NKHANI YAKUSAMBIRA 11
Umo Malemba Ghangamovwilirani Kuti Muzizipizge
‘Chiuta wakutipa nkhongono zakuzizipizgira.’—ROM. 15:5.
SUMU 94 Kuwonga Chifukwa cha Mazgu gha Chiuta
IVYO VILI MU NKHANI IYI *
1. Kasi ni viyezgo wuli ivyo ŵanthu ŵa Yehova ŵangakumana navyo?
KASI mukusangana na masuzgo ghakuru? Panji kasi munthu munyake mu mpingo wali kumukhuŵazgani? (Yak. 3:2) Kasi ŵanyinu ku sukulu panji ku ntchito ŵakumunyozani chifukwa mukuteŵetera Yehova? (1 Pet. 4:3, 4) Panji kasi ŵabali ŵinu ŵakumukanirani kuwungana panji kupharazga vya chigomezgo chinu? (Mat. 10:35, 36) Para chiyezgo ntchikuru chomene, mungamba kughanaghana kuti muleke waka kuteŵetera Yehova. Kweni nanga mungakumana na suzgo wuli, manyani kuti Yehova wamupaninge vinjeru kuti mumanye umo mungachitira na suzgo ilo ndiposo wamupaninge nkhongono zakuzizipizgira.
2. Kuyana na Ŵaroma 15:4, kasi kuŵazga Mazgu gha Chiuta kungatovwira wuli?
2 Mu Baibolo, Yehova wali kuŵikamo nkhani zakulongosora umo ŵanthu ŵambura kufikapo ŵakachitira na viyezgo vikuru ivyo ŵakakumana navyo. Chifukwa wuli wali kuchita nthena? Wali kuchita nthena kuti tisambireko kwa iwo. Fundo iyi ndiyo Yehova wakapangiska mpositole Paulosi kulemba. (Ŵazgani Ŵaroma 15:4.) Para tikuŵazga nkhani izi, tikupembuzgika kweniso tikuŵa na chigomezgo kuti vinthu viŵenge makora munthazi. Kweni kuti tisange chandulo chomene na ivyo tikusambira mu Baibolo, tikwenera kuŵazga waka yayi. Tikwenera kuzomerezga Malemba kuti ghasinthe maghanoghano ghithu na mtima withu. Mwachiyelezgero, kasi tikwenera kuchita wuli para tikukhumba ulongozgi wa umo tingachitira na suzgo lithu? Tikwenera kuchita vinthu vinayi ivi: (1) Kulomba, (2) Kujitora nga ni munthu uyo tikuŵazga mu Baibolo, (3) Kughanaghanirapo, na (4) Kulondezga. Sono tiyeni tidumbiskane umo tingachitira chigaŵa chilichose. * Ndipo pamanyuma, tiwonenge ivyo tingasambirako kwa Themba Davide na mpositole Paulosi, mwakugwiliskira ntchito nthowa iyi yakusambilira.
1. LOMBANI
Pambere mundambe kuŵerenga Baibolo, mulombani Yehova kuti wamovwirani kusanga chandulo (Wonani ndime 3)
3. Kasi mukwenera kuchitachi pambere mundambe kuŵazga Baibolo, ndipo chifukwa wuli?
3 (1) Lombani. Pambere mundambe kuŵazga Baibolo, pemphani Yehova kuti wamovwirani kuti musange chandulo na ivyo mukuŵazga. Mwachiyelezgero, para mukupenja ulongozgi wa umo mungachitira na suzgo linyake, pemphani Yehova kuti wamovwirani kuti musange fundo mu Mazgu ghake izo zingamovwirani kuti mumanye chakuchita.—Fil. 4:6, 7; Yak. 1:5.
