1. Chifukwa wuli nyengo zinyake ŵateŵeti ŵa Yehova ŵangaŵa na phukwa panji kujiwona nga ŵali ŵekha?

TAŴANANDI nyengo zinyake tikuŵanga na phukwa. Ku ŵanyake suzgo ili likutora nyengo yitali yayi. Apo ku ŵanyake likutora nyengo yitali. Nyengo zinyake tingaŵa na phukwa nanga ni para tikukhala na ŵanthu ŵanandi. Ŵanyake chikuŵaŵira chakusuzga kuti ŵasange ŵabwezi ŵaphya mu mpingo uwo ŵasamira sono. Ŵanyake ŵakulira mu mbumba izo zikutemwa kuchitira lumoza vinthu, ntheura ŵangaŵa na phukwa para ŵasamira kutali na mbumba yawo. Kweniso ŵanyake ŵakumusoŵa chomene munyawo uyo wali kutayika. Ndipo Ŵakhristu ŵanyake, chomenechomene awo ŵasambira waka sono unenesko, ŵakujipulika kuti ŵali ŵekha para ŵamumbumba yawo panji ŵabwezi ŵawo awo Mbakaboni yayi ŵakuŵatambuzga panji kuŵakana.

2. Kasi tizgorenge mafumbo wuli?

² Yehova wakutimanya makora kweniso wakutipulikiska. Wakumanya umo tikujipulikira para tili na phukwa panji para tikujiwona nga tili tekha, ndipo wakukhumba kutovwira. Kasi Yehova wakutovwira wuli? Kasi tingachita vichi icho chingatovwira? Ndipo kasi tingawovwira wuli ŵanji mu mpingo awo ŵali na phukwa? Tiyeni tiwone mazgoro gha mafumbo agha.

3. Kasi Yehova wakalongora wuli kuti wakamupweleleranga Eliya?

³ Yehova wakukhumba kuti ŵateŵeti ŵake wose ŵakondwenge. Wali pafupi na waliyose wa ise, ndipo wakumanya para tili na chitima panji para tagongowa. (Sal. 145:18, 19) Wonani umo Yehova wakalongolera kuti wakaghanaghaniranga ntchimi Eliya kweniso  umo wakayiwovwilira. Munthu wakugomezgeka uyu, wakakhalanga mu nyengo yakusuzga chomene mu mdauko wa Israyeli. Ŵanthu awo ŵakasopanga Yehova ŵakatambuzgikanga chomene, ndipo ŵanthu ŵamazaza awo ŵakasopanga Chiuta yayi ŵakakhumbanga chomene kukoma Eliya. (1 Mathe. 19:1, 2) Chinyakeso icho chikamugongoweska Eliya ntchakuti wakaghanaghananga kuti ndiyo yekha wakakhalapo uyo wakateŵeteranga Yehova. (1 Mathe. 19:10) Mwaluŵiro Chiuta wakachitapo kanthu kuti wawovwire Eliya. Yehova wakatuma mungelo kukasimikizgira ntchimi yake kuti yikaŵa yekha yayi, pakaŵa Ŵaisrayeli ŵanandi awo ŵakaŵa kuti ŵachali kuteŵetera Yehova mwakugomezgeka.—1 Mathe. 19:5, 18.

4. Kasi lemba la Mariko 10:29, 30, likulongora wuli kuti Yehova wakughanaghanira ŵateŵeti ŵake awo ŵasida vinthu vinyake vyakuzirwa?

