NKHANI YAKUSAMBIRA 48
“Fiskani Ivyo Mukamba Kuchita”
“Fiskani ivyo mukamba kuchita.”—2 KOR. 8:11.
SUMU 35 “Musande Ivyo ni Vinthu Vyakuzirwa Chomene”
CHILATO CHA NKHANI IYI *
1. Kasi Yehova wali kutipa wanangwa wuli?
YEHOVA wali kutipa wanangwa wakusankha ivyo tikukhumba kuchita pa umoyo withu. Iyo wakutisambizga umo tingasankhira makora vinthu, ndipo para tasankha ivyo vikumukondweska wakutovwira kuti vinthu vitiyendere makora. (Sal. 119:173) Para tikulondezga vinjeru vya mu Mazgu gha Chiuta, tisankhenge makora vinthu.—Heb. 5:14.
2. Nangauli tingaŵa kuti tasankha makora vinthu, kasi tingasangana na suzgo wuli?
2 Nanga tingaŵa kuti tasankha makora vinthu, kweni nyengo zinyake vikutisuzga kufiska ivyo tikasankha. Wonani viyelezgero ivi: Mubali wachinyamata wasankha kuti waŵerenge Baibolo lose. Wambapo kuŵerenga kweni pamanyuma pa masabata ghachoko waka wakuleka dankha. Mudumbu wasankha kwamba upayiniya wanyengozose kweni wakusinthasintha waka madeti ghakwambira. Ŵalara wakolerana kuti ŵachitenge maulendo ghauliska ghanandi mu mpingo, kweni pajumpha myezi yinandi ŵandayambepo. Viyelezgero ivi vikupambana, kweni vili na chinthu chimoza chakuyana. Ŵanthu wose aŵa ŵakasankha kuti ŵachitenge chinthu chinyake kweni ŵakafiska yayi ivyo ŵakasankha. Ŵakhristu ŵakwambilira ku Korinte nawo ŵakaŵa na suzgo lakuyana waka. Tiyeni tidumbiskane ivyo tingasambirako ku Ŵakhristu aŵa.
3. Kasi Ŵakhristu ŵa ku Korinte ŵakasankha kuti ŵachitenge vichi, kweni ntchivichi chikachitika?
3 Cha m’ma 55 C.E., Ŵakhristu ŵa ku Korinte ŵakasankha chinthu chakuzirwa chomene. Ŵakapulika kuti Ŵakhristu ŵanyawo ku Yerusalemu na ku Yudeya ŵakusangana na masuzgo ghanandi kweniso ŵakusuzgika na ukavu, ndipo mipingo yinyake yambapo kusangura ndalama kuti yovwirepo. Pakuti Ŵakhristu ŵa ku Korinte ŵakaŵa ŵalusungu na ŵakupa ŵakasankha kovwirapo. Ntheura ŵakafumba Paulosi umo nawo ŵangawovwilirapo. Paulosi wakatumizga ulongozgi ku mpingo uwu ndipo wakasankha Tito kuti wakawovwire kutolera vyawanangwa. (1 Kor. 16:1; 2 Kor. 8:6) Ndipouli, myezi yichoko waka yikati yajumphapo, Paulosi wakasanga kuti Ŵakorinte ŵandapeleke vyawanangwa ivyo ŵakalayizga. Ntheura, vyakupeleka vyawo vikaŵa vyambura kunozgeka kuti vilute panyengo yiwemi ku Yerusalemu pamoza na ivyo mipingo yinyake yikapeleka.—2 Kor. 9:4, 5.
4. Nga umo pakulongolera pa 2 Ŵakorinte 8:7, 10, 11, kasi Paulosi wakaŵachiska vichi Ŵakorinte?
4 Ŵakhristu ŵa ku Korinte ŵakachita makora kughanaghana vya kovwira ŵanyawo. Paulosi wakaŵawonga chomene chifukwa chakuti ŵakalongora kuti ŵali na chipulikano chakukhora kweniso mtima wakupa. Kweni wakenerangaso kuŵachiska kuti ŵafiskenge ivyo ŵalayizga. (Ŵazgani 2 Ŵakorinte 8:7, 10, 11.) Ivyo ŵakachita, vikutovwira kumanya kuti nanga ŵangaŵa Ŵakhristu ŵakugomezgeka vingaŵasuzga kuchita ivyo ŵadumura.
