1. Kasi ŵabali ŵawukirano ŵakwenera kumanya vichi?

ŴABALI ŵawukirano, pali vinandi vyakuti mungachita mu mpingo. Mwaŵanandi muli na nkhongono. (Zinth. 20:29) Mukuchita vinandi pakovwira ŵabali na ŵadumbu ŵinu mu mpingo. Panji mukukhumbisiska kuŵa muteŵeti wakovwira. Kweni nyengo zinyake mukuwona kuti ŵanji ŵakuwona kuti muchali mwana panji ŵakuwona kuti mundafikepo kuti ŵamupani mauteŵeti ghakuru. Nangauli ndimwe muwukirano, kweni pali vinthu vinyake ivyo mungachita sono kuti ŵabali na ŵadumbu mu mpingo ŵamuchindikaninge na kumugomezgani.

2. Kasi tisambirenge vichi mu nkhani iyi?

² Mu nkhani iyi tisambirenge za Themba Davide. Kweniso tiwonenge mwakudumura ivyo vikachitika pa umoyo wa mafumu ghaŵiri gha Yuda, agho ni Asa na Yehoshafati. Tiwonenge masuzgo agho ŵanalume ŵatatu aŵa ŵakakumana nagho ndiposo umo ŵakaghamazgira. Kufuma apo, tisambirenge ivyo ŵabali ŵawukirano ŵangasambirako ku ŵanalume aŵa.

3. Kasi nthowa yimoza iyo ŵawukirano ŵangawovwilira ŵabali na ŵadumbu ŵachilara njakuti wuli?

³ Apo Davide wakaŵa muwukirano, wakasambira maluso agho ŵanji ŵakawonanga kuti ngakovwira chomene. Ntchakuwonekerathu kuti wakaŵa paubwezi wakukhora na Yehova, kweniso wakalimbikira kuti waŵe waluso pakwimba sumu, ndipo luso ulu wakawovwira nalo Sauli, uyo Chiuta wakamusankha kuŵa fumu ya Israyeli. (1 Sam. 16:16, 23) Mwaŵawukirano, kasi muli na maluso  agho mukuwona kuti ghangawovwira ŵanji mu mpingo? Mwaŵanandi muli nagho. Mwachiyelezgero, ŵanthu ŵachilara ŵakuwonga chomene para ŵawukirano ŵakuŵawovwira umo ŵangagwiliskira ntchito vinthu vyawo vyakupangika na ŵasayansi nga ni matabuleti pa maungano kweniso para ŵakusambira paŵekha. Chifukwa chakuti mukuvimanya makora vinthu ivi, luso lwinu lungawovwira chomene ŵabali ŵachilara.

4. Kasi ŵabali ŵawukirano ŵangamuyezga wuli Davide? (Wonani chithuzi cha pa chikopi.)

⁴ Nyengo zose Davide wakachitanga vinthu mwamahara kweniso ŵanji ŵakamugomezganga. Mwachiyelezgero, apo wakaŵa muwukirano, wakalimbikiranga chomene kupwelelera mberere za awiske. Kweni iyi yikaŵa ntchito yakofya. Nyengo yinyake, Davide wakalongosolera Themba Sauli kuti: “Muteŵeti winu wakaliskanga mskambo wa awiske, mbwenu nkhalamu yikiza, kukizaso nkhalamira, ndipo zose zikakora mberere pa mskambo. Nkhayilondezga na kuyikoma na kuthaska mberere mu mulomo wake.” (1 Sam. 17:34, 35) Davide wakawonanga kuti ni mulimo wake kupwelelera mberere ndipo wakazivikiliranga mwachikanga. Ŵabali ŵawukirano nawo ŵangamuyezga Davide. Ŵakwenera kulimbikira mulimo uliwose uwo ŵapika.