⁴ Yehova wakumanya kuti para tasankha kumuteŵetera, taŵanyake ŵa ise tikuŵa kuti tasida vinthu vinyake vyakuzirwa. Ivi vingasazgapo kutaya wovwiri wakufuma ku ŵabali na ŵabwezi ŵithu awo Mbakaboni yayi. Lekani panji chifukwa chakuti mpositole Petrosi wakafipanga mtima, wakafumba Yesu kuti: “Ise tasida vinthu vyose na kumulondezgani, kasi tizamuŵa na vichi?” (Mat. 19:27) Mwachitemwa, Yesu wakasimikizgira ŵasambiri ŵake kuti mpingo ndiwo uŵenge nga mbumba yawo. (Ŵazgani Mariko 10:29, 30.) Ndipo Yehova, Dada withu wakuchanya, walayizga kuti wawovwirenge wose awo ŵakukhumba kumuteŵetera. (Sal. 9:10) Wonani vinthu vyakovwira ivyo mungachita kuti Yehova wamovwirani apo mukulimbana na phukwa.

5. Chifukwa wuli ntchakuzirwa kughanaghanira umo Yehova wakumovwilirani?

⁵ Mughanaghanirenge umo Yehova wakumovwilirani. (Sal. 55:22) Kuchita nthena kumovwiraninge kuwona kuti muli mwekha yayi. Mudumbu munyake wambura kutengwa zina lake Carol *, uyo ŵamumbumba yakwake Mbakaboni yayi, wakuti: “Para nkhughanaghanira umo Yehova wanovwilira kuzizipizga viyezgo, vikunovwira kumanya kuti nili nekha yayi. Ndipo vikunisimikizgira kuti Yehova wanovwirenge nyengo zose.”

6. Kasi lemba la 1 Petrosi 5:9, 10, lingakhozga wuli awo ŵakujiwona kuti ŵali ŵekha?

 ⁶ Mughanaghanirenge umo Yehova wakovwilira ŵabali na ŵadumbu awo ŵakujipulika kuti ŵali ŵekha. (Ŵazgani 1 Petrosi 5:9, 10.) Hiroshi, mubali uyo kwawo waŵako yekha Kaboni kwa vyaka vinandi, wakuti: “Mu mpingo waliyose wali na masuzgo. Tikumanya kuti tose tikuchita kuyezgayezga kuti titeŵetere Yehova, ndipo kumanya fundo iyi kungakhozga ise tikufuma mu mbumba izo ni za Ŵakaboni yayi.”

7. Kasi lurombo lukumovwirani wuli imwe pamwekha?

⁷ Nyengo zose mulombenge, kuŵazga Baibolo na kuwungana. Kweniso mukwenera kumuphalira Yehova mwakudunjika umo mukujipulikira. (1 Pet. 5:7) Massiel wakuti: “Chinthu chakuzirwa chomene icho chikanovwira kuti nitonde phukwa, nkhulomba kwa Yehova kufumira pasi pamtima. Wakaŵa Dada wanadi kwa ine, ndipo nkhamulombanga kanandi waka zuŵa lililose, kumuphalira umo nkhajipulikiranga.” Mudumbu wachiwukirano uyu apo wakasankha kuteŵetera Yehova, wakajiwonanga kuti wali yekha chifukwa mbumba yakwawo yose yikuteŵetera Yehova yayi.

8. Kasi kuŵazga Mazgu gha Chiuta na kughanaghanirapo kungamovwirani wuli?

⁸ Muŵazgenge Mazgu gha Chiuta nyengo zose na kughanaghanirapo pa malemba agho ghakulongora kuti Yehova wakumutemwani. Bianca, mudumbu uyo wakuzizipizga chifukwa ŵanthu ŵamumbumba yakwake ŵakumugongoweska wakuti: “Kuŵazga na kughanaghanirapo nkhani za mu Baibolo zakukhwaskana na ŵateŵeti ŵa Yehova awo ŵakakumana na masuzgo nga ghane kukunovwira chomene.” Ŵakhristu ŵanyake ŵakusunga pamtima malemba agho ghakuŵakhozga chomene nga ni Salimo 27:10 na Yesaya 41:10. Ŵanyakeso ŵakuwona kuti para ŵakutegherezga vinthu vyakuchita kujambura para ŵakunozgekera maungano panji kuŵazga Baibolo, vikuŵawovwira kuti ŵaleke kujiwona kuti ŵali ŵekha.

