1-2. Usange ndimwe ŵakunozgeka yayi kubatizika, chifukwa wuli mukwenera yayi kugongowa? (Wonani chithuzi cha pa chikopi.)

 USANGE mukukhumba kubatizika, muli na chilato chiwemi chomene. Kasi ndimwe ŵakunozgeka kubatizika sono nthena? Usange mukuwona kuti ndimwe ŵakunozgeka ndipo ŵalara nawo ŵakukolerana namwe, kuziwulika yayi kubatizika pa ungano wakulondezgapo. Para mwachita nthena, muŵenge na umoyo wakukondweska apo mukuteŵetera Yehova.

² Kweni kasi munthu munyake wali kumuphaliranipo kuti mukwenera kuluta dankha panthazi mwauzimu pambere mundabatizike? Panji kasi mukamanya waka mwekha? Usange ni nthena, kugongowa yayi. Mungaluta panthazi mwauzimu na kufiska chilato ichi, kwali ndimwe mwana panji mulara.

3. Kasi nduna ya ku Etiyopiya yikamufumba vichi Filipu, ndipo pakuwuka fumbo wuli? (Milimo 8:36, 38)

³ Ŵazgani Milimo 8:36, 38. Nduna ya ku Etiyopiya yikafumba mupharazgi Filipu kuti: “Ntchivichi chikunitondeska kubatizika?” Munthu wa ku Etiyopiya uyu wakakhumbanga kubatizika, kweni kasi wakaŵa wakunozgeka nadi kubatizika?

4. Kasi nduna ya ku Etiyopiya yikalongora wuli kuti yikaŵikapo mtima kulutilira kusambira vinandi?

⁴ Munthu wa ku Etiyopiya ‘wakaluta ku Yerusalemu kukasopa.’ (Mil. 8:27) Ntheura wakwenera kuti wakazomera chisopa cha Ŵayuda. Ndipo tikukayika yayi kuti wakasambira vya Yehova mu Malemba Ghachihebere. Ndipouli, wakaŵa wakukhumbisiska kusambira vinandi. Nakuti apo Filipu wakasangana na nduna iyi pa msewu, kasi wakayisanga kuti yikuchita vichi? Yikaŵazganga mpukutu wa ntchimi Yesaya. (Mil. 8:28) Ichi chikaŵa chakurya chauzimu chakukhoma. Nduna iyi yikakhorwa waka na visambizgo  vyakwambilira yayi, kweni yikakhumbanga kulutilira kusambira vinandi.

5. Kasi munthu wa ku Etiyopiya wakachita wuli na ivyo wakasambira?

⁵ Munthu uyu wakaŵa na mazaza pasi pa Kandake, fumukazi ya Ŵaetiyopiya; ndipo ‘wakalaŵiliranga usambazi wose wa fumukazi yake.’ (Mil. 8:27) Ntheura wakwenera kuti wakaŵa munthu wakutangwanika chomene na milimo yinandi. Ndipouli, wakapaturanga nyengo yakusopera Yehova. Wakakhorwa waka na kusambira unenesko yayi; kweni wakachitapo kanthu pa ivyo wakasambira. Ntheura wakenda ulendo utali kufuma ku Etiyopiya mwakuti wakasope Yehova pa tempile ku Yerusalemu. Kuti wende ulendo uwu pakakhumbikwanga nyengo na ndalama, kweni mwanalume uyu wakakhumbanga kusopa Yehova, mulimose umo vingaŵira.

6-7. Kasi munthu wa ku Etiyopiya wakachita wuli kuti chitemwa chake pa Yehova chilutilire kukura?

⁶ Munthu wa ku Etiyopiya uyu wakasambira kwa Filipu fundo ziphya zakuzirwa, kusazgapo kumanya Mesiya. (Mil. 8:34, 35) Nduna iyi yikachontheka chomene yati yamanya ivyo Yesu wali kuyichitira. Kasi yikachita vichi yikati yasambira vinthu ivi? Nduna iyi yikhumbenge yikatenge yikhalenge nga umo yikaŵira, pakuŵa munthu wakuchindikika uyo wakazgokera ku Chiyuda. Kweni chifukwa chakuti chitemwa chake pa Yehova na Mwana wake chikakura, yikachiskika kuchita chinthu chakuzirwa chomene, icho nkhubatizika na kuŵa mulondezgi wa Yesu Khristu. Filipu wakati wawona kuti munthu uyu ngwakunozgeka, wakamubatiza.

