Ŵalevi ŵanyake awo ŵakaŵa ŵasembe yayi ŵakachitanga milimo yinyake, nga mulimo wa ulinda. Ŵakalongozgekanga na kapitawo wa pa tempile. Munthu munyake wakulemba mabuku zina lake Philo, uyo wakaŵa Muyuda, wakalongosora milimo iyo ŵanthu aŵa ŵakachitanga. Wakati: “Ŵanyake mwa [Ŵalevi] aŵa ŵakakhalanga pa milyango yakunjilira mu tempile. Ŵanyake ŵakalindanga malo ghakupatulika pa tempile. Ŵakawoneseskanga kuti waliyose uyo ngwambura kuzomerezgeka waleke kunjiramo, kwali mwangozi waka panji yayi. Ŵanyake ŵakendanga kuzingilira tempile, ndipo ŵakasinthananga, ŵanyake ŵakagwiranga muhanya, ŵanyake usiku.”

Ŵa mu Khoti Likuru la Ŵayuda para ŵakukhumba wovwiri unyake ŵakapemphanga ŵanthu aŵa. Gulu la Ŵayuda ili ndilo lekha likazomerezgekanga na boma la Romu kunyamura vilwero.

Mulembi munyake zina lake Joachim Jeremias wakati, “mazgu agho Yesu wakayowoya apo wakakakika, ghakuti zuŵa lililose wakaŵanga mu Tempile kusambizga kweni ŵakamukora yayi (Mat. 26:55), ghakulongora pakweru kuti ŵalinda ŵa pa tempile aŵa ndiwo ŵakakora Yesu.” Mulembi uyu wakugomezgaso kuti ŵalinda ŵa pa tempile aŵa ndiwo ŵakatumikaso panyengo yinyake kumasinda kuti ŵakakore Yesu. (Yoh. 7:32, 45, 46) Nyengo yikati yajumphapo, kapitawo wa pa tempile pamoza na ŵalinda ŵanyake ndiwo ŵakatumikaso kukakora ŵasambiri ŵa Yesu kwiza nawo panthazi pa Sanihedirini. Kweniso vikulongora kuti ŵalinda aŵa ndiwo ŵakaguguzira mpositole Paulosi kuwaro kwa tempile.—Mil. 4:1-3; 5:17-27; 21:27-30.