NKHANI YAKUSAMBIRA 25
SUMU 7 Yehova Ndiyo Nkhongono Zithu
Mukumbukenge Kuti Yehova Ni “Chiuta Wamoyo”
“Yehova ngwamoyo!”—SAL. 18:46.
FUNDO YIKURU
Nkhani iyi yitovwirenge kumanya kuti tikusanga chandulo chikuru chomene para tikukumbuka kuti Chiuta uyo tikusopa ni “Chiuta wamoyo.”
1. Kasi ntchivichi chikovwira ŵateŵeti ŵa Yehova kuti ŵalutilire kumuteŵetera nangauli ŵakusangana na masuzgo?
BAIBOLO likuti tikukhala mu “nyengo zinonono na zakusuzga.” (2 Tim. 3:1) Padera pa masuzgo agho ŵanthu wose ŵakusangana nagho mu charu ichi, ŵanthu ŵa Yehova ŵakususkika kweniso kutambuzgika. Kasi ntchivichi chikutovwira kuti tilutilire kusopa Yehova nangauli tikusangana na masuzgo ghose agha? Chinthu chimoza icho chikutovwira ntchakuti tikumanya kuti Yehova ni “Chiuta wamoyo.”—Yer. 10:10; 2 Tim. 1:12.
2. Kasi Yehova ni Chiuta wamoyo munthowa wuli?
2 Yehova ngwanadi ndipo wakutovwira para tasangana na viyezgo, kweniso nyengo zose wakupenjerezga mipata yakutovwilira. (2 Mid. 16:9; Sal. 23:4) Para tikukumbuka kuti Yehova ni Chiuta wamoyo vitovwirenge kuzizipizga chiyezgo chilichose icho tingasangana nacho. Wonani umo fundo iyi yikawovwilira Themba Davide.
3. Kasi Davide wakang’anamuranga vichi apo wakayowoya kuti “Yehova ngwamoyo”?
3 Davide wakamumanyanga makora Yehova ndipo wakamugomezganga. Apo Davide wakachimbiranga ŵalwani ŵake, kusazgapo Themba Sauli, wakalomba Yehova kuti wamovwire. (Sal. 18:6) Chiuta wati wazgora lurombo lwake na kumuponoska, Davide wakayowoya kuti: “Yehova ngwamoyo!” (Sal. 18:46) Kasi apa wakang’anamuranga vichi? Buku linyake likuti apa Davide wakadidimizganga fundo yakuti Yehova ni “Chiuta wamoyo, ndipo nyengo zose wakovwira ŵanthu ŵake.” Kwizira pa ivyo vikamuchitikira, Davide wakamanya kuti Chiuta wake ngwamoyo ndipo ivi vikamovwira kuti walutilire kulumba Yehova na kumuteŵetera.—Sal. 18:28, 29, 49.
4. Kasi tikusanga chandulo wuli usange takhorwa kuti Yehova ni Chiuta wamoyo?
4 Para takhorwa kuti Yehova ni Chiuta wamoyo vitovwirenge kuti timuteŵeterenge na mtima wose. Tiŵenge na nkhongono zakuzizipizgira viyezgo kweniso kulutilira kuŵikapo mtima pa uteŵeti uwo wali kutipa. Tiŵikengeposo mtima kuŵa paubwezi wakukhora na Yehova.
CHIUTA WAMOYO WAMUPANINGE NKHONGONO
5. Kasi tikwenera kuŵa na chigomezgo wuli apo tikusangana na masuzgo? (Ŵafilipi 4:13)
5 Para tikukumbuka kuti Yehova ni Chiuta wamoyo ndipo ngwakunozgeka kutovwira, tizizipizgenge suzgo lililose ilo tingasangana nalo kwali ndikuru panji lichoko. Nakuti palije suzgo ilo Chiuta wangatondeka kumarana nalo. Iyo Ngwankhongonozose, ndipo wangatipa nkhongono zakuzizipizgira. (Ŵazgani Ŵafilipi 4:13.) Ntheura tili na vifukwa vyakukwana vyakuzizipizgira para tasangana na viyezgo. Para tawona umo Yehova wakutovwilira para tasangana na viyezgo vichokovichoko, tingaŵa na chigomezgo chose kuti watovwirengeso usange tasangana na viyezgo vikuru.