5. Kuyana na lemba la Salimo 25:14, kasi ntchinthu wuli chakuzirwa chomene icho ŵabali ŵawukirano ŵangachita?

⁵ Apo Davide wakaŵa muwukirano, wakaŵa paubwezi wakukhora na Yehova. Ubwezi uwu ukaŵa wakuzirwa chomene kuluska chikanga icho wakaŵa nacho kweniso kuluska luso lwake pakwimba na bango. Davide wakawonanga Yehova kuŵa Chiuta wake kweniso mubwezi wake wapamtima. (Ŵazgani Salimo 25:14.) Ŵabali ŵawukirano, chinthu chakuzirwa chomene icho mungachita nkhukhozga ubwezi winu na Adada ŵinu ŵakuchanya. Ndipo ivi vingawovwira kuti mupikenge mauteŵeti ghanyake mu mpingo.

6. Kasi ŵanji ŵakamuwonanga wuli Davide?

⁶ Suzgo linyake ilo Davide wakaŵa nalo ndakuti ŵanthu ŵakamuwonanga mwambura kwenelera. Mwachiyelezgero, apo Davide wakajipeleka kuti watimbane na Goliyati, Themba Sauli likayezga kumugongoweska. Likamuphalira kuti: “Ndiwe msepuka.” (1 Sam. 17:31-33) Pambere ivi vindachitike, mukuru wake wakamunena kuti wakutondeka mulimo wa kupwelelera mberere za awiske uwo wakapika. (1 Sam. 17:26-30) Ndipouli, Yehova wakawonanga Davide kuti wachali msepuka yayi, kweniso wakamuwonanga kuti ngwakutondeka yayi. Yehova wakamumanyanga makora Davide. Nakuti Davide  wakakoma Goliyati chifukwa cha kugomezga mubwezi wake Yehova.—1 Sam. 17:45, 48-51.

7. Kasi mungasambirako vichi ku nkhani yinyake ya Davide?

⁷ Kasi ivyo vikachitikira Davide vingamusambizgani vichi? Tikusambirako kuti tikwenera kuŵa ŵakuzikira. Pangatora nyengo kuti awo ŵamuwonaninge kufuma waka pa wanichi, ŵambe kumuwonani kuti sono mwakura. Kweni chakuti mumanye ntchakuti Yehova wakulaŵiska waka kuwaro yayi. Wakumumanyani makora ndipo wakumanya ivyo mungakwaniska. (1 Sam. 16:7) Ntheura khozgani ubwezi winu na Chiuta. Davide wakakhozga ubwezi wake na Yehova pakulaŵiska ivyo wali kulenga. Wakaghanaghanirangapo chomene pa ivi ndipo vikamusambizganga vinthu vinyake vyakukhwaskana na Mlengi. (Sal. 8:3, 4; 139:14; Rom. 1:20) Chinthu chinyake icho mungachita, nkhupempha Yehova kuti wamupani nkhongono. Mwachiyelezgero, kasi ŵanyake ku sukulu kwinu ŵakumunenani chifukwa chakuti ndimwe Kaboni wa Yehova? Para ndimo viliri, pemphani Yehova kuti wamovwirani kuti muzizipizge. Ndipo londezgani ulongozgi uwo uli mu Mazgu ghake na mu mabuku ghithu ghakulongosora Baibolo ndiposo mavidiyo. Nyengo yiliyose para mwawona umo Yehova wakumovwilirani pa masuzgo ghinu, mwambenge kumugomezga chomene. Kweniso para ŵanji ŵakuwona kuti mukumugomezga chomene Yehova, nawo ŵambenge kumugomezgani.

8-9. Kasi ntchivichi chikawovwira Davide kuti walindilire mwakuzikira m’paka apo wakaŵira themba, ndipo ŵabali ŵawukirano ŵangasambirako vichi kwa iyo?

⁸ Wonani suzgo linyake ilo Davide wakakumana nalo. Davide wati waphakazgika kuŵa themba, wakalindilira vyaka vinandi kuti wambe kuwusa Yuda. (1 Sam. 16:13; 2 Sam. 2:3, 4) Kasi ntchivichi chikamovwira pa nyengo iyi kuti wazikire? Iyo wakagongowa yayi, m’malo mwake wakachitanga waka ivyo wangafiska. Mwachiyelezgero, apo wakabisamanga mu chigaŵa cha Ŵafilisiti, Davide wakagwiliskira ntchito nyengo iyi kurwa na ŵalwani ŵa Israyeli. Pakuchita nthena, wakavikiliranga mphaka za charu cha Yuda.—1 Sam. 27:1-12.

