1-2. Kasi kanandi chikuchitika ntchivichi para ŵanthu ŵakubatizika, ndipo mukwenera kughanaghanirapo vichi?

 KASI muli kuwonapo gulu la ŵanthu awo ŵabatizikenge? Ndipo pamanyuma mukupulika ivyo ŵasankha apo ŵakuzgora mwankhongono mafumbo ghaŵiri pambere ŵandabatizike. Mukuwona ŵamumbumba yawo kweniso ŵabwezi ŵawo nawo ŵakondwa chomene. Apo ŵakufuma mu maji, mukupulika ŵakuŵakuŵira mawoko ndipo visko vyawo vikuwoneka kuti ŵakondwa chomene. Ŵanthu masauzandi ghanandi sabata yiliyose ŵakujipeleka na kubatizika kuŵa Ŵakaboni ŵa Yehova.

² Imwe ke? Para mukughanaghana vya kubatizika, ndimwe munthu wapadera chomene mu charu chiheni ichi chifukwa ‘mukupenja Yehova.’ (Sal. 14:1, 2) Nkhani iyi yalembekera imwe, kwali ndimwe mwana panji mulara. Kweni ise tili kubatizika kale, nase tikwenera kukhozga ivyo tili kusankha, kuti titeŵetere Yehova muyirayira. Tiyeni tiwonepo vifukwa vitatu mwa vifukwa vinandi ivyo tikwenera kuteŵetelera Yehova.

3. Chifukwa wuli ŵateŵeti ŵa Yehova ŵakutemwa unenesko na urunji? (Salimo 119:128, 163)

³ Yehova wakaphalira ŵanthu ŵake kuti ‘ŵatemwenge unenesko.’ (Zek. 8:19) Yesu wakachiska ŵalondezgi ŵake kuti ŵapenjenge urunji. (Mat. 5:6) Ichi chikung’anamura kuti munthu wakwenera kuŵa wakukhumbisiska chomene kuti wachite icho ntchakunyoloka, chiwemi, na chakutowa mu maso gha Chiuta. Kasi mukuwutemwa unenesko na urunji? Tikugomezga kuti mukuwutemwa. Mukutinkha utesi na vyose ivyo ni viheni. (Ŵazgani Salimo 119:128, 163.) Munthu uyo ni mutesi wakuyezga Satana, muwusi wa charu ichi. (Yoh. 8:44; 12:31) Chimoza mwa vilato vya Satana, nkhubinkhiska zina lituŵa la Yehova Chiuta. Kwambira waka pa uchigaluka wa mu Edeni, Satana wakuthandazga mautesi ghanandi ghakukhwaskana na Chiuta withu. Wakuyezgayezga  kupangiska ŵanthu kughanaghana kuti Yehova wakujighanaghanira yekha, kweniso ni Muwusi mutesi uyo wakuŵanora vinthu viwemi ŵanthu. (Gen. 3:1, 4, 5) Mautesi gha Satana ghakukhwaskana na Yehova ghakunanga maghanoghano na mitima ya ŵanthu m’paka sono. Para ŵanthu ŵasankha kuleka ‘kutemwa unenesko,’ Satana wangaŵapangiska kuchita vinthu viheni vilivyose.—Rom. 1:25-31.

