1. Kasi ŵasambiri ŵa Yesu ŵakawuphalira vichi mzinda ukuru wa ŵanthu?

MZINDA ukuru wa ŵanalume na ŵanakazi ukaluta ku Yerusalemu. Ukafuma mu vyaru vyakupambanapambana kweniso ukayowoyanga viyowoyero vyakupambanapambana. Ndipo chinthu chakuzizwiska chikachitika pa zuŵa ili. Mwamabuchi Ŵayuda ŵanyake ŵakamba kuyowoya viyowoyero vinyake vyachilendo. Ichi chikazizika mzinda uwo ukiza ku malo agha. Kweni ivyo ŵakazizwa navyo chomene ni ivyo Ŵayuda aŵa ŵakayowoyanga, kweniso ivyo mpositole Petrosi wakayowoya ku mzinda uwu. Mzinda uwu ukamanya kuti ungazakaponoskeka pekha para ungaŵa na chipulikano mwa Yesu Khristu. Ndipo ukakhwaskika chomene na uthenga uwu. Ntheura ukafumba kuti: “Kasi tichitechi?” Petrosi wakaŵazgora kuti: “Waliyose wa imwe wabatizike.”​—Mil. 2:37, 38.

2. Kasi tiwonenge vichi mu nkhani iyi? (Wonani chithuzi cha pa chikopi.)

² Icho chikachitika pamanyuma, chikaŵa chakukondweska chomene. Ŵanthu pafupifupi 3,000 ŵakabatizika pa zuŵa ili, na kuŵa ŵasambiri ŵa Khristu. Uku ndiko kukaŵa kwamba kwa mulimo ukuru wakuzgora ŵanthu kuŵa ŵasambiri, uwo Yesu wakalangura ŵasambiri ŵake. Ŵalondezgi ŵake ŵachali kuchita mulimo uwu m’paka sono. Mazuŵa ghano vingachitika yayi kuti munthu timupharazgire kwa maora ghachoko na kubatizika. Kweni pakutora myezi, chaka, panji kujumphaso kuti wabatizike. Pakukhumbikwa kulimbikira kuti tovwire munthu kuti waŵe msambiri wa Khristu, nga umo mukumanyira kale usange muli nayo munthu uyo mukusambira nayo Baibolo. Mu nkhani iyi, tiwonenge umo tingawovwilira msambiri wa Baibolo kuti wabatizike.

3. Nga umo pakulongolera pa Mateyu 28:19, 20, kasi msambiri wakwenera kuchita vichi kuti wabatizike?

³ Pambere msambiri wa Baibolo wandabatizike, wakwenera kulondezga ivyo Baibolo likusambizga. (Ŵazgani Mateyu 28:19, 20.) Para msambiri wakulondezga ivyo wakusambira, wakuŵa nga ni “mwanalume wakuchenjera” wa mu ntharika ya Yesu uyo wakazenga nyumba yake pa jalawe. (Mat. 7:24, 25; Luka 6:47, 48) Kasi mungamovwira wuli msambiri kuti walondezgenge ivyo wakusambira? Tiyeni tiwone masachizgo ghatatu agho ghangatovwira.

4. Kasi tingawovwira wuli msambiri kuti waŵe wakwenelera kubatizika? (Wonaniso bokosi lakuti “ Umo Mungawovwilira Msambiri Winu Kuti Waŵe na Vilato na Kuvifiska.”)

⁴ Wovwirani msambiri winu kuŵa na vilato. Chifukwa wuli mukwenera kuchita nthena? Ghanaghanirani chiyelezgero ichi: Usange muli paulendo utali, mukwenera kusankha malo ghawemi umo mundamuyima kuti mupumure. Para mungachita nthena ndipo ulendo winu mungawuwona kuti ngwakuvuska yayi panji kuti ngutali chomene. Mwakuyana waka, para msambiri wa Baibolo wali na vilato ivyo wangafiska mwaluŵiro, mbwenu wawonenge kuti wangafiska chilato chake chakuti wabatizike. Gwiliskirani ntchito chigaŵa chakuti “Vyakuti Muchite” mu buku la Mungakondwa na Umoyo Kwamuyirayira!, kuti movwire msambiri winu kuti waŵe na vilato. Paumaliro wa sambiro lililose, dumbiskanani umo ivyo vili pa chigaŵa ichi vingamovwilira kulondezga ivyo wasambira. Usange muli na chilato chinyake icho mukukhumba kuti msambiri winu wafiske, mungalemba pa malo apo palembeka kuti “Vinyake.” Nyengo zose gwiliskirani ntchito chigaŵa ichi kudumbiskana na msambiri winu, vilato ivyo wangafiska mwaluŵiro, ndiposo vilato ivyo vitorenge nyengo kuti wafiske.

