1-2. (a) Kasi ntchivichi chikutovwira kuzizipizga masuzgo? Longosorani. (b) Kasi tidumbiskanenge vichi mu nkhani iyi?

KASI muli kusanganapo na suzgo, paumaliro na kuyowoya kuti, “Natenge nifiskenge yayi kuzizipizga suzgo ili panekha”? Taŵanandi tili kuyowoyapo. Panji taŵanyake tikayowoya mazgu agha tikati takumbuka umo tikazizipizgira ulwari ukuru panji nyifwa ya wakutemweka withu. Para tikukumbuka suzgo ilo tikakumana nalo, tikuwona kuti tikazizipizga chifukwa chakuti Yehova wakatovwira na mzimu utuŵa uwo ukatipa “nkhongono zakuluska zakawiro.”—2 Kor. 4:7-9.

² Tikuthembaso mzimu utuŵa kuti utovwire kuti tileke kutolera maghanoghano gha charu chiheni ichi. (1 Yoh. 5:19) Kweniso kuti utovwire kuti tilimbane na “mawumba ghamizimu yiheni.” (Efe. 6:12) Sono tiyeni tidumbiskane nthowa ziŵiri izo mzimu utuŵa ungatovwilira pa masuzgo agha. Pamanyuma tidumbiskanenge ivyo tingachita kuti mzimu utuŵa utovwire.

3. Kasi ni nthowa wuli yimoza iyo Yehova wakutovwilira kuzizipizga masuzgo?

³ Mzimu utuŵa wa Yehova ukutovwira pakutipa nkhongono kuti tifiske milimo yithu nangauli tikusangana na masuzgo. Mpositole Paulosi wakayowoya kuti wakalutilira kuteŵetera Yehova nangauli wakasangananga na masuzgo chifukwa chakuti wakathembanga “nkhongono za Khristu.” (2 Kor. 12:9) Paulendo wake wachiŵiri waumishonale, Paulosi wakalimbikiranga waka kupharazga pera yayi. Kweni wakagwirangaso ntchito kuti wasange vyakukhumbikwa pa umoyo. Wakakhalanga ku Korinte ku nyumba ya Akwila na Prisila. Ŵanthu aŵa ŵakapanganga mahema. Pakuti Paulosi nayo wakayimanyanga ntchito yakupanga mahema, mazuŵa ghanyake wakagwiliranga nawo lumoza. (Mil. 18:1-4) Mzimu utuŵa ndiwo ukamupa nkhongono Paulosi kuti wafiske vyose ivi, kugwira  ntchito kuti wasange vyakukhumbikwa pa umoyo kweniso kupharazga.

4. Kuyana na 2 Ŵakorinte 12:7b-9, kasi Paulosi wakaŵa na suzgo wuli?

⁴ Ŵazgani 2 Ŵakorinte 12:7b-9. Kasi mu mavesi agha, Paulosi wakang’anamuranga vichi apo wakati wali na “munga mu thupi”? Usange mungaŵa na munga mu thupi, mungapulika vyakuŵinya chomene. Ntheura apa Paulosi wakayowoyanga kuti wakakumananga na masuzgo ghakuŵinya chomene. Ndipo wakati masuzgo agha ghali nga ni “mungelo wa Satana” uyo wakamutimbanga (panji kuti “wakamuŵapulanga,” mazgu ghamusi). Panji ni Satana na viŵanda vyake yayi awo ŵakapangiskanga masuzgo ghake, agho ghakaŵa nga ni munga mu thupi lake. Kweni viŵanda ivi vikati vyamanya kuti Paulosi wali na masuzgo, vikwenera kuti vikasazgirangako masuzgo agha kuti Paulosi wapulike vyakuŵinya chomene. Vikaŵa nga ni para munthu wakudidimizga munga mukati kuti unjire chomene. Kasi Paulosi wakachita wuli?

5. Kasi Yehova wakazgora wuli malurombo gha Paulosi?

⁵ Pakwamba, Paulosi wakakhumbanga kuti Yehova wawuskemo “munga” uwu. Iyo wakati: “Nkhaŵeya Fumu [Yehova] katatu kuti . . . ufumeko kwa ine.” Nangauli Paulosi wakalomba, kweni munga ukafumamo yayi mu thupi lake. Kasi ichi chikung’anamura kuti Yehova wakazgora yayi malurombo gha Paulosi? Yayi, wakazgora. Nangauli Yehova wakawuskapo yayi suzgo, kweni wakamupa nkhongono Paulosi kuti wazizipizge. Yehova wakati: “Para iwe walopwa ndipo nkhongono zane zikuŵa zakufikapo.” (2 Kor. 12:8, 9) Ndipo na wovwiri wa Chiuta, Paulosi wakalutilira kuŵa wakukondwa kweniso kuŵa na mtende wa mtima.—Fil. 4:4-7.