6. Kasi ni vinthu wuli ivyo vikachitikira Davide apo wakaŵa musepuka ivyo vikamovwira kuti wagomezgenge chomene Yehova?
6 Wonani vinthu viŵiri ivyo vikamuchitikira Davide, ivyo vikamovwira kuti wagomezgenge chomene Yehova. Apo wakaŵa musepuka nkhalamira na nkhalamu vikakolapo mberere za awiske izo wakaliskanga. Pa maulendo ghose ghaŵiri Davide mwachikanga wakalimbana navyo vinyama ivi na kuponoska mberere. Kweni wakaghanaghanapo yayi kuti wakachita ivi na nkhongono zake. Wakamanya kuti Yehova ndiyo wakamovwira. (1 Sam. 17:34-37) Davide wakaluwa yayi ivyo vikachitika apa. Chifukwa cha kughanaghanirapo vinthu ivi, vikamovwira kuŵa na chigomezgo chose kuti Chiuta wamoyo wamovwirenge na munthazi wuwo.
7. Kasi kuwona vinthu mwakwenelera kukamovwira wuli Davide kuti warwe na Goliyati?
7 Pamanyuma, apo wakaŵa kuti ni munyamata Davide wakaluta ku msasa wa ŵasilikari ŵa Israyeli. Wakasanga ŵankhondo ŵali na wofi chifukwa Goliyati uyo wakaŵa chinkhara cha Ŵafilisiti ‘wakanyozanga ŵankhondo ŵa Israyeli.’ (1 Sam. 17:10, 11) Ŵankhondo ŵakachitanga wofi chifukwa ŵakaŵika mtima pa umo Goliyati wakawonekeranga kweniso pa mazgu agho wakaŵanyozanga nagho. (1 Sam. 17:24, 25) Ndipouli, Davide wakawonanga vinthu mwakupambanako. Iyo wakamanya kuti apo Goliyati wakanyozanga ŵankhondo ŵa Israyeli wakanyozangaso “Chiuta wamoyo.” (1 Sam. 17:26) Davide wakaghanaghaniranga chomene za Yehova. Iyo wakagomezganga kuti Chiuta uyo wakamovwira panyengo iyo wakaŵa muliska wamovwirengeso panyengo iyi. Na wovwiri wa Chiuta, Davide wakarwa na Goliyati na kumuthereska!—1 Sam. 17:45-51.
8. Kasi tingachita wuli kuti tigomezgenge chomene Yehova para takumana na masuzgo? (Wonaniso chithuzi.)
8 Nase tingafiska kuzizipizga masuzgo usange tikukumbuka kuti Chiuta wamoyo ngwakunozgeka kutovwira. (Sal. 118:6) Tingaŵa na chigomezgo chose kuti Yehova watovwirenge, usange tikughanaghanirapo pa ivyo wali kuchitapo kale kumanyuma. Muŵazgenge nkhani za mu Baibolo izo zingamukumbuskani umo Yehova wakaponoskerapo ŵateŵeti ŵake kumanyuma. (Yes. 37:17, 33-37) Kweniso, muŵazgenge na kuwonelera malipoti agho ghakusangika pa webusayiti yithu ya jw.org kuti muwone umo Yehova wakovwilira ŵabali na ŵadumbu mazuŵa ghano. Chinyakeso ntchakuti mukumbukenge umo Yehova wamovwiliranipo. Kufipa mtima yayi usange mukuwona kuti Yehova wandamovwiranipo mwakuzizwiska, nga nkhukoma nkhalamira na nkhalamu. Chifukwa wuli? Fundo njakuti Yehova wamovwirani mu vinandi pa umoyo winu! Wali kumuguzani kuti muŵe nayo paubwezi. (Yoh. 6:44) Nanga ni sono nthena muchali mu unenesko chifukwa chakuti Yehova ndiyo wakumovwirani. Mwalekerachi kumulomba kuti wamukumbuskani nyengo iyo wakazgora malurombo ghinu, kumupani wovwiri uwo mukakhumbikwiranga panyengo yakwenelera, kweniso kumovwirani panyengo iyo mukasangana na suzgo likuru? Para mukughanaghanirapo pa vinthu ivi vimovwiraninge kuti mumugomezgenge chomene Yehova kuti walutilirenge kumovwirani.
