NKHANI YAKUSAMBIRA 25
“Mberere Zane Nizipenjenge Nekha”
“Mberere zane nizipenjenge nekha, ndipo nizipwelelerenge.”—EZEK. 34:11.
SUMU 105 “Chiuta Ntchitemwa”
CHILATO CHA NKANI IYI *
1. Chifukwa wuli Yehova wakajiyelezgera na mama uyo wakonkheska?
“KASI mama wangaluwa mwana wake wakonkha?” Fumbo ili wakafumba ni Yehova mu nyengo ya ntchimi Yesaya. Chiuta wakaphalira ŵanthu ŵake kuti: “Nanga ŵanakazi aŵa ŵangaluwa, kweni ine nikuluwengepo chara.” (Yes. 49:15) Nangauli ni viŵi yayi kuti Chiuta wajiyelezgere na mama, kweni apa ndivyo wakachita. Nga ni umo mama wakutemwera chomene mwana wake, Yehova nayo wakajiyelezgera na mama kuti walongore umo wakutemwera ŵateŵeti ŵake. Ŵamama ŵanandi ŵakujipulika nga ni umo mudumbu munyake zina lake Jasmin, wakujipulikira. Iyo wakuti: “Para ukulera mwana, ukuŵa paubwezi wapadera chomene na mwana wako ndipo ubwezi uwu ukutora nyengo yitali.”
2. Kasi Yehova wakujipulika wuli usange yumoza mwa ŵana ŵake walopwa mwauzimu?
2 Yehova wakumanya nanga ni para mwana wake yumoza waleka kuwungana na mpingo panji waleka kupharazga. Ntheura vikwenera kuti vikumuŵinya chomene kuwona kuti ŵateŵeti ŵake ŵanandi chaka chilichose ŵakulopwa mwauzimu. *
3. Kasi Yehova wakukhumba vichi?
3 Nakuti ŵanandi mwa ŵapharazgi aŵa ŵakuweleraso mu mpingo, ndipo tikukondwa para ŵachita nthena. Yehova wakukhumba kuti ŵawelereso ndipo nase ndimo tikukhumbira. (1 Pet. 2:25) Kasi tingaŵawovwira wuli kuti ŵambeso kuchita makora? Pambere tindazgore fumbo ili, tiyeni tiwone dankha chifukwa icho ŵanyake ŵakulekera kuwungana na kupharazga.
CHIFUKWA WULI ŴANYAKE ŴAKULEKA KUTEŴETERA YEHOVA?
4. Kasi ntchivichi chikuŵachitikira ŵanyake chifukwa cha kutemwa chomene ntchito?
4 Ŵanji ŵakuwona kuti ntchito yakuthupi iyo ŵakugwira ndiyo njakuzirwa chomene. Mubali munyake uyo wakukhala ku Southeast Asia, zina lake Hung * wakuti: “Nyengo yinandi na nkhongono zane nkhamaliranga ku ntchito. Nkhachitanga vinthu mwambura mahara. Nkhaghanaghananga kuti para ningaŵa na ndalama zinandi ndipo ningateŵetera makora Yehova. Ntheura nkhagwiranga ntchito maora ghanandi. Nkhamba kukhala chomene ku maungano, ndipo paumaliro nkhalekerathu kuwungana. Satana wakugwiliskira ntchito charu kuti wapatuske ŵanthu ndipo pachoko na pachoko ŵakuleka kuteŵetera Chiuta.”
5. Kasi mudumbu munyake wakachita wuli wati wasangana na masuzgo?
5 Ŵabali na ŵadumbu ŵanyake ŵakulopwa chifukwa cha masuzgo agho ŵakusangana nagho. Anne uyo wakukhala ku Britain wali na ŵana ŵankhondi. Iyo wakuti: “Mwana wane waumaliro wakababika wakupendera, ndipo mwana wane wachitatu wakasezgeka mu mpingo ndipo mwana wane wachinayi wakamba kulwara nthenda yakusuzgika maghanoghano. Nkhasuzgika chomene maghanoghano mwakuti nkhaleka kuwungana na kupharazga, pamanyuma nkhalopwa mwauzimu.” Nase chitima chikutikora chomene para tikuwona masuzgo agho Anne na mbumba yake ŵakukumana nagho. Kweniso chitima chikutikora para ŵapharazgi ŵanyake nawo ŵakusangana na masuzgo gha nga gha Anne.
