Paulosi wakalemba kuti: “Kwizira mu dango nkhafwa ku dango, kuti niŵe wamoyo kwa Chiuta.”​—Gal. 2:19.

Ivyo Paulosi wakalemba vikakolerananga na fundo yikuru iyo wakayowoya ku mipingo iyo yikaŵa mu chigaŵa cha Romu nga ni Galatiya. Ŵakhristu ŵanyake ku mipingo iyi ŵakamba kulondezga ŵasambizgi ŵatesi. Ŵasambizgi aŵa ŵakasambizganga kuti munthu wazakaponoskeke, wakwenera kulondezga Dango la Mozesi, chomene la ukotoli. Kweni Paulosi wakamanyanga kuti Chiuta wakakhumbangaso kuti awo ŵakugomezga mwa iyo ŵakotolekengeso yayi. Wakayowoya fundo zakukhorweska zambura kususkika, kweniso wakasuska visambizgo ivi kuti vikaŵa vyautesi, ndipo wakakhozga chipulikano cha ŵabali kuti ŵagomezgenge chomene mu sembe yakuwombora ya Yesu Khristu.​—Gal. 2:4; 5:2.

Baibolo likuyowoya mwakupulikikwa makora kuti para munthu wafwa wakumanya kalikose chara. (Muph. 9:5) Ntheura apo Paulosi wakayowoya kuti: “Nkhafwa ku dango,” wakang’anamuranga kuti Dango la Mozesi likagwirangaso ntchito yayi pa iyo. Iyo wakagomezganga kuti chipulikano chake mu sembe yakuwombora ndicho chapangiska kuti ‘waŵe wamoyo kwa Chiuta.’

Dango likapangiska kuti vinthu visinthe umo vikaŵira kwa Paulosi. Kasi likapangiska wuli? Iyo wakaŵa kuti walongosora waka kuti “munthu wakupimika murunji na milimo ya dango yayi, kweni pekha para wali na chipulikano mwa Yesu Khristu.” (Gal. 2:16) Mbunenesko nadi kuti dango lili kufiska vinthu vyakuzirwa chomene. Ndipo pakuyowoya vya Dango, Paulosi wakalongosolera Ŵagalatiya kuti: “Likasazgikako kuti kwananga kuwonekere, m’paka mphapu iyo yikapika layizgo yize.” (Gal. 3:19) Nadi, Dango likalongolerathu kuti ŵanthu ŵambura kufikapo ŵangasungilira mwakufikapo yayi Dango, ndipo ŵakakhumbikwiranga sembe yaumaliro kweni yakufikapo. Ntheura Dango likawovwira ŵanthu kumanya kuti Yesu wakaŵa “mphapu” iyo yikalayizgika. Ntheura para tili na chipulikano mwa Yesu Khristu tikupimika ŵarunji kwa Chiuta. (Gal. 3:24) Paulosi wakayowoya fundo iyi chifukwa kwizira mu Dango wakazomera na kuŵa na chipulikano mwa Yesu. Lekani Paulosi wakayowoya kuti “nkhafwa ku dango” ndipo nkhazgoka “wamoyo kwa Chiuta.” Dango likaŵavyaso nkhongono pa iyo, kweni Chiuta ndiyo.

Paulosi wakayowoyaso fundo yakuyana waka mu kalata yake yakuluta ku Romu. Iyo wakati: “Ŵabali ŵane namweso mukaŵa ŵakufwa ku Dango kwizira mu thupi la Khristu . . . Tili kufwatulika ku Dango, chifukwa tili kufwa ku dango ilo likatikakanga.” (Rom. 7:4, 6) Lemba ili na la Ŵagalatiya 2:19, ghose ghakulongora kuti Paulosi wakayowoyanga za kufwa nga ngwakwananga pasi pa Dango yayi. Kweni wakayowoyanga za kufwatulika ku dango. Dango likagwiranga ntchito yayi pa iyo kweniso pa ŵanyake awo ŵakaŵa nga ndiyo. Iwo ŵakafwatulika chifukwa cha kuŵa na chipulikano mu sembe ya Khristu.