1. Kuyana na Salimo 18:​46, kasi Davide wakamuyaniska Yehova na vichi?

 TIKUKHALA mu charu icho tingasangana na masuzgo mwamabuchi, ndipo masuzgo agha ghangasintha chomene umoyo withu. Kweni tikuwonga chomene kuti tili na mwaŵi wakuti tingalomba wovwiri kwa Yehova Chiuta. Mu nkhani iyo yajumpha, tikakumbuskika kuti Yehova ni Chiuta wamoyo ndipo nyengo zose ngwakunozgeka kutovwira. Para watovwira vikutisimikizgira kuti “Yehova ngwamoyo.” (Ŵazgani Salimo 18:46.) Ndipouli, Davide wakati wayowoya mazgu agha, wakachema Chiuta kuti “Jalawe lane.” Chifukwa wuli wakayaniska Yehova Chiuta wamoyo, na jalawe, chinthu icho ntchambura umoyo?

2. Kasi tisambirenge vichi ku mazgu agho Davide wakayowoya ghakuti Yehova ni “Jalawe lane”?

² Mu nkhani iyi, tiwonenge chifukwa icho Yehova wakuchemekera kuti ni jalawe, kweniso ivyo mazgu agha ghakutisambizga vyakukhwaskana na iyo. Tiwonengeso umo tingachitira kuti timuwonenge kuti iyo ni Jalawe lithu. Paumaliro tiwonengeso umo tingachitira kuti tiyezge mikhaliro yake.

CHIFUKWA ICHO YEHOVA WAKUCHEMEKA KUTI JALAWE

3. Kasi kanandi Baibolo likutemwa kugwiliskira ntchito lizgu lakuti “jalawe” panyengo wuli? (Wonani chithuzi.)

³ Baibolo likugwiliskira ntchito lizgu lakuyelezgera lakuti “jalawe” kuti litovwire kupulikiska mikhaliro ya Yehova. Kanandi lizgu ili likuwoneka mu nkhani izo zikulumba Chiuta, kuti palije wakuyana nayo. Pakwamba apo Yehova wakuyowoyeka kuti ni jalawe mpha Dotoronome 32:4. Mu lurombo, Hana wakayowoya kuti  “kulije jalawe lakuyana na Chiuta withu.” (1 Sam. 2:2) Habakuku wakachema Yehova kuti “Jalawe lane.” (Hab. 1:12) Uyo wakalemba Salimo 73 wakachema Chiuta kuti “jalawe la mtima wane.” (Sal. 73:26) Ndipo nanga ni Yehova iyomwenecho wakajiyowoya kuti ni jalawe. (Yes. 44:8) Tiyeni sono tidumbiskane mikhaliro yitatu iyo yikupangiska Yehova kuŵa jalawe, kweniso tiwone umo ise tingachitira kuti waŵe “Jalawe lithu.”—Doto. 32:31.

4. Kasi Yehova wakuŵa wuli malo ghakubisamamo? (Salimo 94:22)

⁴ Yehova ni malo ghithu ghakubisamamo. Nga umo vingaŵira kuti munthu wangabisama ku jalawe likuru para kuli chimphepo chakofya, mwakuyana waka Yehova nayo wakutivikilira ku vinthu ivyo vingananga umoyo withu. (Ŵazgani Salimo 94:22.) Iyo wakutivikilira na kuwoneseska kuti palije icho chingatipweteka kwamuyirayira. Ndipo wakutilayizgaso kuti munthazi wazamuwuskapo chilichose icho chikutipangiska kuti tenjerwenge panji kusuzgika.—Ezek. 34:​25, 26.

5. Kasi tingachita wuli kuti Yehova waŵe malo ghithu ghakubisamamo?

⁵ Chinthu chimoza icho tingachita kuti Yehova waŵe malo ghithu ghakubisamamo, nkhumulomba. Para tikulomba, Yehova wakutipa ‘mtende wake’ uwo ukuvikilira mitima yithu na maghanoghano ghithu. (Fil. 4:​6, 7) Wonani ivyo vikachitikira Artem, mubali uyo wakajalirika mu jele chifukwa cha chipulikano chake. Wakufufuza mulandu uyo wakaŵaso wankhaza wakamuphulunga na mafumbo kanandi waka, kweniso wakamuchitiranga nkhaza na kumofya. Artem wakati: “Nyengo yiliyose nkhafipanga chomene mtima para namufumbika mafumbo. . . . Ndipo nyengo zose nkhamulombanga Yehova. Nkhamupemphanga kuti wanipe mtende wa mu mtima kweniso vinjeru. Nangauli nkhatambuzgikanga nthena, kweni nkhatenthema yayi. . . Na wovwiri wa Yehova, nkhaŵa nga nimilira kuseri kwa linga lakuzengeka na malibwe.”