5. Kuyana na Mariko 10:17-22, kasi Yesu wakaphalira munthu musambazi kuti wachite vichi, ndipo chifukwa wuli?

⁵ Wovwirani msambiri winu kusintha mikhaliro yake yakale. (Ŵazgani Mariko 10:17-22.) Yesu  wakamanyanga kuti ntchakusuzga kuti munthu musambazi waguliske vinthu vyake vyose. (Mrk. 10:23) Kweni ndivyo wakaphalira munthu uyu kuti wachite. Chifukwa wuli? Chifukwa chakuti Yesu wakamutemwa. Nyengo zinyake tingatondeka kumuchiska msambiri withu kuti walondezgenge ivyo wakusambira chifukwa chakuti tikuwona kuti ngwakunozgeka yayi kusintha. Pangatora nyengo nadi kuti ŵanthu ŵavure wunthu wawo wakale na kuvwara wunthu uphya. (Kol. 3:9, 10) Kweni para msambiri tikumuphalira mwaluŵiro apo wakukhumbikwira kusintha, vingawovwira kuti wambepo kusintha mwaluŵiro. Para mukudumbiskana nayo ivyo wangasintha mukulongora kuti mukumutemwa.​—Sal. 141:5; Zinth. 27:17.

6. Chifukwa wuli tikwenera kumufumba msambiri withu maghanoghano ghake?

⁶ Ntchakuzirwa chomene kuti msambiri timufumbenge umo wakughanaghanira pa nkhani yinyake. Ivi vimovwiraninge kumanya ivyo msambiri winu wapulikiska kweniso ivyo wakugomezga. Usange nyengo zose muchitenge nthena, chiŵenge chipusu kudumbiskana nayo vinthu ivyo vingaŵa vyakusuzga kudumbiskana nayo. Buku la Mungakondwa na Umoyo Kwamuyirayira! lili na mafumbo ghanandi agho ghangatovwira kumanya umo msambiri withu wakughanaghanira pa nkhani yinyake. Mwachiyelezgero, mu sambiro 04 muli fumbo lakuti: “Kasi mukughanaghana kuti Yehova wakujipulika wuli usange mukuzunura zina lake?” Mu sambiro 09 muli fumbo lakuti: “Kasi ni vinthu wuli vinyake ivyo mungatemwa kulomba?” Pakwamba, msambiri winu vingamusuzga kuti wazgore mafumbo agha. Kweni mungamovwira mwakumusambizga kuti waghanaghanirengepo pa malemba kweniso vithuzi ivyo vili mu buku ili.

7. Kasi mungagwiliskira wuli ntchito mwaluso ivyo ŵakachita ŵanthu ŵanyake kuti ŵasinthe?

⁷ Para msambiri winu wapulikiska ivyo wakwenera kuchita, muphalirani viyelezgero vya ŵanthu ŵanyake kuti mumuchiske kuti wachite vinthu ivyo. Mwachiyelezgero, usange msambiri winu wakufika nyengo zose yayi pa maungano, mungamulongora vidiyo ya mutu wakuti Yehova Wakanovwira iyo yili pa chigaŵa chakuti “Sangani Fundo Zakusazgikira” mu sambiro 14. Mu masambiro ghanandi mu buku la Mungakondwa na Umoyo Kwamuyirayira!, musangenge vyakuchitika ivi pa chigaŵa chakuti “Manyani Vinandi” panji “Sangani Fundo Zakusazgikira.” * Kweni kuyaniska msambiri winu na munthu munyake yayi mwakuyowoya kuti, “Usange uyu wakafiska, nawe mbwe ufiskenge.” Msambiri wakwenera kufikapo yekha pa fundo iyi. Imwe yowoyani waka vinthu ivyo vikawovwira munthu wa mu vidiyo kulondezga fundo ya mu Baibolo. Nyengo zinyake mungazunura waka lemba ilo muli fundo yikuru panji chinthu chinyake icho munthu uyo wakachita. Palipose apo mwawona kuti ntchakwenelera, didimizgani umo Yehova wakamovwilira munthu uyo.

