Tingagowokereka zakwananga zithu kwizira mu sembe yakuwombora pera iyo Yesu wakapeleka na ndopa zake. (Efe. 1:7) Ndipouli, Baibolo likuyowoya kuti: “Chiuta wakalongora kuzizipizga [ndipo] wakagowokeranga zakwananga izo zikachitika kale,” icho chikung’anamura kuti pambere Yesu wandapeleke sembe yakuwombora. (Rom. 3:25) Kasi Yehova wakagowokeranga wuli zakwananga pambere sembe yakuwombora yindapelekeke, panyengo yimozamoza na kuŵaso Chiuta waurunji?

Mu maso mwa Yehova, sembe yakuwombora yikaŵa nga yapelekeka kale kufuma waka apo wakayowoyera kuti wapelekenge “mphapu” iyo yizamuwombora ŵanthu. (Gen. 3:15; 22:18) Chiuta wakaŵa na chigomezgo chose kuti pa nyengo yake yakutemeka, Mwana wake wapadera wazamukhumbisiska kupeleka sembe yakuwombora. (Gal. 4:4; Heb. 10:​7-10) Apo Yesu wakaŵa pa charu chapasi, Yehova wakamupa mazaza gha kugowokera zakwananga pambere sembe yakuwombora yindapelekeke. Yesu wakagowokeranga zakwananga chifukwa wakamanyanga kuti sembe iyo wapelekenge yizamubenekelera zakwananga za ŵanthu awo ŵakaŵa na chipulikano.—Mat. 9:​2-6.