9. Kasi kuluta ku maungano kungamovwirani wuli?

⁹ Ŵikanipo mtima kuti nyengo zose musangikengepo pa maungano. Mukhozgekenge chomene na maungano kweniso kumanyana makora na ŵabali na ŵadumbu ŵinu. (Heb. 10:24, 25) Massiel uyo tamuzunura kale wakuti: “Nangauli nkhaŵa wasoni chomene, kweni nkhasankha kuti nisangikengepo pa maungano ghose na kuzgorapo. Ivi vikanovwira kuti nimanyane makora na ŵabali na ŵadumbu mu mpingo.”

10. Chifukwa wuli ntchakuzirwa kuŵa paubwezi na Ŵakhristu ŵakugomezgeka?

¹⁰ Ŵani paubwezi na Ŵakhristu ŵakugomezgeka. Sangani ŵabwezi ŵawemi mu mpingo awo mungasambirako. Ŵangaŵa awo mukupambana vyaka, mitheto panji umo mwakulira. Baibolo likutiphalira kuti “vinjeru vikusangika mu ŵalara.” (Yobu 12:12) Awo mbalara  nawo ŵangasambirako vinandi ku ŵachinyamata ŵakugomezgeka mu mpingo. Davide wakaŵa mwana muchoko chomene kwa Yonatani, kweni ivi vikaŵatondeska yayi kuŵa paubwezi wakandapo nane nikandepo. (1 Sam. 18:1) Davide na Yonatani ŵakawovwirananga kuti ŵalutilire kuteŵetera Yehova mu nyengo zinandi zakusuzga. (1 Sam. 23:16-18) Irina, mudumbu uyo ni yekha Kaboni mu mbumba yakwawo wakuti: “Ŵabali na ŵadumbu ŵithu ŵangaŵa ŵapapi ŵithu kweniso ŵakuru na ŵanung’una ŵithu ŵauzimu. Yehova wangaŵagwiliskira ntchito kuti ŵatovwire.”

11. Kasi tingachita wuli kuti tiŵe paubwezi wakukhora na ŵanji?

¹¹ Kusanga ŵabwezi ŵaphya ntchipusu yayi, chomene para uli wasoni. Ratna, uyo ngwasoni, ndipo wakasambira unenesko nangauli ŵanji ŵakamususkanga, wakuti: “Nkhamanya kuti nkhakhumbikwiranga wovwiri wa ŵabali na ŵadumbu ŵane ŵa mu mpingo.” Nyengo zinyake chingaŵa chakusuzga kuphalira munthu munyake umo ukujipulikira, kweni para wachita nthena, munthu uyo wamuphalira wakuŵa mubwezi wako wa pamtima. Ŵabwezi ŵinu mbakukhumbisiska kumukhozgani na kumovwirani, kweni nyengo zinyake chingakhumbikwira kuti muŵaphalire umo ŵangamovwilirani.

12. Kasi upharazgi ungamovwirani wuli kuti muŵe na ŵabwezi ŵawemi?

¹² Nthowa yiwemi chomene iyo tingaŵira paubwezi na ŵanji nkhupharazgira nawo lumoza. Carol uyo tamuzunura kale wakuti: “Nasanga ŵabwezi ŵanandi chifukwa cha kupharazgira lumoza na ŵadumbu kweniso kuchitira lumoza vinthu vinyake vyauzimu. Yehova wanovwira kwa vyaka vinandi kwizira mu ŵabwezi ŵane aŵa.” Pakuŵa mauwemi ghanandi para tili paubwezi na Ŵakhristu ŵakugomezgeka. Yehova wakugwiliskira ntchito ŵabwezi aŵa, kutikhozga para tagongowa kweniso para tili na phukwa.—Zinth. 17:17.