8. Kasi mungamovwira wuli msambiri winu kutemwa Yehova?

⁸ Wovwirani msambiri winu kutemwa Yehova. Kasi mungamovwira wuli? Penjani mipata iyo mungamovwilira msambiri winu kusambira vinandi vya mikhaliro ya Yehova. Wovwirani msambiri winu kumanya kuti Yehova ni Chiuta wakukondwa uyo wakovwira awo ŵakumutemwa. (1 Tim. 1:11; Heb. 11:6) Muphalirani msambiri winu kuti wapindurenge para walondezgenge ivyo wakusambira, ndipo mulongosolerani kuti vitumbiko ivyo wasangenge ntchilongolero chakuti Yehova wakumutemwa. (Yes. 48:17, 18) Para msambiri winu wakhozgenge chomene chitemwa chake pa Yehova, wakhumbengeso chomene kusintha apo wakuwona kuti wakukhumbikwira kusintha.​—1 Yoh. 5:3.

9. Kuyana na Mariko 10:29, 30, kasi ntchivichi chingawovwira msambiri kuti waside vinthu vinyake na kubatizika?

⁹ Kuti wabatizike, msambiri wakwenera kusida vinthu vinyake. Nga ni munthu musambazi  uyo tamuzunura kukwambilira, ŵasambiri ŵanyake nawo ŵangakhumbikwira kusida vinthu vinyake vyakuthupi. Usange ntchito iyo ŵakugwira yikukolerana yayi na fundo za mu Baibolo, ŵangakhumbikwira kuti ŵasange ntchito yinyake. Ŵanandi ŵangakhumbikwira kuleka ŵabwezi ŵawo awo ŵakumutemwa yayi Yehova. Ŵanyake ŵachibali ŵawo awo ŵakutinkha Ŵakaboni ŵa Yehova ŵangaŵakana. Yesu wakayowoya kuti ŵanyake chingaŵaŵira chinonono kuti ŵaside vinthu vyanthena ivi. Kweni wakalayizgaso kuti awo ŵamulondezgenge ŵakhuŵarenge yayi. Yehova waŵatumbikenge mwakuŵapa mbumba yauzimu iyo yikutemwana zanadi. (Ŵazgani Mariko 10:29, 30.) Kasi mungamovwira wuli msambiri winu wa Baibolo kuti nayo wapindure na chawanangwa chiwemi ichi?

10. Kasi mukusambirako vichi ku ivyo wakayowoya Manuel?

¹⁰ Muŵe paubwezi na msambiri winu. Ntchakuzirwa chomene kuti msambiri winu mumulongorenge kuti mukumutemwa. Chifukwa wuli? Wonani ivyo wakayowoya Manuel, uyo wakukhala ku Mexico. Wakulongosora umo msambizgi wake wakamovwilira apo wakasambiranga Baibolo. Iyo wakuti: “Pambere tindambe kusambira, msambizgi wane wakanifumbanga umo vinthu viliri pa umoyo wane. Wakanovwira kuti niŵe wakufwatuka kumuphalira chilichose. Nkhawonanga kuti wakunighanaghanira nadi.”