⁷ Usange namwe mungayezga ivyo munthu wa ku Etiyopiya wakachita, mungaŵa ŵakunozgeka kubatizika. Namwe muyowoyenge na chigomezgo chose kuti, “[Kasi] ntchivichi chikunitondeska kubatizika?” Sono tiyeni tiwone umo namwe mungachitira nga umo munthu wa ku Etiyopiya uyu wakachitira. Iyo wakalutilira kusambira, wakachitapo kanthu pa ivyo wakasambira, ndipo wakakuzga chitemwa chake pa Chiuta.

8. Kasi lemba la Yohane 17:3 likuti mukwenera kuchita vichi?

⁸ Ŵazgani Yohane 17:3. Kasi mazgu gha Yesu agha namwe ghakamovwirani kuti mwambe kusambira Baibolo? Taŵanandi ghakatovwira chomene. Kweni kasi mazgu agha ghakutiphaliraso kuti tilutilire kusambira? Enya. Tilekenge yayi ‘kumanya Chiuta waunenesko yekha.’ (Muph. 3:11) Tilutilirenge kusambira vya iyo m’paka muyirayira. Para tikusambira vinandi ndipo tikuŵaso paubwezi wakukhora na Yehova.—Sal. 73:28.

9. Kasi tikukhumbikwira kuchita vichi para tasambira visambizgo vyakwambilira vya Baibolo?

⁹ Para tamba kusambira vyakukhwaskana na Yehova, tikusambira visambizgo vyakwambilira pera. Mu kalata yake yakuluta ku Ŵahebere, mpositole Paulosi wakayowoya kuti visambizgo ivi ni “vinthu vyakwambilira.” Pakuyowoya  nthena wakang’anamuranga kuti ‘visambizgo vyakwambilira’ ni vyambura kuzirwa yayi, kweni wakaviyaniskanga na mkaka uwo ukovwira kuti mwana wakure. (Heb. 5:12; 6:1) Kweni wakachiskaso Ŵakhristu wose kuti ŵalutilire kusambira vinandi padera pa visambizgo vyakwambilira, ndiposo kusambira unenesko wa kunyang’amira wa Mazgu gha Chiuta. Kasi sono muli na njara yauzimu yakusambilira visambizgo vyakunyang’amira vya Baibolo? Kasi muli ŵakukhumbisiska kulutilira kukura, na kulutilira kusambira vinandi vya Yehova na khumbo lake?

10. Chifukwa wuli ŵanyake vikuŵasuzga kusambira?

¹⁰ Ndipouli, taŵanandi tikutemwa yayi vyakusambira. Imwe ke? Apo mukaŵa ku sukulu, kasi mukasambira kuŵerenga makora na kupulikiska ivyo mukusambira? Kasi vikamunozgeraninge na kuwona kuti ni vyachandulo? Panji kasi mukawona kuti vyakusambira mabuku ntchigaŵa chinu yayi? Usange ni nthena, ndimwe mwekha yayi. Kweni Yehova wangamovwirani. Iyo ngwakufikapo ndipo ni Msambizgi muwemi chomene kuluska waliyose.

11. Kasi Yehova wakulongora wuli kuti ni “Msambizgi Mukuru”?

¹¹ Yehova wakuti iyo ni “Msambizgi winu Mukuru.” (Yes. 30:20, 21) Iyo ni Msambizgi wakuzikira, walusungu, kweniso wakupulikiska. Wakuwonamo viwemi mu ŵasambiri ŵake. (Sal. 130:3) Ndipo wakukhazga vinandi yayi kuluska ivyo tingafiska kuchita. Kumbukani kuti ndiyo wali kupanga wongo winu, icho ntchawanangwa chapachanya chomene. (Sal. 139:14) Mwakawiro tili na khumbo lakusambira vinthu. Mlengi withu wakukhumba kuti tilutilire kusambira muyirayira kweniso tikondwenge apo tikusambira. Ntheura ntchamahara chomene sono “kunwekera” unenesko wa mu Baibolo. (1 Pet. 2:2) Jiŵikirani vilato ivyo mungavifiska, ndipo nyengo zose muŵazgenge na kusambira Baibolo. (Josh. 1:8) Yehova wangamovwirani kuti mutemwenge kuŵerenga na kusambira chomene vya iyo.

