Nkhababika pa Disembala 22, 1929, ku Noville, muzi uchoko uwo uli na mafamu 9, kufupi na Bastogne, ku Belgian Ardennes. Nkhakondwanga chomene kukhala lumoza na ŵapapi ŵane ku mafamu. Ine na munung’una wane Raymond, zuŵa lililose tikakamanga mkaka kweniso kovwirapo pa ntchito za kuvuna para mbuto zacha. Mu muzi withu tikakolerananga chomene kweniso kovwirana.

Ŵapapi ŵane, Emile na Alice, ŵakaŵa Ŵakatolika ŵakujipeleka chomene. Nyengo zose pa Sabata ŵakalutanga ku Misa. Ndipouli, cha m’ma 1939, ŵapayiniya ŵakufuma ku England ŵakiza mu muzi withu, ndipo adada ŵakapika mwaŵi wakuti ŵalembeske kuti ŵapokerenge magazini mwezi uliwose ghakuchemeka kuti Consolation (iyo pasono yikumanyikwa kuti Wukani!). Adada ŵakamanya kuti ŵasanga unenesko ndipo ŵakamba kuŵazga Baibolo. Ŵati ŵaleka kuluta ku Misa, ŵazengezgani awo ŵakaŵa ŵabwezi ŵithu ŵakamba kuŵasuska chomene. Ŵakaŵachichizganga adada kuti ŵangafumangamo yayi mu Katolika ndipo ŵakakwesana kanandi waka pa nkhani iyi.

Vikaniŵinya chomene kuwona adada ŵakusuzgika nthena. Ivi vikanipangiska kuti nilombe wovwiri kwa Chiuta mu lurombo lwakufumira pasi pa mtima, ulo nangulongosora kukwambilira kwa nkhani iyi. Ŵazengezgani ŵithu ŵati ŵaleka kuŵasuzga adada nkhakondwa chomene mu mtima. Apa nkhakhorwa nadi kuti Yehova ‘ngwakupulika malurombo.’

Pa Meyi 10, 1940, charu cha Germany chikawukira charu cha Belgium, ndipo ŵanthu ŵanandi ŵakachimbira mu charu ichi. Mbumba yakwithu yikachimbilira kumwera kwa France. Apo tikaŵa mu nthowa, tikajumphanga mu malo ghakofya chomene umo  mukaŵa ŵankhondo ŵa Germany na France awo ŵakatimbananga.

Tati taweleraso ku famu yithu, tikasanga kuti katundu withu munandi wibika. Tikasangako waka ntcheŵe yithu zina lake Bobbie. Vyakuchitika ivi vikapangiska kuti nijifumbe kuti, ‘Chifukwa wuli kuli nkhondo na masuzgo ghanyake ghanandi?’

Pa nyengo iyi tikakhozgeka chomene na kwiza kwa Mubali Emile Schrantz, a uyo wakaŵa mulara kweniso mupayiniya wakugomezgeka. Wakalongosora mwakupulikikwa makora chomene kufuma mu Baibolo, chifukwa icho kuliri masuzgo, kweniso wakazgora mafumbo ghane ghanyake ghakukhwaskana na umoyo. Nkhamba kuŵa paubwezi wakukhora chomene na Yehova ndipo nkhakhorwa kuti Chiuta ngwachitemwa.

Nanga mpha nyengo iyo nkhondo yikaŵa mukati, mbumba yithu nyengo zose yikayowoyeskananga na ŵabali. Mu Ogasiti 1943, Mubali José-Nicolas Minet wakiza ku famu yithu kuzakadumba nkhani. Wakafumba kuti, “Ni njani wakukhumba kubatizika?” Ine na adada tose tikawuska mawoko. Tikabatizikira mu kadambo kachoko ako kakaŵa pafupi na famu yithu.

Mu Disembala 1944, charu cha Germany chikawukira vyaru vya kumanjiliro gha dazi kwa Europe. Kuwukira uku kukumanyikwa kuti the Battle of the Bulge. Tikakhalanga kufupi na uko nkhondo iyi yikachitikiranga, ndipo mwezi wose tikakhalanga waka mu nyumba. Zuŵa linyake apo nkhafuma kuwaro kukaliska viŵeto, mabomba ghakatimba nyumba iyo tikasungirangamo viŵeto ndipo ghakananga mtenje wake. Msilikari wa ku America uyo wakaŵa pafupi na uko tikasunganga viŵeto wakachemerezga kuti, “Gona pasi!” Nkhachimbira na kugona pafupi nayo ndipo wakanivwalika chisoti chake ku mutu kwane kuti niŵe wakuvikilirika.