11. Kasi ŵasambiri ŵangapindura wuli usange ŵakuchezga nase?

¹¹ Yesu wakachezganga na ŵalondezgi ŵake. Mwakuyana waka, namwe muchezgenge na ŵasambiri ŵinu. (Yoh. 3:22) Usange mukuwona kuti ntchakwenelera, muchemerani kunyumba kwinu msambiri winu kuti muzakarye nayo chakurya panji kuwonelera lumoza pulogiramu yithu ya mwezi na mwezi ya JW Broadcasting. Msambiri winu wangawonga chomene, chomenechomene para mungamuchema panyengo iyo ŵabwezi panji ŵamumbumba yakwake ŵakukondwelera maholide agho ghakukolerana yayi na fundo za mu Baibolo, chifukwa panyengo zanthena izi nyengo zinyake wangaŵa na phukwa. Kazibwe, uyo wakukhala ku Uganda, wakuti: “Nkhuwona kuti nkhasambira vinandi vya Yehova chifukwa cha kuchezga na msambizgi wane kuluska panyengo  ya sambiro. Nkhawona umo Yehova wakupwelelera ŵanthu ŵake kweniso kuti mbakukondwa chomene. Nakuti ivi ndivyo nkhakhumbanga pa umoyo wane.”

12. Chifukwa wuli ku sambiro lithu tikwenera kuluta na ŵapharazgi ŵakupambanapambana?

¹² Lutani ku sambiro linu na ŵapharazgi ŵakupambanapambana. Nyengo zinyake tingawona kuti ntchiwemi waka kuti ku sambiro lithu tilutenge waka tekha panji na mupharazgi yumoza na yumoza. Nangauli ntchipusu nadi kuchita nthena, kweni msambiri withu tingamovwira chomene para tikuluta na ŵapharazgi ŵakupambanapambana. Dmitrii uyo wakukhala ku Moldova, wakuti: “Mupharazgi waliyose uyo wakizanga na msambizgi wane apo nkhasambiranga, wakalongosoranga vinthu munthowa yapadera chomene. Ivi vikanovwira kumanyaso nthowa zinyake izo ningagwiliskira ntchito vinthu ivyo nkhasambiranga. Nkhaŵa na soni viŵi yayi apo nkhiza kakwamba ku maungano, chifukwa ŵabali na ŵadumbu ŵanandi nkhaŵa kuti nakumanapo nawo kale.”

13. Chifukwa wuli tikwenera kovwira ŵasambiri kuti ŵawunganenge?

¹³ Wovwirani msambiri winu kuti wawunganenge. Chifukwa wuli? Chifukwa Yehova wali kulangura kuti ŵasopi ŵake wose ŵawunganenge pamoza, ndipo maungano ntchigaŵa cha kusopa kwithu. (Heb. 10:24, 25) Kweniso ŵabali na ŵadumbu ŵithu ni mbumba yithu yauzimu. Para tili nawo pamoza ku maungano, vikuŵa nga ni para tikulyera lumoza chakurya chakunowa. Para mukovwira msambiri winu kuwungana, ndikuti mukumovwira kuti wachite chinthu chakuzirwa chomene icho nkhubatizika. Kweni nyengo zinyake chingaŵa chakusuzga kwa iyo kuti wambe kuwungana. Kasi mungamovwira wuli na buku lakuti Mungakondwa na Umoyo Kwamuyirayira! kuti watonde masuzgo agho ghakumutondeska kuwungana?

14. Kasi mungamovwira wuli msambiri winu kuti wambe kuwungana?

¹⁴ Gwiliskirani ntchito sambiro 10 mu buku lakuti Mungakondwa na Umoyo Kwamuyirayira! kuti mumovwire msambiri winu. Pambere buku ili lindamare kulembeka, ŵapharazgi ŵanyake ŵakapempheka kuti ŵagwiliskirepo ntchito sambiro ili. Ŵapharazgi aŵa ŵakati sambiro ili likawovwira chomene ŵasambiri kwamba kuwungana. Ndipouli, tikwenera kulindilira dankha kuti tifike sambiro 10 yayi kuti tambenge kuchiska msambiri withu kuwungana. Tikwenera kumuchiska luŵiro msambiri withu kuti wawunganenge nyengo zose. Msambiri waliyose wakuŵa na masuzgo ghake. Ntheura mukwenera kuwoneseska chomene ivyo msambiri winu wakukhumbikwira, na kuwona usange mungamovwira. Kugongowa yayi usange msambiri winu wakwiza yayi ku maungano nangauli mwamuchiskapo kanandi waka. Zikirani na kulutilira kumuchiska.