5. Kasi tizgorenge mafumbo wuli?
5 Nga umo vikaŵira na Ŵakhristu ŵa ku Korinte, nase nyengo zinyake vingatisuzga kuchita ivyo talayizga. Chifukwa wuli? Chifukwa chakuti ndise ŵambura kufikapo, tingamba kuziwulika. Kweniso vyakuchitika vyamabuchi vingapangiska kuti chiŵe chakusuzga kufiska ivyo tasankha kuti tichitenge. (Muph. 9:11; Rom. 7:18) Kasi tikwenera kuchita wuli usange tikukhumba kusintha ivyo tikasankha? Ndipo kasi tingachita wuli kuti nyengo zose tifiskenge ivyo tikamba kuchita?
PAMBERE MUNDASANKHE CHAKUCHITA
6. Chifukwa wuli nyengo zinyake tingakhumbikwira kusintha ivyo tili kusankha?
6 Vinthu vinyake vyakuzirwa ivyo tili kusankha ni vyakuti tingavisintha yayi. Mwachiyelezgero, tikusungilira ivyo tikalayizga kuti titeŵeterenge Yehova, kweniso tikuŵikapo mtima kugomezgeka kwa munyithu wa mu nthengwa. (Mat. 16:24; 19:6) Kweni vinyake ivyo tili kusankha vingakhumbikwira kusintha. Chifukwa wuli? Chifukwa chakuti vinthu vikusintha pa umoyo withu. Kasi ni vichi ivyo vingatovwira kuti tisankhe makora vinthu?
7. Kasi tikwenera kulomba vichi, ndipo chifukwa wuli?
7 Lombani vinjeru. Yehova wakachiska Yakobe kulemba kuti: “Usange yumoza wa imwe wakupeleŵera vinjeru, walombenge Chiuta, pakuti iyo wakupeleka mwawanangwa ku wose.” (Yak. 1:5) Kuyowoya unenesko, tose nyengo zinyake ‘tikupeleŵera vinjeru.’ Ntheura lombani Yehova kuti wamovwirani para mukusankha vinthu kweniso para mukukhumba kusintha ivyo mukasankha. Para muchitenge nthena Yehova wamovwiraninge kuti musankhe mwamahara.
8. Kasi tikwenera kuchita wuli pambere tindasankhe chakuchita?
8 Fufuzani mwakukwana. Penjerezgani fundo mu Mazgu gha Chiuta, mu mabuku gha gulu la Yehova, ndipo fumbani ku ŵanthu awo ŵangamupani ulongozgi uwemi. (Zinth. 20:18) Kuchita nthena nkhuwemi pambere mundasankhe pa nkhani ya kusintha ntchito, kusama, panji kusankha masambiro agho ghangamupani m’pata kuti mulutilire kuteŵetera Yehova.
9. Kasi pakuŵa uwemi wuli para tili ŵakugomezgeka?
9 Sandani vifukwa ivyo mwasankhira kuchita chinthu icho. Yehova wakumanya chifukwa icho tasankhira kuchita chinthu chinyake. (Zinth. 16:2) Iyo wakukhumba kuti tiŵenge ŵakugomezgeka mu vinthu vyose. Ntheura para tikusankha vyakuchita tikwenera kuŵa ŵakugomezgeka na ku ŵanyithu wuwo. Para tili ŵakugomezgeka yayi chiŵenge chakusuzga kufiska ivyo tayowoya. Mwachiyelezgero, mubali muwukirano wangasankha kwamba upayiniya wanyengozose. Ndipouli, pati pajumpha nyengo yichoko waka, vikumusuzga kufiska maora agho mupayiniya wanyengozose wakwenera kupeleka ndipo waleka kukondwa na uteŵeti. Muwukirano uyu, wakeneranga kukumbuka kuti wakamba upayiniya kuti wakondweske Yehova. Kweni panji wakamba upayiniya kuti wakondweske waka ŵapapi ŵake panji munthu munyake.
10. Kasi chikukhumbikwa ntchivichi kuti munthu wasinthe?
10 Ghanaghanirani za msambiri munyake wa Baibolo uyo wasankha kuleka kukhweŵa hona. Pakwamba, wakhala kwa sabata yimoza panji ghaŵiri kwambura kukhweŵa nangauli ntchakusuzga kwa iyo. Kweni pamanyuma wakukhweŵaso. Ndipouli, paumaliro wakulekerathu. Watonda suzgo ili chifukwa chakuti wakumutemwa Yehova kweniso wakukhumba kumuteŵetera.—Kol. 1:10; 3:23.