⁹ Kasi ŵabali ŵawukirano ŵangasambirako vichi kwa Davide? Gwiliskirani ntchito mwaŵi uliwose uwo wasangika kuti muteŵetere ŵabali ŵinu. Wonani ivyo vikachitikira mubali munyake zina lake Ricardo. * Kufuma waka pa unyamata, wakakhumbanga kuŵa mupayiniya wanyengozose. Kweni ŵalara ŵakamuphalira kuti walindilirepo dankha. M’malo mwa kukwiya na kukhuŵara, Ricardo wakamba kulimbikira chomene mu uteŵeti. Iyo wakuti: “Para nkhulaŵiska kumanyuma, nkhuwona kuti chikaŵa chiwemi nadi kuti nisazgireko mwamphu wane. Nkhawoneseskanga kuti nawelerako kwa waliyose uyo wanweka na makani ghawemi ndipo nkhanozgekeranga makora sambiro lililose. Ndipo kakaŵa kakwamba kuti niŵe na sambiro la Baibolo. Kweniso wofi ukamara chifukwa cha kupharazga pafupipafupi.” Sono Ricardo ni mupayiniya wanyengozose kweniso ni muteŵeti wakovwira.

10. Kasi nyengo yinyake Davide wakachita wuli pambere wandasankhe chakuchita pa nkhani yinyake yikuru?

¹⁰ Wonaniso chinthu chinyake icho chikachitikira Davide. Panyengo iyo Davide na ŵanalume ŵake ŵakakhalanga mu chigaŵa cha Ŵafilisiti, kuchimbira themba Sauli, ŵakaleka mbumba zawo na kuluta ku malo ghanyake kukarwa nkhondo. Apo ŵakaŵa ku nkhondo, kukiza ŵalwani ndipo ŵakakora ŵawoli ŵawo na ŵana ŵawo na kuluta nawo. Davide waŵenge munyake mphanyi wakaghanaghana kuti nkhondo wakuyimanya chomene, ndipo wayisangenge yekha nthowa yiwemi yakuthaskira awo ŵakakoleka. Kweni wakachita nthena yayi. Wakapempha Yehova kuti wamovwire. Davide wakafumba kwa Yehova kwizira mwa wasembe  Abiyatara. Wakafumba kuti: “Kasi nililondezge gulu la ŵakuwukira ili?” Yehova wakaphalira Davide kuti walute ndipo wamuthaska awo ŵakakoleka. (1 Sam. 30:7-10) Kasi imwe ŵawukirano, mukusambirapo vichi apa?

11. Kasi mukwenera kuchita wuli pambere mundasankhe chakuchita pa nkhani yinyake?

¹¹ Mufumbenge ulongozgi ku ŵanji pambere mundasankhe chakuchita pa nkhani yinyake. Fumbani ŵapapi ŵinu. Kweniso ŵalara ŵakukhwima mwauzimu ŵangamupani ulongozgi wakovwira. Yehova wakuŵagomezga ŵanalume aŵa, ntheura namwe mukwenera kuŵagomezga. Yehova wakuŵawona kuti ni “vyawanangwa” ku mpingo. (Efe. 4:8) Para mungalondezga chipulikano chawo na kupulikira ulongozgi na masachizgo agho ŵakumupani, musankhenge vinthu mwamahara. Sono tiyeni tiwone ivyo tingasambirako kwa Themba Asa.