12. Chifukwa wuli tikwenera kusambira vya uteŵeti na umoyo wa Yesu?

¹² Nyengo zose mupaturenge nyengo ya kughanaghanirapo umoyo na uteŵeti wa Yesu. Ntchakuzirwa chomene kulondezga mendero gha Yesu mwakugomezgeka usange tikukhumba kuteŵetera Yehova, chomenechomene mu nyengo zakusuzga izi. (1 Pet. 2:21) Yesu wakayowoya mwambura kubisa masuzgo agho ŵalondezgi ŵake ŵakumanenge nagho. (Luka 14:27, 28) Ndipouli, wakaŵa na chigomezgo chose kuti ŵalondezgi ŵake ŵaunenesko ŵazamulutilira kuŵa ŵakugomezgeka nga umo iyo wakachitira. (Yoh. 16:33) Sambirani mwakupwelelera vya umoyo wa Yesu, na kujiŵikira vilato vya umo mungamulondezgera pa umoyo winu wa zuŵa na zuŵa.

13. Kasi mukwenera kulutilira kumulomba vichi Yehova, ndipo chifukwa wuli?

¹³ Kumanya waka vinthu nkhwakukwana yayi. Kweni kukumovwirani waka kuti mumanye vinandi vya Yehova na umo mungachitira kuti muŵe na mikhaliro yake, nga ntchitemwa kweniso kuŵa na chipulikano mwa iyo. (1 Kor. 8:1-3) Apo mukulutilira kusambira vinandi, lutilirani kumulomba Yehova kuti wamovwirani kusazgirako chipulikano chinu. (Luka 17:5) Iyo wakuzgora malurombo ghanthena. Chipulikano chanadi chakujintha pakumumanya makora Chiuta, chimovwiraninge kuti mulute panthazi mwauzimu.—Yak. 2:26.

14. Kasi mpositole Petrosi wakadidimizga wuli fundo yakuti tikwenera kuchitapo kanthu pa ivyo tikusambira? (Wonaniso chithuzi.)

¹⁴ Mpositole Petrosi wakadidimizga kuti ntchakuzirwa chomene kuti ŵalondezgi ŵa Khristu ŵalutilire kuchitapo kanthu pa ivyo ŵakusambira. Wakayowoya nkhani ya mu Baibolo ya Nowa. Yehova wakaphalira Nowa kuti wizenge na chigumula, ndipo wazamuparanya ŵanthu ŵaheni wose. Kuti Nowa na mbumba yake ŵaponoskeke, chikaŵa chakukwana yayi kumanya waka kuti kukwiza  chigumula. Wonani kuti apo Petrosi wakati “apo chingalaŵa chikapangikanga,” wakayowoyanga vya nyengo iyo chigumula chikaŵa kuti chindachitike. (1 Pet. 3:20) Nadi, Nowa na mbumba yake ŵakachitapo kanthu pa ivyo ŵakasambira kwa Chiuta, ndipo ŵakapanga chingalaŵa, panji kuti chiboti chikuru. (Heb. 11:7) Pamanyuma Petrosi wakayaniska ivyo Nowa wakachita na ubatizo, pakulemba kuti: “Ubatizo ndiwo ukuyana na ichi, uwo ukumuponoskani sono.” (1 Pet. 3:21) Ntheura tingayaniska mulimo uwo mukwenera kuchita sono apo mukunozgekera kubatizika, na mulimo wakupanga chingalaŵa uwo Nowa na mbumba yake ŵakachita kwa vyaka vinandi. Kasi mukwenera kuchita mulimo wuli kuti muŵe ŵakunozgeka kubatizika?