6. (a) Kasi Yehova wangazgora wuli malurombo ghinu? (b) Kasi ni mazgu wuli gha mu malemba gha mu ndime iyi agho ghakumukhozgani?

⁶ Nga ni Paulosi, kasi namwe muli kulombapo Yehova kuti wamuwuskiranipo suzgo? Usange kanandi waka muli kulombapo kufumira pasi pamtima, kweni suzgo linu likamara yayi, kweni ndipo likasazgikiranga chomene, kasi mukamba kughanaghana kuti Yehova waleka kukondwa namwe? Para ni nthena, kumbukani chiyelezgero cha Paulosi. Yehova wakazgora malurombo ghake, ntheura namwe wamuzgoraninge. Nyengo zinyake Yehova wangawuskapo suzgo yayi. Kweni na mzimu wake utuŵa, wamupaninge nkhongono kuti muzizipizge chiyezgo. (Sal. 61:3, 4) Nyengo zinyake ‘mungaponyeka pasi,’ kweni Yehova wamutayaninge yayi.—2 Kor. 4:8, 9; Fil. 4:13.

7-8. (a) Kasi mzimu utuŵa uli nga ni mphepo munthowa wuli? (b) Kasi Petrosi wakalongosora wuli umo mzimu utuŵa ukugwilira ntchito?

⁷ Kasi ni nthowa wuli yinyake iyo mzimu utuŵa ukutovwilira? Nga umo mphepo yingawovwilira ngalaŵa para yikuputira uko ngalaŵa yikuya nangauli pa nyanja pangaŵa majigha, mzimu utuŵa nawo ukutovwira kuti tilutilire kuteŵetera Yehova mu nyengo zakusuzga izi m’paka tikafike mu charu chiphya icho Chiuta walayizga.

⁸ Pakuti mpositole Petrosi wakaŵa mulovi, wakamanyanga vinandi vya ulendo wapanyanja. Panji lekani apo wakalongosoranga umo mzimu utuŵa ukugwilira ntchito wakayaniska na ivyo vikuchitika paulendo wa pa nyanja. Iyo wakalemba kuti: “Chifukwa nanga nkhamoza, uchimi undizepo na khumbo la munthu, kweni ŵanthu ŵakayowoyanga vyakufuma kwa Chiuta pakulongozgeka na mzimu utuŵa.” Lizgu Lachigiriki ilo lili kung’anamulika kuti “pakulongozgeka” likung’anamura kuti mwakovwirika.—2 Pet. 1:21.

9. Kasi Petrosi wakakhumbanga kuti ŵanthu ŵaghanaghane vichi apo wakalemba mazgu ghakuti ŵanthu ‘ŵakalongozgekanga’ na mzimu utuŵa?

⁹ Kasi Petrosi wakakhumbanga kuti ŵanthu ŵaghanaghanire vichi apo wakalemba mazgu ghakuti ŵanthu ‘ŵakalongozgekanga’ na mzimu utuŵa? Mazgu ghakuyana waka agha ndighoso Luka, uyo wakalemba buku la Milimo,  wakagwiliskira ntchito kuti walongosore za ngalaŵa iyo ‘yikuyegheka waka’ na mphepo. (Mil. 27:15) Wakusanda Baibolo munyake wakati apo Petrosi wakalemba kuti awo ŵakalemba Baibolo ‘ŵakalongozgeka’ na mzimu utuŵa, wakagwiliskira ntchito mazgu agho ghangapangiska ŵanthu kughanaghana za umo ulendo wapanyanja ukuŵira. Apa tingati Petrosi wakayowoyanga kuti, nga umo mphepo yikututuzgira ngalaŵa mpaka yikafike uko yikuya, ntheura ndimoso mzimu utuŵa ukalongozgera awo ŵakalemba Baibolo kuti ŵafiske mulimo wawo. Wakusanda Baibolo uyu wakatiso: “Awo ŵakalemba Baibolo ŵakaŵa nga ni ngalaŵa iyo yajura mathanga (chisalu chaboti) kuti munjire mphepo. Nawo ŵakaŵa ŵakunozgeka kuchita ntchito iyo mzimu utuŵa ukaŵalongozga kuchita.” Yehova wakachitapo chigaŵa chake. Wakaŵapa “mphepo” panji kuti mzimu utuŵa. Awo ŵakalemba Baibolo nawo ŵakachita chigaŵa chawo. Ŵakalondezga ivyo mzimu utuŵa ukaŵaphalira.

10-11. Kasi tikwenera kuchita vinthu wuli viŵiri kuti mzimu utuŵa utilongozgenge? Yowoyani chiyelezgero.