6. Chifukwa wuli nyengo zose tikwenera kumuthemba Yehova? (Yesaya 26:​3, 4)

⁶ Yehova ngwakugomezgeka. Nga umo vikuŵira kuti jalawe likusezgeka yayi, Yehova nayo nyengo zose waŵengepo. Tingamugomezga chifukwa iyo ni “Jalawe lamuyirayira.” (Ŵazgani Yesaya 26:​3, 4.) Nyengo zose waŵenge wamoyo ndipo wafiskenge ivyo walayizga, kupulika malurombo ghithu, kweniso kutipa wovwiri uwo tikukhumbikwira. Tingamugomezgaso Yehova chifukwa iyo ngwakugomezgeka ku awo ŵakumuteŵetera. (2 Sam. 22:26) Wazamuluwapo yayi ivyo tikuchita, kweniso nyengo zose watitumbikenge.—Heb. 6:10; 11:6.

7. Kasi tisangenge chandulo wuli para tithembenge Yehova? (Wonaniso chithuzi.)

⁷ Yehova wangaŵa Jalawe lithu para tikumugomezga na mtima wose. Tikumanyaso kuti tisangenge chandulo para tikumupulikira nanga ni mu nyengo zakusuzga. (Yes. 48:​17, 18) Nyengo yiliyose para tawona kuti watovwira timugomezgenge chomene. Ivi vitovwirenge kuti tigomezgenge chomene kuti Yehova watovwirenge pa suzgo lililose ilo tasangana nalo nanga lingaŵa lakusuzga wuli. Ndipo kanandi para tasangana na suzgo ilo tikuwona kuti  palije watovwirenge, tikumanya kuti Yehova walipo ndipo watovwirenge. Vladimir wakati: “Apo nkhajalirika ndipo nkhawona kuti nili pafupi chomene na Yehova. Nkhasambira kumugomezga chomene chifukwa panyengo iyi nkhaŵa waka nekha ndipo ni Yehova pera wakaŵa kuti wanganovwira.”

8. (a) Chifukwa wuli tingayowoya kuti Yehova wakusintha yayi? (b) Kasi tikupindura wuli chifukwa chakuti Chiuta ni Jalawe lithu? (Salimo 62:​6, 7)

⁸ Yehova wakusintha yayi. Nga umo lili jalawe likuru, Yehova nayo ngwakukhora ndipo wakusintha yayi. Wakusintha yayi wunthu wake kweniso khumbo lake. (Mal. 3:6) Ŵanthu ŵakwamba ŵakati ŵamugalukira mu Edeni, Yehova wakasintha yayi khumbo lake. Mpositole Paulosi wakalemba kuti Yehova “wangajikana yayi.” (2 Tim. 2:13) Ichi chikung’anamura kuti kwali pangachitika chinthu wuli, Yehova wazamusinthapo yayi wunthu wake, khumbo lake, panji fundo zake. Chifukwa chakuti Chiuta wakusintha yayi, tikumanya kuti watovwirenge mu nyengo zakusuzga kweniso kuti wafiskenge ivyo walayizga munthazi.—Ŵazgani Salimo 62:​6, 7.

9. Kasi tikusambirako vichi ku ivyo vikachitikira Tatyana?

⁹ Yehova wangaŵaso Jalawe lithu para nyengo zose tikughanaghanira vya wunthu wake kweniso khumbo lake. Kuchita nthena kutovwirenge kuti tileke kusunkhunyika para tasangana na viyezgo. (Sal. 16:8) Umo ndimo vikaŵiraso na mudumbu munyake zina lake Tatyana, uyo wakaŵikika pa jele la pa nyumba chifukwa cha chipulikano chake. Iyo wakati: “Nkhaŵa waka nekha kwambura waliyose. Pakwamba chikaŵa chakusuzga chomene. Kanandi nkhafipanga mtima.” Ndipouli, wakati wamba kughanaghanirapo chomene za Yehova na khumbo lake, vikamovwira kuti mtima wake ukhazikike kweniso kuti wasange nkhongono zakuzizipizgira chiyezgo ichi. Iyo wakati: “Kumanya chifukwa icho ivi vikanichitikiranga, vikanovwira kukumbuka kuti nkhusangana na chiyezgo ichi chifukwa chakuti nkhuteŵetera Yehova. Ivi vikanovwira kuti nileke kujighanaghanira waka nekha.”