15. Kasi kupera kwanadi kukusazgapo vichi?

¹⁵ Chinthu chakwamba icho tikwenera kuchita nkhupera zakwananga zithu kufumira pasi pamtima. (Mil. 2:37, 38) Para tapera zanadi, ndipo tingasintha zanadi. Kasi mwaleka kuchita vinthu ivyo Yehova wakutinkha, nga mbuzaghali, kukhweŵa hona, kutuka panji kayowoyero kaheni kalikose? (1 Kor. 6:9, 10; 2 Kor. 7:1; Efe. 4:29) Para muchali mundaleke, lutilirani kuchitapo kanthu kuti musinthe. Yowoyani na uyo wakumusambizgani Baibolo, panji fumbani ŵalara mu mpingo winu kuti ŵamovwirani na kumulongozgani. Usange ndimwe mwana ndipo mukukhala na ŵapapi, ŵafumbani kuti ŵamovwirani kuleka nkharo yiliyose yiheni iyo yingamutondeskani kuti mubatizike.

16. Kasi kuchita vinthu vyauzimu mwakukhazikika kukusazgapo vichi?

¹⁶ Ntchakuzirwaso chomene kuchita vinthu vyauzimu mwakukhazikika. Ivi vikusazgapo kuwungana na kuzgorapo pa maungano. (Heb. 10:24, 25) Ndipo usange mwaŵa ŵakwenelera kupharazga na mpingo, ŵikaniposo mtima pa mulimo uwu. Para mukuchitako mwakukwana mulimo uwu, muwutemwenge chomene kweniso kukondwa nawo. (2 Tim. 4:5) Usange ndimwe muwukirano ndipo mukukhala na ŵapapi ŵinu, jifumbani kuti: ‘Kasi ŵapapi ŵane ŵakuchita kunikumbuska kuti nilute ku maungano panji mu uteŵeti? Panji nkhuchita waka nekha kwambura kunikumbuska?’ Para mukuchita ivi pamwekha, mukulongora kuti muli na chipulikano kweniso mukumutemwa Yehova Chiuta, ndiposo kuti mukuwonga pa vyose ivyo wakumupani. Iyi ni “milimo iyo yikulongora kuti  mukusopa Chiuta mwakujipeleka,” ndipo ntchawanangwa icho mukumupa Yehova. (2 Pet. 3:11; Heb. 13:15) Vyawanangwa vyose ivyo tikupeleka mwawanangwa kweniso kwambura kuchichizgika, Chiuta withu wakukondwa navyo. (Yaniskani na 2 Ŵakorinte 9:7.) Tikuchita nthena chifukwa tikukondwa kumupa viwemi chomene Yehova.

17-18. Kasi ni mukhaliro wuli uwo ungamovwirani kuti muŵe ŵakwenelera kubatizika, ndipo chifukwa wuli? (Zintharika 3:3-6 na mazgu ghamusi)

¹⁷ Apo mukulutilira kuti muŵe ŵakwenelera kubatizika, musanganenge na masuzgo. Ŵanthu ŵanyake ŵangamunyozani chifukwa cha chipulikano chinu chiphya kweniso nanga nkhumususkani panji kumutambuzgani. (2 Tim. 3:12) Panji mukuyezgayezga chomene kuti muleke nkharo yinyake yiheni, kweni nyengo zinyake vikumusuzgani ndipo mukuchitaso vinthu ivyo. Nyengo zinyake mungatondeka kulindilira ndipo mungakhuŵara chifukwa mukuwona kuti chilato chinu chikuchedwa kufiskika. Kweni kasi chingamovwirani ntchivichi kuti muzizipizge? Kutemwa Yehova ndiko kungamovwirani, ndipo uwu ni mukhaliro uwemi chomene.

¹⁸ Kutemwa Yehova ni mukhaliro uwemi chomene uwo mungaŵa nawo. (Ŵazgani Zintharika 3:3-6 na mazgu ghamusi.) Para mukumutemwa zanadi Chiuta vimovwiraninge kuti mutonde masuzgo agho mukukumana nagho. Kanandi Baibolo likuyowoya kuti Yehova wali na chitemwa chakugomezgeka pa ŵateŵeti ŵake. Chitemwa ichi chikusimikizgira kuti iyo waŵalekenge yayi ŵateŵeti ŵake ndipo nyengo zose waŵatemwenge. (Sal. 100:5) Manyani kuti muli kulengeka mu chikozgo cha Chiuta. (Gen. 1:26) Kasi mungalongora wuli chitemwa ichi?