¹⁰ Nangauli nyengo yakulembera Baibolo yili kujumpha, kweni Yehova wachali kulongozga ŵateŵeti ŵake na mzimu utuŵa. Yehova wachali kuchita chigaŵa chake. Kasi tingachita wuli kuti mzimu utuŵa wa Chiuta utilongozgenge? Nase tikwenera kuwoneseska kuti tikulutilira kuchita chigaŵa chithu. Kasi tingachita wuli nthena?

¹¹ Ghanaghanirani chiyelezgero ichi. Para uyo wakwendeska boti wakukhumba kuti mphepo yimovwire, wakwenera kuchita vinthu viŵiri. Chakwamba, wakwenera kulaziska (kuthalika) boti lake uko mphepo yikuya. Nakuti boti lake lingenda yayi para wayima waka nalo pa dowoko, kutali na uko mphepo yikuputira. Chachiŵiri, wakwenera kutandawura makora thanga. Kweniso nanga mphepo yingaŵa kuti yikuputa chomene, boti lake lendenge pekha para mphepo yazura dankha mu mathanga. Mwakuyana waka, nase tilutilirenge kuteŵetera Yehova pekha para mzimu utuŵa ungatovwira. Kuti mzimu utuŵa  utovwire, tikwenera kuchita vinthu viŵiri. Chakwamba, tikwenera kuchita milimo iyo mzimu wa Chiuta ukulongozga ŵateŵeti ŵake kuti ŵachitenge. Chachiŵiri, tikwenera kuchita milimo iyi na nkhongono zithu zose. (Sal. 119:32) Para tichitenge vinthu ivi, mzimu utuŵa utovwirenge kuti tizizipizge masuzgo na kulutilira kuteŵetera Yehova mwakugomezgeka m’paka tikanjire mu charu chiphya cha Chiuta.

12. Kasi tiwonenge vichi sono?

¹² Kufika sono tadumbiskana nthowa ziŵiri izo mzimu utuŵa ukutovwilira. Mzimu utuŵa ukutipa nkhongono na kutovwira kulutilira kugomezgeka para tasanga na masuzgo. Kweniso ukutilongozga na kutovwira kuti tichitenge mulimo uwo Yehova watipa kuti tizakasange umoyo wamuyirayira. Sono tiwonenge vinthu vinayi ivyo tikwenera kuchita kuti mzimu utuŵa utovwire.

13. Kuyana na 2 Timote 3:16, 17, kasi Malemba ghangatovwira wuli, kweni tikwenera kuchita vichi?

¹³ Chakwamba, musambirenge Mazgu gha Chiuta. (Ŵazgani 2 Timote 3:16, 17.) Lizgu Lachigiriki ilo lili kung’anamulika kuti ‘kupelekeka na Chiuta’ likung’anamura kuti ‘Chiuta wakathuta.’ Chiuta ‘wakathutira’ maghanoghano ghake mu awo ŵakalemba Baibolo pakugwiliskira ntchito mzimu wake utuŵa. Ntheura para tikuŵazga Baibolo na kughanaghanirapo, ulongozgi uwo Yehova wakutipa ukunjira mu maghanoghano ghithu na mu mtima withu. Ulongozgi uwu, ukutovwira kuti tisinthe umoyo withu mwakuti tikondweske Yehova. (Heb. 4:12) Kweni kuti mzimu utuŵa utovwire, tikwenera kupatura nyengo kuti tiŵazgenge Baibolo na kughanaghanirapo. Para tikuchita nthena, Mazgu gha Chiuta ghatilongozgenge pa chilichose icho tikuyowoya na kuchita.

14. (a) Chifukwa wuli tingayowoya kuti mzimu utuŵa ukuŵapo pa maungano ghithu? (b) Kasi tikwenera kuchitachi kuti mzimu utuŵa utovwire para tili pa maungano?

¹⁴ Chachiŵiri, musopenge Chiuta. (Sal. 22:22) Mzimu wa Yehova ukuŵapo pa maungano gha mpingo. (Chivu. 2:29) Chifukwa wuli tikuyowoya nthena? Chifukwa para tili pa maungano pamoza na Ŵakhristu ŵanyithu, tikulomba mzimu utuŵa, tikwimba sumu za Ufumu izo zikufuma mu Baibolo, kweniso tikupika ulongozgi wakufuma mu Baibolo kwizira mu nkhani izo ŵabali awo ŵali kusoleka na mzimu utuŵa ŵakuyowoya. Kweniso mzimu uwu ukovwira ŵadumbu kuti ŵanozgekere na kuchita makora vigaŵa ivyo ŵakupika pa maungano. Ndipouli, kuti mzimu utuŵa utovwire, nase tikwenera kunozgekera kuti tizgorengepo pa maungano. Usange tichitenge nthena, para tili pa maungano, mzimu utuŵa utovwirenge nga umo mphepo yikovwilira boti ilo latandawura mathanga ghake kuti lende makora.