Para takumana na masuzgo timanye kuti ntchigaŵa cha nkhani yikuru iyo yili pakati pa Yehova na Satana (Wonani ndime 8-9)
9. Kasi tikwenera kughawona wuli masuzgo ghithu? (Zintharika 27:11)
9 Usange tikugomezga kuti Yehova ngwanadi vitovwirenge kuti tiwonenge masuzgo mwakwenelera. Munthowa wuli? Tikwamba kuwona masuzgo ghithu kuti ntchigaŵa cha nkhani yikuru iyo yili pakati pa Yehova na Satana. Dyabulosi wakuti para tingasangana na masuzgo mbwenu tingaleka kuteŵetera Yehova. (Yobu 1:10, 11; ŵazgani Zintharika 27:11.) Kweni para tafiska kuzizipizga masuzgo tikulongora kuti tikumutemwa Yehova kweniso kuti Dyabulosi ni mutesi. Kasi uko mukukhala boma likumususkani, mukusangana na masuzgo gha vyachuma, ŵanthu wakunweka yayi na uthenga winu, panyake mukusangana na masuzgo ghanyake? Usange ni nthena, kumbukani kuti masuzgo agha ghakumupani mwaŵi wakuti mukondweske mtima wa Yehova. Kumbukaniso kuti iyo wazomerezgenge yayi kuti musangane na chiyezgo icho mungatondeka kuzizipizga. (1 Kor. 10:13) Iyo wamupaninge nkhongono zakuzizipizgira.
CHIUTA WAMOYO WAZAMUMUPANI NJOMBE
10. Kasi Chiuta wamoyo waŵachitirenge vichi awo ŵakumusopa?
10 Yehova wakuŵapa njombe awo ŵakumusopa. (Heb. 11:6) Wakutipa mtende kweniso umoyo wakukhorweska sono ndipo kunthazi wazamutipa umoyo wamuyirayira. Tili na chigomezgo chose kuti Yehova wakukhumba chomene kutipa njombe ndipo iyo wali na nkhongono zakuchitira nthena. Ivi vikutituma kuti tilimbikirenge chomene kumuteŵetera nga umo ŵakachitiranga ŵateŵeti ŵa Chiuta ŵa mu nyengo yakale. Umu ndimo Timote wakachitira.—Heb. 6:10-12.
11. Kasi ntchivichi chikawovwira Timote kuti walimbikirenge chomene milimo mu mpingo? (1 Timote 4:10)
11 Ŵazgani 1 Timote 4:10. Timote wakagomezganga kuti Chiuta wamoyo wamupenge njombe. Lekani wakalimbikiranga kuteŵetera Yehova kweniso ŵanji. Kasi wakachita wuli? Mpositole Paulosi wakachiska Timote kuti wasazgireko luso lwake lwa kupharazga kweniso kusambizga mu mpingo. Paulosi wakaphaliraso Timote kuti waŵe chiyelezgero chiwemi ku Ŵakhristu ŵanyake, ku ŵana na ŵalara wuwo. Timote wakapikaso mauteŵeti ghanyake ghakusuzga agho ghakasazgangapo kupeleka ulongozgi wankhongono kweni mwachitemwa ku awo ŵakakhumbikwiranga ulongozgi wanthena. (1 Tim. 4:11-16; 2 Tim. 4:1-5) Nangauli nyengo zinyake ŵanji ŵakawonanga yayi ivyo Timote wakachitanga panji kumuwonga, kweni iyo wakaŵa na chigomezgo chose kuti Yehova wazamumupa njombe.—Rom. 2:6, 7.
