1-2. Kasi tili na mwaŵi wuli wapadera?

 USANGE munyake wangamufumbani kuti, ‘Kasi Yehova ni njani kwa imwe? Panji mungazgora kuti, ‘Yehova ni Dada wane, Chiuta wane, na Mubwezi wane.’ Yehova waliso na mazina ghanyake ghaudindo. Kweni kasi imwe mukujiwona kuŵa mulendo wa Yehova?

² Themba Davide likayaniska Yehova na mwenecho wa mulendo, kweniso ŵabwezi ŵake na mulendo. Likafumba kuti: “A Yehova, kasi ni njani wangaŵa mulendo mu hema linu? Ni njani wangakhala mu phiri linu lituŵa?” (Sal. 15:1) Apa tikusambirapo kuti tingaŵa ŵalendo ŵa Yehova, panji kuti ŵabwezi ŵake. Uwu ni mwaŵi wapadera chomene.

YEHOVA WAKUKHUMBA KUTI TIŴE ŴALENDO ŴAKE

3. Kasi ni njani wakaŵa mulendo wakwamba wa Yehova, ndipo Yehova na mulendo wake uyu ŵakajipulikanga wuli?

³ Yehova wakaŵako yekha pambere wandambe kulenga chilengiwa chilichose. Kweni pamanyuma wakapokelera Mwana wake wakwamba mu hema lake. Yehova wakakondwa chomene pakuŵa na mulimo uphya wakupokelera ŵalendo. Baibolo likuyowoya kuti Yehova “wakakondwanga” nayo chomene Mwana wake. Kweniso Mwana wake uyu, pakuŵa mulendo wake wakwamba, ‘wakakondwanga pamaso pa Yehova nyengo zose.’—Zinth. 8:30.

4. Kasi mbanjani ŵanyakeso awo ŵakaŵa ŵalendo ŵa Yehova?

⁴ Kufuma apo, Yehova wakalengaso ŵangelo, ndipo nawo ŵakazgokaso ŵalendo ŵake. Ŵangelo ŵake aŵa, nawo ŵakuchemeka  ‘ŵana ŵa Chiuta’ ndipo vikulongora kuti nawo ŵakukondwa kuŵa na Yehova. (Yobu 38:7; Dan. 7:10) Kwa vyaka vinandi, Chiuta ŵabwezi ŵake ŵakaŵa kuchanya pera. Pamanyuma wakalenga ŵanthu, ndipo nawo ŵakaŵa ŵalendo ŵake. Ndipo ŵanyake mwa ŵalendo ŵake aŵa ŵakaŵa Enoki, Nowa, Abrahamu, na Yobu. Baibolo likulongora kuti ŵanthu aŵa ŵakaŵa ŵabwezi ŵa Yehova chifukwa ŵakamupulikiranga.—Gen. 5:24; 6:9; Yobu 29:4; Yes. 41:8.

5. Kasi tikusambirapo vichi pa uchimi uwo uli pa Ezekiyeli 37:​26, 27?

⁵ Kwa vyaka vinandi Yehova walutilira kuchema ŵabwezi ŵake kuti ŵaŵe ŵalendo ŵake. (Ŵazgani Ezekiyeli 37:​26, 27.) Mwachiyelezgero, kufuma pa uchimi wa Ezekiyeli tikusambirapo kuti Chiuta wakukhumba nadi ŵasopi ŵake, ŵaŵe paubwezi wakukhora na iyo. Wakulayizga kuti wachitenge nawo “phangano lamtende.” Uchimi uwu ukuyowoya vya nyengo iyo awo ŵali na chilindizga cha kuluta kuchanya kweniso awo ŵali na chilindizga cha pa charu chapasi ŵazamuŵa ŵakukolerana mu hema lake kuŵa “mskambo umoza.” (Yoh. 10:16) Nakuti ivi vikuchitika sono.

