1. Kasi ŵateŵeti ŵanyake ŵakugomezgeka ŵa Yehova ŵakukayikira vichi?

 NTCHAKUKHOZGA chomene kumanya kuti Yehova wakukondwa nawo ŵanthu ŵake wose nga ni gulu. Baibolo likuti: “Yehova wakukondwa na ŵanthu ŵake.” (Sal. 149:4) Ndipouli, nyengo zinyake ŵanyake ŵangamba kukayika na kujifumba kuti, ‘Kasi Yehova wakukondwa nane panekha?’ Ŵateŵeti ŵa Yehova ŵanandi ŵakugomezgeka mu nyengo yakale, nyengo zinyake vikaŵasuzganga kugomezga usange Yehova wakukondwa nawo nadi.—1 Sam. 1:​6-10; Yobu 29:​2, 4; Sal. 51:11.

2. Kasi Yehova wakukondwa na ŵanthu wuli?

² Baibolo likulongora kuti ŵanthu ŵambura kufikapo nawo, Yehova wangakondwa nawo. Ipo kasi tikwenera kuchita wuli? Tikwenera kuŵa na chipulikano mwa Yesu Khristu na kubatizika. (Yoh. 3:16) Para tachita nthena, tikulongora ku ŵanji kuti talapa zakwananga zithu na kumulayizga Chiuta kuti tichitenge khumbo lake. (Mil. 2:38; 3:19) Yehova wakukondwa para tikuchita nthena mwakuti tiŵe nayo paubwezi. Para tikuchita vyose ivyo tingafiska na kulutilira kusungilira layizgo lithu lakuti timuteŵeterenge, Yehova wakukondwa nase na kutiwona kuti ndise ŵabwezi ŵake ŵa pamtima.—Sal. 25:14.

3. Kasi tidumbiskanenge mafumbo wuli?

³ Kweni chifukwa wuli nyengo zinyake ŵanyake ŵakuwona kuti Chiuta wakukondwa nawo yayi? Kasi Yehova wakulongora wuli kuti wakukondwa nase? Ndipo kasi Mkhristu wangachita wuli kuti waŵe na chigomezgo chose kuti Chiuta wakukondwa nayo?

CHIFUKWA ICHO ŴANYAKE ŴAKUWONERA KUTI YEHOVA WAKUKONDWA NAWO YAYI

4-5. Nanga vingaŵa kuti tikujiwona ŵambura kuzirwa, kasi tikwenera kugomezga kuti vichi?

⁴ Taŵanandi kufuma waka pa wanichi tikusuzgika na maghanoghano gha kujiwona kuti ndise ŵambura kuzirwa. (Sal. 88:15) Mubali munyake zina lake Adrián wakuti: “Nyengo zose nkhujiwona wawakawaka. Apo nkhaŵa msepuka, nkhukumbuka kuti nkhalomberanga mbumba yakwithu kuti yizakanjire mu Paradiso,  nangauli ine nkhajiwonanga kuti ndine wakwenelera yayi kuŵa mu Paradiso.” Tony, uyo wakakulira mu mbumba ya Ŵakaboni yayi, wakuti: “Ŵapapi ŵane ŵakaniphalirapo yayi kuti ŵakunitemwa panji ŵakunotha nane. Ivi vikanipangiska kujiwona kuti chilichose icho ningachita chingaŵakondweskapo yayi.”

⁵ Usange nyengo zinyake tikujiwona kuti ndise ŵambura kuzirwa, tikwenera kukumbuka kuti Yehova ndiyo wakatiguzira kwa iyo. (Yoh. 6:44) Iyo wakuwona viwemi mwa ise, ivyo ise taŵeneko tikuviwona yayi, ndipo wakumanya makora mtima withu. (1 Sam. 16:7; 2 Mid. 6:30) Ntheura tingakayikiranga yayi para wakuyowoya kuti ndise ŵakuzirwa kwa iyo.—1 Yoh. 3:​19, 20.