6. Chifukwa wuli ŵanyake ŵangaleka kuteŵetera Yehova para ŵatondeka kulondezga fundo iyo yili pa Ŵakolose 3:13?
6 Ŵazgani Ŵakolose 3:13. Ŵateŵeti ŵanyake ŵa Yehova ŵali kukhuŵara chifukwa cha ivyo mubali panji mudumbu wakachita mu mpingo. Mpositole Paulosi wakati nyengo zinyake tingaŵa na ‘chifukwa chakupulikikwa chakudandawulira na munyake.’ Vingachitika kuti ŵanji ŵatichitira vinthu mwambura urunji. Kweni usange tingaleka kuŵa maso, tingamba kuŵasungira vyakusingo. Para munthu wakwiya chomene wangaleka kuteŵetera Yehova. Wonani ivyo vikachitikira Pablo, mubali wa ku South America. Ŵakamupusikizgira kuti wachita kwananga, ndipo pamanyuma wakalekeskeka mauteŵeti agho wakachitanga mu mpingo. Kasi mubali uyu wakachita wuli? Iyo wakuti: “Nkhakwiya chomene, ndipo pachoko na pachoko nkhaleka kuwungana.”
7. Kasi chingachitika ntchivichi para munthu wakujipa mulandu?
7 Usange munyake wakachita kwananga kukuru kumasinda, wangajipa mulandu kwa nyengo yitali. Ndipo wangawona nga kuti wangatemwekaso yayi na Chiuta. Nanga vingaŵa kuti wakapera ndipo wakalongoreka lusungu, wangaŵa kuti wachali kujiwona kuti ngwambura kwenelera kuŵa mu gulu la ŵanthu ŵa Chiuta. Ndimo mubali munyake zina lake Francisco wakajipulikiranga. Iyo wakuti: “Nkhachenyeka chifukwa chakuti nkhachita uzaghali. Nangauli pakwamba nkhalutilira kuwungana, kweni nkhambaso kusuzgika maghanoghano ndipo nkhawonanga kuti ndineso wakwenelera yayi kuŵa pakati pa ŵanthu ŵa Yehova. Nkhajipanga mulandu, ndipo nkhawonanga kuti Yehova wandanigowokere. Pamanyuma nkhaleka kuwungana.” Kasi mukujipulika wuli na ŵabali na ŵadumbu awo ŵakusangana na masuzgo ghanthena agho tadumbiskana mu nkhani iyi? Kasi mukuŵalengera chitima? Kuluska vyose, kasi Yehova wakujipulika wuli?
YEHOVA WAKUZITEMWA MBERERE ZAKE
Muliska Wachiisrayeli wakafipanga mtima chomene para mberere yake yazgeŵa (Wonani ndime 8-9) *
8. Kasi Yehova wakuŵaluwa ŵanthu awo ŵakamuteŵeterapo? Longosorani.
8 Yehova wakuŵaluwa yayi ŵanthu awo ŵakamuteŵeterapo kweni ŵali kuleka kumuteŵetera kwakanyengo. Kweniso wakuluwa yayi milimo iyo ŵakachita mu gulu lake. (Heb. 6:10) Ntchimi Yesaya yili kulemba chiyelezgero chiwemi chomene icho chikulongora kuti Yehova wakuŵatemwa ŵanthu ŵake. Yili kulemba kuti: “Wapwelelerenge mskambo wake nga ni muliska. Na woko lake wawunganyenge pamoza twana twa mberere, ndipo watuyeghenge pa chifuŵa chake.” (Yes. 40:11) Kasi Yehova, Muliska Mukuru, wakujipulika wuli para mberere yake yazgeŵa? Yesu wakavumbura umo Yehova wakujipulikira apo wakafumba ŵasambiri ŵake kuti: “Imwe mukughanaghana wuli? Usange munthu wali na mberere 100, ndipo yimoza yazgeŵa, asi walekenge mberere 99 pa phiri na kuluta kukapenja iyo yazgeŵa? Ndipo para wayisanga, nadi nkhumuphalirani, wakusekelera chomene chifukwa cha iyo kuluska mberere 99 izo zindazgeŵe.”—Mat. 18:12, 13.