4. Kasi Yehova walongora wuli kuti ni “Chiuta waunenesko”? (Wonaniso chithuzi.)

⁴ Yehova ni “Chiuta waunenesko,” ndipo wakusambizga unenesko ŵanthu awo ŵakumutemwa mwawanangwa. (Sal. 31:5) Ntheura wakuŵawovwira kuti ŵaleke kupusikika na mautesi gha Satana. Yehova wakusambizgaso ŵateŵeti ŵake kuchita vinthu mwaunenesko kweniso mwaurunji. Ivi vikovwira kuti ŵaŵe na mtende wa mu mtima kweniso kuti ŵanji ŵaŵachindikenge. (Zinth. 13:5, 6) Kasi namwe ndivyo mukuwona apo mukusambira Baibolo? Tikugomezga kuti mwamanya kuti nthowa za Yehova ndizo ni ziwemi chomene ndipo zingawovwira ŵanthu wose kusazgapo imwe. (Sal. 77:13) Ntheura mukukhumba chomene kuchita ivyo Chiuta wakuyowoya kuti ni vyakunyoloka. (Mat. 6:33) Mukukhumba kuvikilira unenesko na kulongora kuti ivyo Satana wakayowoya vyakukhwaskana na Yehova Chiuta withu ni vyautesi. Kasi mungachita wuli nthena?

5. Kasi mungakhozgera wuli unenesko na urunji?

⁵ Namwe mungasankha kuŵa ku chigaŵa cha Yehova, ndipo para mwachita nthena vingaŵa nga mukuti: “Nakana mautesi gha Satana, ndipo nakoleska unenesko. Nkhukhumba Yehova kuŵa Fumu yane, kweniso nkhukhumba kuchita icho ntchakunyoloka.” Kasi mungachita wuli nthena? Muphalirani Yehova mu lurombo na kujipatulira kwa iyo, ndipo pamanyuma na kulongora pakweru kuti mwajipatulira, mwakubatizika. Para mukutemwa unenesko na urunji, vinthu ivi ndivyo vingamovwirani chomene kuti musankhe kubatizika.

6. Kuyana na Salimo 45:4, chifukwa wuli mukutemwa Yesu Khristu?

⁶ Chifukwa wuli mukumutemwa Yesu Khristu? Wonani vifukwa viwemi ivyo vikusangika pa Salimo 45:4. (Ŵazgani.) Yesu wakutemwa unenesko, urunji, ndipo wakukhuŵilizga kujiyuyura. Usange tikutemwa unenesko na urunji, ndikuti tikumutemwaso Yesu Khristu. Ghanaghanirani umo Yesu wakavikililira mwachikanga unenesko na urunji. (Yoh. 18:37) Kweni kasi Yesu wakukhuŵilizga wuli kujiyuyura?

7. Kasi ntchivichi chikumukondweskani na kujiyuyura kwa Yesu?

 ⁷ Yesu wakukhuŵilizga kujiyuyura kwizira mu chiyelezgero chake. Mwachiyelezgero, wakukhumba kuti uchindami wose ulutenge kwa Adada ŵake, kwa iyo yayi. (Mrk. 10:17, 18; Yoh. 5:19) Kasi mukujipulika wuli chifukwa chakuti Yesu ngwakujiyuyura nthena? Kasi vyamuchiskani kuti mumutemwenge na kulondezga chiyelezgero chake? Tikukayika yayi kuti vyamuchiskani nadi. Kweni chifukwa wuli Yesu ngwakujiyuyura? Chifukwa ntchakuti wakuŵatemwa Adada ŵake, awo mbakujiyuyura, ndipo wakuŵayezga. (Sal. 18:35; Heb. 1:3) Asi namwe vyamovwirani kuti muŵe paubwezi na Yesu, uyo wakuyezga mikhaliro ya Yehova mwakufikapo?

8. Chifukwa wuli tikumutemwa Yesu pakuŵa Themba lithu?

⁸ Tikumutemwa Yesu pakuŵa Themba lithu chifukwa ni Muwusi muwemi chomene. Yehova wali kusambizga yekha Mwana wake na kumwimika kuŵa themba. (Yes. 50:4, 5) Ghanaghaniraniso chitemwa chakujipata icho Yesu wali kulongora. (Yoh. 13:1) Chifukwa chakuti Yesu ni Themba linu, mukwenera kumutemwa nadi. Wose awo ŵakumutemwa nadi, wakuŵachema kuti mbabwezi ŵake, ndipo nawo ŵakulongora kuti ŵakumutemwa para ŵakupulikira malango ghake. (Yoh. 14:15; 15:14, 15) Ni mwaŵi wapadera chomene kuŵa mubwezi wa Mwana wa Yehova.