CHIUTA WAKUTIPWELELERA KULIKOSE UKO TINGAŴA

6. Kasi munthu wangachita wuli kuti waŵe mulendo mu hema la Yehova, ndipo hema lake likusangika nkhu?

⁶ Mu nyengo yakale, hema ghakaŵa malo agho munthu wakapumulirangamo kweniso kuŵa wakuvikilirika ku vinthu vyakupambanapambana. Nakuti uyo ni mulendo mu hema ili wakakhazganga kuti mwenecho wamupwelelerenge. Tikati tajipeleka kwa Yehova, tikazgoka ŵalendo mu hema lake. (Sal. 61:4) Nakuti tikusangwa na chakurya chinandi chauzimu, kweniso tili paubwezi na ŵanji awo nawo ŵali kuzgokaso ŵalendo ŵake. Hema la Yehova lakuyelezgera lili pa malo ghamoza pera yayi. Nyengo zinyake muli kulutako ku charu chinyake kuti mukaŵepo pa ungano wapadera, ndipo mukakumana na ŵanji awo nawo mbakukondwa kuŵa mu hema la Chiuta. Ntheura tingayowoya kuti hema ili likusangika palipose apo pali ŵateŵeti ŵake ŵakupulikira.—Chivu. 21:3.

7. Chifukwa wuli tingayowoya kuti ŵateŵeti ŵakugomezgeka awo ŵali kufwa ŵachali ŵalendo mu hema la Yehova? (Wonaniso chithuzi.)

⁷ Wuli pakuyowoya vya ŵateŵeti ŵakugomezgeka awo ŵali kufwa? Kasi nawo ŵachali  ŵalendo mu hema la Yehova? Enya! Chifukwa wuli tikuyowoya nthena? Chifukwa ntchakuti ŵanthu aŵa kwa Yehova ŵachali ŵamoyo. Yesu wakalongosora kuti: “Mu nkhani yakuyowoya vya chivwati, Mozesi nayo wakayowoyapo kuti ŵakufwa ŵakuwuskika, apo wakuyowoya kuti Yehova ni, ‘Chiuta wa Abrahamu, Chiuta wa Yisake, na Chiuta wa Yakhobe.’ Iyo ni Chiuta wa ŵakufwa yayi, kweni wa ŵamoyo, pakuti wose mbamoyo kwa iyo.”—Luka 20:​37, 38.

VYANDULO IVYO TIKUSANGA KWENISO IVYO TIKWENERA KUCHITA PAKUŴA ŴALENDO

8. Kasi ŵalendo ŵa Yehova ŵakupindura wuli kuŵa mu hema lake?

⁸ Nga umo vikuŵira kuti hema lanadi ghakuŵa malo ghawemi ghakupumulirako kweniso gha chivikiliro, hema la Yehova nalo likuvikilira ŵalendo ŵake ku chilichose icho chingananga umoyo wawo wauzimu, kweniso likovwira kuti ŵaŵe na chigomezgo chiwemi cha munthazi. Para tikulutilira kuŵa paubwezi wakukhora na Yehova, Satana wangachita chilichose yayi icho chingatipweteka kwamuyirayira. (Sal. 31:23; 1 Yoh. 3:8) Mu charu chiphya Yehova wazamulutilira kuvikilira ŵabwezi ŵake ŵakugomezgeka mwauzimu pera yayi, kweni na ku nyifwa wuwo.—Chivu. 21:4.

9. Kasi Yehova wakukhazga kuti ŵalendo ŵake ŵachitenge wuli apo ŵali mu hema lake?

⁹ Ni mwaŵi wapadera nadi kuŵa mulendo mu hema la Yehova ndipo tingaŵa nayo paubwezi wakukhora kwamuyirayira. Ipo kasi tikwenera kuchita wuli kuti tilutilire kuŵa ŵalendo ŵake? Para mwachemeka kunyumba ya munthu munyake, mukwenera kumanya ivyo mwenecho wakukhazga kwa imwe. Mwachiyelezgero, wangatemwa kuti muvure skapato zinu para mukunjira munyumba, nakuti namwe mungakana yayi kuchita nthena. Mwakuyana waka, nase tikwenera kumanya ivyo Yehova wakukhumba ku awo ŵakukhumba kulutilira kuŵa ŵalendo mu hema lake. Kumutemwa chomene Yehova ndiko kutitumenge kuti tichite vyose ivyo tingafiska kuti ‘timukondweskenge pa chilichose.’ (Kol. 1:10) Nangauli Yehova ni mubwezi withu, kweni tikumanyaso kuti ni Chiuta withu na Dada withu, uyo ngwakwenelera kuti timupenge ntchindi. (Sal. 25:14) Ntheura tingaluwanga yayi fundo iyi, kuti nyengo zose tikwenera kumuchindika chomene. Ivi vitovwirenge kuti tileke kuŵa na nkharo iyo yingamukwiyiska. Nyengo zose tikukhumba “kwenda mwakujiyuyura” na Chiuta withu.—Mika 6:8.

