga wuli Loti? Ndipo tingamuyezga wuli?

⁷ Yehova wakatenge walaŵiskenge waka pa maubudi gha Loti. M’malo mwake, wakakhuŵilizga mpositole Petrosi na mzimu utuŵa kulemba kuti Loti wakaŵa munthu murunji. Tikuwonga chomene kuti Yehova wakusulako waka maubudi ghithu. (Sal. 130:3) Kasi tingamuyezga wuli pa nkhani iyi? Para tilaŵiskenge pa viwemi ivyo ŵabali na ŵadumbu ŵithu ŵakuchita makora, tizikirenge nawo. Ichi chiwovwirenge kuti ŵalondezge ulongozgi uwo taŵapa.

8. Kasi tichitenge wuli vinthu para tili ŵachiwuravi?

⁸ Mwakupambana na Loti, Yobu wakasuzgika chifukwa chakuti wakasankha uheni yayi. Ndipouli, wakasangana na masuzgo ghakuru chomene. Katundu wake yose wakamara, wakalwara kweniso lumbiri lwake lukanangika. Chiheni chomene kuluska vyose ntchakuti ŵana ŵake wose ŵakafwa. Kweniso ŵabwezi ŵake ŵatatu ŵawakawaka ŵakamunyozanga. Chifukwa wuli ŵabwezi ŵatatu aŵa ŵakatondeka kumuchitira chiwuravi Yobu? Iwo ŵakatondeka kupulikiska suzgo la Yobu. Ichi chikapangiska kuti ŵaŵe  na maghanoghano ghakubudika na kumweruzga uheni Yobu. Kasi tingagega wuli kuchita nthena? Tikwenera kumanya kuti Yehova pera ndiyo wakumanya vyose vya suzgo la munthu. Tegherezgani chomene para uyo wali na masuzgo wakuyowoya. Chitani vinandi padera pa kutegherezga, longorani kuti namwe mwakhwaskika chomene. Para muchitenge nthena mumuchitirenge chiwuravi Mkhristu munyinu.

9. Kasi tigegenge vichi para tili ŵachiwuravi, ndipo chifukwa wuli?

⁹ Para tili ŵachiwuravi tigegenge kusesa. Tithandazgenge yayi masuzgo agho ŵanyithu ŵakukumana nagho. Munthu wakusesa wakukhozga mpingo yayi, kweni wakupangiska kuti mpingo uŵe wakugaŵikana. (Zinth. 20:19; Rom. 14:19) Munthu wanthena ngwalusungu yayi kweni ngwawakawaka, ndipo mazgu ghake ghangapweteka munthu uyo wali na masuzgo kale. (Zinth. 12:18; Efe. 4:31, 32) Ntheura ntchakuzirwa chomene kuti tiwonenge viwemi mu ŵanyithu na kughanaghanira umo tingaŵawovwilira kuti ŵazizipizge masuzgo.

10. Kasi lemba la Yobu 6:2, 3 likutisambizga vichi?

¹⁰ Ŵazgani Yobu 6:2, 3. Nyengo zinyake Yobu wakayowoyanga ‘mwambura kwenelera.’ Ndipouli, pamanyuma wakazomerezga kuti vinthu vinyake ivyo wakayowoya vikaŵa vyambura kwenelera. (Yobu 42:6) Nga ni Yobu, mazuŵa ghano napo munthu uyo wakusuzgika maghanoghano wangayowoya mwambura kwenelera ndipo pamanyuma wangamba kujiyimba mulandu. Kasi tikwenera kuchita wuli? M’malo mwa kumukalipira, tikwenera kuŵa ŵachiwuravi. Kumbukani kuti ni khumbo la Yehova yayi kuti tisanganenge na masuzgo na kusuzgika maghanoghano. Ntheura ntchakupulikikwa kuti muteŵeti wa Yehova wangayowoya mwambura kwenelera para wakusuzgika maghanoghano. Nanga ni para wangayowoya vinthu vyambura  kwenelera vyakukhwaskana na Yehova panji ise, tingakwiyanga mwaluŵiro yayi panji kumweruzga.—Zinth. 19:11.