15. Kasi msambiri withu wangawopa vichi?

¹⁵ Panji namwe mukukumbuka kuti mukawopanga kuŵa Kaboni wa Yehova. Nyengo zinyake mukawonanga kuti mungafiska yayi kupharazga nyumba na nyumba. Panji mukawopanga kuti ŵamumbumba yinu panji ŵabwezi ŵinu ŵamususkaninge. Usange ni nthena, mungamupulikiska msambiri winu umo wakujipulikira. Yesu wakayowoya kuti ŵanthu ŵanyake ŵangaŵa na wofi wanthena. Ndipouli, wakachiska ŵalondezgi ŵake kuti ŵangatondekanga yayi kuteŵetera Yehova chifukwa cha wofi. (Mat. 10:16, 17, 27, 28) Kasi Yesu wakawovwira wuli ŵasambiri ŵake kuti ŵaleke kopa? Ndipo kasi nase tingamuyezga wuli?

16. Kasi mungamovwira wuli msambiri winu kuti waphalirengeko ŵanyake ivyo wakusambira?

¹⁶ Lutilirani kovwira msambiri winu kuti waphalirengeko ŵanyake ivyo wakusambira. Ŵasambiri ŵa Yesu ŵakwenera kuti ŵakaŵa na wofi apo wakaŵatuma kukapharazga. Kweni Yesu wakaŵawovwira mwakuŵaphalira uko ŵakwenera kukapharazga kweniso uthenga uwo ŵamupharazga. (Mat. 10:5-7) Kasi tingamuyezga wuli Yesu? Wovwirani msambiri winu kumanya awo wangaŵapharazgira. Mwachiyelezgero, mufumbani usange wakumanyapo munthu munyake uyo wangasanga  chandulo na fundo yinyake iyo wasambira mu Baibolo. Kufuma apo movwirani umo wangayowoyera fundo iyo mu nthowa yipusu. Usange ntchakwenelera, mungayezgelera nayo mwakulondezga ivyo vili pasi pa chigaŵa chakuti “Ivyo Ŵanyake Ŵakuyowoya” kweniso pa chigaŵa chakuti “Ŵanyake Ŵangafumba Kuti,” ivyo vili mu buku lakuti Mungakondwa na Umoyo Kwamuyirayira! Apo mukuyezgelera, chilato chinu chiŵe cha kovwira msambiri winu kugwiliskira ntchito Baibolo kuti wakazgore mwaluso kweniso kupeleka zgoro lipusu.

17. Kasi tingagwiliskira wuli ntchito lemba la Mateyu 10:19, 20, 29-31 kuti tovwire msambiri withu kuthemba Yehova?

¹⁷ Wovwirani msambiri winu kugomezga Yehova. Yesu wakaphalira ŵasambiri ŵake kuti Yehova waŵawovwirenge chifukwa wakuŵatemwa. (Ŵazgani Mateyu 10:19, 20, 29-31.) Mukumbuskani msambiri winu kuti nayo Yehova wamovwirenge. Mungamovwira kuti wathembenge Yehova mwakulombera nayo lumoza za vilato vyake ivyo wali navyo. Franciszek uyo wakukhala ku Poland wakuti: “Msambizgi wane kanandi wakazunuranga vilato vyane mu malurombo ghake. Nkhati nawona umo Yehova wakazgolera malurombo gha msambizgi wane, nane mwaluŵiro nkhamba kulomba. Nkhawona kuti Yehova wakanovwira apo nkhapempha ku ntchito kuti nkhaŵepo pa ungano wa chigaŵa kweniso kuti niwunganenge na mpingo.”

18. Kasi Yehova wakuwuwona wuli mulimo wakusambizga uwo Ŵakhristu ŵakuchita?

¹⁸ Yehova wakuŵikako mahara chomene ku ŵasambiri ŵithu ŵa Baibolo. Wakuwonga chomene umo ŵasambizgi Ŵachikhristu ŵakulimbikilira pakovwira ŵanthu kusendelera kwa iyo, ndipo wakuŵatemwa chomene. (Yes. 52:7) Nanga mungaŵa kuti mulije sambiro la Baibolo pasono, kweni nipera mungawovwira ŵasambiri ŵa Baibolo mwakuluta na ŵapharazgi ŵanyake ku masambiro ghawo.