10. Kasi Yehova wangaŵa wuli Jalawe lithu sono?

¹⁰ Munthazi umu tikumanenge na masuzgo agho ghakhumbikwirenge kuti tigomezgenge chomene Yehova kuluska kumasinda kose. Ntheura sono ndiyo nyengo yakuti tikhozgere chigomezgo chithu chakuti watovwirenge kulutilira kugomezgeka para tasangana na masuzgo. Kasi tingachita wuli nthena? Tiŵazgenge nkhani za mu Baibolo kweniso ivyo vikuchitikira Ŵakaboni ŵa Yehova ŵamazuŵa ghano. Kweniso tiwonenge umo Chiuta walongolera mikhaliro yake kuti wawovwire ŵateŵeti ŵake. Tighanaghanirengeposo chomene pa nkhani izi. Para tichitenge nthena Yehova waŵenge Jalawe lithu.

YEZGANI MIKHALIRO YA YEHOVA

11. Chifukwa wuli tikwenera kuyezga mikhaliro ya Yehova? (Wonaniso bokosi lakuti “ Chilato Icho Ŵabali Ŵachinyamata Ŵangajiŵikira.”)

¹¹ Tawona umo Yehova walongolera kuti wali nga ni jalawe. Sono wonani umo tingayezgera mikhaliro yake. Para tikuŵikapo mtima kuyezga mikhaliro yake, tikhozgenge ŵabali na ŵadumbu  mu mpingo. Mwachiyelezgero, Yesu wakamupa Simoni zina lakuti Kefase (kung’anamura “Petrosi”), ndipo zina ili likung’anamura kuti “Libwe.” (Yoh. 1:42) Fundo iyi yikang’anamuranga kuti Petrosi wazamuŵa ntchindamiro ya mpingo ndipo wazamukhozganga ŵabali. Ŵalara ŵa mpingo ŵakulongosoreka kuti iwo ni “mfwiri wa jalawe likuru.” Ichi chikung’anamura kuti ŵakuvikilira mpingo. (Yes. 32:2) Ndipouli, tose mu mpingo tingakhozgana yumoza na munyake para tikuyezga mikhaliro ya Yehova.—Efe. 5:1.

12. Longosorani ivyo tingachita kuti tiŵe malo ghakubisamamo ku ŵanji.

¹² Muŵe malo ghakubisamamo. Nyengo zinyake tingaŵapa ŵabali malo ghakukhala para kwachitika soka la chilengiwa, vivulupi, panji nkhondo. Apo vinthu vikuhenipirahenipira mu “mazuŵa ghaumaliro” agha, mwambura kukayika tili na mipata yinandi yakovwilirana. (2 Tim. 3:1) Tingaŵakhozgaso ŵabali na ŵadumbu ŵithu. Nthowa yimoza, nkhuŵapokelera pa Nyumba ya Ufumu na kuchezga nawo. Ivi viwovwirenge kuti ŵajiwonenge kuti ŵakutemweka. Tikukhala mu charu icho ntchakusuzga kweniso cha nkhaza. Ntheura para ŵabali na ŵadumbu ŵiza ku maungano tikwenera kuchita vyose ivyo tingafiska kuti ŵasamphuskike kweniso kuti ŵajiwonenge kuti ŵakutemweka.

13. Kasi mphanyengo wuli apo chomene ŵalara ŵakwenera kuŵa malo ghakubisamamo ku ŵanji? (Wonaniso chithuzi.)

¹³ Ŵalara ŵangaŵa malo ghakubisamamo ku ŵabali na ŵadumbu mu mpingo awo ŵakusangana na masuzgo ghakupambanapambana agho ghali nga ntchimphepo. Para kwachitika masoka ghachilengiwa kweniso ŵabali na ŵadumbu ŵakukhumbikwira wovwiri wa chipatala, ŵalara ŵakuchita vinthu mwaluŵiro kuti ŵawovwirepo. Ŵakupelekaso wovwiri wauzimu. Ŵabali na ŵadumbu chiŵaŵirenge chipusu kumufikira mulara para ngwaubwezi, ngwalusungu kweniso ngwakutegherezga. Mikhaliro iyi yikovwira ŵanji kuwona kuti ŵakutemweka, ndipo chikuŵa  chipusu kwa iwo kupulikira ulongozgi wa mu Baibolo uwo ŵalara ŵakuŵapa.—1 Tes. 2:​7, 8, 11.

14. Kasi tingalongora wuli kuti ndise ŵakugomezgeka?

¹⁴ Muŵe ŵakugomezgeka. Ŵanji ŵakwenera kutigomezga kuti tiŵawovwirenge, chomenechomene panyengo ya masuzgo. (Zinth. 17:17) Kasi tingachita wuli kuti ŵanji ŵatigomezgenge? Tikwenera kufwilirapo kulongora mikhaliro ya Chiuta nyengo zose, nga nkhufiska ivyo talayizga kweniso kusunga nyengo. (Mat. 5:37) Tingawovwiraso mubali na mudumbu uyo wasoŵerwa. Kweniso tikwenera kuwoneseska kuti tikufiska uteŵeti uwo tapika mwakuyana na ulongozgi uwo ulipo.