2. JITORANI NGA NDIMWE
Yezgani kujitora nga ni munthu uyo mukuŵazga mu nkhani ya mu Baibolo (Wonani ndime 4)
4. Kasi ntchivichi chingawovwira kuti ivyo mukuŵazga viŵenge vyanadi kwa imwe?
4 (2) Jitorani nga ndimwe. Yehova wali kutipa luso lwakuti para vinthu vikuchitika tiwonenge nga vikuchitikira ise. Kuti ivyo mukuŵazga vimovwirani makora, ivyo vikuchitika muŵenge nga mukuviwona ndipo vikuchitikira imwe. Muŵenge nga ndimwe muli pa malo gha munthu uyo mukuŵazga, ndipo mukuwona ivyo iyo wakuwona na kujipulika nga umo iyo wakwenera kuti wakajipulikiranga.
3. MUGHANAGHANIRENGEPO
Mughanaghanirengepo chomene pa ivyo mukuŵerenga kweniso umo vikumukhwaskirani (Wonani ndime 5)
5. Kasi kughanaghanirapo chikung’anamurachi, ndipo mungachita wuli nthena?
5 (3) Ghanaghaniranipo. Kughanaghanirapo chikung’anamura kukhala chete na kughanaghanirapo mwakupwelelera umo vinthu ivyo mukuŵazga vikumukhwaskirani. Kuchita nthena kukovwira kuti mupulikiske makora ivyo mukuŵazga. Para munthu wakuŵazga Baibolo kwambura kughanaghanirapo, vikuyana waka na munthu uyo wakurya chakurya kwambura kusumba. Kuti chakurya chiŵe chakovwira mu thupi lithu tikwenera kusumba. Mwakuyana waka, mukwenera kughanaghanirapo pa ivyo mukuŵazga kuti musange chandulo. Mujifumbenge mafumbo pa ivyo mukuŵazga. Mungajifumba mafumbo nga ni: “Kasi munthu wa mu nkhani iyi wakachita wuli kuti wamazge suzgo lake? Kasi Yehova wakamovwira wuli? Kasi ivyo wakachita vinganovwira wuli kuzizipizga viyezgo?”
4. LONDEZGANI
Mulondezgenge ivyo mukusambira kuti musankhenge makora vinthu, kuti muŵe na mtende, kweniso kuti mukhozge chipulikano chinu (Wonani ndime 6)
6. Chifukwa wuli tikwenera kulondezga ivyo tikusambira?
6 (4) Londezgani. Yesu wakati para tikuleka kulondezga ivyo tikusambira, tili nga ni munthu uyo wakuzenga nyumba yake pa mchenga. Wakulimbikira chomene kweni wakujipyora pawaka. Chifukwa wuli? Chifukwa para chimphepo chikuputa ndipo maji ghakututuka, nyumba iyi yiwenge. (Mat. 7:24-27) Mwakuyana waka, para tikulomba, kujitora nga ndise na kughanaghanirapo kweni tikuleka kulondezga ivyo tikusambira, mbwe ndikuti tikujipyora pawaka. Ndipo para tasangana na viyezgo panji nthambuzgo, chipulikano chithu chingalopwa. Kweni para tikuŵazga na kulondezga ivyo tikusambira, tikusankha vinthu mwamahara, tikuŵa na mtende wa mu mtima, ndipo chipulikano chithu chikukhora. (Yes. 48:17, 18) Tiyeni sono tiwone ivyo tingasambirako kwa Themba Davide mwakugwiliskira ntchito vinthu vinayi ivyo tasambira.
KASI MUNGASAMBIRAKO VICHI KWA THEMBA DAVIDE?
7. Kasi ni nkhani wuli ya mu Baibolo iyo tidumbiskanenge sono?
7 Kasi mubwezi winu panji mubali winu wali kumukhuŵazganipo chomene? Para vili kumuchitikiranipo, movwirikenge chomene na nkhani ya Davide na mwana wake Abisalomu. Mwana wa Davide uyu wakendera mphiska adada ŵake ndipo wakakhumbanga kuŵapoka ufumu.—2 Sam. 15:5-14, 31; 18:6-14.
