1-2. Kasi munthu wakwenera kuchita vichi pambere wandabatizike?

 MU VYAKA 5 ivyo vyajumpha, ŵanthu ŵakujumpha 1 miliyoni ŵali kubatizika na kuŵa Ŵakaboni ŵa Yehova. Nga umo vikaŵira na Timote, ŵanandi mwa iwo ŵakasambizgika unenesko “kufuma pa ubonda.” (2 Tim. 3:​14, 15) Ŵanyake ŵakasambira vyakukhwaskana na Yehova apo mbalara kale, ndipo ŵanyake ku uchekuru. Mwachiyelezgero, mwanakazi munyake uyo wakasambiranga Baibolo na Ŵakaboni ŵa Yehova wakabatizika na vyaka 97!

² Usange ndimwe msambiri wa Baibolo panji mukulereka na ŵapapi awo Mbakaboni, kasi mukughanaghana vya kubatizika? Para ni nthena, muli na chilato chiwemi chomene. Kweni pambere mundabatizike, mukwenera kujipeleka dankha kwa Yehova. Nkhani iyi yikulongosora ng’anamuro la kujipeleka. Yimovwiraningiso kumanya kuti palije chifukwa cha kopera panji kuziwulika kujipeleka na kubatizika usange muli ŵakunozgeka kuchita nthena.

KASI KUJIPELEKA NI VICHI?

3. Yowoyani viyelezgero vya ŵanthu awo ŵakuzunulika mu Baibolo awo ŵakajipeleka kwa Yehova.

³ Mu Baibolo, kujipeleka chikung’anamura kusoleka kuti uchite uteŵeti unyake wapadera. Ŵaisrayeli ukaŵa mtundu wakujipeleka kwa Yehova. Kweni ŵanyake mu mtundu uwu ŵakajipeleka kwa Yehova munthowa yapadera. Mwachiyelezgero, Aroni wakavwaranga “chimanyikwiro chakupatulika cha kujipatulira”—kachisulo kakunyezimira kagolide panthazi pa nduŵira yake. Kachisulo aka kakalongoranga kuti wakasoleka kuti wateŵetere  Yehova munthowa yapadera, kuti waŵenge wasembe mukuru wa Israyeli. (Lev. 8:9) Ŵanaziri nawo ŵakajipeleka kwa Yehova munthowa yapadera. Lizgu lakuti “Munaziri,” ilo lili kufuma ku lizgu la Chihebere lakuti nazirʹ, likung’anamura “Wakupatulika,” panji “Wakupelekeka.” Ŵanaziri ŵakeneranga kupulikira malango ghapadera agho ghakaŵa mu Dango la Mozesi.—Maŵa. 6:​2-8.

4. (a) Usange mwajipeleka kwa Yehova, kasi ndikuti mwasankha kuchita vichi? (b) Kasi ‘kujipata’ chikung’anamurachi? (Wonaniso chithuzi.)

⁴ Usange mwajipeleka kwa Yehova, ndikuti mwasankha kuŵa msambiri wa Yesu Khristu, kweniso kuti kuchita khumbo la Chiuta ndiko kuŵenge kwakuzirwa chomene pa umoyo winu. Kasi kujipeleka kwinu kukusazgapo vichi? Yesu wakati: “Usange munthu wakukhumba kunilondezga, wajipate.” (Mat. 16:24) Lizgu la Chigiriki ilo lili kung’anamulika kuti ‘kujipata’ lingang’anamulikaso kuti “kujikana” panji kuti “kuleka kujikhalira wekha.” Pakuŵa ŵateŵeti ŵakujipeleka kwa Yehova, mukwenera kukana chilichose icho chikususkana na khumbo lake. (2 Kor. 5:​14, 15) Ivi vikusazgapo kukana “milimo ya thupi,” nga uzaghali. (Gal. 5:​19-21; 1 Kor. 6:18) Kasi mukuwona kuti kulondezga malango agha nkhwakufyenya? Usange mukumutemwa Yehova kweniso kukhorwa kuti malango ghake ngakovwira nyengo zose, muwonenge kuti nkhwakufyenya yayi. (Sal. 119:97; Yes. 48:​17, 18) Mubali munyake zina lake Nicholas wakayowoya kuti: “Tingawona fundo zapachanya za Yehova nga ni mphingilizgo za selo izo zikutitondeska kuchita chilichose icho takhumba, panji nga ni mphingilizgo za umo ŵakusunga nkhalamu izo zikutivikilira ku vikoko ivi.”

5. (a) Kasi munthu wakuchita vichi kuti wajipeleke kwa Yehova? (b) Kasi pali mphambano wuli pakati pa kujipeleka na kubatizika? (Wonaniso chithuzi.)