11. Kasi ŵalara ŵangamuyezga wuli Elihu para ŵakupeleka ulongozgi?

¹¹ Nyengo zinyake munthu uyo wakusuzgika maghanoghano wangakhumbikwiraso ulongozgi panji ntchenyo. (Gal. 6:1) Kasi ŵalara ŵangachita wuli? Ŵakwenera kuyezga Elihu, uyo wakamutegherezga Yobu na kumulongora lusungu. (Yobu 33:6, 7) Elihu wakapeleka ulongozgi wati wamanya dankha maghanoghano gha Yobu. Ŵalara awo ŵakuyezga Elihu ŵategherezgenge na kuyezgayezga kupulikiska suzgo la munthu. Para ŵachita nthena, ulongozgi uwo ŵapelekenge umufikenge pamtima munthu uyo wakusuzgika maghanoghano.

12. Kasi Naomi wakakhwaskika wuli na nyifwa ya mfumu wake na ŵana ŵake ŵaŵiri?

¹² Naomi wakaŵa mwanakazi wakugomezgeka uyo wakatemwanga Yehova. Kweni mfumu wake na ŵana ŵake ŵaŵiri ŵati ŵafwa, wakakhumbanga kusintha zina lake. Wakakhumbanga kuti ŵamuchemenge kuti “Mara,” kung’anamura kuti “Kuŵaŵa.” (Rute 1:3, 5, 20, mazgu ghamusi, 21) Rute uyo wakaŵa mkamwana wake, wakaŵa nayo mu masuzgo ghake ghose. Rute wakamovwira Naomi kuti waŵe na vinthu ivyo wakakhumbikwiranga kweniso wakamupembuzganga. Na mazgu ghapusu kweniso ghakufumira pasi pamtima, Rute wakalongora kuti wakamutemwanga nadi Naomi na kumovwira.—Rute 1:16, 17.

13. Chifukwa wuli awo mfumu panji muwoli wawo wafwa ŵakukhumbikwira wovwiri withu?

¹³ Para munyake mu mpingo, mfumu panji muwoli wake wafwa, tikwenera kumanya kuti wakukhumbikwira wovwiri withu. Ŵanthu awo mbakutorana tingaŵayaniska na makuni ghaŵiri agho ghamera pafupi na pafupi. Para vyaka vyajumphapo, misisi ya makuni agha yikunjilirana. Para khuni limoza ŵali dumura panji lafwa, khuni linyake ili nalo likukhwaskika. Mwakuyana waka, usange munyake mfumu panji muwoli wake wafwa, wangasuzgika maghanoghano nyengo yitali. Paula, * uyo mfumu wake wakafwa mwamabuchi, wakuti: “Vinthu vikasintha chomene pa umoyo wane, ndipo nkhongono zikanimalira. Nkhaluza mubwezi wane wapamtima. Mfumu wane nkhamuphaliranga chilichose. Tikakondwanga, ndipo wakaŵanga nane mu nyengo zakusuzga. Nyengo zose wakanitegherezganga para nkhumuphalira masuzgo ghane. Nkhajipulika nga chiŵaro chimoza cha thupi lane chadumulika.”

14-15. Kasi tingapembuzga wuli uyo mfumu panji muwoli wake wafwa?

¹⁴ Kasi tingapembuzga wuli uyo mfumu panji muwoli wake wafwa? Chinthu chakwamba nkhuyowoya nayo, nanga ni para tingaŵa na soni panji kusoŵa chakuyowoya. Paula, uyo tamuzunura kale mu nkhani iyi, wakuti: “Nkhumanya kuti ŵanthu ŵakuŵa ŵambura kufwatuka kuyowoya nawe para wasangana na suzgo la nyifwa. Ŵakughanaghana kuti ivyo ŵayowoyenge vikukhuŵazgenge. Kweni apo pakuŵa paheni chomene ni para ŵanthu ŵakuyowoya nawe chilichose yayi.” Munthu uyo wali na chitima wakukhazga kuti tiyowoyenge fundo zapadera yayi. Paula wakuti: “Nkhawonganga chomene para ŵabwezi ŵane ŵaniphalira kuti, ‘Phepani chomene chifukwa cha ivyo vyachitika.’”

¹⁵ William, uyo muwoli wake wali kufwa, wakuti: “Nkhukondwa para ŵanji ŵakuniphalira vinthu viwemi ivyo muwoli wane wakachitanga. Vikunisimikizgira waka kuti ŵakamutemwanga na kumuchindika. Ivi vyanovwira chomene. Mazgu ghawo ghakunipembuzga chifukwa muwoli wane wakaŵa wakuzirwa chomene kwa ine, ndipo wali kunovwira chomene pa umoyo wane.”  Bianca, uyo ni chokoro, wakuti: “Nkhupembuzgika chomene para ŵanyane ŵakulomba nane na kuniŵazgira lemba limoza panji ghaŵiri. Kweniso para ŵakuyowoya vyakukhwaskana na mfumu wane na kunitegherezga para nane nkhuyowoya vya mfumu wane.”