8. Kasi mukwenera kuchita wuli kuti Yehova wamovwirani?
8 (1) Lombani. Apo mukughanaghanirapo nkhani iyi, muphalirani Yehova umo mukujipulikira chifukwa cha ivyo munthu wali kumuchitirani. (Sal. 6:6-9) Muphalirani Yehova umo mukujipulikira nadi. Pamanyuma pemphani Yehova kuti wamovwirani kuwona fundo izo zingamovwirani kumanya icho mungachita pa nkhani iyo.
9. Longosorani mwakudumura ivyo vikachitika pakati pa Davide na Abisalomu.
9 (2) Jitorani nga ndimwe. Ghanaghanirani ivyo vikachitika mu nkhani iyi, ndipo yezgani kughanaghanira umo Themba Davide likwenera kuti likajipulikiranga. Abisalomu mwana wa Davide wakalimbikira vyaka vinandi kukopa ŵanthu kuti ŵamutemwenge. (2 Sam. 15:7) Panyengo iyo Abisalomu wakawona kuti njakwenelera, wakatuma mphachi mu Israyeli yose kuti ziphalire ŵanthu kuti ŵimike iyo kuŵa fumu yawo. Ndipo wakafika na pa kukhorweska Ahitofeli, yumoza mwa ŵabwezi ŵa Davide ndiposo wakumupa fundo, kuti nayo wagaluke na kuŵa ku chigaŵa chake. Abisalomu wakajiŵika yekha kuŵa fumu, ndipo pamanyuma wakakhumbanga kukora na kukoma Davide, uyo panyengo iyi wakwenera kuti wakaŵa mulwari chomene. (Sal. 41:1-9) Davide wakamanya za chiŵembu ichi ndipo wakachimbira mu Yerusalemu. Pamanyuma, pakaŵa nkhondo pakati pa ŵasilikari ŵa Abisalomu na ŵasilikari ŵa Davide. Ŵasilikari ŵa Abisalomu ŵakathereskeka, ndipo Abisalomu wakakomeka.
10. Kasi Davide waŵenge munyake mphanyi wakachita wuli?
10 Sono ghanaghanirani umo Davide wakwenera kuti wakajipulikiranga apo vyose ivi vikamuchitikiranga. Iyo wakamutemwanga Abisalomu kweniso wakamugomezganga chomene Ahitofeli. Kweni wose ŵaŵiri ŵakamwendera mphiska. Iwo ŵakamuŵinyiska chomene mtima ndipo ŵakakhumbanga na kumukoma wuwo. Davide waŵenge munyake mphanyi wakaleka kugomezga ŵabwezi ŵake ŵanyake awo ŵakaŵa ŵakugomezgeka kwa iyo. Mphanyi wakamba kuŵakayikira kuti panji nawo ŵali ku chigaŵa cha Abisalomu. Wakatenge wajighanaghanirenge yekha na kuchimbira yekha mu charu. Panji wakatenge wagongowenge waka. Kweni ndivyo Davide wakachita yayi. Wakamarana navyo viyezgo ivi. Kasi wakafiska wuli kuchita nthena?
11. Kasi Davide wakachita wuli wati wakumana na masuzgo?
11 (3) Ghanaghaniranipo. Kasi mungasambirapo vichi pa nkhani iyi? Zgorani fumbo lakuti, “Kasi Davide wakachita wuli wati wakumana na masuzgo?” Davide wakapupuluma yayi panji kusankha vyakuchita mwakuchimbilira. Kweniso wakafwa chipoyo yayi na wofi panji kuleka kuchitapo kanthu. Iyo wakalomba Yehova kuti wamovwire. Kweniso wakapempha wovwiri ku ŵabwezi ŵake. Kufuma apo, wakachita mwaluŵiro ivyo wakasankha kuchita. Nangauli ivyo vikamuchitikira vikaŵa vyakuŵinya chomene, kweni wakazomerezga yayi kuti vimupangiske kukayikira waliyose panji kutinkha ŵanji. Iyo wakalutilira kugomezga Yehova na ŵabwezi ŵake.