⁵ Kasi munthu wakuchita vichi kuti wajipeleke kwa Yehova? Wakumulayizga Yehova mu lurombo kuti wasopenge iyo pera kweniso wadangizgenge khumbo la Chiuta mu umoyo wake. Ichi  chikung’anamura kuti wakumulayizga Yehova kuti walutilirenge kumutemwa ‘na mtima wake wose na umoyo wake wose na maghanoghano ghake ghose na nkhongono zake zose.’ (Mrk. 12:30) Munthu wakujipeleka kwa Yehova kwayekha. Apo ubatizo ukuŵa wapakweru, ndipo vikovwira awo ŵakuwonelera kumanya kuti muli kujipeleka kale kwa Yehova. Manyani kuti para mwajipeleka kwa Yehova ndikuti mwachita chilapo, ndipo mukwenera kuyezgayezga kuchifiska chifukwa ndivyo Yehova wakukhazga.—Muph. 5:​4, 5.

CHIFUKWA WULI MUKWENERA KUJIPELEKA KWA YEHOVA?

6. Kasi ntchivichi chikutuma munthu kuti wajipeleke kwa Yehova?

⁶ Chifukwa chikuru icho mukwenera kujipelekera kwa Yehova ntchakuti mukumutemwa. Chitemwa chinu chikuthemba pa umo mukujipulikira waka yayi. Kweni chikujintha pa ‘kumumanya makora Chiuta’ kweniso “kupulikiska vinthu vyamzimu.” Vinthu ivi ni ivyo muli kusambira vyakukhwaskana na Yehova, ivyo vikupangiska kuti ubwezi winu na iyo wambe kukura. (Kol. 1:9) Chifukwa cha kusambira Baibolo, mwakhorwa kuti (1) Yehova ngwanadi, (2) Baibolo ni Mazgu ghake, ndipo (3) wakugwiliskira ntchito gulu lake kuti wafiske khumbo lake.

7. Kasi ni vinthu wuli ivyo munthu wakwenera kulutilira kuchita pambere wandajipeleke kwa Chiuta?

⁷ Awo ŵajipeleka kwa Yehova ŵakwenera kumanya visambizgo vyakwambilira vya Baibolo kweniso kulondezga fundo za Chiuta pa umoyo wawo. Ŵakuyezgayezga kuphalirako ŵanyawo ivyo ŵasambira mu Baibolo. (Mat. 28:​19, 20) Ŵakwamba kumutemwa chomene Yehova, ndipo ŵakuŵa ŵakukhumbisiska kusopa iyo pera.  Kasi ndimo viliriso kwa imwe? Para ni nthena, mujipelekenge na kubatizika kuti mukondweske waka uyo mukusambira nayo Baibolo yayi panji ŵapapi ŵinu; nesi chifukwa waka chakuti ndivyo ŵanyinu ŵakuchita.

8. Kasi kuwonga kungamovwirani wuli kuti musankhe kujipeleka kwa Yehova? (Salimo 116:​12-14)

⁸ Para mukughanaghanirapo pa viwemi vyose ivyo Yehova wamuchitirani, muŵenge ŵakukhumbisiska kujipeleka kwa iyo. (Ŵazgani Salimo 116:​12-14.) Baibolo likuti “chawanangwa chilichose chiwemi na chawanangwa chilichose chakufikapo” chikufuma kwa Yehova. (Yak. 1:17) Kweni chawanangwa chapadera chomene pa vyose, ni sembe yakuwombora ya Mwana wake, Yesu. Ghanaghanirani kuzirwa kwa sembe iyi. Yatipa mwaŵi wakuŵa paubwezi wakukhora na Yehova kweniso kuti tizakasange umoyo wamuyirayira. (1 Yoh. 4:​9, 10, 19) Kujipeleka kwa Yehova ni nthowa yiwemi chomene iyo mungalongolera kuti mukuwonga chitemwa chikuru chomene icho Yehova wali kumulongorani, kusazgapo na vyawanangwa vyose ivyo wamupani. (Doto. 16:17; 2 Kor. 5:15) Nthowa iyi yalongosorekaso makora mu sambiro 46 fundo 4, mu buku la Mungakondwa na Umoyo Kwamuyirayira!, kusazgapo vidiyo ya maminiti ghatatu ya mutu wakuti, Kupeleka Vyawanangwa Vithu kwa Chiuta.

KASI NDIMWE ŴAKUNOZGEKA KUJIPELEKA NA KUBATIZIKA?