9. Kasi ŵaliska ŵawemi mu nyengo yakale ŵakachitanga nazo wuli mberere zawo? (Wonani chithuzi cha pa chikopi.)
9 Chifukwa wuli ntchakwenelera kumuyaniska Yehova na muliska? Chifukwa ntchakuti muliska muwemi mu nyengo yakale wakapweleleranga chomene mberere zake. Mwachiyelezgero, Davide wakakoma nkhalamu na nkhalamira kuti wavikilire mskambo wake. (1 Sam. 17:34, 35) Muliska muwemi wakumanya nanga ni para mberere yake yimoza yazgeŵa. (Yoh. 10:3, 14) Muliska wanthena wangaleka dankha mberere 99 pa malo ghakuvikilirika kuti wakapenje dankha iyo yazgeŵa. Yesu wakagwiliskira ntchito ntharika iyi kuti wasambizge fundo yakuzirwa yakuti: “Adada awo ŵali kuchanya ŵakukhumba chara kuti yumoza wa ŵachoko aŵa watayike.”—Mat. 18:14.
Muliska Wachiisrayeli wakafipanga mtima chomene para mberere yake yazgeŵa (Wonani ndime 9)
YEHOVA WAKUPENJA MBERERE ZAKE
10. Kuyana na Ezekiyeli 34:11-16, kasi Yehova wakalayizga kuti wachitenge nazo wuli mberere zake zakuzgeŵa?
10 Yehova wakutitemwa tose kusazgapo na “ŵachoko” awo ŵapuluka. Kwizira mwa ntchimi Ezekiyeli, Chiuta wakalayizga kuti wazamupenja mberere zake zakuzgeŵa na kuziwovwira kuti ziŵeso paubwezi na iyo. Wakayowoya ivyo wachitenge kuti waziponoske, ndipo ivyo wakayowoya vikuyana waka na ivyo muliska Wachiisrayeli wakachitanga para mberere yazgeŵa. (Ŵazgani Ezekiyeli 34:11-16.) Chakwamba, muliska wakapenjanga mberere, chinthu icho chikakhumbikwiranga nyengo na kuŵikapo mtima. Ndipo para wayisanga wakayiwezgeranga pa mskambo. Kweniso para mberere wayisanga kuti njakupwetekeka, muliska wakayiwovwiranga mwachitemwa, wakakakanga vilonda vyake, kuyinyamura na kuyilyeska. Ŵalara awo mbaliska ŵa mskambo wa Chiuta ŵakwenera kuchita mwakuyana waka kuti ŵawovwire waliyose uyo wapuluka mu mpingo. (1 Pet. 5:2, 3) Ŵalara ŵakupenja ŵanthu aŵa, na kuŵawovwira kuti ŵawelere mu mpingo, ndipo ŵakuŵalongora chitemwa mwakuŵawovwira kuti ŵaŵeso paubwezi na Yehova. *
11. Kasi muliska muwemi wakumanya kuti vichi?
11 Muliska muwemi wakumanya kuti mberere yingazgeŵa. Ndipo para mberere yazgeŵa wakayipanga chilango yayi. Wonani umo Chiuta wakachitira pakovwira ŵateŵeti ŵake ŵanyake awo kwakanyengo ŵakalopwa.
