“Muvyara wane wati wamba kutimbana nane, nkhamukora pasingo na kwamba kumufyenya. Nkhakhumbanga kumukoma.”—Paul.

“Panyumba nkhachedwanga yayi kukwiya, ndipo para nakwiya nkhaphwanyanga mipando, mathebulu na vinyake; niti waka chilichose icho nachisanga.”—Marco.

Taŵanandi ŵa ise tili nga ni ŵanthu aŵa yayi. Kweni nyengo zinyake nase vikutisuzga kujikora. Ivi vikuchitika chifukwa chakuti tili kuhara kwananga kufuma kwa Adamu. (Rom. 5:12) Ŵanyake, nga ni Paul na Marco, vikuŵasuzga kujikora para ŵakwiya. Ŵanyake vikuŵasuzga kukanizga maghanoghano ghaheni. Mwachiyelezgero, ŵakulutilira kughanaghanira vinthu ivyo ŵakwenjerwa navyo panji vikuŵagongoweska. Kweniso ŵanyake vikuŵasuzga kujikora para ŵakopeka kuti ŵachite uzaghali, kumwa moŵa mwakujumphizga, panji kugwiliskira ntchito minkhwala yakutimbanizga wongo.

Awo ŵakuzomerezga kulongozgeka na maghanoghano ghawo, makhumbiro, kweniso vyakuchita vyawo, umoyo wawo ukuŵa pangozi. Kweni tingagega masuzgo agha. Tingagega wuli? Tikwenera kuŵa ŵakujikora. Kuti tiŵe ŵakujikora, tiyeni tidumbiskane mafumbo agha: (1) Kasi kujikora ni vichi? (2) Chifukwa wuli nkhwakuzirwa? (3) Kasi tingachita wuli kuti tiŵe na mukhaliro uwu, uwo ngumoza mwa “vipambi vya mzimu.” (Gal. 5:22, 23) Kufuma apo tidumbiskanenge ivyo waliyose wangachita para nyengo zinyake vikumusuzga kujikora.

Munthu uyo ngwakujikora wakuchita vinthu mwamahara para ŵanji ŵamukwiyiska. Wakujikora mu kayowoyero na kuchita vinthu kuti wakondweske Chiuta.

Yesu wakalongora ivyo kujikora kukung’anamura. Baibolo likuti: “Apo wakatukikanga, wakawezgera kutuka yayi. Apo wakayuzgikanga, wakafingiranga yayi, kweni wakajipeleka kwa uyo wakweruzga mwaurunji.” (1 Pet. 2:23) Yesu wakalongora kuti ngwakujikora apo ŵalwani ŵake ŵakamunenanga panyengo iyo wakapayikika pa khuni lakusuzgikirapo. (Mat. 27:39-44) Wakalongoraso mukhaliro uwu apo ŵalongozgi ŵa chisopa ŵakamufumbanga mafumbo ghanandinandi kuti ŵamusange kafukwa mu kayowoyero kake. (Mat. 22:15-22) Yesu wakalongoraso chiyelezgero chiwemi apo Ŵayuda ŵakukwiya ŵakakhumbanga kumudinya na malibwe. M’malo mwa kuwezgera, “Yesu wakabisama na kufumamo mu tempile.”—Yoh. 8:57-59.

Kasi nase tingachita nga ni umo Yesu wakachitira? Enya, nase tingayezga. Mpositole Petrosi wakalemba kuti: “Khristu wakasuzgika chifukwa cha imwe, wali kumulekerani chakuwonerapo kuti mulondezgenge mendero ghake mwakugomezgeka.” (1 Pet. 2:21) Nangauli ndise ŵambura kufikapo, kweni tingalondezga mendero gha Yesu mwakugomezgeka. Chifukwa wuli ntchakuzirwa kuchita nthena?

Tikwenera kuŵa ŵakujikora para tikukhumba kuti Yehova wakondwenge nase. Nanga vingaŵa kuti tateŵetera Yehova mwakugomezgeka kwa nyengo yitali, tingananga ubwezi withu na iyo para tindajikore mu ivyo tikuyowoya na kuchita.

Ghanaghanirani vya Mozesi. Iyo “wakaŵa wakuzika chomene pa ŵanthu wose awo ŵakaŵa pa charu chapasi.” (Maŵa. 12:3) Kwa vyaka vinandi, Mozesi wakategherezganga mwakuzikira madandawuro gha Ŵaisrayeli. Kweni zuŵa linyake wakatondeka kujikora. Wakakwiya Ŵaisrayeli ŵati ŵadandawura vya kusoŵa kwa maji. Wakayowoya mwaukali ku ŵanthu, wakati: “Sono pulikani, imwe ŵakugaluka! Kasi mukukhumba kuti timufumiskirani maji mu jalawe ili?”—Maŵa. 20:2-11.

Mozesi wakatondeka kujikora. Wakatondeka kupeleka uchindami kwa Yehova uyo wakapangiska munthondwe kuti ŵasange maji. (Sal. 106:32, 33) Ntheura Yehova wakamuzomerezga yayi kuti wakanjire mu Charu cha Layizgano. (Maŵa. 20:12) Mozesi wakwenera kuti wakajipa mulandu chifukwa chakuti wakatondeka kujikora.—Doto. 3:23-27.