9. Chifukwa wuli munthu wakwenera kuchichizgika yayi kuti wajipeleke kwa Yehova?

⁹ Nyengo zinyake mungawona kuti ndimwe ŵakunozgeka yayi kujipeleka na kubatizika. Panji mungawona kuti mukukhumbikwira kusintha vinthu vinyake pa umoyo winu kuti mumukondweskenge Yehova, kweniso panji mukukhumbikwira nyengo yinandi kuti mukhozge chipulikano chinu. (Kol. 2:​6, 7) Lekani kughanaghana kuti ŵasambiri wose ŵakukura mwauzimu mwakuyana, kweniso ni ŵachinyamata wose yayi awo ŵakuŵa ŵakunozgeka kujipeleka na kubatizika pa msinkhu wakuyana. Manyani ivyo mukwenera kusintha, ndipo pamanyuma chitanipo kanthu kwambura kujiyaniska na ŵanyinu.—Gal. 6:​4, 5.

10. Kasi mungachita wuli para mukuwona kuti ndimwe ŵakunozgeka yayi kujipeleka na kubatizika? (Wonaniso bokosi lakuti “ Awo Ŵali Kukulira mu Unenesko.”)

¹⁰ Lutilirani kuŵikapo mtima kuti mufiske chilato chinu cha kujipeleka kwa Yehova nanga vingaŵa kuti pasono mukuwona kuti mundanozgeke kuchita nthena. Mulombani Yehova kuti wamovwirani kusintha apo mphakukhumbikwa. (Fil. 2:13; 3:16) Gomezgani kuti Yehova wapulikenge lurombo lwinu na kumovwirani.—1 Yoh. 5:14.

CHIFUKWA WULI ŴANYAKE ŴAKUZIWULIKA KUJIPELEKA NA KUBATIZIKA?

11. Kasi Yehova watovwirenge wuli kuti tilutilire kugomezgeka kwa iyo?

¹¹ Ŵanyake ŵakuziwulika kujipeleka kwa Yehova na kubatizika nangauli mbakunozgeka. Nyengo zinyake ŵakopa kuti para ŵazakabatizika, ŵangazakachita kwananga kukuru na kusezgeka. Para namwe mukopa, manyani kuti Yehova wamupaninge chilichose icho mukukhumbikwira “kuti mwendenge mwakwenelera [iyo] na kumukondweska pa chilichose.” (Kol. 1:10) Wamupaningiso nkhongono kuti muchite icho ntchiwemi. Iyo wawovwirapo kale ŵanandi kuchita icho ntchiwemi ndipo namwe wamovwiraninge. (1 Kor. 10:13) Lekani mbanthu ŵachoko chomene awo ŵakusezgeka mu mpingo Wachikhristu. Yehova wakovwira ŵanthu ŵake kulutilira kugomezgeka.

12. Kasi tingachita wuli kuti tigege kwananga kukuru?

¹² Pakuŵa ŵanthu ŵambura kufikapo, waliyose wakuyezgeka kuti wachite chiheni. (Yak. 1:14) Ndipouli, mukwenera kusankha icho muchitenge para mwayezgeka. Fundo njakuti imwe  ndimwe muli na mazaza gha kusankha umo muchitirenge na umoyo winu. Nangauli ŵanthu ŵanyake ŵakuwona kuti ŵangakwaniska yayi kukanizga makhumbiro ghaheni, kweni uwu mbutesi. Mungasambira kukanizga makhumbiro ghaheni. Nanga mungayezgeka, mungagega kuchita chiheni. Ntheura mulombenge nyengo zose. Musambirenge Mazgu gha Chiuta mwakukhazikika. Muwunganenge nyengo zose. Muphalirengeko ŵanji ivyo mukusambira. Kuchita ivi nyengo zose, kumovwiraninge kuti musange nkhongono izo mukukhumbikwira kuti mulutilire kugomezgeka kwa Yehova. Ndipo mungaluwanga yayi kuti Yehova wamovwiraninge kuti mufiske kuchita nthena.—Gal. 5:16.

13. Kasi Yosefe wali kutilekera chiyelezgero wuli chiwemi?

¹³ Chizamuŵa chipusu kulutilira kugomezgeka kwa Yehova para mwamanyirathu umo muzamuchitira para mwakumana na chiyezgo. Baibolo likutiphalira ŵanthu ŵanandi awo ŵakachita nthena, nangauli nawo ŵakaŵa ŵambura kufikapo. Mwachiyelezgero, muwoli wa Potifara wakanyengelera Yosefe mwakuwerezgawerezga kuti wagone nayo. Kweni Yosefe wakamanyirathu ivyo wangachita. Baibolo likutiphalira kuti “wakakana,” ndipo wakati: “Ningachitirachi uheni ukuru uwu na kunangira Chiuta?” (Gen. 39:​8-10) Ntchakuwonekerathu kuti Yosefe wakamanyirathu umo wangachitira pambere wandayezgeke. Ivi vikamovwira kuti chiŵe chipusu kuchita icho ntchiwemi wati wayezgeka.