12. Kasi ntchivichi chingakhukiska ŵalara kuti ŵalimbikirenge chomene milimo yawo? (Wonaniso chithuzi.)
12 Ŵalara nawo mazuŵa ghano ŵangaŵa na chigomezgo kuti Yehova wakuwona na kuzirwiska milimo yawo yiwemi. Padera pa kupharazga, kusambizga, kweniso kuchita maulendo ghauliska, ŵalara ŵanandi ŵakovwirapo pa ntchito ya vyakuzenga na uko kwachitika masoka. Ŵanyake ŵakuteŵetera mu Makomiti Ghakudumbiskana na Chipatala apo ŵanji mu Magulu Ghakwendera Ŵalwari. Ŵalara awo ŵakujipeleka pa milimo iyi ŵakuwona kuti mpingo ngwa Yehova, ngwa munthu yayi. Lekani iwo ŵakujipeleka na mtima wose pa mauteŵeti ghawo ndipo ŵali na chigomezgo chose kuti Chiuta wazamuŵapa njombe chifukwa cha ivyo ŵakuchita.—Kol. 3:23, 24.
Chiuta wamoyo wamutumbikaninge para mukulimbikira chomene milimo mu mpingo (Wonani ndime 12-13)
13. Kasi Yehova wakuviwona wuli ivyo tikumuchitira?
13 Tose tingaŵa yayi ŵalara. Kweni tose tili na chinyake icho tingamupa Yehova. Chiuta withu wakukondwa chomene para tikuchita vyose ivyo tingafiska kuti timuteŵetere. Iyo wakuwona para tikupeleka vyawanangwa vyakovwira pa ntchito ya pa charu chose nanga vingaŵa vichoko wuli. Ndipo wakukondwa chomene para tikuŵikapo mtima kumazga wofi, mwakuti tiwuske woko lithu na kuzgorapo pa maungano, kweniso para tikusurako maubudi gha ŵanji na kuŵagowokera. Nanga vingaŵa kuti mukuwona kuti mungafiska yayi kumuchitira vinandi Yehova nga umo imwe mukukhumbira, gomezgani kuti vichoko ivyo mukuchita wakuviwona ndipo wakuvizirwiska. Wakukondwa namwe chomene, ndipo wazamumupani njombe.—Luka 21:1-4.
LUTILIRANI KUŴA PAUBWEZI NA CHIUTA WAMOYO
14. Kasi kulutilira kuŵa paubwezi wakukhora na Yehova kungatovwira wuli kuti tilutilire kuŵa ŵakugomezgeka? (Wonaniso chithuzi.)
14 Usange Yehova ngwanadi kwa ise chiŵenge chipusu kulutilira kuŵa ŵakugomezgeka kwa iyo. Ndimo vikaŵira na Yosefe. Iyo wakakana kuchita uzaghali. Chiuta wakaŵa wanadi kwa iyo, ndipo wakakhumbanga yayi kumukwiyiska. (Gen. 39:9) Kuti Yehova waŵe wanadi kwa ise, tikwenera kupatura nyengo yakulomba kwa iyo na kusambira Mazgu ghake. Para tachita nthena ubwezi withu na iyo ukhorenge. Nga ni Yosefe, para nase tili paubwezi wakukhora na Yehova, tichitenge yayi chilichose icho chingamukwiyiska.—Yak. 4:8.
