Kuti tikondweske Yehova tikwenera kuŵa na chipulikano. Kweni Baibolo likuti “chipulikano chili na ŵanthu wose yayi.” (2 Tes. 3:2) Apo Paulosi wakayowoyanga mazgu agha, wakang’anamuranga “ŵanthu ŵaheni na ŵakwananga” awo ŵakamutambuzganga. Kweni ivyo wakayowoya vyakukhwaskana na chipulikano vikukhwaska tose. Ŵanthu ŵanyake ŵakugomezga yayi kuti kuli Chiuta uyo ni Mlengi nangauli pali maukaboni ghanandi. (Rom. 1:20) Ŵanyakeso ŵakugomezga kuti kuli nkhongono yinyake yikuru chomene. Kweni kuŵa waka na chigomezgo chanthena nkhwakukwana yayi kuti munthu wakondweske Yehova.

Tikwenera kukhorwa kuti Yehova waliko ndipo “wakuŵapa njombe” awo ŵali na chipulikano chakukhora. (Heb. 11:6) Chipulikano ntchimoza mwa vipambi vya mzimu utuŵa. Kuti tipokere mzimu utuŵa tikwenera kulomba kwa Yehova. (Luka 11:​9, 10, 13) Nthowa yinyakeso yakuzirwa iyo tingachita kuti tipokere mzimu utuŵa, nkhuŵazga Mazgu ghake Baibolo. Kufuma apo, tikwenera kughanaghanirapo pa ivyo taŵazga na kuvilondezga. Para tachita nthena, mzimu wa Yehova utovwirenge kuti tichitenge vinthu vyakulongora kuti tili na chipulikano ndipo paumaliro timukondweskenge.