16. (a) Kasi tingamovwira wuli uyo wakutemweka wake wali kufwa? (b) Kuyana na Yakobe 1:27, kasi tili na mulimo wuli?

¹⁶ Nga umo Rute wakademelera kwa Naomi uyo wakaŵa chokoro, nase tikwenera kulutilira kovwira awo ŵakutemweka ŵawo wali kufwa. Paula, uyo tamuzunura kale mu nkhani iyi, wakuti: “Mfumu wane wati wafwa waka, ŵanthu ŵanandi ŵakiza kuzakanovwira na kunipembuzga. Kweni mazuŵa ghachoko waka ghakati ghajumphapo, ŵakambaso kutangwanika na milimo yawo. Kweni vinthu vikaŵa kuti vyasintha chomene pa umoyo wane. Ntheura ntchakovwira chomene kumanya kuti munthu uyo wali na chitima wakukhumbikwira wovwiri kwa myezi panji vyaka pamanyuma pa nyifwa.” Mbunenesko kuti ŵanthu ŵakupambana. Ŵanji ŵakuzgoŵera luŵiro para vinthu vyasintha. Kweni ŵanyake nyengo yiliyose iyo ŵakuchita mulimo uwo ŵakachitiranga lumoza na munyawo, vikuŵakumbuska munyawo ndipo ŵakuŵa na chitima chomene. Ŵanthu ŵakupambana pa nkhani ya chitima. Tikwenera kukumbuka kuti Yehova watipa mulimo wakuti tovwirenge awo mfumu panji muwoli wawo wali kufwa.—Ŵazgani Yakobe 1:27.

17. Chifukwa wuli awo ŵanyawo ŵa mu nthengwa ŵali kuŵaleka ŵakukhumbikwira wovwiri withu?

¹⁷ Ŵanyake ŵakusuzgika maghanoghano chifukwa chakuti munyawo wa mu nthengwa wali  kuŵaleka. Joyce, uyo mfumu wake wali kumuleka na kutora mwanakazi munyake, wakuti: “Apo mfumu wane wakanileka, nkhaŵa na chitima chomene kuluska icho nkhatenge niŵenge nacho yiŵenge kuti ni nyifwa. Waŵenge kuti wafwa pa ngozi panji chifukwa cha ulwari, ntchakupulikikwa chifukwa palije icho wakatenge wachitengepo kuti waleke kufwa. Kweni pa nkhani iyi, mfumu wane wakanilekera dala. Nkhakhozgeka soni chomene.”

18. Kasi tingachita wuli kuti tovwire awo mfumu panji muwoli wawo wali kufwa panji kuŵachimbira?

¹⁸ Para tikovwira awo mfumu panji muwoli wawo wali kufwa panji kuŵachimbira, tikulongora kuti tikuŵatemwa. Chifukwa chakuti sono ŵali ŵekha, ŵakukhumbikwira ŵabwezi ŵawemi. (Zinth. 17:17) Kasi mungalongora wuli kuti muli mubwezi wawo? Mungaŵachemera kunyumba yinu kuti mukarye nawo chakurya. Mungapatura nyengo kuti muchitire lumoza vyakusanguluska vinyake panji mupharazgire lumoza. Kweniso mungaŵachemera pa kusopa kwa mbumba. Para muchitenge nthena, mukondweskenge Yehova chifukwa “wali pafupi na ŵakusweka mu mtima,” ndiposo ni “muvikiliri.”—Sal. 34:18; 68:5.

19. Kasi lemba la 1 Petrosi 3:8 likutiphalira kuti tichitenge vichi?

¹⁹ Sonosono apa, para Ufumu wa Chiuta wamba kuwusa charu chapasi, ‘visuzgo vyose vyakale vizamuluwika.’ Tikulindilira mwakunweka nyengo iyi apo ‘vinthu vyakale vizamukumbukikaso chara, ndipo vizamunjiraso yayi mu mtima.’ (Yes. 65:16, 17) Ntheura tiyeni tilutilire kovwirana na kulongora kuti tikutemwa ŵabali ŵithu wose ŵauzimu kwizira mu vyakuyowoya na vyakuchita vithu.—Ŵazgani 1 Petrosi 3:8.