Nkhondo yati yamara, nyengo zose tikayowoyeskananga na ŵabali na ŵadumbu ŵa mpingo wa Liège, mtunda wa makilomita 90 kumpoto kwa muzi withu. Nyengo yati yajumphapo, tikapanga kagulu ku Bastogne. Nkhamba ntchito ya kutolera misonkho ndipo nkhaŵa na mwaŵi wakusambira vyamalango. Kufuma apo nkhamba kugwira ntchito mu boma. Mu 1951 tikanozga vyakuti tiŵe na ungano wadera ku Bastogne. Pa ungano uwu pakaŵa ŵanthu pafupifupi 100, kusazgapo na mupayiniya wamwamphu, Mudumbu Elly Reuter. Wakatchova njinga mtunda wa makilomita 50 kuti wafike pa ungano. Na nyengo  wuwo yayi, mbwenu tikamba chibwezi na kupangana vyakuti titorane. Elly wakaŵa kuti wachemeka kuti wakanjire Sukulu ya Giliyadi ku United States. Wakalemba kalata ku ofesi yithu yikuru kulongosora chifukwa icho wanjilirenge yayi sukulu. Mubali Knorr uyo pa nyengo iyo wakadangiliranga ŵanthu ŵa Yehova, wakazgora mwalusungu kuti panji zuŵa linyake wangazakanjira sukulu iyi lumoza na mfumu wake. Tikatorana mu Febuluwale 1953.

Chaka chenechicho, ine na Elly tikaluta ku ungano wa mutu wakuti New World Society uwo ukachitikira ku Yankee Stadium, New York. Pa ungano uwu nkhasangana na mubali munyake uyo wakati pali mwaŵi wa ntchito yiwemi chomene, ndipo wakanichema kuti nisamukire ku United States. Pamanyuma pa kumuphalira Yehova mu lurombo nkhani iyi, ine na Elly tikakana mwaŵi wa ntchito uwu na kuwelera ku Belgium kuti tikawovwire kagulu kachoko ka ŵapharazgi 10 ku Bastogne. Chaka chakulondezgapo tikakondwa chomene kuŵa na mwana mwanalume, zina lake Serge. Chachitima ntchakuti myezi 7 yati yajumphapo, Serge wakalwara na kufwa. Tikaŵa na chitima chomene ndipo tikamuphalira Yehova mu lurombo umo tikajipulikiranga. Tikakhozgeka chomene na chilindizga cha chiwuka.

Mu Okutobala 1961, nkhasanga ntchito iyo yikatenge yinipenge m’pata wakuti ningachita upayiniya. Kweni zuŵa leneliro nkhapokera foni kufuma kwa muteŵeti wa munthavi ku Belgium. Wakanipempha usange ningafiska kuti niŵe muteŵeti wadera (uyo sono wakuchemeka kuti mulaŵiliri wadera). Nkhafumba kuti: “Kasi tingachitapo dankha yayi upayiniya wanyengozose pambere tindambe uteŵeti wadera?” Ŵakazomerezga ivyo nkhapempha. Tati tateŵeterapo nga ŵapayiniya ŵanyengozose kwa myezi 8, tikamba uteŵeti wakwendera dera mu Seputembala 1962.

Vyaka viŵiri vyati vyajumphapo uku tikwendera dera, tikachemeka kuti tikambe kuteŵetera pa Beteli ku Brussels. Tikamba kuchita uteŵeti uwu mu Okutobala 1964. Tikatumbikika chomene chifukwa cha uteŵeti uphya uwu. Nyengo yichoko waka pamanyuma pakuti Mubali Knorr wendera Beteli yithu mu 1965, nkhazizwa chomene kuti nkhimikika kuŵa muteŵeti wa munthavi. Pamanyuma, ine na Elly tikachemeka kuti tikanjire kilasi nambara 41 la Sukulu ya Giliyadi. Mazgu agho wakayowoya Mubali Knorr vyaka 13 kumanyuma, apa ghakafiskika. Tati tamalizga masambiro, tikawelera ku Beteli ya Belgium.