12. Kasi Yehova wakachita vichi kuti wawovwire Davide?
12 Kasi Yehova wakamovwira wuli Davide? Para mungachita kafukufuku, muwonenge kuti Yehova wakamupa nkhongono Davide kuti wazizipizge chiyezgo ichi. (Sal. 3:1-8; mazgu ghapachanya) Yehova wakatumbika ivyo Davide wakasankha. Kweniso wakawovwira ŵabwezi ŵakugomezgeka ŵa Davide apo ŵakarwanga nkhondo kuti ŵavikilire fumu yawo.
13. Kasi mungamuyezga wuli Davide para munthu munyake wamukhuŵazgani chomene? (Mateyu 18:15-17)
13 (4) Londezgani. Jifumbani kuti: ‘Kasi ningamuyezga wuli Davide?’ Mukwenera kuchitapo kanthu mwaluŵiro kuti mumalane na suzgo linu. Kuyana na umo vinthu viŵiri, panji mungalondezga ndendende ulongozgi wa Yesu wa pa Mateyu chaputara 18, panji mungalondezga waka fundo yake. (Ŵazgani Mateyu 18:15-17.) Kweniso lekani kusankha chakuchita mwakuchimbilira chifukwa cha kukwiya. Mukwenera kulomba Yehova kuti wamupani mtima wakuzika ndiposo vinjeru kuti mumanye icho mungachita pa nkhani iyo. Lekani kwamba kukayikira ŵabwezi ŵinu, kweni zomerani para ŵakukhumba kumovwirani. (Zinth. 17:17) Chakuzirwa chomene ntchakuti mukwenera kulondezga ulongozgi uwo Yehova wakumupani kwizira mu Mazgu ghake.—Zinth. 3:5, 6.
KASI MUNGASAMBIRAKO VICHI KWA PAULOSI?
14. Kasi mphanyengo wuli apo mungakhozgeka na 2 Timote 1:12-16; 4:6-11, 17-22?
14 Kasi ŵamumbumba yinu ŵakumuwukirani chifukwa chakuti mukuteŵetera Yehova? Panji kasi mukukhala mu charu icho milimo yinyake ya Ŵakaboni ŵa Yehova njakukanizgika, panji muli bani? Para ni nthena, mungakhozgeka chomene para mungaŵazga 2 Timote 1:12-16; 4:6-11, 17-22. * Paulosi wakaŵa mu jele apo wakalembanga mavesi agha.
15. Kasi mungamupempha vichi Yehova?
15 (1) Lombani. Pambere mundaŵazge mavesi agha, phalirani Yehova suzgo linu ndiposo umo mukujipulikira. Yowoyani mwakudunjika. Kufuma apo, pemphani Yehova kuti wamovwirani kuwona fundo mu nkhani zakuyowoya viyezgo ivyo Paulosi wakakumana navyo, izo zingamovwirani kusankha chakuchita.
16. Longosorani mwakudumura ivyo vikachitikira Paulosi.
16 (2) Jitorani nga ndimwe. Muŵe nga ndimwe Paulosi. Mwakakika na simbi ndipo muli mu jele ku Romu. Kumanyuma mukajalirikapo mu jele, kweni panyengo iyi mukumanyirathu kuti ŵamukomaninge. Ŵabwezi ŵinu ŵanyake ŵamuchimbirani, ndipo thupi ndakulopwa.—2 Tim. 1:15.