6. Kasi mpositole Paulosi wakajipulikanga wuli chifukwa cha maubudi agho wakachita kumasinda?

⁶ Pambere tindasambire unenesko, taŵanyake tikachita vinthu ivyo panji tichali kujiyimba navyo mulandu m’paka sono. (1 Pet. 4:3) Nanga Mbakhristu ŵakugomezgeka nawo ŵachali kusuzgika na tumaubudi tunyake. Imwe ke? Kasi nyengo zinyake mukuwona kuti Yehova wangamugowokerani yayi? Usange ni nthena, manyani kuti ŵateŵeti ŵa Yehova ŵanyake nawo ŵakasuzgikapo na maghanoghano ghakuyana waka. Mwachiyelezgero, mpositole Paulosi wakajiwonanga kuti ngwakusokwa para wakughanaghanira vya maubudi ghake. (Rom. 7:​24, Baibolo la Malemba Ghakupatulika mu Mang’anamuliro gha Charu Chiphya Mateyu—Uvumbuzi) Mbunenesko kuti Paulosi apa wakaŵa kuti walapa kale zakwananga zake na kubatizika. Ndipouli, iyo wakati ni “muchoko chomene pa ŵapositole” wose kweniso “wakwananga chomene.”—1 Kor. 15:9; 1 Tim. 1:15.

7. Kasi tikwenera kukumbuka vichi pa nkhani ya maubudi agho tikachita kumasinda?

⁷ Adada ŵithu ŵakuchanya ŵakulayizga kuti ŵatigowokerenge para talapa. (Sal. 86:5) Ntheura usange talapa nadi zakwananga izo tikachita, tikwenera kuŵa na chigomezgo chose kuti Yehova watigowokera nga umo iyo wakuyowoyera.—Kol. 2:13.

8-9. Kasi tingachita wuli kuti titonde maghanoghano ghakuti palije icho tingachita kuti Yehova wakondwe nase?

⁸ Tose tikukhumba kuchita vinandi pakuteŵetera Yehova. Ndipouli, ŵanyake ŵakuwona kuti palije icho ŵangachita kuti Yehova wakondwe nawo. Mudumbu munyake zina lake Amanda wakuti: “Kanandi nkhughanaghana kuti kumupa viwemi chomene Yehova chikung’anamura kuti nyengo zose nichitenge vinandi. Ntheura kanandi nkhuyezgayezga kuti nichitenge vinandi kuluska ivyo ningafiska. Para vyanitonda nkhukhuŵara, ndipo nkhwamba kuwona kuti Yehova nayo wakhuŵara nane ndipo wangakondwaso nane yayi.”

⁹ Kasi tingachita wuli kuti titonde maghanoghano ghakuti palije icho tingachita kuti Yehova wakondwe nase? Tikumbuke kuti Yehova wakutipulikiska ndipo wakukhwimiska vinthu yayi. Iyo wakukhazga vinandi kuluska ivyo tingafiska yayi. Wakuzirwiska vyose ivyo tikumuchitira chikuru tikuchita vyose ivyo tingafiska. Ghanaghaniraniso viyelezgero vya ŵanthu ŵakuzunulika mu Baibolo awo ŵakateŵetera Yehova na mtima wose. Mwachiyelezgero, ghanaghanirani vya Paulosi. Wakateŵetera mwamwamphu kwa vyaka vinandi, kwenda mitunda yitali na kwambiska mipingo yinandi. Kweni apo vinthu vikasintha pa umoyo wake ndipo wakaleka kuchita vinandi pa mulimo wakupharazga, kasi ndikuti Chiuta wakaleka kukondwa nayo? Yayi. Iyo wakalutilira kuchita ivyo wangafiska, ndipo Yehova wakamutumbika. (Mil. 28:​30, 31) Mwakuyana waka, nyengo zinyake ivyo tikumupa Yehova vingasintha. Kweni chakuzirwa chomene kwa iyo, ntchilato icho tikumuteŵetelera. Tiyeni sono tiwone nthowa zinyake izo Yehova wakulongolera kuti wakukondwa nase.

KASI YEHOVA WAKULONGORA WULI KUTI WAKUKONDWA NASE?