13. Kasi waliyose mu mpingo wali na udindo wuli?

¹³ Waliyose wali na udindo wakupangiska kuti mu mpingo muŵenge mtende kweniso chitemwa, mwakuti paŵavye munthu wajiwonenge kuti wali yekha. (Yoh. 13:35) Ivyo tikuchita na kuyowoya, vingakhozga chomene ŵanji. Mudumbu munyake wakati: “Nkhati nasambira unenesko, mpingo ndiwo ukazgoka mbumba yane. Kuŵavyenge wovwiri wa ŵabali na ŵadumbu, mphanyi nkhaŵa Kaboni wa Yehova yayi.” Kasi mungachita wuli kuti movwire awo kukwawo Kaboni ni ŵekha, kuti ŵajipulikenge kuti ŵakutemweka?

14. Kasi mungachita wuli kuti muŵe paubwezi na awo ŵamba sono unenesko?

¹⁴ Ŵani paubwezi na awo ŵamba waka sono. Tingachita nthena mwakuŵapokelera makora awo ŵamba sono kwiza ku maungano gha mpingo. (Rom. 15:7) Kweni tikwenera kuchita vinandi padera pakuŵatawuzga waka. Tikwenera kuŵa nawo paubwezi wakukhora. Ntheura mukwenera kuŵa ŵalusungu na kulongora kuti mukuŵaghanaghanira awo ŵamba sono. Ŵafumbani masuzgo agho ŵakusangana nagho, kweni kuŵafumba mafumbo ghakukhozga soni yayi. Ŵanyake chingaŵaŵira chakusuzga kuyowoya umo ŵakujipulikira, ntheura kuŵachichizga yayi kuti ŵayowoye. Kweni ŵafumbani mwavinjeru na kutegherezga mwakuzikira para ŵakuzgora. Mwachiyelezgero, mungaŵafumba umo ŵakasambilira unenesko.

15. Kasi Ŵakhristu awo ŵali na chipulikano chakukhora ŵangawovwira wuli ŵanji mu mpingo?

¹⁵ Tose mu mpingo chipulikano chikukhora para tikulongora kuti tikughanaghanirana yumoza na munyake, chomenechomene para ŵalara na awo ŵali na chipulikano chakukhora ndiwo ŵakuchita nthena. Melissa, uyo wakasambizgika unenesko na amama ŵake wakuti: “Nkhuŵawonga chomene ŵabali awo ŵakaŵa nga mbadada ŵane, ŵakapaturanga  nyengo kuchezga nane, ndipo ŵakalongora kuti ŵakanighanaghaniranga kwa vyaka vinandi. Usange nili na vyakuyowoya, nkhamanyanga kuti wakunitegherezga walipo.” Mubali wachinyamata zina lake Mauricio wakaŵa na chitima kweniso wakajiwonanga kuti wali yekha, uyo wakamusambizganga Baibolo wati waleka unenesko. Iyo wakuti: “Ŵalara ŵakalongora kuti ŵakanighanaghaniranga ndipo ivi vikanovwira chomene. Nyengo zose ŵakayowoyeskananga nane. Tikanjiliranga lumoza mu upharazgi, ŵakaniphalirangako fundo izo ŵasanga pakuŵerenga Baibolo kweniso tikachitiranga lumoza maseŵero ghakukhozga thupi.” Melissa na Mauricio wose ŵakuchita uteŵeti wanyengo zose.

16-17. Kasi ni vichi vinyake ivyo tingachita kuti tovwire ŵanji?

¹⁶ Chitanipo kanthu kuti movwirepo. (Gal. 6:10) Leo uyo ni mishonale, uyo wakuteŵetera kutali na mbumba yakwawo, wakuti: “Kanandi icho chikukhumbikwa nkhulongora waka lusungu panyengo yakwenelera. Nkhukumbuka zuŵa linyake nkhachita ngozi ya galimoto. Nati nafika kunyumba, nkhasuzgika chomene maghanoghano. Kweni pamanyuma mbumba yinyake yikanichemera kunyumba kwawo kuti tikarye lumoza chakurya. Nkhukumbuka yayi chakurya icho tikarya, kweni nkhukumbuka waka kuti ŵakanitegherezganga chomene ndipo paumaliro nkhajipulika makora.”