17. Kasi Paulosi waŵenge munyake mphanyi wakachita wuli?
17 Paulosi waŵenge munyake mphanyi wakamba kughanaghanira vyakumanyuma na kwamba kughanaghana kuti walekenge kulimbikira chomene kupharazga mphanyi wandakakike. Wakate wakwiyirenge Ŵakhristu ŵa mu chigaŵa cha Asia awo ŵakamuchimbira, kweniso wakate wambenge kukayikira ŵabwezi ŵake ŵanyake. Kweni wakachita nthena yayi. Chifukwa wuli wakagomezga kuti ŵabwezi ŵake aŵa ŵalutilirenge kuŵa ŵagomezgeka kwa iyo kweniso kuti Yehova wamutumbikenge?
18. Kasi Paulosi wakachita wuli na viyezgo ivyo wakakumana navyo?
18 (3) Ghanaghaniranipo. Zgorani fumbo lakuti, Kasi Paulosi wakachita wuli apo wakaŵa mu masuzgo agha? Nangauli nyifwa yikanunkhira, kweni Paulosi wakaluwa yayi nkhani yakuzirwa chomene, yakuti wapeleke uchindami kwa Yehova. Kweniso wakalutilira kughanaghanira umo wangakhozgera ŵanji. Wakagomezganga Yehova, ntheura wakalombanga nyengo zose. (2 Tim. 1:3) M’malo mwa kuŵika chomene mahara ku awo ŵakamuchimbira, iyo wakawonganga chomene wovwiri uwo ŵabwezi ŵake ŵakugomezgeka ŵakamupanga. Kweniso Paulosi wakalutilira kusambira Mazgu gha Chiuta. (2 Tim. 3:16, 17; 4:13) Chakuluska vyose ntchakuti wakagomezganga na mtima wose kuti Yehova na Yesu ŵakumutemwa. Yehova na Yesu ŵakaŵa kuti ŵandamutayepo, ndipo wakaŵa na chigomezgo kuti ŵamutumbikenge chifukwa cha kuchita uteŵeti wake mwakugomezgeka.
19. Kasi Yehova wakamovwira wuli Paulosi?
19 Yehova wakaŵa kuti wamuphalira kale Paulosi kuti wakumanenge na viyezgo chifukwa chakuti ni Mkhristu ndipo wakwenera kuzizipizga. (Mil. 21:11-13) Kasi Yehova wakamovwira wuli Paulosi? Wakazgora malurombo gha Paulosi, ndipo pamanyuma wakamupa nkhongono. (2 Tim. 4:17) Paulosi wakaŵa na chigomezgo chose kuti wapikenge njombe iyo wakalimbikiranga chomene kuti wayisange. Kweniso Yehova wakapangiska kuti ŵabwezi ŵa Paulosi ŵamovwirenge.
20. Kuyana na lemba la Ŵaroma 8:38, 39, kasi mungamuyezga wuli Paulosi?
20 (4) Londezgani. Jifumbani kuti, ‘Kasi ningamuyezga wuli Paulosi?’ Nga ni Paulosi, nase tikwenera kukhazga kuti titambuzgikenge chifukwa cha chipulikano chithu. (Mrk. 10:29, 30) Kuti tilutilire kugomezgeka pa nyengo ya masuzgo, tikwenera kugomezga Yehova. Tikwenera kulomba na kulutilira kuŵazga Mazgu ghake nyengo zose. Tikweneraso kukumbuka nyengo zose kuti chinthu chakuzirwa chomene pa umoyo withu nkhupeleka uchindami kwa Yehova. Tili na chigomezgo chose kuti Yehova watitayenge yayi ndipo palije icho waliyose wangachita chakuti chimupangiske kuleka kutitemwa.—Ŵazgani Ŵaroma 8:38, 39; Heb. 13:5, 6.
SAMBIRANIKO KU ŴANTHU ŴANYAKE AWO ŴAKUYOWOYEKA MU BAIBOLO
21. Kasi ni vichi vili kovwira Aya na Hector kuti ŵamazge masuzgo ghawo?
21 Nanga tingakumana na suzgo wuli, tingakhozgeka para tingasambirako ku ŵanthu awo wakuyowoyeka mu Baibolo. Mwachiyelezgero, Aya, uyo ni mupayiniya ku Japan, wakuti nkhani ya Yona yili kumovwira kuti waleke kuŵa na wofi pakupharazga ku malo uko kukusangika ŵanthu ŵanandi. Hector, muwukirano wa ku Indonesia, uyo ŵapapi ŵake Mbakaboni yayi, wakuti nkhani ya Rute ndiyo yikumukhukiska kuti walutilire kuteŵetera Yehova.