9. Kasi ubatizo wa Ŵakhristu ukuyanako wuli na ubatizo wa Khristu?

⁹ Dango linyake la Yesu ndakuti ŵalondezgi ŵake ŵabatizike. (Mat. 28:19, 20) Iyo ndiyo ntchakuwonerapo, nangauli ubatizo wake ukupambanako na wa ŵalondezgi ŵake. (Wonani bokosi lakuti “ Kasi Ubatizo wa Yesu na Ubatizo wa Ŵalondezgi Ŵake Ukupambana Wuli?”) Kweni mu vinthu vinyake, ukuyanako. Apo wakabatizikanga, Yesu wakajipeleka kuchita khumbo la Awiske. (Heb. 10:7) Mwakuyana waka, ŵalondezgi ŵa Khristu para ŵabatizika ŵakulongora pakweru kuti ŵapeleka umoyo wawo kwa Yehova Chiuta. Sono chakuzirwa chomene pa umoyo wawo nkhuchita khumbo la Chiuta, lawo yayi. Ntheura ŵakulondezga chiyelezgero cha Fumu yawo.

10. Chifukwa wuli kutemwa Yesu kungamuchiskani kuti mubatizike?

¹⁰ Sono mukugomezga kuti Yesu ni Mwana yekha wapadera wa Yehova, ndipo mukukondwa kuti ni Themba ilo Chiuta wali kwimika kuti litiwusenge. Mwamanya kuti Yesu ngwakujiyuyura ndipo wakuyezga Adada ŵake mwakufikapo. Mwasambira kuti wakalyeskanga ŵanjara, kupembuzga ŵakugongoweskeka, na kuchizga ŵalwari wuwo. (Mat. 14:14-21) Mwawona umo wakulongozgera mpingo mazuŵa ghano. (Mat. 23:10) Ndipo mukumanya kuti wazamuchita vinandi chomene munthazi pakuŵa Themba la Ufumu wa Chiuta. Kasi mungalongora wuli kuti mukumutemwa? Londezgani chiyelezgero chake. (Yoh. 14:21) Chinthu chakwamba icho mukwenera kuchita kuti mulondezge chiyelezgero chake, nkhujipeleka kwa Yehova na kubatizika.

11. Kasi ntchifukwa wuli chakuzirwa chomene icho mukwenera kubatizikira, ndipo chifukwa wuli vili nthena?

¹¹ Kasi ntchifukwa wuli chakuzirwa chomene icho mukwenera kubatizikira? Yesu wakayowoya dango likuru chomene la Chiuta. Iyo wakati: “Utemwenge Yehova Chiuta wako na mtima wako wose na umoyo wako wose na maghanoghano ghako ghose na nkhongono zako zose.” (Mrk. 12:30) Kasi mazgu agha ghakulongosora umo mukwenera kutemwera Chiuta?

12. Chifukwa wuli mukwenera kutemwa Yehova? (Wonaniso chithuzi.)

¹² Pali vifukwa vinandi chomene ivyo mukwenera kutemwera Yehova. Mwachiyelezgero, mwamanya kuti iyo ‘ntchisimi cha umoyo,’ kweniso ni Mupi wa “chawanangwa chilichose chiwemi na chawanangwa chilichose chakufikapo.”  (Sal. 36:9; Yak. 1:17) Chawanangwa chilichose icho mukusangwa nacho chikufuma kwa Chiuta withu wachitemwa na wakupa.