Kwa vyaka vinandi naŵa na mwaŵi wakugwiliskira ntchito ivyo nkhasambira vyakukhwaskana na malango pa kuvikilira wanangwa withu wakusopa ku Europe kweniso vyaru vinyake. (Fil. 1:7) Ivi vyapangiska kuti nidumbiskane na ŵamazaza ŵa mu vyaru vyakujumpha 55 uko ntchito yithu yikaŵa yakukanizgika panji uko yikalekeskekerathu. M’malo mwa kuŵaphalira ivyo nkhumanya vyakukhwaskana na vya malango, nkhaŵaphaliranga waka kuti ndine “munthu wa Chiuta.” Nyengo zose nkhalombanga Yehova kuti wanilongozge chifukwa nkhamanyanga kuti “mtima wa themba [panji kuti mweruzgi] uli nga nthumilonga twa maji mu woko la Yehova. Wakuwulongozgera kulikose uko wakhumba.”—Zinth. 21:1.

Chakuchitika chimoza icho nkhuluwa yayi, ni ivyo vikachitika apo nkhaluta kukakumana na yumoza wa mu Mphara ya Malango ku Europe. Nkhaŵa kuti namupempha kanandi waka kuti tisangane, ndipo paumaliro  wakazomera. Wakaniphalira kuti, “Nakupa maminiti 5 pera ghakuti tidumbiskane, ndipo nisazgirengeko yayi nanga ni miniti yimoza.” Nkhasindama na kwamba kulomba. Mbwenu wakanifumba kuti, ‘Kasi ukuchita vichi?’ Nkhinuska mutu na kuyowoya kuti, “Nawonganga Chiuta chifukwa ndimwe yumoza wa ŵateŵeti ŵake.” Wakanifumba kuti, “Kasi ukung’anamurachi?” Nkhamulongora lemba la Ŵaroma 13:4. Wakaŵa wa Chiprotesitanti ndipo lemba ili likamukhwaska chomene. Kasi ntchivichi chikachitika pamanyuma? Wakanipa maminiti 30 ndipo tikaŵa na chidumbirano chiwemi chomene. Wakalongosoraso kuti wakuchindika chomene ntchito yithu.

Mu vyaka vinandi ivyo vyajumpha, Ŵakaboni ŵa Yehova ŵawinapo milandu yinandi ku Europe yakukhwaskana na kuleka kunjilirapo pa vya charu, wanangwa wa kulera ŵana, misonkho, na milandu yinyake yinandi. Naŵa na mwaŵi wakujiwonera nekha umo Yehova wakatovwilira kuti tiwine milandu iyi. Ŵakaboni ŵa Yehova ŵawinapo milandu yakujumpha 140 ku Khoti Lakuwona vya Wanangwa wa Ŵanthu ku Europe!

Cha m’ma 1990, nkhagwiranga lumoza na Mubali Philip Brumley, wakufuma ku likuru lithu, na Mubali Valter Farneti, wakufuma ku Italy, kuti tovwire ŵabali ŵithu ŵa ku Cuba, kuŵa na wanangwa wakusopa, chifukwa ntchito yithu yikaŵa yakukanizgika. Nkhalembera kalata kazembe wa ku Cuba uyo wakaŵa ku Belgium ndipo kufuma apo nkhakumana na wamazaza uyo wakasankhika kuti watovwire. Maulendo ghakwamba agho tikakumana tikatondeka kuti tidumbiskane na kumazga vifukwa ivyo boma likakanizgira mulimo withu.

Pamanyuma pakulomba ulongozgi kwa Yehova, tikapempha kuti ŵatizomerezge kutumizga Mabaibolo ku Cuba, ndipo ŵakatizomerezga kutumizga Mabaibolo 5,000. Mabaibolo ghakafika makora ndipo ghakagaŵika ku ŵabali na ŵadumbu, ntheura tikawona kuti Yehova wakatumbika ntchito yithu. Tikapemphaso kuti ŵatizomerezge kutumizga Mabaibolo ghanyake 27,500. Apa napo ŵakatizomerezga. Nkhakondwa chomene kuti nane nkhawovwirapo kuti ŵabali na ŵadumbu ku Cuba ŵaŵe na Baibolo lawo.

Kanandi waka nalutapo ku Cuba kuti nkhawovwire ŵabali na ŵadumbu pa nkhani yakuti mulimo withu ulutilire kuŵa wakuzomerezgeka. Kuchita nthena kwanovwira kuti nimanyane na ŵamazaza ŵanandi ŵa boma.