11. Chifukwa wuli tikwenera kuŵa na vilato?
11 Muŵe na vilato. Para muli na vilato, chiŵenge chipusu kuvifiska. Mwachiyelezgero, panji mungasankha kuti muŵazgenge Baibolo zuŵa lililose. Kweni para mulije ndondomeko mbwenu mungafiska yayi chilato chinu. * Panji ŵalara mu mpingo ŵangasankha kuti ŵachitenge maulendo ghauliska pafupipafupi, kweni pati pajumpha nyengo mbwenu ŵakuchita yayi ivyo ŵakakolerana. Kuti ŵafiske chilato chawo, ŵakwenera kujifumba mafumbo agha: “Kasi talemba mazina gha ŵabali na ŵadumbu awo ŵakukhumbikwira maulendo ghauliska? Kasi tasankha kale nyengo iyo tamukumana nawo?”
12. Kasi tingakhumbikwira kuchita vichi, ndipo chifukwa wuli?
12 Muŵe ŵanenesko. Palije munthu uyo wali na nyengo, ndalama, kweniso nkhongono zakuchitira chilichose icho wakukhumba. Ntheura tikwenera kuŵa ŵanenesko kweniso ŵamahara. Para ntchamachitiko, mungakhumbikwira kusintha vinthu vinyake ivyo mukasankha ivyo mukuwona kuti mungafiska yayi. (Muph. 3:6) Tiyelezgere kuti mwaweleramo ivyo mukasankha, mwasinthapo apo mphakwenelera, ndipo sono mukuwona kuti mungachita. Wonani vinthu vinkhondi ivyo vingamovwirani kuti mufiske ivyo mukamba.
IVYO VINGAMOVWIRANI KUTI MUFISKE IVYO MUKASANKHA
13. Kasi mungasanga wuli nkhongono zakuti mufiskire ivyo mwasankha?
13 Lombani nkhongono. Chiuta wangamupani ‘nkhongono’ kuti mufiske ivyo mwasankha. (Fil. 2:13) Ntheura lombani Yehova kuti wamupani mzimu utuŵa uwo ungamovwirani kuti muŵe na nkhongono izo mukukhumbikwira. Lutilirani kulomba nanga ni para mukuwona kuti lurombo lwinu lukuchedwa kuzgoreka. Yesu wakati: “Lutilirani kulomba, ndipo mupikenge” mzimu utuŵa.—Luka 11:9, 13.
14. Kasi fundo iyo yili pa Luka 14:28, yingamovwirani wuli kuti mufiske ivyo mwasankha?
14 Pangani pulani. (Ŵazgani Luka 14:28.) Kuti mufiske ivyo mukukhumba kuchita, mukwenera kupanga pulani. Kufuma apo mukwenera kulondezga pulani iyo mwapanga. Mwakuyana waka, para mwasankha kuti muchite chinthu chinyake, mukwenera kulemba vyose ivyo vikukhumbikwira kuti mufiske ivyo mwasankha. Para ntchito iyo muchitenge njikuru panji njakusuzga, mukwenera kuyigaŵa kuti muchitenge pachokopachoko. Para mungachita nthena, vingamovwirani kumanya ivyo mwachitako. Paulosi wakachiska Ŵakorinte kuti ŵaŵikenge kanthu padera pa “zuŵa lakwamba lililose la sabata” m’malo mwakuti ŵazakambe kusonkha para iyo wiza. (1 Kor. 16:2) Para tikuchita ntchito yikuru pachokopachoko vikovwira kuti tileke kujikayikira kuti tingafiska yayi.
15. Pamanyuma pakupanga pulani, kasi mukwenera kuchita vichi?
15 Usange mwalemba ivyo mukukhumba kuchita chiŵenge chipusu kuti muvichite. (1 Kor. 14:40) Mwachiyelezgero, mawupu gha ŵalara ghakuphalirika kuti ghakwenera kusankha mulara yumoza kuti walembenge vyose ivyo wupu wakolerana, uyo wasankhika kuchita mulimo unyake, kweniso nyengo iyo mulimo uwo uzamumalira. Ŵalara awo ŵakulondezga ulongozgi uwu, chikuŵaŵira chipusu kuti ŵachite ivyo ŵakolerana. (1 Kor. 9:26) Namwe mungalondezga nthowa iyi pamwekha. Mwachiyelezgero, mungalemba ivyo muchitenge zuŵa lililose na kulemba pakwamba icho mwambenge. Ivi vingamovwirani kuti mufiske ivyo mwamba kweniso kuti muchite vinandi pa nyengo yichoko.