14. Kasi tingachita wuli kuti tileke kuthera para tayezgeka?

¹⁴ Kasi namwe mungamuyezga wuli Yosefe pa nkhani iyi? Mukwenera kusankhirathu sono ivyo muzamuchita para mwayezgeka. Sambirani kukana nyengo yeneyiyo vinthu ivyo Yehova wakutinkha na kuleka kuzomerezga kuti vikhazikike mu maghanoghano ghinu. (Sal. 97:10; 119:165) Kuchita nthena kuzamumovwirani kuti muleke kuchita kwananga para mwayezgeka. Muzamuŵa kuti mukumanya kale icho mungachita ndipo muzamusankha vinthu mwamahara.

15. Kasi munthu wangalongora wuli kuti ‘wakupenja Yehova na mtima wose’? (Ŵahebere 11:6)

¹⁵ Panji mukumanya kuti muli kusanga unenesko, ndipo mukukhumba kuteŵetera Yehova na mtima wose, kweni pali chinyake icho chikumupangiskani kuti muziwulikenge kujipeleka kwa Yehova na kubatizika. Para ni nthena, yezgani Themba Davide. Mulombani Yehova kuti: “Nisandani, A Chiuta, na kumanya mtima wane.  Nipimani, na kumanya vyenjezgo vya mu maghanoghano ghane. Wonani usange panji mungaŵa kendero kakupweteka mwa ine, ndipo nilongozgerani mu nthowa ya muyirayira.” (Sal. 139:​23, 24) Yehova wakutumbika awo “ŵakumupenja na mtima wose.” Para namwe mukuchitapo kanthu kuti mufiske chilato chinu cha kujipeleka na kubatizika, mukulongora kuti mukumupenja na mtima wose.—Ŵazgani Ŵahebere 11:6.

LUTILIRANI KUSENDELERA KWA YEHOVA

16-17. Kasi Yehova wakuguza wuli awo ŵakulira mu unenesko? (Yohane 6:44)

¹⁶ Yesu wakayowoya kuti msambiri wake waliyose Yehova ndiyo wali kumuguza. (Ŵazgani Yohane 6:44.) Ghanaghanirani waka umo fundo iyi yikumukhwaskirani kweniso ivyo yikung’anamura. Yehova wakuwonamo viwemi mwa munthu waliyose uyo wamuguzira kwa iyo. Kweniso wakuwona waliyose payekha kuŵa “chuma chake chapadera,” panji kuti ‘katundu wake wakuzirwa.’ (Doto. 7:6) Ndimo wakuwoneraso na imwe wuwo.

¹⁷ Panji ndimwe muwukirano uyo wakulira mu unenesko. Nyengo zinyake mungamba kuwona kuti mukuteŵetera Yehova chifukwa chakuti ŵapapi ŵinu ndivyo ŵakuchita ndipo Yehova wakamuguzani yayi imwe pamwekha. Ndipouli, Baibolo likuti: “Sendelerani kwa Chiuta, ndipo iyo wasendelerenge kwa imwe.” (Yak. 4:8; 1 Mid. 28:9) Para mwamba ndimwe kusendelera kwa Yehova, nayoso wasendelerenge kwa imwe. Manyani kuti Yehova wakumuwonani imwe pamwekha, nga ni gulu waka yayi. Iyo wakuguza munthu waliyose payekha kusazgapo na wose awo ŵakulira mu unenesko. Para munthu wanthena wachitapo kanthu kuti wasendelere kwa Yehova, Yehova nayo wakusendelera kwa iyo nga umo tanguwonera pa lemba la Yakobe 4:8.—Yaniskani na 2 Ŵatesalonika 2:13.

18. Kasi mu nkhani yakulondezgapo tizamudumbiskana vichi? (Salimo 40:8)

¹⁸ Para mwajipeleka kwa Yehova na kubatizika, mukulongora kuti mwayezga Yesu. Iyo wakajipeleka na mtima wose kwa Adada ŵake kuti wachite chilichose icho ŵakukhumba. (Ŵazgani Salimo 40:8; Heb. 10:7) Mu nkhani yakulondezgapo, tizamudumbiskana ivyo vingamovwirani kuti mulutilire kuteŵetera Yehova mwakugomezgeka pamanyuma pa kubatizika.