¹⁷ Tose tikukondwa na maungano gha dera na gha chigaŵa chifukwa chakuti tikusangirapo mwaŵi wakuchezga na ŵanji kweniso kudumbiskana fundo izo tapulika pa maungano agha. Ndipouli, Carol uyo tamuzunura kale wakuti: “Pa maungano gha chigaŵa na gha dera nkhuŵa na phukwa chomene.” Chifukwa wuli? Iyo wakutiso: “Nangauli pa maungano agha pakuŵa ŵabali na ŵadumbu ŵanandi chomene kweni kanandi ŵakuŵa kuti ŵakhala waka pasi pamoza na mbumba zawo. Ndipo para naŵawona ndipo nkhuŵa na phukwa chomene.” Ŵanyake chikuŵaŵira chakusuzga kuti ŵalute ku ungano wa chigaŵa panji wadera para munyawo wa mu nthengwa watayika. Kasi mukumanyapo waliyose uyo wakukumana na masuzgo agha? Nga mbumba, mwalekerachi kumuchemerako ku ungano wakulondezgapo, kwali ngwa dera panji wa chigaŵa?

18. Kasi tingalondezga wuli lemba la 2 Ŵakorinte 6:11-13?

¹⁸ Muchezgenge na ŵanji. Para muchezgenge, muyezgeskenge kuti paŵenge ŵabali na  ŵadumbu ŵakupambanapambana, chomenechomene awo ŵali na phukwa. Tikwenera ‘kujura mitima yithu,’ chomenechomene ku awo ŵakujiwona kuti ŵali ŵekha. (Ŵazgani 2 Ŵakorinte 6:11-13.) Melissa uyo tamuzunura kale wakukumbuka kuti: “Nyengo zose tikaŵanga ŵakukondwa chomene para ŵabali na ŵadumbu ŵatichemera kunyumba zawo kuti tikachezge pamoza na mbumba zawo panji kukatembeya lumoza ku malo ghanyake.” Kasi mu mpingo winu walimo uyo mungamuchemerako ku nyumba kwinu?

19. Kasi mphawuli apo kuchezga na Ŵakhristu ŵanyithu kungaŵa kwakovwira chomene?

¹⁹ Pali nyengo izo Ŵakhristu ŵanyithu ŵangawonga chomene para tingachezga nawo. Chingaŵa chakusuzga ku ŵanyake kukhala pamoza na ŵamumbumba yawo awo Mbakaboni ŵa Yehova yayi, chomenechomene panyengo ya vikondwelero ivyo vikukolerana yayi na malemba. Ndipo ŵanyake ŵangaŵa na chitima chomene para deti ilo wakutemweka wawo wakafwira lafika. Para tikupatura nyengo kuti tichezge na ŵabali na ŵadumbu awo ŵakusangana na masuzgo agha ndikuti tikulongora kuti ‘tikupwelelera nadi’ vya iwo.—Fil. 2:20.

20. Kasi mazgu gha Yesu agho ghali pa Mateyu 12:48-50, ghangatovwira wuli para tikujiwona nga tili tekha?

²⁰ Pali vifukwa vinandi ivyo vingapangiska Ŵakhristu kuti nyengo zinyake ŵajiwonenge nga ŵali ŵekha. Kweni tingaluwanga yayi kuti Yehova wakumanya makora umo tikujipulikira. Kanandi wakugwiliskira ntchito ŵabali na ŵadumbu kutipa ivyo tikukhumbikwira. (Ŵazgani Mateyu 12:48-50.) Nakuti tikulongora kuti tikuwonga chomene Yehova chifukwa cha mpingo, para tikuchita vyose ivyo tingafiska kuti tovwire ŵabali na ŵadumbu ŵithu. Vilije kanthu kuti tikujipulika wuli nyengo zinyake, kweni tili tekha yayi chifukwa Yehova wali nase nyengo zose.