12. Kasi Yehova wakachita nayo wuli Yona?
12 Ntchimi Yona yikachimbira mulimo uwo Yehova wakayipa. Nangauli ndimo wakachitira, kweni Yehova wakamukana yayi Yona. Nga ni muliska muwemi, Yehova wakamuponoska Yona na kumovwira kuti waŵeso na nkhongono izo wakakhumbikwiranga kuti wachite uteŵeti uwo wakapika. (Yona 2:7; 3:1, 2) Pamanyuma, Chiuta wakagwiliskira ntchito nyungu ya mphindi kuti wamovwire Yona kumanya kuzirwa kwa umoyo wa munthu waliyose. (Yona 4:10, 11) Kasi tikusambirapo vichi apa? Ŵalara ŵakwenera yayi kuchimbilira kuzileka mberere izo zalopwa mwauzimu. M’malo mwake, ŵalara ŵakwenera kuyezgayezga kumanya ivyo vyapangiska mberere kuti yipuluke. Ndipo para mberere yawelera kwa Yehova, ŵalara ŵakwenera kulutilira kuyilongora chitemwa kweniso kuyighanaghanira.
13. Kasi tikusambirapo vichi pa umo Yehova wakachitira na uyo wakalemba Salimo 73?
13 Uyo wakalemba Salimo 73 wakagongowa wati wawona kuti ŵanthu ŵaheni vinthu vikuŵayendera makora. Wakamba kukayika usange ntchakuzirwa kuchita khumbo la Chiuta. (Sal. 73:12, 13, 16) Kasi Yehova wakachita wuli? Wakamususka yayi. M’malo mwake, wakazomerezga kuti mazgu agho wakayowoya ghalembeke mu Baibolo. Pamanyuma, Wamasalimo uyu wakawamo kuti palije chinthu chakuzirwa kuluska kuŵa paubwezi na Yehova. (Sal. 73:23, 24, 26, 28) Kasi tikusambirapo vichi apa? Ŵalara ŵakwenera kuchimbilira yayi kweruzga awo ŵamba kukayika usange kuteŵetera Yehova nkhwakuzirwa nadi. M’malo mwa kuchimbilira kuŵasuska, ŵalara ŵakwenera kuyezgayezga kumanya chifukwa icho ŵakuyowoyera nthena. Pamanyuma ndipo ŵalara ŵangagwiliskira ntchito Baibolo kuti ŵaŵakhozge.
14. Chifukwa wuli Eliya wakakhumbikwiranga kovwirika, ndipo Yehova wakamovwira wuli?
14 Ntchimi Eliya yikachimbira Fumukazi Yezebeli. (1 Mathe. 19:1-3) Eliya wakaghanaghananga kuti palije uyo wakaŵa ntchimi ya Yehova, ndipo wakawonanga kuti mulimo wake ukawa pawaka. Wakasuzgika chomene maghanoghano ndipo wakakhumbanga kuti wafwe waka. (1 Mathe. 19:4, 10) M’malo mwakuti wamususke Eliya, Yehova wakamusimikizgira kuti wakaŵa yekha yayi. Wakamuphalira kuti pachali ntchito yinandi yakuti wachite ndipo wakwenera kuthemba nkhongono za Chiuta. Yehova wakamutegherezga mwalusungu Eliya ndipo wakamupa mulimo unyake. (1 Mathe. 19:11-16, 18) Kasi tikusambirapo vichi apa? Tose, chomenechomene ŵalara, tikwenera kuchita nazo mwalusungu mberere za Yehova. Kwali mberere yingaŵa kuti yakwiya panji yikujiwona kuti Yehova wangayigowokeraso yayi, ŵalara ŵakwenera kuyitegherezga para yikuŵaphalira umo yikujipulikira. Ndipo ŵakwenera kuyiphalira kuti Yehova wakuyitemwa chomene.
KASI TIKWENERA KUJIPULIKA WULI PARA MBERERE YA CHIUTA YAZGEŴA?