13. Chifukwa wuli sembe yakuwombora ntchawanangwa chiwemi chomene?

¹³ Sembe yakuwombora ntchawanangwa chiwemi chomene icho Yehova wali kutipa. Chifukwa wuli tikuyowoya nthena? Ghanaghanirani ubwezi wakukhora uwo ulipo pakati pa Yehova na Mwana wake. Yesu wakati: “Adada ŵakunitemwa” ndipo “ine nkhutemwa Adada.” (Yoh. 10:17; 14:31) Ubwezi wawo ukakhora chomene apo ŵakaŵira lumoza vyaka mabiliyoni ghanandi. (Zinth. 8:22, 23, 30) Sono ghanaghanirani umo Chiuta vikamuŵinyira kuzomerezga Mwana wake kusuzgika na kufwa. Yehova wakuŵatemwa chomene ŵanthu kusazgapo imwe, lekani wakapeleka Mwana wake na mtima wose kuŵa sembe mwakuti imwe na ŵanji muŵe na mwaŵi wakuzakakhala kwamuyirayira. (Yoh. 3:16; Gal. 2:20) Ichi ntchifukwa chikuru chomene icho tikwenera kutemwera Chiuta.

14. Kasi ntchilato wuli chiwemi chomene pa umoyo winu icho mukwenera kusankha?

¹⁴ Chitemwa chinu pa Yehova chakura chomene chifukwa mwasambira vinandi vya iyo. Nakuti mukukhumba chomene kuŵa paubwezi wakukhora na iyo sono kweniso muyirayira. Ndipo mungafiska nadi. Iyo wakumuchiskani mwachitemwa kuti mukondweskenge mtima wake. (Zinth. 23:15, 16) Mukwenera kuchita ivi na mazgu pera yayi kweni na vyakuchita wuwo.  Umo mukuchitira vinthu pa umoyo vilongorenge usange mukumutemwa nadi Yehova. (1 Yoh. 5:3) Ichi ndicho chilato chiwemi chomene pa umoyo winu icho mukwenera kusankha.

15. Kasi mungalongora wuli kuti mukumutemwa Yehova?

¹⁵ Kasi mungalongora wuli kuti mukumutemwa Yehova? Chakwamba, lombani mwapadera kuti mwajipeleka kwa iyo pakuŵa Chiuta waunenesko. (Sal. 40:8) Kufuma apo, mubatizike kuti mulongore pakweru kujipeleka kwinu. Nga umo tadumbiskirana kale mu nkhani iyi, nyengo yakubatizikira njakukondweska chomene kweniso njakuzirwa chomene pa umoyo winu. Mukwamba umoyo uphya kuti muteŵetere Yehova, kujikondweska mwekha yayi. (Rom. 14:8; 1 Pet. 4:1, 2) Nangauli yingawoneka nkhani yikuru kusankha kuchita nthena, kweni yikujura nthowa yakuti muŵe na umoyo uwemi chomene. Kasi yikujura wuli?

16. Nga umo lemba la Salimo 41:12 likulongolera, kasi Yehova wazamuŵatumbika wuli awo ŵajipeleka kumuteŵetera?

¹⁶ Yehova wakupeleka mwawanangwa kuluska waliyose. Kwali imwe mungamupa chithu wuli, kweni iyo nyengo zose wawezgerengepo vinandi kuluska ivyo imwe mwamupa. (Mrk. 10:29, 30) Wamupaninge umoyo uwemi chomene na wakukhorweska, nanga ni sono nthena mu charu chiheni ichi. Kweni uku nkhwamba waka. Umoyo uwo mukwamba pa ubatizo winu ulije chigoti. Mungateŵetera Adada ŵinu ŵachitemwa kwamuyirayira. Chitemwa icho chilipo pakati pa imwe na Adada ŵinu chilutilirenge kukura, ndipo muzamulutilira kukhala kwamuyirayira nga umo iwo ŵaliri.—Ŵazgani Salimo 41:12.