YEHOVA WAKACHITANGA VINTHU NA ŴAISRAYELI MWAMBURA KUTEMWERA

10-11. Kasi Yehova wakachitanga wuli vinthu na Ŵaisrayeli mu mapopa gha Sinayi, ndipo ivi vikulongora wuli kuti ngwambura kutemwera?

¹⁰ Yehova wakuchita vinthu na ŵalendo ŵake mwambura kutemwera. (Rom. 2:11) Tikumanya fundo iyi para tikuwona umo wakachitiranga vinthu na Ŵaisrayeli apo ŵakaŵa mu mapopa gha Sinayi.

¹¹ Yehova wakati wawombora ŵanthu ŵake ku wuzga ku Eguputo, wakimika ŵasembe kuti ŵateŵeterenge pa chihema. Ŵalevi ŵakimikika kuti ŵachitenge milimo yinyake pa chihema. Kasi awo ŵakateŵeteranga pa chihema, panji awo ŵakakhalanga pafupi na chihema, ndiwo Yehova wakaŵapweleleranga mwapadera kuluska ŵanyake? Yayi! Yehova wakutemwera yayi.

12. Kasi Yehova wakalongora wuli kuti ngwambura kutemwera ku mtundu wa Israyeli? (Ekisodo 40:38) (Wonaniso chithuzi.)

¹² Waliyose mu msasa wakaŵa na mwaŵi wakuyana waka wakuŵa paubwezi na Yehova,  kwali wakachitanga uteŵeti wapadera, panji wakakhalanga pafupi na chihema panji yayi. Mwachiyelezgero, Yehova wakawoneseska kuti waliyose mu mtundu wa Israyeli, wawonenge munthondwe wa mzati wa bingu panji mzati wa moto pachanya pa chihema. (Ŵazgani Ekisodo 40:38.) Para bingu lamba kwenda, nanga ni awo ŵakaŵa kutali na chihema ŵakawonanga, ndipo ŵakapakiranga vinthu vyawo, kuzgura mahema ghawo, na kunyamuka lumoza na mtundu wose. (Maŵa. 9:​15-23) Wose ŵakapulikanga kulira kwa mbata ziŵiri za siliva, icho chikaŵa chimanyikwiro chakuti ŵakukhumbikwa ŵanyamuke. (Maŵa. 10:2) Apa ntchakuwonekerathu kuti kukhala pafupi na chihema, ukaŵa ukaboni wakuti mbwenu munthu wali paubwezi wakukhora na Yehova yayi. M’malo mwake, waliyose mu mtundu wa Israyeli wakaŵa na mwaŵi wakuti wangaŵa mulendo wa Yehova na kulondezga ulongozgi wake kweniso kuvikilirika na iyo. Mazuŵa ghano napo, kwali tikukhala nkhu, kweni Yehova wakutitemwa, kutipwelelera kweniso kutivikilira.