Kasi tikusambirapo vichi apa? Nanga tingaŵa kuti tateŵetera Yehova nyengo yitali, tikwenera yayi kuyowoya mwambura ntchindi ku awo ŵatikwiyiska panji awo ŵakukhumbikwira ulongozgi. (Efe. 4:32; Kol. 3:12) Para tikuchekura, nyengo zinyake chikuŵa chakusuzga kuŵa wakujikora. Kweni mungachita makora kukumbuka ivyo wakachita Mozesi. Tileke kunanga ubwezi withu na Yehova chifukwa cha kutondeka kujikora. Kasi tingachita wuli kuti tiŵenge ŵakujikora?

Lombani mzimu utuŵa. Chifukwa wuli tikwenera kuchita nthena? Chifukwa ntchakuti kujikora ntchipambi cha mzimu wa Chiuta, ndipo Yehova wakupeleka mzimu wake ku awo ŵakumulomba. (Luka 11:13) Na mzimu wake uwu, Yehova wangatipa nkhongono izo tikukhumbikwira kuti tiŵe ŵakujikora. (Fil. 4:13) Yehova wangatovwiraso kuŵa na vipambi vinyake vya mzimu nga ntchitemwa, icho chingatovwira kuti tiŵe ŵakujikora.—1 Kor. 13:5.

Gegani chilichose icho chingamutondeskani kujikora. Mwachiyelezgero, gegani mawebusayiti na vyakusanguluska ivyo muli vinthu viheni. (Efe. 5:3, 4) Nakuti tikwenera kugega chilichose icho chingatiyezga kuti tichite kwananga. (Zinth. 22:3; 1 Kor. 6:12) Mwachiyelezgero munthu uyo wakuyezgeka kuti wachite uzaghali, wakwenera kugega kuwonelera mafilimu, panji  kuŵazga mabuku agho ghakuyowoya vya chitemwa panji vya kugonana.

Nyengo zinyake vingatisuzga kulondezga ulongozgi uwu. Kweni para tiŵikengepo mtima, Yehova watipenge nkhongono izo tikukhumbikwira kuti tiŵe ŵakujikora. (2 Pet. 1:5-8) Wazamutovwira kugega maghanoghano ghaheni, kujikora mu kayowoyero na vyakuchita vithu. Paul na Marco, awo taŵazunura kukwambilira kwa nkhani iyi, ŵali kuleka mtima wawo wakunjoŵe. Wonani ivyo vikachitikira mubali munyake uyo kanandi wakakaŵanga yayi kukwiya na madilayivara ghanyake para wakwendeska galimoto. Mubali uyu wakatemwanga kupindana na madilayivara ghanyake. Kasi wakachita wuli kuti wamazge suzgo lake ili? Iyo wakuti: “Zuŵa lililose nkhalombanga Yehova kufumira pasi pa mtima. Nkhaŵazganga nkhani zakuyowoya umo ningaŵira wakujikora na kusunga pa mtima mavesi ghanyake ghakovwira. Nangauli nachita ivi kwa vyaka vinandi, kweni mulenji uliwose nkhujikumbuska kuti nkhwenera kuŵa wakujikora. Sono para nkhuluta ku malo ghanyake nkhunyamuka luŵiro kuti nileke kuwona nga kuti madilayivara ghanyane ghakunichedweska.”

Nyengo zinyake tose tingatondeka kujikora. Para vyanthena vyachitika tingatondeka kumulomba Yehova. Kweni panyengo iyi ndipo tikwenera kumulomba chomene Yehova. Ntheura kuchedwa yayi kumulomba Yehova. Mulombani kuti wamugowokerani, wamovwirani, ndipo ŵikanipo mtima kuti muzakaleke kuchitaso ivyo mwachita. (Sal. 51:9-11) Yehova wapulikenge lurombo lwinu lwakufumira pasi pa mtima. (Sal. 102:17) Mpositole Yohane wakutikumbuska kuti ndopa za mwana wa Chiuta “zikutitozga ku kwananga kose.” (1 Yoh. 1:7; 2:1; Sal. 86:5) Kumbukani kuti Yehova wakuphalira ŵateŵeti ŵake kuti ŵagowokeranenge nyengo zose. Ntheura tingaŵa na chigomezgo chose kuti ndimo Yehova wachitirenge kwa ise.—Mat. 18:21, 22; Kol. 3:13.

Yehova wakakondwa nayo yayi Mozesi apo wakatondeka kujikora mu mapopa. Ndipouli, Yehova wakamugowokera. Mazgu gha Chiuta ghakutiphalira kuti Mozesi wakaŵa munthu wakugomezgeka chomene uyo tikwenera kumuyezga. (Doto. 34:10; Heb. 11:24-28) Yehova wakamuzomerezga yayi Mozesi kunjira mu Charu cha Layizgano, kweni wazamumuzomerezga kunjira mu Paradiso na kumupa njombe ya umoyo wamuyirayira. Nase tingazakasangwa na vitumbiko ivi para tikuyezgayezga kuŵa ŵakujikora.—1 Kor. 9:25.