10. Kasi tingachita wuli kuti “tipulike” Yehova wakutiphalira kuti wakukondwa nase? (Yohane 16:27)

¹⁰ Kwizira mu Baibolo. Yehova wakusanga nthowa zakulongolera ŵanthu ŵake kuti wakuŵatemwa kweniso wakukondwa nawo. Malemba  ghakulongora nyengo ziŵiri apo Yehova wakaphalira Yesu kuti ni Mwana wake wakutemweka, uyo wakukondwa nayo. (Mat. 3:17; 17:5) Kasi mungatemwa kuti Yehova wamuphalirani yekha kuti wakukondwa namwe? Yehova wakuyowoya nase maso na maso yayi, kweni wakuyowoya nase kwizira mu Mazgu ghake. Para tikuŵazga mazgu gha Yesu agho ghali mu mabuku gha Makani Ghawemi, vikuŵa nga ‘tikupulika’ Yehova wakuyowoya kuti wakukondwa nase. (Ŵazgani Yohane 16:27.) Yesu wakayezga mikhaliro ya Awiske mwakufikapo. Ntheura usange tikuŵazga vyakuti Yesu wakakondwanga nawo ŵasambiri ŵake ŵakugomezgeka nangauli nawo ŵakaŵa ŵambura kufikapo, vikuŵa nga tikupulika Yehova wakuyowoya mazgu ghakuyana waka kwa ise.—Yoh. 15:​9, 15.

11. Chifukwa wuli tingati para tikusangana na masuzgo ndikuti Yehova waleka kukondwa nase yayi? (Yakobe 1:12)

¹¹ Kwizira mu ivyo wakutichitira. Yehova ngwakukhumbisiska kutovwira, mwachiyelezgero wakutipa ivyo tikukhumbikwira pa umoyo. Nyengo zinyake Yehova wangazomerezga kuti tisangane na masuzgo ghakuru, nga umo vikaŵira na munthu murunji Yobu. (Yobu 1:​8-11) Kweni para tikukumana na viyezgo, ndikuti Chiuta waleka kukondwa nase yayi. M’malo mwake, viyezgo vikutipa mwaŵi wakulongolera kuti tikumutemwa chomene Chiuta kweniso kuti tikumugomezga. (Ŵazgani Yakobe 1:12.) Ndipo apo tikukumana na viyezgo, tijiwonerenge tekha umo wakutitemwera kweniso kutovwilira kuti tizizipizge.

12. Kasi tingasambirako vichi ku ivyo vikachitikira Dmitrii?

¹² Wonani ivyo vikachitikira mubali munyake wa ku Asia zina lake Dmitrii. Ntchito yikamumalira ndipo wakasangaso yinyake yayi kwa myezi yinandi. Ntheura wakawona kuti wasazgireko nyengo yakupharazgira kuti walongore kuti wakumugomezga Yehova. Myezi yinandi yikajumphapo, kweni ntchito wakayisanganga yayi. Pamanyuma mbwenu wakamba kulwara chomene ndipo wakawukanga yayi pa bedi. Wakamba kukayikira usange wachali mfumu panji dada muwemi, kweniso wakakayikiranga usange Yehova wachali kukondwa nayo. Mise yinyake, mwana wake msungwana wakalemba pa pepara mazgu gha pa Yesaya 30:​15, agho ghakuti: “Musangenge nkhongono chifukwa cha kukhala mwakufwasa na kugomezga.” Wakiza nalo pepara ili pa bedi pawo na kuyowoya kuti, “Adada, para mwamba kujiwona mwambura kwenelera, mukumbukenge lemba ili.” Dmitrii wakakumbuka kuti  mbumba yake yichali na chakurya chakukwana, vyakuvwara kweniso pakukhala chifukwa cha Yehova. Iyo wakuti: “Icho nkhakhumbikwiranga kuchita, nkhulutilira kukhala mwakufwasa na kugomezga Chiuta.” Usange namwe mukukumana na masuzgo ghakuyana waka, gomezgani kuti Yehova wakuŵikako mahara kwa imwe ndipo wamovwiraninge kuzizipizga.