16. Kasi chakukhumbikwa ntchivichi kuti mufiske ivyo mwasankha, ndipo kasi lemba la Ŵaroma 12:11 likukhozgera wuli fundo iyi?
16 Ŵikanipo mtima. Pakukhumbikwa kulimbikira kuti mulondezgenge ndondomeko yinu na kufiska ivyo mwamba kuchita. (Ŵazgani Ŵaroma 12:11.) Paulosi wakaphalira Timote kuti ‘walutilire kuŵazga’ na kulutilira kulondezga ivyo wakusambira kuti waŵe waluso pakusambizga. Nase tingalondezga ulongozgi wa Paulosi uwu pa chilichose icho tikukhumba kuchitira Yehova.—1 Tim. 4:13, 16.
17. Kasi lemba la Ŵaefeso 5:15, 16 lingatovwira wuli kuti tichite ivyo tasankha?
17 Gwiliskirani ntchito makora nyengo yinu. (Ŵazgani Ŵaefeso 5:15, 16.) Ŵikani nyengo iyo muzamuchitira ivyo mwasankha ndipo mungasinthanga yayi nyengo. Lekani kulindilira kuti apo vinthu vizamuŵira makora chomene ndipo muzakambe kuchita. Nyengo zinyake vinthu vizamuŵapo makora yayi. (Muph. 11:4) Muŵe maso kuti vinthu vyakuzirwa pachoko vileke kumulyerani nyengo na kumumalirani nkhongono izo mukwenera kuchitira vinthu vyakuzirwa chomene. (Fil. 1:10) Usange ntchamachitiko, sankhani nyengo iyo ŵanji ŵangamutimbanizgani yayi. Phalirani ŵanji nyengo iyo muŵenge ŵakutangwanika. Mukwenera kuzimwa foni yinu kweniso muŵelengenge uthenga wa pa imelo panji pa malo ghakuchezgerapo gha pa Intaneti para mwamara ivyo mwachitanga. *
18-19. Kasi ntchivichi chingamovwirani kuti mulutilire kuchita ivyo muli kusankha nanga nyengo zinyake mungakumana na masuzgo?
18 Ghanaghanirani viwemi ivyo musangenge. Ivyo musangenge pa ivyo mwasankha vikuŵa nga ni para mwanguŵa paulendo ndipo mwafika uko mwalutanga. Usange mukukhumba nadi kukafika uko mukuya, mulutilirenge ulendo winu nanga vingaŵa kuti mukukhumbikwira kusanga nthowa yinyake kuti mukafike. Mwakuyana waka, usange nase tikughanaghanira viwemi ivyo tizamusanga pa ivyo tasankha, tigongowenge yayi nanga tingasangana na masuzgo paulendo withu.—Gal. 6:9.
19 Ntchakusuzga kusankha makora vinthu, ndiposo kuchita ivyo tasankha. Kweni na wovwiri wa Yehova, mungasanga vinjeru na nkhongono izo mukukhumbikwira kuti mufiske ivyo mukayamba.
SUMU 65 Limbikirani!
^ ndime 5 Kasi mukudandawura na vinthu vinyake ivyo mukasankha? Panji kasi nyengo zinyake vikumusuzgani kusankha makora vinthu panji kuchita ivyo mwasankha? Nkhani iyi yimovwiraninge umo mungachitira kuti mutonde masuzgo agha kuti mufiske ivyo mukamba kuchita.
^ ndime 11 Kuti muŵe na ndondomeko yiwemi ya kuŵazga Baibolo, mungagwiliskira ntchito “Ndondomeko ya Kuŵazga Baibolo” iyo yili pa jw.org®.
^ ndime 17 Kuti musange masachizgo ghanyake gha umo mungagwiliskira ntchito makora nyengo yinu, wonani nkhani ya mutu wakuti “Mfundo 20 Zothandiza Kuti Muzikhala ndi Nthawi Yokwanira” mu Galamukani! ya Epulero 2010.