17. Kasi ntchinthu wuli icho mungamupa Yehova icho walije?

¹⁷ Para mwajipeleka na kubatizika, muli na mwaŵi wakuŵapa chinthu chiwemi chomene Adada ŵinu ŵakuchanya. Iwo ŵali kumupani chinthu chiwemi chilichose icho mukukondwa nacho. Namweso mungamupa Mweneko wa kuchanya na charu chapasi chinthu icho iyo walije, icho nkhujipeleka kwinu na kumuteŵetera mwakugomezgeka. (Yobu 1:8; 41:11; Zinth. 27:11) Palije nthowa yinyake yiwemi chomene iyo mungagwiliskira ntchito umoyo winu kuluska iyi. Kuyowoya unenesko, chifukwa chiwemi  chomene icho mukwenera kubatizikira, nkhutemwa kwinu Yehova.

18. Kasi mukwenera kujifumba mafumbo wuli?

¹⁸ Ipo kasi mungazgora wuli fumbo lakuti, Kasi namwe mubatizikenge? Ndimwe pera mungazgora fumbo ili. Ntheura mukwenera kujifumba kuti, ‘Kasi nkhulindilira vichi kuti nibatizike?’ (Mil. 8:36) Kumbukani vifukwa vitatu ivyo tadumbiskana. Chakwamba, mukutemwa unenesko na urunji. Jifumbani kuti, ‘Kasi nane nkhukhumba kuzakawona zuŵa ilo waliyose wazamuyowoyanga unenesko na kuchita icho ntchakunyoloka?’ Chachiŵiri, mukumutemwa Yesu Khristu. Jifumbani kuti, ‘Kasi nane nkhukhumba kuti Mwana wa Chiuta waŵe Themba lane, kweniso nkhukhumba kulondezga chiyelezgero chake?’ Ndipo chachitatu chakuluska vyose, mukutemwa Yehova. Jifumbani kuti, Kasi nane nkhukhumba chomene kukondweska mtima wa Yehova na kumuteŵetera?’ Usange zgoro linu la mafumbo agha ndakuti enya, ipo mwalekerachi kubatizika? Chifukwa wuli mukuchedwa kubatizika?—Mil. 16:33.

19. Chifukwa wuli mukwenera yayi kuziwulika kubatizika? Longosorani. (Yohane 4:34)

¹⁹ Usange mukuziwulika kubatizika, ghanaghanirani ivyo Yesu wakayowoya. (Ŵazgani Yohane 4:34.) Wonani kuti Yesu wakayaniska kuchita khumbo la Awiske na chakurya. Chifukwa wuli? Chakurya ntchiwemi kwa ise. Yesu wakamanyanga kuti chilichose icho Yehova wakutipempha kuchita ntchiwemi kwa ise. Yehova wakukhumba yayi kuti tichite chilichose icho paumaliro chingatipweteka. Kasi Yehova wakukhumba kuti imwe mubatizike? Enya. (Mil. 2:38) Ntheura gomezgani kuti para mwapulikira dango ili musangenge chandulo. Usange mungaziwulika yayi kurya chakurya icho ntchiwemi chomene, mwakuyana waka kuziwulika yayi kubatizika.

20. Kasi tizamudumbiskana vichi mu nkhani yakulondezgapo?

²⁰ Chifukwa wuli ŵanyake ŵakuziwulika kubatizika? Ŵanandi ŵakuzgora kuti, ‘Nili wakunozgeka dankha yayi.’ Kweni fundo njakuti kusankha kujipeleka kwa Yehova na kubatizika ndicho ntchakusankha chakuzirwa chomene kuluska chilichose icho mungachita. Ntheura ghanaghaniranipo chomene pa nkhani iyi, kweniso manyani kuti pakukhumbikwa nyengo na kuyezgayezga chomene kuti muŵe ŵakwenelera. Kweni usange kufumira pasi pamtima mukukhumba kubatizika, kasi mungachita vichi sono kuti munozgekere? Fumbo ili tizamudumbiskana mu nkhani yakulondezgapo.