13. Kasi Yehova wangagwiliskira ntchito anjani kuti walongore kuti wakukondwa nase, ndipo munthowa wuli?

¹³ Kwizira mu ŵasopi ŵanyithu. Yehova wakugwiliskira ntchito ŵabali na ŵadumbu kuti walongore kuti wakukondwa nase. Mwachiyelezgero, wangaŵagwiliskira ntchito kuti ŵatikhozge pa nyengo yakwenelera. Ivi ndivyo vikachitikira mudumbu munyake ku Asia, uyo wakasuzgikanga maghanoghano. Ntchito yikamumalira ndipo wakalwara chomene. Pamanyuma mfumu wake wakachita kwananga kukuru ndipo wakalekeskeka ulara. Iyo wakati: “Nkhapulikiskanga yayi chifukwa icho ivi vikachitikiranga ine. Nkhamba kughanaghana kuti panyake nachita chinthu chinyake chiheni ndipo Yehova waleka kukondwa nane.” Mudumbu withu wakaŵeyelera Yehova kuti wamusimikizgire kuti wachali kukondwa nayo. Kasi wakamusimikizgira wuli? Iyo wakuti: “Ŵalara mu mpingo ŵakayowoya nane na kunisimikizgira kuti Yehova wachali kunitemwa.” Pamanyuma, mudumbu uyu wakalombaso Yehova kuti wamusimikizgireso. Iyo wakuti: “Zuŵa lenelilo nkhapokera kalata yakufuma ku ŵabali na ŵadumbu ŵanyake mu mpingo. Nkhati naŵazga kalata yakukhozga iyi, nkhawona kuti Yehova wanipulika.” Nadi, kanandi Yehova wakulongora kuti wakukondwa nase kwizira mu mazgu ghakukhozga ghakufuma ku ŵabali na ŵadumbu.—Sal. 10:17.

14. Kasi ni nthowa wuli yinyake iyo Yehova wakulongolera kuti wakukondwa nase?

¹⁴ Yehova wakulongoraso kuti wakukondwa nase mwa kutipa ulongozgi uwo tikukhumbikwira kwizira mu Ŵakhristu ŵanyithu. Mwachiyelezgero, mu nyengo yakale, Yehova wakagwiliskira  ntchito mpositole Paulosi kuti walembe makalata 14 ghakuluta ku Ŵakhristu ŵanyake. Mu makalata agha mukaŵa ulongozgi wankhongono kweni wachitemwa. Chifukwa wuli Yehova wakakhuŵilizga Paulosi kulemba ulongozgi uwu? Yehova ni Dada muwemi, ndipo wakulanga ŵana ŵake awo ‘wakukondwa nawo.’ (Zinth. 3:​11, 12) Ntheura para tapika ulongozgi wa mu Baibolo, tikwenera kuwona kuti mbukaboni wakuti Chiuta wakukondwa nase, kuti watitaya yayi. (Heb. 12:6) Kasi pali ukaboni wuli unyake wakulongora kuti Yehova wakukondwa nase?

UKABONI UNYAKE WAKULONGORA KUTI YEHOVA WAKUKONDWA NASE

15. Kasi Yehova wakupeleka kwa anjani mzimu wake, ndipo chifukwa wuli ivi vingatipa chigomezgo chakuti wakukondwa nase?

¹⁵ Yehova wakupeleka mzimu wake utuŵa ku awo wakukondwa nawo. (Mat. 12:18) Tingajifumba kuti, ‘Kasi nili kulongorapo chipambi cha mzimu wa Chiuta pa umoyo wane?’ Kasi sono mukuwona kuti ndimwe ŵakuzikira chomene kuluska apo mukaŵa mundamumanye Yehova? Nakuti para mukulongora chomene vipambi vya mzimu wa Chiuta, muŵengeso na ukaboni wakukwana wakuti Yehova wakukondwa namwe.—Wonani bokosi lakuti “ Vipambi vya Mzimu Ni . . . ”

16. Kasi Yehova wakugwiliskira ntchito anjani kupharazga makani ghawemi, ndipo ivi vikumupangiskani kuti mujipulikenge wuli? (1 Ŵatesalonika 2:4)

