Mavesi agha ghakuyowoya mikhaliro 9. Pa mavesi agha tikuŵazga kuti: “Vipambi vya mzimu ntchitemwa, chimwemwe, mtende, kuzikira, lusungu, uwemi, chipulikano, kuzika, na kujikora.” Kweni tileke kuwona kuti mzimu wa Chiuta ungatovwira kuŵa na mikhaliro iyi pera.

Wonani ivyo mpositole Paulosi wakalemba mu mavesi ghakulondezgapo: “Milimo ya thupi yikuwonekera, ndipo ni uzaghali, ukazuzi, ukwakwa, kusopa vikozgo, kuchita vyamizimu, maulwani, zawe, sanji, kukalipa, mphindano, kugaŵikana, kugaluka, bina, uloŵevu, kwenda mu viphikiro ivyo mukuŵa vyongo, na vinyake vyanthena.” (Gal. 5:19-21) Paulosi wakayowoya mazgu ghakuti “na vinyake.” Wakazunura yose yayi “milimo ya thupi,” nga iyo yikuyowoyeka pa Ŵakolose 3:5. Mwakuyana waka, wakati wazunura mikhaliro yiwemi wakati: “Palije dango lakususkana na vinthu ivi.” Ntheura Paulosi wakazunura yose yayi mikhaliro yiwemi iyo mzimu utuŵa ungatovwira kuti tiŵe nayo.

Tikumanya fundo iyi para tikuwona ivyo Paulosi wakalembera mpingo wa ku Efeso. Iyo wakati: “Vipambi vya ungweru ni uwemi wa mtundu uliwose na urunji na unenesko.” (Efe. 5:8, 9) Nadi “uwemi,” pamoza na mikhaliro yinyake nga ni urunji na unenesko ni vimoza vya “vipambi vya ungweru,” kweniso vili mu gulu la “vipambi vya mzimu.”

Kweniso Paulosi wakachiska Timote kuti waŵe na mikhaliro yiwemi 6. Mikhaliro iyi ni “urunji, kusopa Chiuta mwakujipeleka, chipulikano, chitemwa, chizizipizgo, na kuzika.” (1 Tim. 6:11) Pa mikhaliro iyi, mikhaliro yitatu pera (chipulikano, chitemwa, na kuzika) ndiyo yili mu gulu la “vipambi vya mzimu.” Ndipouli, Timote wakakhumbikwirangaso wovwiri wa mzimu kuti waŵeso na mikhaliro yinyake nga ni urunji, kusopa Chiuta mwakujipeleka, na chizizipizgo.—Yaniskani na Ŵakolose 3:12; 2 Petrosi 1:5-7.

Ntheura lemba la Ŵagalatiya 5:22, 23 likuzunura mikhaliro yose yayi iyo Mkhristu wakwenera kuŵa nayo. Mzimu wa Chiuta ungatovwira kuti tiŵe na mikhaliro 9 iyo ni “vipambi vya mzimu.” Kweni pali mikhaliro yinandi iyo tikwenera kuŵa nayo kuti tiŵe Ŵakhristu ŵakukhwima mwauzimu na ‘kuvwara wunthu uphya uwo ukalengeka mwakuyana na khumbo la Chiuta, mu urunji wenecho na kugomezgeka.’—Efe. 4:24.