12. Kasi Asa wakaŵa na mikhaliro wuli apo wakambanga kuwusa?

¹² Apo Themba Asa wakaŵa munyamata, wakaŵa wakujiyuyura ndiposo wachikanga. Mwachiyelezgero, wakati waŵa waka themba kunjira m’malo mwa awiske a Abiya, wakamba kuwuskamo vikozgo mu charu. Kweniso “wakaphalira Yuda kupenja Yehova Chiuta wa ŵasekuru ŵawo na kusungilira Dango na languro.” (2 Mid. 14:1-7) Ndipo apo Zera Muetiyopiya wakawukira Yuda na ŵasilikari ŵake 1,000,000, Asa wakachita mwamahara. Wakapempha Yehova kuti wamovwire. Iyo wakati: “A Yehova, vili na kanthu yayi kwa imwe, kwali awo mukuwovwira mbanandi panji ŵalije nkhongono. Tovwirani, mwe Yehova Chiuta withu, pakuti tikuthemba imwe.” Mazgu agha ghakulongora kuti wakaŵa na chipulikano chikuru mwa Yehova kuti wangaŵathaska. Asa wakagomezga Adada ŵake ŵakuchanya, ndipo “Yehova wakathereska Ŵaetiyopiya.”—2 Mid. 14:8-12.

13. Kasi ntchivichi icho chikachitikira Asa pamanyuma, ndipo chifukwa wuli?

¹³ Namwe mungazomera kuti chikaŵa chakofya chomene kurwa nkhondo na ŵasilikari 1,000,000, kweni Asa wakatonda chifukwa chakuti wakagomezga Yehova. Kweni chachitima ntchakuti panyengo yinyake apo Asa wakakumana na suzgo linyake, wakagomezga Yehova yayi. Basha, Themba la Israyeli ilo likaŵa liheni chomene likati lamofya kuti lirwenge nayo nkhondo, iyo wakapempha wovwiri kwa fumu ya Siriya. Ivyo wakachita apa vikamupwetekeska. Yehova kwizira mwa ntchimi yake Hanani, wakaphalira Asa kuti: “Pakuti  wagomezga themba la Siriya ndipo ukagomezga Yehova Chiuta wako chara, ŵankhondo ŵa themba la Siriya ŵafwanthamuka mu woko lako.” Nakuti kufuma nyengo iyi kuya munthazi, Asa wakakhaliranga waka kurwa nkhondo. (2 Mid. 16:7, 9; 1 Mathe. 15:32) Kasi sambiro ndakuti wuli apa?

14. Kasi mungalongora wuli kuti mukugomezga Yehova? Kuyana na lemba la 1 Timote 4:12, kasi ŵanji ŵamuwonaninge wuli para mwachita nthena?

¹⁴ Nyengo zose muŵenge ŵakujiyuyura na kulutilira kugomezga Yehova. Apo mukabatizikanga, mukalongora kuti muli na chipulikano cha nkhongono kweniso mukugomezga chomene Yehova. Yehova wakakondwa namwe ndipo wakamupokelerani kuti muŵe mu mbumba yake. Sono mukwenera kulutilira kumugomezga. Chingaŵa chipusu kugomezga Yehova para mukukhumba kusankha chakuchita pa nkhani yikuru pa umoyo winu. Kweni wuli pa nkhani zinyake waka? Ntchakuzirwa chomene kuti mugomezgenge Yehova pakusankha chilichose, kwali ni vyakusanguluska, ntchito, panji ivyo mukukhumba kuchita pa umoyo. Mungagomezganga vinjeru vinu yayi. Mukwenera kupenjerezga fundo za mu Baibolo izo zikukolerana na umo vinthu viliri pa umoyo winu, na kuzilondezga. (Zinth. 3:5, 6) Para muchitenge nthena, Yehova wakondwenge chomene ndipo ŵabali na ŵadumbu mu mpingo ŵamuchindikaninge.—Ŵazgani 1 Timote 4:12.