Mu 1994 ŵanthu ŵakujumpha 1,000,000 ŵakakomeka pa viwawa ivyo vikaŵapo kuti ŵamarane na mtundu wa Tutsi ku Rwanda. Chachitima ntchakuti ŵanyake mwa ŵabali na ŵadumbu ŵithu nawo ŵakakomeka. Mu nyengo yichoko waka, pakapangika kagulu ka  ŵabali kakuti kawovwirepo pa ntchito yakupeleka wovwiri ku ŵabali ŵa mu charu ichi.

Apo kagulu kithu kakafikanga mu msumba ukuru wa Kigali, tikasanga kuti viliŵa vya ofesi yakung’anamulirako mabuku kweniso uko kukufikira mabuku vili na vidolozi vya vipolopolo. Tikapulika nkhani zakuchitiska chitima chomene zakukhwaskana na ŵabali na ŵadumbu awo ŵakakomeka na vimayi. Kweniso tikapulika umo ŵabali na ŵadumbu ŵakalongolerana chitemwa pa nyengo iyi. Mwachiyelezgero, tikakumana na mubali uyo wakaŵa wa mtundu wa Tutsi uyo wakabisama mu khululu kwa mazuŵa 28, ndipo wakapwelelekanga na mbumba ya Ŵakaboni ŵa mtundu wa Hutu. Kweniso tikakumana na ŵabali na ŵadumbu ŵakujumpha 900 ku Kigali, ndipo tikaŵakhozga mwauzimu.

Kufuma apo tikaluta ku Zaire (uko sono kukuchemeka kuti Democratic Republic of the Congo) kuti tikapenje Ŵakaboni ŵanandi ŵa ku Rwanda awo ŵakachimbilira mu misasa yakufupi na msumba wa Goma. Tikapenja kweni tikaŵasanganga yayi, ntheura tikalomba Yehova kuti watovwire kuŵasanga. Kufuma apo tikawona munthu munyake wakwiza kunthazi zithu, ndipo tikamufumba usange wakumanyapo waliyose uyo ni Kaboni wa Yehova. Wakazgora kuti, “Ine ndine yumoza wawo. Ningakamulongorani uko kuli komiti yakovwira para kwachitika soka.” Tati takumana na komiti iyi, tikakumanaso na ŵabali na ŵadumbu ŵakuchimbira kwawo pafupifupi 1,600 ndipo tikaŵakhozga mwauzimu kweniso kuŵapembuzga. Tikaŵaŵazgiraso kalata yakufuma ku Wupu Wakulongozga. Ŵabali na ŵadumbu ŵakakhwaskika chomene na mazgu agho ghakaŵa mu kalata iyi, ghakuti: “Tikumulomberani nyengo zose. Tikumanya kuti Yehova wamutayaninge yayi.” Mazgu ghakufuma ku Wupu Wakulongozga agha ghakaŵa ghaunenesko nadi. Pasono ku Rwanda kuli Ŵakaboni ŵa Yehova ŵakujumpha 30,000!

Muwoli wane wakutemweka Elly wakafwa mu 2011, pamanyuma pakuti takhala mu nthengwa vyaka pafupifupi 58. Nkhamuphalira Yehova mu lurombo vya chitima icho nkhaŵa nacho ndipo iyo wakanipembuzga. Kweniso nkhapembuzgikanga chomene para nkhupharazgira ŵazengezgani ŵane vyakukhwaskana na uthenga uwemi wa Ufumu.

Nangauli pasono nili na vyaka vya m’ma 90, kweni nichali kupharazga sabata yiliyose. Kweniso nkhukondwa chomene kovwira Dipatimenti Yakuwona Vyamalango kuno ku ofesi ya munthavi ya Belgium, kuŵaphalirako ivyo nkhumanya, na kukhozga ŵawukirano awo ŵali mu mbumba ya Beteli.

Vyaka pafupifupi 84 ivyo vyajumpha, nkhalomba lurombo lwane lwakwamba kwa Yehova. Apa ndipo nkhambira kuŵa paubwezi wakukhora na iyo ndipo nkhulutilira kukhozga ubwezi uwu. Nkhuwonga chomene kuti pa umoyo wane wose, Yehova wakutegherezga malurombo ghane.—Sal. 66:19. b