22. Kasi mungachita wuli kuti musange chandulo para mukuwonelera madirama gha mu Baibolo panji kuŵazga nkhani za pa chigaŵa chakuti “Yezgani Chipulikano Chawo?”
22 Kasi ni nkhu uko mungasanga nkhani za ŵanthu ŵa mu Baibolo izo zingamukhozgani? Mavidiyo ghithu na madirama ndiposo chigaŵa chakuti “Yezgani Chipulikano Chawo” vikutovwira kuti tipulikiske makora nkhani za mu Baibolo. * Pambere mundambe kuwonelera, kupulikizga, panji kuŵazga nkhani izi, izo ŵakufufuza mwakukwana pambere ŵandalembe, pemphani Yehova kuti wamovwirani kusanga fundo izo zingamovwirani. Mujitore nga ndimwe munthu uyo mukuŵazga panji kuwonelera. Ghanaghaniranipo ivyo ŵateŵeti ŵakugomezgeka ŵa Yehova aŵa ŵakachita ndiposo umo wakaŵawovwilira pa masuzgo ghawo. Pamanyuma, londezgani ivyo mwasambira. Wongani Yehova chifukwa cha wovwiri uwo wakumupani kale. Ndipo longorani kuti mukuwonga wovwiri uwu. Mungalongora kuti mukuwonga usange namwe mukupenja nthowa zakukhozgera ŵanji na kuŵawovwira.
23. Kuyana na Yesaya 41:10, 13, kasi Yehova walayizga kuti wachitenge nase wuli?
23 Umoyo ngwakusuzga chomene mu charu chakuwusika na Satana ichi, ndipo nyengo zinyake tikusoŵa na chakuchita wuwo. (2 Tim. 3:1) Kweni tingawopanga yayi panji kwenjerwa. Yehova wakumanya masuzgo ghithu. Iyo wakutilayizga kuti watikorenge na woko lake lamalyero usange tikukhumba kuwa. (Ŵazgani Yesaya 41:10, 13.) Ntheura, tili na chigomezgo chose kuti Yehova watovwirenge, kweniso kuti ivyo tikuŵazga mu Baibolo vitipenge nkhongono zakuzizipizgira masuzgo ghose agho tingakumana nagho.
SUMU 96 Buku la Chiuta Mbusambazi
^ ndime 5 Nkhani zinandi mu Baibolo zikulongora kuti Yehova wakutemwa ŵateŵeti ŵake ndipo wakuŵawovwira kuzizipizga viyezgo vyawo vyose. Nkhani iyi yikulongosora umo tingachitira kuti sambiro la Baibolo la taŵene litovwire chomene.
^ ndime 2 Iyi ni nthowa yimoza waka yakusambilira Baibolo iyo mungalondezga. Masachizgo ghanyake agho mungalondezga pakusambira Baibolo ghali mu Buku Lakupenjera Nkhani la Ŵakaboni ŵa Yehova, pa mutu wakuti “Baibolo” na kamutu kachoko kakuti “Kuŵazga na Kupulikiska Baibolo.”
^ ndime 14 Mungaŵazganga yayi Malemba agha panyengo ya Sambiro la Gongwe la Mulinda la mpingo.
^ ndime 22 Wonani “Yezgani Chipulikano Chawo—Ŵanalume na Ŵanakazi Awo Ŵakuyowoyeka mu Baibolo” pa jw.org. (Lutani pa IVYO BAIBOLO LIKUSAMBIZGA > CHIPULIKANO MWA CHIUTA.)