15. Kuyana na lemba la 2 Midauko 18:1-3; 19:2, kasi Themba Yehoshafati likabudiska vichi?

¹⁵ Mbunenesko kuti tose tili ŵambura kufikapo, ndipo nyengo zinyake namwe mubudiskenge vinthu vinyake. Kweni ivi vingamutondeskaninge yayi kuchita ivyo mungakwaniska pakuteŵetera Yehova. Ghanaghanirani ivyo vikachitikira Themba Yehoshafati. Wakaŵa na mikhaliro yiwemi yinandi. Apo wakaŵa muwukirano, “wakapenja Chiuta wa awiske na kulondezga malango ghake.” Kweniso wakatuma ŵakaronga ŵake kwenda mu misumba ya Yuda kuti ŵasambizge ŵanthu za Yehova. (2 Mid. 17:4, 7) Nangauli Yehoshafati wakakhumbanga kukondweska Yehova, kweni nyengo zinyake wakasankhanga makora yayi vinthu. Chifukwa chakuti nyengo yinyake Yehoshafati wakasankha vinthu mwambura mahara, wakapokera ulongozgi wankhongono kufuma kwa muteŵeti wa Yehova. (Ŵazgani 2 Midauko 18:1-3; 19:2.) Kasi mungasambirapo vichi apa?

16. Kasi mungasambirako vichi kwa Rajeev?

¹⁶ Muzomerenge ulongozgi na kuwulondezga.  Panji nga mbawukirano ŵanyinu, namwe mukutondeka kusankha icho ntchakuzirwa chomene pa umoyo. Usange ndimo viliri, mungagongowanga yayi. Wonani ivyo vikachitikira mubali wachinyamata, zina lake Rajeev. Pakulongosora umo vinthu vikaŵira pa uwukirano wake, iyo wakuti: “Nyengo zinyake nkhamanyanga yayi ivyo nkhukhumba kuchita pa umoyo wane. Nga mbawukirano ŵanyane, nane nkhatemwanga chomene maseŵero na kunjoya kuluska kuluta ku maungano panji mu uteŵeti.” Kasi ntchivichi chikawovwira Rajeev kuti wasinthe? Mulara walusungu wakamupa ulongozgi. Rajeev wakuti: “Wakanovwira kuti nighanaghanirepo fundo iyo yili pa 1 Timote 4:8.” Rajeev wakajiyuyura, wakapulikira ulongozgi, ndipo wakasanda icho ntchakuzirwa chomene pa umoyo wake. Iyo wakuti: “Nkhasankha kuti kuteŵetera Yehova ndiko kuŵe pakwamba mu umoyo wane.” Kasi ntchivichi icho chikachitika pamanyuma pake? Rajeev wakulongosora kuti: “Pati pajumpha vyaka vichoko waka kufuma apo nkhapikira ulongozgi uwu, nkhimikika kuŵa muteŵeti wakovwira.”

17. Kasi ŵabali na ŵadumbu ŵachilara ŵakujipulika wuli na ŵabali ŵachinyamata awo ŵakuteŵetera Yehova?

¹⁷ Ŵabali na ŵadumbu ŵachilara ŵakumuwongani chomene ŵabali ŵachinyamata imwe mukuteŵetera nawo Yehova “na mtima umoza.” (Zef. 3:9) Ŵakukondwa na mwamphu winu pa vinthu vyauzimu kweniso chifukwa cha kulimbikira mauteŵeti agho mwapika. Iwo ŵakumutemwani chomene.—1 Yoh. 2:14.

18. Kuyana na lemba la Zintharika 27:11, kasi Yehova wakujipulika wuli na ŵachinyamata awo ŵakumuteŵetera?

¹⁸ Ŵabali ŵawukirano, kuluwa yayi kuti Yehova wakumutemwani kweniso wakumugomezgani. Iyo wakayowoyerathu kuti mu mazuŵa ghaumaliro, wumba wa ŵanyamata uzamujipeleka na mtima wose. (Sal. 110:1-3) Yehova wakumanya kuti mukumutemwa ndipo mukukhumba kumuteŵetera na nkhongono zinu zose. Ntheura muzikirenge nawo ŵanji, ndipo namwe pamwekha mungapupulumanga yayi pakuchita vinthu. Para mwabudiska vinthu, zomerani ulongozgi na ntchenyo iyo mungapika, ndipo muviwone kuti vyafuma kwa Yehova. (Heb. 12:6) Limbikirani uteŵeti uliwose uwo mwapika. Ndipo chakuzirwa chomene ntchakuti, pa chilichose icho mukuchita, mukondweskenge Adada ŵinu ŵakuchanya.​—Ŵazgani Zintharika 27:11.