19. Kasi mungachita wuli kuti muwongenge chomene vyose ivyo Yehova wamuchitirani? (Ŵagalatiya 2:20)

¹⁹ Yambani na kumuwonga. (1 Tes. 5:18) Zuŵa lililose, mujifumbenge kuti, ‘Kasi Yehova walongora wuli kuti wakunitemwa?’ Kufuma apo woneseskani kuti mukumuwonga Yehova mu malurombo ghinu, ndipo zunurani vinthu ivyo wali kumuchitirani. Manyani vinthu ivyo wamuchitirani imwe mwakudunjika chifukwa chakuti wakumutemwani, nga umo mpositole Paulosi nayo wakamanyira fundo iyi yakukhwaskana na Yehova. (Ŵazgani Ŵagalatiya 2:20.) Jifumbani kuti, ‘Kasi nane ningalongora wuli kuti nkhumutemwa?’ Kutemwa Yehova kumovwiraninge kuti mutonde viyezgo na kuzizipizga masuzgo agho mukukumana nagho. Kumuchiskaninge kuti mulutilire kuchita mwakukhazikika vinthu vyauzimu, na kulutilira kulongora chitemwa pa Adada ŵinu zuŵa lililose.

20. Kasi mungachita wuli kuti mujipeleke kwa Yehova, ndipo chifukwa wuli ntchakuzirwa kuchita nthena?

 ²⁰ Para nyengo yajumphapo, chitemwa chinu pa Yehova chimuchiskaninge kuti mupeleke lurombo lwapadera. Mujipatulirenge kwa Chiuta. Kumbukani kuti para mwajipatulira kwa Yehova muŵenge na chigomezgo chiwemi chomene. Chigomezgo ichi ntchakuti mungaŵa ŵa Yehova kwamuyirayira. Para mwajipatulira kwa Yehova, mukulayizga kuti mumuteŵeterenge mu nyengo ziwemi na zakusuzga wuwo. Layizgo ili muzamukhumbikwiraso kulipangaso yayi. Mbunenesko kuti para tikujipatulira kwa Yehova, tikupanga chakusankha chikuru chomene na chakuzirwa. Kweni ghanaghanirani fundo iyi: Pa umoyo winu mupangenge vyakusankha vinandi chomene, ndipo vinyake viŵenge viwemi chomene. Kweni palije chakusankha chiwemi chomene kuluska kujipatulira kwa Yehova. (Sal. 50:14) Satana wayezgeyezgenge kulopweska chitemwa chinu pa Adada ŵinu, ndipo wakukhazga kuti mutayenge kunyoloka kwinu. Kweni kumuzomerezga yayi Satana kuti wamutondani. (Yobu 27:5) Para mukumutemwa chomene Yehova vimovwiraninge kuti musungilire layizgo linu lakuti mumuteŵeterenge kwamuyirayira, kweniso kuŵa paubwezi wakukhora na Adada ŵinu ŵakuchanya.

21. Chifukwa wuli tikuyowoya kuti ubatizo mbumaliro wa vyose yayi kweni nkhwamba waka?

²¹ Para mwajipeleka kwa Yehova, yowoyani na ŵalara mu mpingo winu kuti muchite chinthu chinyake chakulondezgapo icho nacho ntchakuzirwa chomene. Ndipouli, nyengo zose mukumbukenge kuti ubatizo mbumaliro wa vyose yayi kweni nkhwamba waka. Ubatizo nkhwamba waka kwa umoyo uwo muteŵeterenge Yehova muyirayira. Ntheura khozgani sono chitemwa chinu pa Adada ŵinu ŵakuchanya. Jiŵikirani vilato mwakuti chitemwa chinu chilutilire kukura zuŵa na zuŵa. Kuchita nthena kumovwiraninge kuti mubatizike. Ndipo ili lizamuŵa zuŵa lambura kuluwika kwa imwe. Kweni manyani kuti uku nkhwamba waka. Ntheura, mphanyi chitemwa chinu pa Yehova na Mwana wake chalutilira kukura muyirayira.