15. Kasi tikwenera kuchita vichi kuti mzimu utuŵa utovwire para tikupharazga?

¹⁵ Chachitatu, tipharazgenge. Usange tikugwiliskira ntchito Baibolo para tikupharazga na kusambizga, tikuzomerezga mzimu utuŵa kuti utovwire mu uteŵeti. (Rom. 15:18, 19) Ndipouli, kuti mzimu wa Chiuta utovwire chomene, tikwenera kupharazga nyengo zose na kugwiliskira ntchito Baibolo. Nthowa yimoza iyo yingatovwira kudumbiskana makora na ŵanthu para tikupharazga, ni para tikulondezga masachizgo agho ghakuŵa mu kabuku ka Uteŵeti na Umoyo Wachikhristu.

16. Kasi ni nthowa wuli yiwemi chomene iyo yingatovwira kuti tiŵe na mzimu utuŵa?

¹⁶ Chachinayi, mulombenge kwa Yehova. (Mat. 7:7-11; Luka 11:13) Nthowa yiwemi chomene kuti mzimu utuŵa uŵe nase, nkhulomba kwa Yehova. Palije icho chingatondeska malurombo ghithu kufika kwa Yehova. Kweniso palije icho chingatondeska mzimu utuŵa wa Chiuta kufikira ise, nanga wangaŵa Satana panji tingajalirika mu jele. (Yak. 1:7) Kasi tikwenera kulomba wuli kuti tisangenge chomene chandulo na mzimu utuŵa? Kuti tizgore fumbo ili, tiyeni tidumbiskane vinandi vyakukhwaskana na lurombo. Tiwonenge  ntharika iyo yili mu Buku la Makani Ghawemi la Luka. *

17. Kasi ntharika iyo Yesu wakayowoya pa Luka 11:5-9, 13, yikutisambizga vichi pa nkhani ya lurombo?

¹⁷ Ŵazgani Luka 11:5-9, 13. Ntharika iyo Yesu wakayowoya yikutovwira kumanya umo tingalombera mzimu utuŵa. Mu ntharika iyi, mwanalume wakapika ivyo wakakhumbanga “chifukwa cha kukosera kwake.” Wakawopa yayi kupempha wovwiri kwa mubwezi wake nangauli kukaŵa usiku chomene. (Wonani mazgu ghakulongosora vesi la Luka 11:8 mu mwbr18.07 peji 3 na 4.) Kasi Yesu wakati ntharika iyi yikutisambizga vichi pa nkhani ya lurombo? Iyo wakati: “Lutilirani kulomba, ndipo mupikenge. Lutilirani kupenja, ndipo musangenge. Lutilirani kukhung’uska, ndipo kumujulikiraninge.” Ipo, kasi tikusambirapo vichi apa? Nase kuti mzimu utuŵa utovwire, tikwenera kukosera mu lurombo.

18. Kuyana na ntharika ya Yesu, chifukwa wuli tikugomezga kuti Yehova watipenge mzimu wake utuŵa?

¹⁸ Ntharika iyi yikutovwiraso kumanya chifukwa icho Yehova wakutipira mzimu utuŵa. Mwanalume wa mu ntharika iyi, wakakhumbanga kulongora kuti wakupokelera makora ŵalendo. Iyo wakawona kuti wakwenera kumupa chakurya mulendo wake uyo wakamwizira usiku, kweni wakaŵavya chakuti wangamupa. Yesu wakati mwanalume uyu, mubwezi wake wakamupa vingwa chifukwa cha kukosera kwake. Kasi fundo ya Yesu yikaŵa yakuti wuli? Usange munthu wambura kufikapo ndiyo wakawovwira munyake uyo wakakoseranga, tikugomezga kuti Adada ŵithu ŵakuchanya awo mbalusungu, ŵawovwirengeso awo ŵakukosera kulomba mzimu utuŵa. Ntheura tikwenera kulomba na chigomezgo chose kuti Yehova wazgorenge para tikumulomba mzimu utuŵa.—Sal. 10:17; 66:19.

19. Chifukwa wuli tikugomezga kuti tizizipizgenge?

¹⁹ Tikugomezga kuti tizizipizgenge nangauli Satana wakuleka yayi kulimbana nase. Chifukwa wuli? Chifukwa ntchakuti mzimu utuŵa ukutovwira munthowa ziŵiri. Yakwamba, ukutipa nkhongono kuti tizizipizge masuzgo. Yachiŵiri, ukutipa nkhongono kuti tilutilire kuteŵetera Yehova m’paka tikanjire mu charu chiphya. Ntheura tiyeni tiŵikepo mtima kuti tisangenge chomene chandulo na mzimu utuŵa.