15. Kasi mpingo ukupindura wuli para ŵalara mbakugomezgeka?

¹⁵ Ŵalara ŵakugomezgeka ni thumbiko ku mpingo. Mwawuli? Ŵapharazgi ŵakujipulika makora chomene para ŵangapempha wovwiri ku ŵalara nyengo yiliyose, nga nkhu mulaŵiliri wa kagulu kawo ka uteŵeti. Ŵapharazgi ŵakujipulikaso kuti ŵakutemweka para ŵamanya kuti ŵalara mbakunozgeka kuŵawovwira nyengo yiliyose. Kweniso para ŵalara ulongozgi wawo ukufuma  mu Baibolo na mabuku gha muzga wakugomezgeka na wavinjeru m’malo mwakupeleka maghanoghano ghawo, ŵabali na ŵadumbu mu mpingo ŵakuŵagomezga. Ŵabali na ŵadumbu ŵakuŵagomezgaso chomene ŵalara para ŵakusunga chisisi kweniso ŵakufiska ivyo ŵalayizga kuti ŵaŵachitirenge.

16. Kasi ise para tikuleka kusinthasintha tikupindura wuli kweniso ŵanji ŵakupindura wuli?

¹⁶ Muŵe ŵambura kusinthasintha. Tingaŵaso chiyelezgero chiwemi ku ŵanji para nyengo zose tikuchita icho ntchakunyoloka kweniso ivyo tikusankha vikujintha pa fundo za mu Baibolo. Apo chipulikano chithu chikulutilira kuŵa chakukhora kweniso tikulutilira kumanya vinandi vyakukhwaskana na Chiuta, tikuŵa ŵanthu ŵambura kusunkhunyika pa nkhani ya unenesko. Kweniso tikupusikika yayi na visambizgo vyautesi na kaghanaghaniro ka charu. (Efe. 4:14; Yak. 1:​6-8) Para tapulika nkhani ziheni chipulikano chithu mwa Yehova kweniso mu malayizgo ghake chikutovwira kuti mtima withu uŵe mu malo. (Sal. 112:​7, 8) Kweniso tikuŵa ŵakunozgeka kovwira awo ŵasangana na masuzgo.—1 Tes. 3:​2, 3.

17. Kasi ntchivichi chikovwira ŵalara kuti ŵawovwirenge ŵanji?

¹⁷ Ŵalara ŵakwenera kuŵa ŵakujikora mu vyakuchita, ŵamahara, ŵakulongosoka, kweniso ŵakupulikiska. Ŵanalume aŵa ŵakovwira ŵanji kuti mtima uŵe mu malo kweniso ŵaŵe na chipulikano chakukhora mwa Yehova, ndipo ŵakukhozga mpingo ‘pakukoleska mazgu ghakugomezgeka.’ (Tito 1:9; 1 Tim. 3:​1-3) Kwizira mu chiyelezgero chawo chiwemi na maulendo ghauliska agho ŵakuchita, ŵakovwira ŵapharazgi kuti nyengo zose ŵaunganenge, ŵapharazgenge kweniso ŵasambirenge paŵekha. Para ŵabali na ŵadumbu ŵasangana na masuzgo agho ghakuŵapangiska kuti ŵenjerwenge, ŵalara ŵakuŵawovwira pakuŵakumbuska kuti ŵakwenera kulutilira kuthemba Yehova na kuŵika mtima pa malayizgo ghake.

18. Chifukwa wuli tikwenera kulumba Yehova na kuŵa ŵabwezi ŵake kwamuyirayira? (Wonaniso bokosi lakuti “ Umo Tingaŵira Paubwezi na Yehova.”

¹⁸ Pamanyuma pakuwona mikhaliro yakukondweska ya Yehova, nase tingayowoya nga ni Themba Davide kuti: “Walumbike Yehova, Jalawe lane.” (Sal. 144:1) Nyengo zose tikwenera kumuthemba Yehova chifukwa wazamutondekapo yayi. Nanga tingaŵa kuti tachekura kwali yayi, kweni tili na chifukwa chakuyowoyera kuti: “[Yehova] ni Jalawe Lane,” chifukwa tikugomezga kuti nyengo zose watovwirenge kuti tilutilire kuŵa paubwezi wakukhora na iyo.—Sal. 92:​14, 15.