Kuyowoya unenesko, mazuŵa ghano palije munthu uyo wangalongosora umo Paulosi wakawonekeranga. Vithuzithuzi vya Paulosi ivyo vili mu mabuku ghithu ŵakuchita waka kupenta panji kudinda. Ŵanthu ŵakusanda vinthu vyakale ŵandasangepo vithuzithuzi vya Paulosi panji chilichose chakulongora umo wakaŵira.

Kweni pali vinthu vinyake ivyo vingatovwira kumanya umo Paulosi wakawonekeranga. Mwachiyelezgero, Gongwe la Mulinda la Malichi 1, 1902, likati: “Kuyowoya za umo Paulosi wakawonekeranga: . . . Mu buku la ‘Acts of Paul and Thecla,’ . . . ilo likalembeka m’ma A. D. 150, muli nkhani yakulongosora za umo Paulosi wakaŵira. Panji nkhani iyi ndiyo yikumulongosora makora chomene Paulosi kweniso panji kwamba kale ŵanthu ŵakagomezganga kuti ndimo wakawonekeranga. Buku ili likuti Paulosi wakaŵa ‘mufupi, wachipara, wamatewe, wakujintcha, tunkhope tukakhwaskananga, kweniso wakaŵa na mphuno yitali.’”

Pakulongosora za vinthu vyakale, The Oxford Dictionary of the Christian Church (1997 edition), yikati: “Vingachitika yayi kuti buku la ‘Acts of Paul and Thecla’ litete vinthu vyose vyakukhwaskana na mbiri yakale.” Mu nyengo yakale, ŵanthu ŵakalichindikanga chomene buku la Acts of Paul and Thecla. Ukaboni wakuti ŵanthu ŵakalichindikanga ngwakuti mipukutu 80 Yachigiriki ya buku ili yichali kusangika, ndipo paliso ya viyowoyero vinyake. Ntheura, vithuzithuzi vya umo Paulosi wakawonekeranga ivyo vili mu mabuku ghithu vikukoleranako na ivyo mabuku ghanyake ghakale ghakuyowoya.

Kumbukani kuti pali vinthu vinyake ivyo ni vyakuzirwa chomene kuluska umo Paulosi wakawonekeranga. Apo Paulosi wakachitanga uteŵeti wake, ŵanthu ŵanyake ŵakamunenanga kuti “wakuwoneka wakulopwa ndipo kayowoyero kake nkhambura fundo.” (2 Kor. 10:10) Kweni tileke kuluwa kuti Paulosi wakazgoka Mkhristu chifukwa cha munthondwe uwo Yesu wakamulongora. Kweniso tingaghanaghanira ivyo Paulosi wakafiska nga ‘ntchiŵiya chakusoleka [cha Khristu] icho chikayegha zina [la Yesu] ku mitundu.’ (Mil. 9:3-5, 15; 22:6-8) Tighanaghanirengeso umo tingapindulira na mabuku gha mu Baibolo agho Paulosi wakalemba na wovwiri wa Yehova.

Paulosi wakajilumbapo yayi na ivyo wakachitanga pambere wandaŵe Mkhristu, kweniso wakayowoyapo yayi umo wakawonekeranga. (Mil. 26:4, 5; Fil. 3:4-6) Iyo wakati: “Ndine muchoko chomene pa ŵapositole, ndipo nili wakwenelera yayi kuchemeka mpositole.” (1 Kor. 15:9) Pamanyuma, Paulosi wakalemba kuti: “Lusungu lukuru ulu lukapika kwa ine, munthu muchoko chomene pa ŵatuŵa wose, mwakuti nipharazge ku mitundu makani ghawemi ghakuyowoya za usambazi wambura kumara wa Khristu.” (Efe. 3:8) Mazgu agha ngakuzirwa chomene kuluska kughanaghanira waka za umo Paulosi wakawonekeranga.