MAZUŴA GHANO NAPO YEHOVA WAKUTEMWERA YAYI

13. Kasi ni nthowa wuli yimoza iyo Yehova wakulongolera kuti ngwambura kutemwera mazuŵa ghano?

¹³ Ŵateŵeti ŵanyake ŵa Chiuta mazuŵa ghano, ŵakukhala kufupi na likuru lithu, panji ŵakukhala kufupi na ofesi ya munthavi ya Ŵakaboni ŵa Yehova. Nakuti ŵanyake ŵakuteŵetera pa malo agha. Ntheura ŵateŵeti aŵa ŵangachitako milimo yinandi iyo yikuchitika pa malo agha, kweniso ŵangaŵa na mwaŵi wakuchezga maso na maso na awo ŵakulongozga. Ŵanyake ŵakuteŵetera nga mbalaŵiliri ŵakwendakwenda panji ŵakuchitako mauteŵeti ghanyake ghapadera ghanyengozose. Usange muli pa gulu la ŵanthu ŵanandi ilo lilije mwaŵi wanthena uwu, tikumusimikizgirani kuti Yehova uyo ni mwenecho wa ŵalendo, wakuŵatemwa ŵalendo ŵake wose.  Kweniso wakuŵamanya makora waliyose payekhapayekha na kuŵapwelelera. (1 Pet. 5:7) Ŵanthu ŵa Yehova wose ŵakupokera chakurya chauzimu, ulongozgi, kweniso chivikiliro.

14. Kasi Yehova wakulongoraso wuli kuti ngwambura kutemwera mazuŵa ghano?

¹⁴ Nthowa yinyake iyo Yehova walongolera kuti wakutemwera yayi, njakuti wawoneseska kuti ŵanthu pa charu chose ŵaŵe na mwaŵi wakuŵazga mazgu ghake Baibolo. Malemba Ghakupatulika ghakalembeka mu viyowoyero vitatu: Chihebere, Chiaramu, na Chigiriki. Kasi awo ŵakumanya kuŵazga Baibolo mu viyowoyero ivi ndiwo ŵali paubwezi wakukhora na Yehova kuluska awo ŵakutondeka kuŵazga? Ndimo viliri yayi.—Mat. 11:25.

15. Kasi paliso ukaboni wuli wakulongora kuti Yehova ngwambura kutemwera? (Wonaniso chithuzi.)

¹⁵ Kuti tiŵe paubwezi wakukhora na Yehova vikuthemba pa masambiro panji chiyowoyero yayi. M’malo mwakuti ŵanthu ŵakusambira pera ndiwo ŵasange vinjeru vyake, Yehova wapangiska kuti ŵanthu wose pa charu chapasi ŵaŵe na mwaŵi wakusanga vinjeru vyake, kwali mbakusambira panji yayi. Mazgu ghake Baibolo, ghang’anamulika mu viyowoyero vinandi chomene. Ntheura ŵanthu pa charu chose chapasi ŵangasanga chandulo na ivyo likusambizga kweniso kumanya umo ŵangaŵira paubwezi wakukhora na iyo.—2 Tim. 3:​16, 17.

LUTILIRANI KUŴA MULENDO WA YEHOVA

16. Kuyana na Milimo 10:​34, 35, kasi tingachita wuli tilutilire kuŵa ŵalendo ŵa Yehova?

¹⁶ Ni mwaŵi wapadera chomene kuŵa mulendo wa Yehova mu hema lake. Iyo ngwalusungu chomene, ngwachitemwa, kweniso wakupokelera makora chomene ŵalendo. Nakutiso iyo ngwambura kutemwera, wakupokelera waliyose vilije kanthu uko wakufuma, masambiro, mtundu, chiyowoyero, msinkhu, kwali ni mwanalume panji mwanakazi. Ndipouli, Yehova wakupokelera ŵekha awo ŵakumupulikira kuŵa ŵalendo ŵake.—Ŵazgani Milimo 10:​34, 35.

17. Kasi mu nkhani yakulondezgapo tizamudumbiskana vichi?

¹⁷ Pa Salimo 15:​1, Davide wakafumba kuti: “A Yehova, kasi ni njani wangaŵa mulendo mu hema linu? Ni njani wangakhala mu phiri linu lituŵa?” Pamanyuma wamasalimo wakakhuŵilizgika na mzimu utuŵa kuzgora mafumbo agha. Nkhani yakulondezgapo yizamuyowoya vinthu vinyake ivyo tikwenera kufiska kuti tilutilire kuŵa paubwezi na Yehova.