15. Kuyana na Yohane 6:39, kasi Yesu wakaziwonanga wuli mberere za Adada ŵake?
15 Kasi Yehova wakukhumba kuti tijipulikenge wuli usange mberere yake yazgeŵa? Yesu wali kutilekera chakuwonerapo. Wakamanyanga kuti mberere zose za Yehova ni zakuzirwa mu maso mwake. Ntheura wakachita chilichose kuti wawovwire “mberere zakuzgeŵa za nyumba ya Israyeli” kuti ziwelere kwa Yehova. (Mat. 15:24; Luka 19:9, 10) Pakuŵa muliska muwemi, Yesu wakachita chilichose kuti waleke kutayapo mberere yiliyose ya Yehova.—Ŵazgani Yohane 6:39.
16-17. Kasi ŵalara ŵakwenera kujipulika wuli para ŵakovwira awo ŵalopwa mwauzimu? (Wonani bokosi lakuti “ Umo Mberere Yakuzgeŵa Yingajipulikira.”)
16 Mpositole Paulosi wakachiska ŵalara mu mpingo wa ku Efeso kuti ŵayezge Yesu. Iyo wakati: ‘Wovwirani awo ŵakukhumbikwira wovwiri, ndipo mukumbukenge mazgu gha Fumu Yesu, ghakuti: ‘Uyo wakupeleka wakukondwa chomene kuluska uyo wakupokera.’” (Mil. 20:17, 35) Ntchakuwonekerathu kuti ŵalara ŵali na mulimo wapadera chomene wakupwelelera mberere za Yehova. Mulara munyake wa ku Spain zina lake Salvador, wakuti: “Para nkhughanaghanira umo Yehova wakupwelelera mberere zake izo zikazgeŵa, nane nkhongono zikukwera ndipo nkhuchita chilichose kuti nizovwire. Pakuŵa muliska, nkhumanya kuti Yehova wakukhumba kuti niziwovwire.”
17 Wose awo ŵazunulika mu nkhani iyi kuti ŵakalopwa mwauzimu ŵakawovwirika, ndipo ŵakambaso kuchita milimo iyo Yehova wakaŵapa. Pasono, ŵanandi awo ŵali kulopwa mwauzimu nawo ŵakukhumba kuchita mwakuyana waka. Nkhani yakulondezgapo yizamulongosora vinandi pa nkhani ya umo tingaŵawovwilira kuti ŵawelere kwa Yehova.
SUMU 139 Mujiwone Kuti Muli mu Charu Chiphya
^ ndime 5 Chifukwa wuli ŵanyake awo ŵateŵetera Yehova mwakugomezgeka nyengo yitali ŵali kuleka kuwungana na mpingo? Kasi Chiuta wakujipulika wuli na ivyo ŵali kuchita? Nkhani iyi yikuzgora mafumbo agha. Yikulongosoraso ivyo tingasambirako pakuwona umo Yehova wakawovwilira ŵanthu ŵanyake mu nyengo yakale awo ŵakachita yayi ivyo wakaŵatuma.
^ ndime 2 MAZGU GHALONGOSOLEKA: Mupharazgi wakulopwa ni uyo wandapeleke malipoti gha uteŵeti wa m’munda kwa myezi 6 panji kujumpha apa. Nangauli vili nthena, kweni ŵapharazgi ŵakulopwa nawo mbabali na ŵadumbu ŵithu ndipo tikuŵatemwa.
^ ndime 4 Mazina ghanyake ghasinthika mu nkhani iyi.
^ ndime 10 Nkhani yakulondezgapo yizamulongosora umo ŵalara ŵangalondezgera nthowa izi.
^ ndime 60 MAZGU GHAKULONGOSORA VITHUZI: Chifukwa chakuti wakafipiranga mtima mberere iyo yazgeŵa, muliska wakayipenjanga na kuyiwovwira kuti yiwelereso pa mskambo. Ndimoso ŵaliska ŵauzimu ŵakuchitira mazuŵa ghano.
^ ndime 64 MAZGU GHAKULONGOSORA VITHUZI: Mudumbu uyo ngwakulopwa apo wakulindilira basi kuti yinyamuke, wakuwona Ŵakaboni ŵaŵiri ŵakupharazga ku malo uko kukusangika ŵanthu ŵanandi, ndipo mbakukondwa chomene.