¹⁶ Yehova wapeleka ntchito ya kupharazga makani ghawemi ku awo wakukondwa nawo. (Ŵazgani 1 Ŵatesalonika 2:4.) Wonani umo mudumbu munyake zina lake Jocelyn wakasangira chandulo chifukwa cha kuphalirako ŵanji makani ghawemi. Zuŵa linyake Jocelyn wati wawuka waka, wakasuzgika chomene maghanoghano. Iyo wakuti: “Nkhaŵavyirathu nkhongono ndipo nkhajiwonanga wawakawaka. Kweni nkhaŵa mupayiniya ndipo pa zuŵa ili nkhanjiranga mu upharazgi. Ntheura nkhalomba na kunjira mu upharazgi.” Mulenji wura, Jocelyn wakasangana na mwanakazi munyake zina lake Mary, uyo wakaŵa walusungu ndipo wakazomera sambiro la Baibolo. Pati pajumpha myezi, Mary wakayowoya kuti apo Jocelyn wakafikanga pa nyumba yake, iyo wakaŵa kuti wakulomba kwa Chiuta kuti wamovwire. Para wakughanaghanira chakuchitika ichi, Jocelyn wakuti, “Nkhajipulika nga kuti Yehova wakuniphalira kuti, ‘Nkhukondwa nawe.’” Mbunenesko kuti ni waliyose yayi uyo wazomerenge uthenga uwo tikupharazga. Kweni tingakayikiranga yayi kuti Yehova wakukondwa nase usange tikuchita vyose ivyo tingafiska kuti tiphalireko ŵanji makani ghawemi.

17. Kasi mukusambirako vichi ku ivyo Vicky wakayowoya pa nkhani ya sembe yakuwombora? (Salimo 5:12)

 ¹⁷ Yehova wakugwiliskira ntchito chiwombolero kuti chovwire ŵanthu awo wakukondwa nawo. (1 Tim. 2:​5, 6) Kweni wuli usange tikukayikira nipera kuti Yehova wakukondwa nase, nangauli tili na chipulikano mu sembe yakuwombora kweniso tili kubatizika? Kumbukani kuti ni nyengo zose yayi apo tikwenera kugomezga ivyo mtima withu ukutiphalira, kweni tikwenera kugomezga Yehova. Iyo wakuwona wose awo ŵali na chipulikano mu sembe yakuwombora kuti mbarunji mu maso ghake ndipo wakulayizga kuti waŵatumbikenge. (Ŵazgani Salimo 5:12; Rom. 3:26) Mudumbu munyake zina lake Vicky wakasanga chandulo chomene chifukwa cha kughanaghanirapo pa sembe yakuwombora. Zuŵa linyake, pamanyuma pakuti waghanaghanirapo chomene pa sembe yakuwombora, wakati: “Yehova wazikira nane nyengo yitali. . . . Ntheura kumanyuma kose uku apo nkhakayikiranga, vikaŵa nga nkhumuphalira Yehova kuti: ‘Mukunitemwa zanadi yayi. Sembe ya Mwana winu njakukwana yayi kubenekelera zakwananga zane.’” Chifukwa cha kughanaghanirapo pa chawanangwa cha sembe yakuwombora, mudumbu uyu wakamba kujipulika kuti Yehova wakumutemwa. Nase usange tikughanaghanirapo chomene pa sembe yakuwombora, tijipulikenge kuti Yehova wakutitemwa kweniso kukondwa nase.

18. Kasi para tikulutilira kutemwa Adada ŵithu ŵakuchanya, tingaŵa na chigomezgo wuli?

¹⁸ Nangauli tingaŵikapo mtima kulondezga masachizgo agho tadumbiskana mu nkhani iyi, kweni nyengo zinyake tingagongoweskeka na kwamba kukayikira usange Yehova wakukondwa nase. Para vyanthena vyachitika, kumbukani kuti Yehova wakukondwa na “awo ŵakulutilira kumutemwa.” (Yak. 1:12) Ntheura lutilirani kusendelera kwa Yehova na kusanga nthowa izo wakulongolera kuti wakukondwa namwe. Nyengo zose mukumbukenge fundo yakuti Yehova “wali kutali yayi na waliyose wa ise.”—Mil. 17:27.