Kuŵa paubwezi na Chiuta wamoyo kungamovwirani kuti mulutilire kuŵa ŵakugomezgeka (Wonani ndime 14-15)
15. Kasi tingasambirako vichi ku ivyo vikachitikira Ŵaisrayeli mu mapopa? (Ŵahebere 3:12)
15 Awo ŵaluwa kuti Yehova ni Chiuta wamoyo, chingaŵa chipusu kuti ŵaleke kuŵa ŵakugomezgeka kwa iyo. Wonani ivyo vikachitikira Ŵaisrayeli apo ŵakaŵa mu mapopa. Iwo ŵakamanyanga kuti Yehova waliko kweni ŵakamba kukayikira kuti iyo wangaŵapwelelera nadi. Ŵakafika na pakuyowoya kuti: “Kasi Yehova wali pakati pithu panji yayi?” (Eks. 17:2, 7) Paumaliro ŵakamugalukira Chiuta. Ivyo ŵakachita ni chenjezgo kwa ise, ndipo tikwenera kugega kuŵa nga ndiwo.—Ŵazgani Ŵahebere 3:12.
16. Kasi ntchivichi chingayezga chipulikano chithu?
16 Mu charu ichi ntchipusu yayi kulutilira kuŵa paubwezi na Yehova. Ŵanandi ŵakukana kuti Chiuta waliko. Nakuti kanandi awo wakusulako fundo za Chiuta ŵakuwoneka nga vinthu vikuŵendera makora. Para tikuwona ivi vikuchitika, chipulikano chithu chingayezgeka. Nangauli tikumanya kuti Chiuta waliko, kweni tingamba kukayikira usange wangatovwira nadi. Uyo wakalemba Salimo 73 nayo nyengo yinyake ndimo wakamba kujipulikira. Wakawonanga ŵanthu awo wakasurangako malango gha Chiuta ŵakuwoneka ŵakukondwa na umoyo. Paumaliro wakamba kukayikira usange ntchakuzirwa nadi kuteŵetera Chiuta.—Sal. 73:11-13.
17. Kasi ntchivichi chitovwirenge kulutilira kuŵa paubwezi na Yehova?
17 Kasi ntchivichi chikawovwira wamasalimo kuti wasinthe maghanoghano ghake? Wakaghanaghanirapo vinthu ivyo vichitikirenge ŵanthu awo ŵakuteŵetera Yehova yayi. (Sal. 73:18, 19, 27) Wakaghanaghaniraposo vitumbiko ivyo vikwiza chifukwa cha kuteŵetera Chiuta. (Sal. 73:24) Nase tingachita makora kughanaghanirapo vitumbiko vyose ivyo Yehova watipa. Ghanaghanirani umo umoyo withu wate uŵirenge tiŵenge kuti tikuteŵetera Yehova yayi. Kuchita nthena kungatovwira kuti tilutilire kuŵa ŵakugomezgeka kwa Yehova ndipo nase tingayowoya nga ngwamasalimo uyo wakayowoya kuti: “Kwa ine, ntchiwemi kusendelera kwa Chiuta.”—Sal. 73:28.
18. Chifukwa wuli tikwenera yayi kopa ivyo vichitikenge munthazi?
18 Tingafiska kuzizipizga masuzgo ghose agho tingasangana nagho mu mazuŵa ghaumaliro agha, chifukwa tikuteŵetera “nga mbazga ŵa Chiuta wamoyo na waunenesko.” (1 Tes. 1:9) Chiuta withu ngwanadi ndipo wakovwira waliyose uyo wakumuteŵetera. Iyo wakawovwiranga ŵateŵeti ŵake ŵa mu nyengo yakale, ndipo nase watovwirenge. Sonosono apa tisanganenge na suzgo yikuru. Kweni tili tekha yayi, Yehova watovwirenge. (Yes. 41:10) Mphanyi tose takhwima mtima na kuyowoya kuti: “Yehova ni movwiri wane, nopenge chara.”—Heb. 13:5, 6.
SUMU 3 Nkhongono na Chigomezgo Chithu
